ஈஸ்டர் தாக்குதல், முஸ்லிம்களுக்கு எதிரான வன்முறைகள்: குற்றவாளிகளை சர்வதேச பொறிமுறையின் கீழ் தண்டிக்குக
மத சுதந்திரம் தொடர்பான ஐ.நா. விசேட அறிக்கையாளர் அஹ்மட் ஷஹீத் இலங்கை அரசாங்கத்திற்கு பரிந்துரை
இலங்கையில் இடம்பெற்ற ஈஸ்டர் குண்டுத்தாக்குதல் மற்றும் முஸ்லிம்களுக்கு எதிரான வன்முறைச் சம்பவங்கள் தொடர்பில் உரிய விசாரணைகளை மேற்கொண்டு சர்வதேச மனித உரிமைகள் பொறிமுறைகளுக்கமைய குற்றவாளிகளுக்கு தண்டனை வழங்க வேண்டும்.
குறிப்பாக வன்முறைகளைத் தூண்டியவர்கள், ஈஸ்டர் குண்டுத்தாக்குதலுக்கு காரணமானோர் உட்பட சகல குற்றவாளிகளும் தண்டிக்கப்பட வேண்டும் என மத சுதந்திரம் தொடர்பான ஐக்கிய நாடுகள் சபையின் விசேட அறிக்கையாளர் அஹ்மட் ஷஹீத் தெரிவித்துள்ளார்.
கடந்த 2019 ஆகஸ்ட் 15 ஆம் திகதி முதல் 26 ஆம் திகதி வரை இலங்கைக்கு விஜயம் மேற்கொண்டு திரட்டிய தகவல்களை அடிப்படையாகக் கொண்டு ஜெனீவா மனித உரிமைகள் பேரவையின் 43 ஆவது அமர்வில் கடந்த மார்ச் 2 ஆம் திகதி முன்வைத்த அறிக்கையின் பரிந்துரைகளிலேயே அவர் இவ்வாறு குறிப்பிட்டுள்ளார்.
அதில் அவர் மேலும் குறிப்பிட்டுள்ளதாவது, இலங்கையில் போருக்குப் பின்னரான நிலைமாறு காலப்பகுதியில் சகல சமூகங்களுக்குமிடையே பாதுகாப்பற்ற சூழல் தோன்றியுள்ளதை அவதானிக்க முடிகிறது. குறிப்பாக இக் காலப்பகுதியில் இன, மத சமூகங்களிடையே பதற்றங்கள் பதிவாகியுள்ளன. மேலும் 2019 ஈஸ்டர் குண்டுத்தாக்குதலுக்கு முன்னர் பல இன வன்முறைச் சம்பவங்களும் மத தீவிரவாத நிகழ்வுகளும் தொடர்ச்சியாக இடம்பெற்றுள்ளன.
ஈஸ்டர் குண்டுத் தாக்குதலுக்குப் பின்னர் முஸ்லிம்களுக்கு எதிரான அச்சுறுத்தல்களும் வன்முறைகளும் சடுதியாக அதிகரித்தன. முஸ்லிம்களின் வர்த்தக நிலையங்கள் பகிஷ்கரிக்கப்பட்டன. முஸ்லிம் பெண்களின் ஆடைகளை இலக்கு வைத்து தாக்குதல்கள் நடத்தப்பட்டதுடன் ஊடக பரப்புரைகளும் முன்னெடுக்கப்பட்டன. முஸ்லிம் மக்களும் அரசியல் சிவில் தலைவர்களும் குண்டுத் தாக்குதல்களுடன் தொடர்புடையவர்களை முன்னரே நிராகரித்திருந்த போதிலும், முஸ்லிம்கள் மீது இலக்கு வைக்கப்பட்ட இனவாத பிரசாரங்கள் தொடர்ந்தன.
பொலிசாரின் தரவுகளின் படி ஈஸ்டர் தாக்குதலைத் தொடர்ந்து 2289 பேர் அவசரகாலச் சட்டம் அல்லது பயங்கரவாத தடைச் சட்டம் அல்லது ஐ.சி.சி.பி. ஆர் சட்டத்தின் கீழ் கைது செய்யப்பட்டனர். இவர்களில் மிகப் பெரும்பாலானவர்கள் முஸ்லிம்களாவர்.
