இவ்வருடம் புனித ஹஜ் கடமையை நிறைவேற்றிய ஹஜ் யாத்திரிகர்கள் சிலர் ஹஜ் முகவர் நிலையங்களுக்கு எதிராக சமர்ப்பித்த முறைப்பாடுகளை விசாரணை செய்த ஹஜ் முறைப்பாட்டு விசாரணைக்கு குழு தனது அறிக்கையை எதிர்வரும் 20 ஆம் திகதி அரச ஹஜ் குழுவிடம் கையளிக்கவுள்ளது.
11 ஹஜ் முகவர்களுக்கு எதிராக 13 ஹஜ் முறைப்பாடுகள் கிடைக்கப் பெறறிருந்ததாகவும் குறிப்பிட்ட ஹஜ் முகவர்கள் அழைக்கப்பட்டு விசாரணை நடத்தப்பட்டுள்ளதாகவும் ஹஜ் முறைப்பாட்டு விசாரணைக் குழுவின் செயலாளர் ரபீக் இஸ்மாயில் தெரிவித்தார்.
ஹஜ் முகவர் நிலையங்களுக்கு எதிராக கிடைக்கப்பெற்ற முறைப்பாடுகள் வகைப்படுத்தப்பட்டு விசாரணைக்குட்படுத்தப்பட்டதாகவும் ஊழல் மற்றும் குற்றங்கள் உறுதிப்படுத்தப்பட்ட முகவர்களுக்கு வழங்கப்பட வேண்டிய தண்டனைகளை ஹஜ் முறைப்பாட்டு விசாரணைக்குழு பதிந்துரை செய்துள்ளதாகவும் அவர் தெரிவித்தார்.
கடந்த வருடத்தில் சில ஹஜ் முகவர்களின் அனுமதிப்பத்திரம் ரத்துச் செய்யப்பட்டு தண்டனை வழங்கப்பட்டமை குறிப்பிடத்தக்கதாகும். ஹஜ் முறைப்பாடுகளை விசாரணை செய்வதற்கான விசாரணைக்குழு முஸ்லிம் சமய விவகார முன்னாள் அமைச்சர் எம்.எச்.ஏ. ஹலீமினால் நியமிக்கப்பட்டமை குறிப்பிடத்தக்கதாகும்.