ஐக்கிய தேசியக் கட்சியின் பிரதித் தலைவர் சஜித் பிரேமதாஸ தலைமையிலான கூட்டணியின் வேட்பாளர் தேர்வுக்குழுவில் முன்னாள் அமைச்சர்களான கபீர் ஹாஷிம் மற்றும் இம்தியாஸ் பாக்கிர் மாக்கார் ஆகியோர் உள்ளீர்க்கப்பட்டுள்ளனர்.
குழுவில் ஐக்கிய மக்கள் சக்தியின் செயலாளர் ரஞ்சித் மத்தும பண்டார, லக் ஷ்மன் கிரியெல்ல, மலிக் சமரவிக்ரம, தலதா அத்துகோரள, மங்கள சமரவீர, கபீர் ஹாஷிம், இம்தியாஸ் பாக்கிர் மாக்கார், ரவீந்திர சமரவீர, எரான் விக்ரமரத்ன உள்ளிட்ட மேலும் சிலரும் அங்கம் வகிக்கின்றனர்.
இக்குழு நேற்று முன்தினம் கூடி வேட்பாளர் தெரிவு தொடர்பிலான ஆரம்பகட்ட பேச்சுவார்த்தைகளில் ஈடுபட்டன.
பதினைந்தாவது பாராளுமன்றம் கடந்த திங்கட்கிழமை நள்ளிரவுடன் நான்கரை வருடங்களைக் கடந்த நிலையில் ஜனாதிபதி தனது அதிகாரத்தைப் பயன்படுத்தி பாராளுமன்றத்தை கலைத்துள்ளார்.
அதன்படி பதினாறாவது பாராளுமன்றத்துக்கான தேர்தல் ஏப்ரல் மாதம் 25 ஆம் திகதி நடைபெறவுள்ளதுடன், வேட்பு மனுத் தாக்கல்கள் இம்மாதம் 12 ஆம் திகதி முதல் 19 ஆம் திகதி நண்பகல் 12 மணிவரை இடம்பெறவுள்ளன. அத்துடன் பதினாறாவது பாராளுமன்றத்தின் முதலாவது சபை அமர்வு மே மாதம் 14 ஆம் திகதி நடைபெறவுள்ளமை குறிப்பிடத்தக்கது.-Vidivelli