நாடெங்கும் முஸ்லிம்களின் வீடுகளும் பள்ளிவாசல்களும் மத்ரஸாக்களும் படையினரால் கடும் தேடுதல் நடவடிக்கைக்குட்படுத்தப்பட்டன. சில இடங்களில் பள்ளிவாசல்களுக்குள் நாய்களும் கொண்டு செல்லப்பட்டு எந்தவிதமான மரியாதையுமின்றி தேடுதல்கள் இடம்பெற்றன. பத்திரிகைகளும் தொலைக்காட்சிகளும் முஸ்லிம்களுக்கு எதிரான செய்திகளை தொடர்ந்து வெ ளியிட்டன.
ஈஸ்டர் தாக்குதலை வாய்ப்பாக பயன்படுத்தி இன, மத தீவிரவாத குழுக்கள் முஸ்லிம்களுக்கு எதிரான பாரிய வன்முறைகளை கட்டவிழ்த்தன. அதிகாரிகள் இவற்றைக் கட்டுப்படுத்தாது மெளனம்காத்தமை இச்சக்திகளுக்கு வாய்ப்பாக அமைந்தது.
முஸ்லிம்களுக்கு எதிரான தாக்குதல்கள் புதியவை அல்ல. அவை 2013 முதலே நடைபெற்று வருகின்றன. 2013 இல் கிராண்ட்பாஸ் பள்ளிவாசல் தாக்குதல், 2014 இல் பொது பல சேனாவின் பின்னணியில் அரங்கேறிய அளுத்கம வன்முறைகள், 2017 ஏப்ரல் முதல் ஜூன் வரை நாட்டின் பல பகுதிகளிலும் முஸ்லிம் வர்த்தக நிலையங்களை இலக்கு வைத்த வன்முறைகள், 2017 நவம்பரில் கிந்தோட்டையில் இடம்பெற்ற வன்முறைகள், 2018 மார்ச்சில் இடம்பெற்ற கண்டி, திகன வன்முறைகள் ஆகியவற்றைக் குறிப்பிட்டுச் சொல்ல முடியும்.
ஈஸ்டர் தாக்குதலையடுத்து முகத்திரை அணிவது தடை செய்யப்பட்டது. இதனையடுத்து முஸ்லிம் பெண்கள் பொது இடங்களில் அசெளகரியங்களுக்குள்ளாக்கப்பட்ட பல சம்பவங்கள் பதிவாகின. அரசாங்க நிறுவனங்களிலும் கூட முஸ்லிம் பெண்கள் அசெளகரியங்களுக்குள்ளாக்கப்பட்டனர்.
இலங்கையில் வாழும் பெரும்பான்மையான முஸ்லிம்கள் இஸ்லாமிய தீவிரவாத கொள்கைகளை ஆதரிப்பவர்கள் என்பதற்கு எந்தவித ஆதாரங்களுமில்லை. சஹ்ரான் குழுவினர் உள்ளூர் சூபி முஸ்லிம்கள் மீது தாக்குதல்களை நடத்திய போதிலும் சஹ்ரானை சகல முஸ்லிம் அரசியல், சிவில் தரப்புகளும் நிராகரித்தன. சஹ்ரானின் போதனைகளால் முஸ்லிம் சமூகத்தில் தீவிரப் போக்கு வளரும் அபாயத்தை முஸ்லிம்கள் தொடர்ச்சியாக அரசாங்கத்திற்கும் பாதுகாப்புத் தரப்பிற்கும் தெரியப்படுத்தி வந்தனர். எனினும் அரசாங்க தரப்பினால் இந்த எச்சரிக்கைகள் கவனத்திற் கொள்ளப்படவில்லை.
2012 முதல் பொது பல சேனா அமைப்பு தனது செயற்பாடுகளை ஆரம்பித்து மிகக் குறுகிய காலத்தில் நாட்டில் செல்வாக்குச் செலுத்தும் அமைப்பாக மாறியது. இலங்கையில் முஸ்லிம்களின் சனத்தொகை அதிகரிப்பதாகவும் இஸ்லாமிய அச்சுறுத்தல் உள்ளதாகவும் பிரசாரங்களை முன்னெடுத்தது. இதன் மூலம் சமூகங்களிடையே பிளவுகள் தோற்றுவிக்கப்பட்டன.
