சஜித் தலைமையிலான ஐக்கிய மக்கள் சக்தி கூட்டணி ஸ்தாபிப்பு
10 கட்சிகள், 18 தொழிற்சங்கங்கள், 20 அமைப்பு இணைவு
10 அரசியல் கட்சிகள் , 18 தொழிற்சங்கங்கள் மற்றும் 20 சிவில் அமைப்புகளின் சங்கமத்துடன் சஜித் பிரேமதாச தலைமையிலான ஐக்கிய மக்கள் சக்தி கூட்டணி நேற்று உத்தியோகபூர்வமாக ஸ்தாபிக்கப்பட்டது. அத்துடன், புரிந்துணர்வு ஒப்பந்தமும் கைச்சாத்திடப்பட்டது. சின்னம் குறித்து எவ்விதமான அறிப்பும் விடுக்காத நிலையில் கூட்டணியின் தலைவர் மற்றும் பொதுச் செயலாளர் ஆகியோரின் உரைகள் இடம்பெற்றன.
எதிர்க்கட்சி தலைவர் சஜித் பிரேமதாச தலைமையில் உருவாக்கப்பட்டுள்ள ஐக்கிய மக்கள் சக்தி கூட்டணியின் அங்குரார்ப்பண நிகழ்வு நேற்று திங்கட்கிழமை காலை கொழும்பு தாமரைத்தடாக கலையரங்கில் இடம்பெற்றது.
‘புதிய எதிர்பார்ப்பு, புதிய பயணத்தை நோக்கி ஒரே எண்ணத்தில், ஓரே இலக்கில் ஒன்றாய் இணைவோம்’ என்ற தொனிப்பொருளில் இடம்பெற்ற இந்நிகழ்வு சர்வமதத் தலைவர்களின் ஆசியுடன் ஆரம்பமாகியது.
புதிய கூட்டணிக்கான மதத் தலைவர்களின் ஆசிர்வாதத்தை தொடர்ந்து பொதுச் செயலாளர் ரஞ்சித் மத்தும பண்டார வரவேற்புரை நிகழ்த்தினார்.
இதனை தொடர்ந்து புதிய கூட்டணிக்கான புரிந்துணர்வு ஒப்பந்தத்தில் கைச்சாத்திடும் நிகழ்வு கூட்டணியின் தலைவர் சஜித் பிரேமதாச மற்றும் பொதுச் செயலாளர் ரஞ்சித் மத்துமபண்டார ஆகியோர் முன்னிலையில் பிரதான மேடையில் இடம்பெற்றது.
இதன்போது பங்காளி கட்சிகள், சிவில் அமைப்புகள் மற்றும் தொழிற்சங்கங்கள் என பல தரப்புகள், புரிந்துணர்வு ஒப்பந்தத்தில் கைச்சாத்திட்டன.
இதன்போது புதிய கூட்டணியுடன் 10 அரசியல் கட்சிகளும், 20 சிவில் அமைப்புக்களும், 18 தொழிற்சங்கங்களும் புரிந்துணர்வு ஒப்பந்தத்தில் கைசாத்திட்டன.
அதற்கமைய இந்தப் புரிந்துணர்வு ஒப்பந்தத்தில் பாராளுமன்ற உறுப்பினர் பாட்டலி சம்பிக்க ரணவக்க தலைமையிலான ஜாதிக ஹெல உறுமய, ரவூப் ஹக்கீம் தலைமையிலான ஸ்ரீலங்கா முஸ்லிம் காங்கிரஸ் சார்பில் அந்த கட்சியின் செயலாளர் நிஸாம் காரியப்பர் கைச்சாத்திட்டதுடன், பாராளுமன்ற உறுப்பினர் மனோ கணேசன் தலைமையிலான தமிழ் முற்போக்கு கூட்டணி சார்பில் சந்திர சாப்டர், ரிஷாத் பதியுதீன் தலைமையிலான அகில இலங்கை மக்கள் காங்கிரஸ் சார்பில் கட்சியின் செயலாளர் எஸ். சுபைதீன் உள்ளிட்டோர் புரிந்துணர்வு ஒப்பந்தத்தில் கைச்சாத்திட்டனர்.
