முஸ்லிம் கட்சிகள் அனைத்தும் ஒன்றிணைந்து தேர்தலை எதிர்கொள்வதென்றால் அதற்கு நாம் தயாராகவே உள்ளோம். ஆனால் தனி நபராக என்னால் எந்தவொரு கட்சியிலும் இணைந்து செயற்பட முடியாது என ஸ்ரீ லங்கா முஸ்லிம் காங்கிரஸின் முன்னாள் செயலாளர் நாயகமும் ஐக்கிய சமாதானக் கூட்டமைப்பின் செயலாளருமான எம்.ரி. ஹஸன் அலி ‘விடிவெள்ளி‘க்குத் தெரிவித்தார்.
கண்டி பொல்கொல்லையில் கடந்த ஞாயிற்றுக்கிழமை இடம்பெற்ற மு.கா.வின் 29 ஆவது பேராளர் மாநாட்டில் உரையாற்றிய கட்சியின் தலைவர் ரவூப் ஹக்கீம், மீண்டும் கட்சியில் இணைந்து கொள்ளுமாறு ஹஸன் அலிக்கு விடுத்த பகிரங்க அழைப்பு குறித்து கேட்டபோதே அவர் இவ்வாறு தெரிவித்தார்.
ஐக்கிய சமாதானக் கூட்டமைப்பின் செயலாளருமான எம்.ரி. ஹஸன் அலி மேலும் குறிப்பிடுகையில், நாட்டின் தற்போதைய சூழ்நிலையில் சகல முஸ்லிம் கட்சிகளும் ஒன்றிணைந்து தேர்தலில் போட்டியிட வேண்டும் எனும் கோரிக்கை வலுப்பெற்று வருகின்றது. மூன்று தினங்களுக்கு முன்னர் நடைபெற்ற எமது கட்சியின் தலைமைத்துவ சபைக் கூட்டத்திலும் இது தொடர்பில் தீர்மானம் ஒன்றை நிறைவேற்றியுள்ளோம். முஸ்லிம் கட்சிகள் அனைத்தும் இணைந்து எதிர்வரும் தேர்தலை கூட்டாக சந்திப்பதற்கான வாய்ப்புகள் வருமானால் அதற்கு முன்னுரிமை வழங்க வேண்டும் என தீர்மானித்துள்ளோம்.
இவ்வாறு ஒற்றுமைப்படுவது முஸ்லிம்கள் சகலருக்கும் பயன்தரக் கூடிய விடயமாகும். யாரேனும் இந்த முயற்சியை முன்னெடுத்தால் இக் கூட்டமைப்புடன் இணைந்து பயணிக்க நாம் தயாராகவுள்ளோம்.
புத்திஜீவிகள், ஊடகங்கள் இதற்காக முன்னிற்க வேண்டும். இன்றைய அரசியல் சூழலில் இது மிகவும் அவசியமான ஒன்றாகும். கிழக்கு மாகாணத்தில் கூட மக்கள் எல்லோரும் இதனையே விரும்புகின்றனர். சகலரும் ஒற்றுமைப்பட வேண்டும் என்பதையே வலியுறுத்துகின்றனர் என்றார்.
ஆனால் மு.கா. பேராளர் மாநாட்டில் உரையாற்றிய கட்சியின் தலைவர் ரவூப் ஹக்கீம் உங்களையே பெயர் குறிப்பிட்டு மீண்டும் கட்சியில் இணைந்து கொள்ளுமாறு அழைத்தாரே? இதற்கு உங்கள் பதில் என்ன? எனக் கேட்டதற்கு..‘‘ அவர் அழைப்பு விடுத்ததை நானும் கேட்டேன். ஆனால் நான் இப்போது வேறொரு கட்சியில் உள்ளேன். எனவே கட்சிகள் இணையும்போது இந்த அழைப்பை பரிசீலிக்க முடியும். இது விடயத்தில் தனி நபராக நான் தீர்மானிக்க முடியாது. எனக்கென்று ஒரு தனிப்பட்ட நிகழ்ச்சி நிரல் இல்லை‘‘ என்றும் ஹஸன் அலி பதிலளித்தார்.-Vidivelli