இலங்கையின் சட்ட முறைமையானது சகல மக்களுக்கும் சமமான உரிமைகளை வழங்குகின்ற போதிலும் இந்த உரிமைகளை அனுபவிப்பதில் பல சவால்கள் நிலவுகின்றன. மத சிறுபான்மையினர் பல்வேறு தடைகளை எதிர்கொள்கின்றனர். மத நிகழ்வுகளுக்கும் நிறுவனங்களுக்கும் இடையூறுகள் விளைவிக்கப்பட்டுள்ளன. சிறுபான்மை சமூகங்கள் தமது மத நிலையங்களை நிர்மாணிப்பதில் தடைகள் உள்ளன. குறிப்பாக கத்தோலிக்கர்களுக்கும் முஸ்லிம்களுக்கும் எதிராக மத தீவிரப் போக்காளர்களால் வெறுப்பூட்டும் பிரசாரங்கள் முன்னெடுக்கப்பட்டுள்ளன.
இப் பின்னணியில் இலங்கை அரசாங்கத்திற்கு பின்வரும் பரிந்துரைகளை முன்வைக்க விரும்புகிறேன்.
1. இலங்கையில் மத சகிப்புத்தன்மையும் பதற்றமும் நீடிப்பதற்கான அடிப்படைக் காரணிகளைக் கண்டறிந்து சகல இனங்கள் மற்றும் மதங்களிடையே நம்பிக்கையைக் கட்டியெழுப்பும் நடவடிக்கைகளை முன்னெடுக்க வேண்டும்.
2. சகல வன்முறைச் சம்பவங்கள் தொடர்பிலும் உரிய விசாரணைகளை மேற்கொண்டு சர்வதேச மனித உரிமைகள் பொறிமுறைகளுக்கமைய குற்றவாளிகளுக்கு தண்டனை வழங்க வேண்டும். குறிப்பாக வன்முறைகளைத் தூண்டியவர்கள், ஈஸ்டர் குண்டுத்தாக்குதலுக்கு காரணமானோர் உட்பட சகல குற்றவாளிகளும் தண்டிக்கப்பட வேண்டும்.
3. சர்வதேச சட்டங்களுக்கு உட்பட்ட வகையில் தீவிரவாத வன்முறைகளையும் பயங்கரவாதத்தையும் தடுத்து நிறுத்துவதற்கான பொறிமுறையை வகுக்க வேண்டும்.
4. வெறுப்புப் பேச்சை எதிர்கொள்ளவும் அது தொடர்பான முன்னெச்சரிக்கைகளை வழங்கவும் சர்வதேச மனித உரிமைச் சட்டங்களுடன் இணைந்ததாக கண்காணிப்புப் பொறிமுறை ஒன்றை கட்டியெழுப்ப வேண்டும்.
5. 1979 ஆம் ஆண்டின் பயங்கரவாத தடைச் சட்டத்தை மீளப் பெறுவதுடன் மதம் சார் வன்முறைகளுடன் தொடர்புடையவர்களை தண்டிக்கும் வகையில் தண்டனைச் சட்டக் கோவையில் கோவையில் திருத்தங்களை மேற்கொள்ள வேண்டும்.
6. பாடசாலை மாணவர்கள் மத்தியில் திறந்த சமூகம், புரிந்துணர்வு, சமாதானம், சகிப்புத்தன்மை, பாலின சமத்துவம் மற்றும் நட்புறவை கட்டியெழுப்புவதை அடிப்படையாகக் கொண்டு கல்வி முறைமையில் திருத்தங்களைக் கொண்டு வர வேண்டும்.
7. மிதவாத மத தலைவர்களின் கருத்துக்களை ஊக்குவிப்பதுடன் இனங்கள், மதங்களுக்கிடையிலான கலந்துரையாடலுக்கு ஆதரவளிக்க வேண்டும்.
8. மதங்களுக்கி டையிலான கலந்துரையாடலில் பங்கேற்கும் வகையில் பெண்களை வலுப்படுத்துவதுடன் மத ரீதியான திருமண சட்டங்கள் மூலம் அவர்களது உரிமைகள் கட்டுப்படுத்தப் படாதிருப்பதை உறுதிப்படுத்த வேண்டும். முஸ்லிம் தனியார் சட்டத்தின் கீழ் பெண்களுக்கு பாகுபாடு காட்டப்படுவது தொடர்பிலும் எனது கவனத்திற்குக் கொண்டு வரப்பட்டது.
இதில் உரிய திருத்தங்கள் கொண்டுவரப்பட வேண்டியது அவசியமாகும்.