அதற்கு மேலதிகமாக இந்தக் கூட்டணியில் 20 சிவில் அமைப்புக்கள் அங்கத்துவம் வகிக்கும் நிலையில் தேசிய மக்கள் சபை சார்பில் சமீர பெரேராவும், அப்பி புரவசியோ அமைப்பு சார்பில் இனோக்கா சத்தியங்கனியும் கைச்சாத்திட்டனர்.
மேலும் 18 தொழிற்சங்கங்கள் இந்தக் கூட்டணியில் அங்கம் வகிக்கும் அதேவேளை, தொழிற்சங்கங்கள் சார்பில் சந்திக்க பண்டார புரிந்துணர்வு ஒப்பந்தத்தில் கைச்சாத்திட்டிருந்தார்.
இதனைத் தொடர்ந்து நிகழ்வின் இறுதியில் ஸ்ரீலங்கா சுதந்திரக் கட்சியை பாதுகாப்பதற்கான அமைப்பினரும், ஐக்கிய தேசிய முன்னணியினரும் இந்தக் கூட்டணியுடன் உத்தியோகபூர்வமாக இணைந்து கொள்வதாகவும் அறிவிக்கப்பட்டது.
இதன்பின்னர் அனைவரும் எழுந்து நின்று வலது கரத்தை உயர்த்தியவாறு உறுதிமொழிகளை வழங்கினர். தமிழிலும் உறுதிமொழி அறிவிக்கப்பட்டது.
உறுதிமொழி;
இலங்கை தாய் பூமியை மிக உயர்ந்த வெற்றி பூமியாக வளரசெய்து, மக்களின் சுதந்திரம், தேசத்தின் பாதுகாப்பு ஆகியவற்றை சிறப்பாக நிச்சயப்படுத்திக்கொண்டு நாட்டின் எதிர்கால அபிவிருத்திக்காக இயற்கை தர்மம் எமக்கு வழங்கியுள்ள வளங்களை பாதுகாத்து, தன்னிறைவான தேசத்தின் எதிர்கால தலைமுறைக்காக அர்ப்பணிக்க மனோதிடம் கொண்டு விஷமத்தனமான சக்திகளால் ஆட்கொள்ளப்பட்டுள்ள இலங்கை மக்களின் திறன்களை மேம்படுத்தி பொருளாதார, சமூக, அரசியல் நிலைகளில் சம சந்தர்ப்பங்களை உருவாக்கும் சமபூமியை அர்ப்பணித்து உருவாக்க சமத்துவம், சகவாழ்வு ஆகிய அடிப்படைகளை கொண்டு, உலகம் ஏற்றுக்கொண்டுள்ள மனித உரிமை மற்றும் கௌரவங்களை பாதுகாத்துக்கொண்டு எமது அதியுயர் பாரம்பரிய கொள்கைகளின்படி அதியுயர் தேசத்தை கட்டியெழுப்புவதை எமது அபிலாஷைகளாகக் கொள்வதற்காக பிரமாண்டமான பொருளாதாரத்தைப் புனர்நிர்மாணம் செய்ய மக்களுக்கான சமத்துவ ஆட்சியை உருவாக்குவதற்காக நாட்டின் அனைத்து மக்களையும் ஒன்றிணைத்து மக்களின் வெற்றியை உறுதி செய்வதன் நோக்கில் ஐக்கிய மக்கள் சக்தி மனப்பூர்வமாக அர்ப்பணிப்புடன் செயற் படும் என்பதை இலங்கை மக்களின் முன்னிலையில் கௌரவபூர்வமாக உறுதி யுடன் கூறுகின்றோம்.
இதனை தொடர்ந்து இடம்பெற்ற கலை நிகழ்வொன்றின் பின்னர் கூட்டணியின் தலைவர் சஜித் பிரேமதாசவின் உரை இடம்பெற்றது.
பொதுத்தேர்தல் மாத்திரமல்ல, அதனை தொடர்ந்து வரும் மாகாண சபை தேர்தல் மற்றும் உள்ளூராட்சி மன்றத் தேர்தல் அனைத்திலும் வெற்றி பெறுவோமென ஆதரவாளர்கள் மத்தியில் இதன் போது சஜித் பிரமேதாச அறிவித்தார்.-Vidivelli