நடைபெறவுள்ள பொதுத் தேர்தலில் சஜித் பிரேமதாச தலைமையிலான கூட்டணியில் நாம் களமிறங்கவுள்ளோம். இக்கூட்டணி ஆளும் கட்சிக்குப் பெரும் சவாலாக அமையுமென ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீம் தெரிவித்தார்.
தி.மு.க. தலைவர் மு.க.ஸ்டாலினின் பிறந்த நாள் விழாவில் கலந்து கொள்வதற்காக நேற்று பிற்பகல் சென்னை விமானம் நிலையத்தை வந்தடைந்த அவர், ஊடகங்களுக்குப் பேட்டியளிக்கையிலேயே இவ்வாறு குறிப்பிட்டார்.
அங்கு அவர் மேலும் கருத்து வெளியிடுகையில், இந்தியாவில் குடியுரிமைச் சட்டம் குறித்து போராட்டம் நடைபெறுகிறது. இந்த போராட்டம் மிகவும் கவலைக்குரியது. ஒரு சட்டமூலம் நிறைவேறியிருப்பது தொடர்பாக தொப்புள்கொடி உறவுகளாக இலங்கையில் வாழ்ந்து வரும் நாங்களும் கவலை கொள்கிறோம். இப்போராட்டம் வெற்றிபெற வாழ்த்துகிறேன் என்றார். அத்துடன் இலங்கை விவகாரங்கள் குறித்து செய்தியாளர்கள் எழுப்பிய கேள்விகளுக்கும் அவர் பதிலளித்தார்.
கேள்வி: இலங்கையில் தேசிய கீதத்தை தமிழில் பாட தடைவிதிக்கப்பட்டுள்ளது குறித்து என்ன கூறுகிறீர்கள்?
பதில்: ஒட்டுமொத்தமாக தடை விதிக்கப்பட்டுள்ளது என்பது பிழையான தகவல். உத்தியோகபூர்வமான நிகழ்ச்சிகளில் சிங்கள மொழியில் பாடுவதுடன் தமிழ் மொழியிலும் தேசிய கீதம் பாடுவதை முந்தைய அரசு இருந்த காலகட்டத்தில் நாங்கள் வழமையாகக் கொண்டிருந்தோம். அந்த வழமையை இப்போதைய அரசு மாற்றி, சிங்களத்தில் மட்டுமே தேசிய கீதம் பாட வேண்டுமென்று உத்தரவிட்டிருக்கிறது. நல்லிணக்கம் கருதிக் கொண்டுவரப்பட்ட அந்த வழமை தற்போது மாற்றப்பட்டுள்ளதால் அது தமிழர்களின் மனதைப் புண்படுத்தி இருக்கிறது. அதுவே தற்போது இலங்கையில் சர்ச்சைக்குரிய விஷயமாக இருந்துகொண்டிருக்கிறது.
கேள்வி: இலங்கையில் போர்க்குற்றம் தொடர்பாக இதுவரை விசாரணை நடைபெறவில்லையென ஐக்கிய நாடுகள் சபை பொதுச் செயலாளர் கவலை தெரிவித்திருக்கிறார். இனியேனும் அந்த விசாரணை நடைபெறுமா?
பதில்: இலங்கையில் தற்போதுள்ள அரசு ஐக்கிய நாடுகள் சபையுடன் கூட்டாக நிறைவேற்றிய பிரேரணையில் தமது இசைவைத் திரும்பப் பெற்றிருக்கிறார்கள். இந்த நடவடிக்கை சர்வதேச மட்டத்தில் இலங்கை அரசு எடுத்துவரும் நல்லெண்ண நடவடிக்கைகளுக்கு பாரிய பாதிப்பை ஏற்படுத்தி விடுமோ என்ற அச்சம் நிலவுகிறது. இலங்கையில் நடைபெற்ற போரின்போது போர்க்குற்றங்கள் நடைபெற்றனவா இல்லையா என்பதில் சர்வதேச அரசியல் தலையீடு எதுவும் இருக்க கூடாது என்பது தற்போது இலங்கையை ஆட்சி செய்பவர்களின் நெடுநாள் கொள்கையாக உள்ளது. எனவே இது குறித்த சர்ச்சை சர்வதேச அளவில் இன்னும் விரிவடையும் வாய்ப்பிருக்கிறது.
கேள்வி: இலங்கையிலுள்ள கிறிஸ்தவ தேவாலயங்களில் குண்டுவெடிப்பு தாக்குதல் நடைபெற்ற பிறகு அங்கிருக்கும் முஸ்லிம்களுக்கான பாதுகாப்பில் பிரச்சினை நிலவியதே? அதன் தற்போதைய நிலை என்ன?
பதில்: அந்தப் பதற்றம் தற்போது ஓரளவுக்கு தணிந்திருக்கிறது என்று இருந்தாலும், ஆத்திரமூட்டும் பேச்சுக்களைத் தொடர்ந்தும் பொதுவெளியில் சில அரசியல்வாதிகள் பேசிக் கொண்டிருப்பதால், அது மனங்களை வேறுபடுத்திக் கொண்டிருக்கிறது. இந்த நிலை தொடராமல் இருக்க வேண்டும் என்பதே எமது அவா.
கேள்வி: பாராளுமன்றம் கலைக்கப்படவுள்ளதாகத் தகவல்கள் கூறுகின்றன. உங்களது தேர்தல் நிலைப்பாடு எப்படி இருக்கும்?
பதில்: திங்கட்கிழமை நள்ளிரவுடன் பாராளுமன்றம் கலைக்கப்படுகிறது என்பது உறுதியான தகவல். கடந்த தேர்தலின் போது ஜனாதிபதி வேட்பாளராக போட்டியிட்ட சஜித் பிரேமதாச தலைமையிலான கூட்டணியில் தொடர்ந்து நாங்கள் களம் காண்கின்றோம். இக்கூட்டணி ஆளும் கட்சிக்குப் பெரும் சவாலாக இருக்கும் என்ற நிலையே தற்போது உள்ளது என்றார்.
சென்னை விமான நிலையத் திற்கு வருகை தந்த ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீமை இந்திய யூனியன் முஸ்லிம் லீக்கின் தேசிய தலைவர் பேராசிரியர் கே.எம். காதர் மொஹிதீன், சென்னை கிழக்கு மாவட்ட தி.மு.க. பொருளாளர் ஆசாத், மாவட்ட சிறுபான்மை இணைச் செயலாளர் இப்ராஹிம் கனி ஆகியோர் வரவேற்றனர்.-Vidivelli
- திருச்சி சாகுல் ஹமீத்