இலங்கை அரசாங்கத்தின் பதில்
அஹ்மத் ஷஹீதின் மேற்படி அறிக்கைக்கு இலங்கை அரசாங்கம் ஜெனீவா அமர்வில் பதில் வழங்கியுள்ளது. அதில் குறிப்பிடப்பட்டுள்ளதாவது,
சிறப்பு அறிக்கையாளரின் அறிக்கையானது, உயிர்த்தெழுந்த ஞாயிறு தாக்குதல்களைத் தொடர்ந்து சில மாதங்களிலேயே இலங்கையில் மத சுதந்திரம் அல்லது நம்பிக்கைக்கான இடத்தை தீர்மானிக்க முற்பட்டது துரதிர்ஷ்டவசமானது என்று நாங்கள் கருதுகிறோம். இந்த தாக்குதல்களின் அளவு இலங்கையில் ஒரு தேசிய அவசரகால நிலையை ஏற்படுத்தி, அனைத்து சமூகங்களின் பாதுகாப்பு மற்றும் பாதுகாப்பின் நலனுக்காக நாட்டின் பல்வேறு பகுதிகளிலுள்ள பயங்கரவாதக் கூறுகளை அடையாளம் கண்டு மட்டுப்படுத்துவதற்கு அரசாங்கம் உடனடியாக நடவடிக்கை எடுக்க வேண்டுமென்ற நிலையை ஏற்படுத்திய அதேவேளை, தேசிய பாதுகாப்பு மற்றும் மனித உரிமைகளுக்கு இடையிலான நுட்பமான சமநிலையையும் பேணவேண்டியிருந்தமை நினைவுகூரத்தக்கது. இத் தாக்குதல்களுக்குப் பின்னர், உள்நாட்டு அமைதியின்மையின் எந்தவொரு பழிவாங்கும் செயல்களையும் தடுக்கவும், சட்டம் ஒழுங்கை பராமரிக்கவும், மிக முக்கியமாக அனைத்து மக்களதும், குறிப்பாக முஸ்லிம் சமூகத்தின் பாதுகாப்பையும் உறுதி செய்ய அரசாங்கம் உடனடியாக அனைத்து நடவடிக்கைகளையும் எடுத்தது.
நிலைமையைக் கட்டுப்படுத்த உதவிய நாட்டின் சிவில் மற்றும் அரசியல் தலைமையின் ஆக்கபூர்வமான மற்றும் நல்லிணக்க அணுகுமுறைகள் மற்றும் அழைப்புகள் பரவலாக ஏற்றுக்கொள்ளப்பட்டு பாராட்டப்பட்டன.
குறிப்பாக முஸ்லிம் சமூகத்தினர் விசாரணைகள் மற்றும் தேடல் நடவடிக்கைகளில் பாதுகாப்பு நிறுவனங்களுடன் ஒத்துழைப்பதற்குச் செயலூக்கமான நடவடிக்கைகளை எடுத்தனர். கைதான சந்தேக நபர்களுக்குச் சட்டரீதியான பாதுகாப்புகள் வழங்கப்பட்டதுடன் அவர்களின் நிலைமையைக் கண்காணிக்க சுயாதீன நிறுவனங்களுக்கும் அனுமதி வழங்கப்பட்டது. பயங்கரவாத தாக்குதல்கள் நடந்த 3 வாரங்களுக்குப் பின் இடம்பெற்ற குழுவன்முறைச் சம்பவங்கள் இனரீதியாக ஊக்கமளிக்கப்படவில்லை, அவை சட்டத்திற்கு கட்டுப்படாதோரால் மேற்கொள்ளப்பட்டன. சிலரைக் கைது செய்தல் மற்றும் சம்பந்தப்பட்டவர்களை நீதியின் முன் நிறுத்துவதன் மூலம் அரசாங்கம் இக்கும்பல்களைத் திறம்பட கட்டுப்பாட்டுக்குள் கொண்டுவந்தது. விரைவில் இந்த நாடு சாதாரண நிலைக்குத் திரும்பியதுடன், சகல இலங்கையர்களுக்கும், நாட்டுக்கு வருகை தருபவர்களுக்குமான பாதுகாப்பும் உறுதிப்படுத்தப்பட்டது.
சம்பந்தப்பட்ட சட்ட ஏற்பாடுகளையும் மற்றும் தேவையான சட்ட செயற்பாடுகளையும் செயற்படுத்துவதன் மூலம் சட்டமும் ஒழுங்கும் வலுவாக மீள நிறுவப்பட்டது. இதுவிடயத்தில் இலங்கை பாதுகாப்பு படையினரின் உடனடியான, தொழில் ஈடுபாடுள்ள நடவடிக்கையானது குறிப்பாகப் பாராட்டப்பட்டது.
அதனால், சிறப்பு அறிக்கையாளரின் அறிக்கையிலுள்ள; “இலங்கை பாதுகாப்பு படையினர் வன்முறையைத் தடுக்கவோ நிறுத்தவோ செயற்படாது வன்முறைக்கும்பலுடன் ஒத்துழைத்தமை” தொடர்பான “கடுமையான கரிசனங்கள்”, “இந்த வன்முறைக்கெதிரான அதிகாரிகளின் நடவடிக்கையின்மை” மற்றும் “வன்முறைச் செயல்கள் அதிகாரிகளின் மெளனம் மற்றும் செயற்பாடின்மையால் மகிழ்விக்கப்பட்டமை” ஆகிய தவறான குறிப்புக்களை இந்த அரசாங்கம் நிராகரிக்கிறது. சம்பவங்கள் நடந்ததாகக் கூறப்பட்டவுடனேயே அவை முழுமையாக மறுக்கப்பட்டு விளக்கமளிக்கப்பட்ட பின்னரும் கூட, இந்த தவறான சம்பவங்கள் அறிக்கையில் சேர்க்கப்பட்டுள்ளமை வருந்தத்தக்கது. சட்டத்திற்கேற்ப பயங்கரவாத செயல்களைத் தடுக்க குற்றவியல் விசாரணைகள் நடத்தப்பட்ட நிகழ்வுகளை, மதத்தின் அல்லது நம்பிக்கையின் சுதந்திரத்தை மீறும் முயற்சியாகச் சித்தரிக்க இந்த அறிக்கை முயன்றதும் வருந்தத்தக்கது.
ஆடை விதிகள் மீதான கட்டுப்பாடுகள் தொடர்பான குறிப்புகளைப் பொறுத்தவரை, அந்த நேரத்திலிருந்த உடனடியான பாதுகாப்பு அச்சுறுத்தலைக் கருத்தில் கொண்டு, அடையாளத்தை மறைப்பதைத் தடுக்கும் நோக்கில், அவசரகால விதிமுறைகளின் கீழ் சம்பந்தப்பட்ட ஒழுங்குமுறை ஒரு தற்காலிக நடவடிக்கையாகவே இருந்ததென்பது குறிப்பிடத்தக்கது.
பொதுமக்களின் பாதுகாப்பு, ஒழுங்கு, உடல்நலம், அல்லது ஒழுக்கம் அல்லது மற்றவர்களின் அடிப்படை உரிமைகள் மற்றும் சுதந்திரங்களைப் பாதுகாக்கும் நோக்கத்திற்காக ஒருவரின் மதம் அல்லது நம்பிக்கைகளின் சுதந்திரத்தை சட்டத்தினால் மட்டுப்படுத்துவதற்கு அனுமதிக்கிறது என, சிவில் மற்றும் அரசியல் உரிமைகள் தொடர்பான சர்வதேச ஒப்பந்தத்தில் குறிப்பிடப்பட்டுள்ளது என்பதை சபையின் கவனத்திற்கு கொண்டுவர விரும்புகிறோம்.
சிறுபான்மையினரைப் பாதுகாக்க சிவில் மற்றும் அரசியல் உரிமைகள் தொடர்பான சர்வதேச ஒப்பந்த சட்டம் பயன்படுத்தப்படவில்லை, ஆனால் மதம் அல்லது நம்பிக்கையின் சுதந்திரத்தைக் குறைக்கும் ஒரு “அடக்குமுறைச் சாதனமாக” மாறியுள்ளது என்று அறிக்கையில் தவறாக குறிப்பிடப்பட்டிருப்பதை இலங்கை திட்டவட்டமாக நிராகரிக்கிறது. 2007 இல் சிவில் மற்றும் அரசியல் உரிமைகள் தொடர்பான சர்வதேச ஒப்பந்தச் சட்டம் இயற்றப்பட்டதிலிருந்து, இச்சட்டத்தின் கீழ் கைது செய்யப்பட்ட சந்தேக நபர்களில் 90% பேர் பெரும்பான்மையான சிங்கள சமூகத்தைச் சேர்ந்தவர்கள் என்பதை இது தொடர்பில் நாம் சுட்டிக்காட்ட விரும்புகிறோம்.
பெளத்தமதத்தின் “மேலாதிக்கத்தை” அடிப்படையாகக்கொண்டு மற்ற மதங்களின் மீது பாகுபாடு காட்டுவது பற்றி இவ்வறிக்கையில் கூறப்பட்டுள்ள கருத்துகளைப் பொறுத்தவரையில், அரசியலமைப்பின் 9 வது பிரிவு புத்த சாசனத்தை பாதுகாக்கவும் வளர்க்கவும் அரசுக்கு தேவைப்படுகிறது என்பதையும் அதேநேரம், அந்த அரசியலமைப்பின் கீழ் சகல மதங்களுக்குமான உரிமைகள் வழங்கப்பட்டுள்ளன என்பதையும் நாம் வலியுறுத்த விரும்புகிறோம்.
இலங்கை அரசியலமைப்பு அல்லது தேசிய சட்டங்களில் எந்தவொரு ஏற்பாடும் மதம் அல்லது பொது வாழ்வின் எந்தவொரு பிரிவிலும் உள்ள நம்பிக்கையின் அடிப்படையில் ஒரு நபரை பாகுபடுத்த அனுமதிக்காது. மாறாக, அரசியலமைப்பின் 12 வது உறுப்புரையானது, இனம், மதம், மொழி, சாதி, பாலினம், அரசியல் கருத்து, பிறந்த இடம் அல்லது அத்தகைய காரணங்களை அடிப்படையாகக் கொண்ட பாகுபாட்டைத் தடை செய்கிறது.
ஒரு குறிப்பிட்ட மதச் சமூகத்தைச் சேர்ந்த இளைஞர்களை பயங்கரவாதச் செயல்களில் ஈடுபடும் அளவிற்கு தீவிரமயமாக்குவதற்கான இயக்கிகள் மற்றும் மூல காரணங்களை இந்த அறிக்கை போதுமான அளவில் விவாதிக்கத் தவறியதுடன், பாதிக்கப்பட்டவர்களின் குடும்ப உறுப்பினர்கள், சந்தேக நபர்கள் மற்றும் நடுநிலையாளர்கள் உள்ளிட்ட, இலங்கை சமூகத்தின் வெவ்வேறு தரப்பினரிடமிருந்த பரந்த அளவிலான உள்ளீடுகளைக் கொண்டிருக்கவில்லை என்பதும் தெரிகிறது.
வழிபாட்டுத் தலங்களுக்கு எதிரான தாக்குதல்கள் மற்றும் அவமதிப்பு ஆகியவற்றை விவரிப்பதில், பெளத்த வழிபாட்டுத் தலங்கள் மீதான தாக்குதல்கள், அழித்தல் போன்ற சம்பவங்கள் மற்றும் நாட்டின் சில பகுதிகளில் பெளத்த வழிபாட்டாளர்களைத் தடுத்த நிகழ்வுகள் ஆகியவற்றைக் குறிப்பிட அறிக்கை தவறிவிட்டது.
சகல தரப்பிலுமுள்ள தீவிரவாத அம்சங்களைக் கவனத்தில் கொள்ளுதல், வன்முறையால் பாதிக்கப்பட்டவர்களுக்கு இழப்பீடு வழங்குவதற்கான அலுவலகம் மூலம் இழப்பீடு வழங்குதல், மற்றும் மதங்களுக்கிடையேயான சபைகளை அமைப்பதற்கான பொறிமுறைகளை அமைத்தலுக்கான வழிமுறைகளை அமைத்தல் போன்ற மத நல்லிணக்கத்தை வளர்ப்பதற்காக அரசாங்கமும் சட்ட அமுலாக்க முகவரமைப்புக்களும் மேற்கொண்ட உறுதியான நடவடிக்கைகளில் இந்த அறிக்கை போதுமான அளவில் கவனஞ்செலுத்தவில்லை.
ஏப்ரல் 21 க்குப் பின்னர், அனைத்து மதங்களின் சகல குடிமக்களையும் பாதுகாத்து உதவுவதில் இலங்கையர்களின் எழுச்சி மற்றும் ஒற்றுமையானது; முஸ்லிம்களின் தொழுகையின்போது பெளத்தர்களும் கிறிஸ்த வர்களும் அவர்களைப் பாதுகாத்ததன் மூலம் நிரூபித்துக்காட்டப்பட்டமை, சேதமடைந்த சொத்துக்களை புதுப்பித்தமை மற்றும் சேதமடைந்த தேவாலயங்களை பாதுகாப்பு படையினர் புதுப்பித்தமை ஆகியவை இந்த அறிக்கையில் பிரதிபலிக்கவில்லை என்பதும் துரதிர்ஷ்டவசமானது.-Vidivelli