ஏப்ரல் குண்டுத்தாக்குதல் இடம்பெற்ற சந்தர்ப்பத்தில் மைத்திரிபால சிறிசேன உடனடியாக நாடுதிரும்ப சந்தர்ப்பம் இருந்தும் வராமல் இருந்ததன் மூலம் இது தொடர்பாக அவர் முன்கூட்டியே அறிந்திருந்தாரா என்ற சந்தேகம் எழுகின்றது. அதனால் இதுதொடர்பில் அவரை விசாரிக்கவேண்டும் என ஐக்கிய தேசிய கட்சி பாராளுமன்ற உறுப்பினர் ஆசூ மாரசிங்க தெரிவித்தார்.
ஐக்கிய தேசிய கட்சி தலைமையகமான சிறிகொத்தாவில் நேற்று இடம்பெற்ற செய்தியாளர் சந்திப்பில் கலந்துகொண்டு கருத்து தெரிவிக்கையிலேயே இவ்வாறு குறிப்பிட்டார்.
அவர் அங்கு தொடர்ந்து தெரிவிக்கையில்,
ஏப்ரல் குண்டுத்தாக்குதல் சம்பவத்தை அடிப்படையாகக்கொண்டு பிரசாரம் செய்தே அரசாங்கம் ஆட்சிக்கு வந்தது. ஆனால் அரசாங்கம் இதுதொடர்பாக எந்த விசாரணையையும் மேற்கொள்ளவில்லை. அத்துடன் ஏப்ரல் தாக்குதல் தொடர்பாக மேற்கொண்ட பாராளுமன்ற தெரிவுக்குழுவின் விசாரணையின்போது முன்னாள் ஜனாதிபதி மைத்திரிபால சிறிசேனவிடமும் வாக்குமூலம் பெற்றுக்கொண்டோம்.
அவரது வாசஸ்தலத்துக்கு சென்று இதுதொடர்பாக வாக்குமூலம் பெற்றுக்கொள்ளும்போது, குண்டுத்தாக்குதல் இடம்பெற்ற தினத்தில் சிங்கப்பூரிலிருந்த உங்களுக்கு உடனடியாக நாடு திரும்ப முடியாமல் போனதற்கு காரணம் என்னவெனக் கேட்டபோது, ஸ்ரீலங்கன் எயார்லைன் விமானத்தில் அன்றையதினம் ஆசனம் இருக்கவில்லை. அதனால்தான் வரமுடியாமல் போனதென அவர் தெரிவித்திருந்தார். ஆனால் இதுதொடர்பாக ஸ்ரீலங்கன் விமான நிறுவனத்தின் அதிகாரிகள் சிலரை பாராளுமன்ற விசாரணைக் குழுவுக்கு அழைத்துக் கேட்டபோது, குறிப்பிட்ட தினத்தில் 20க்கும் அதிகமான ஆசனங்கள் மீதமிருந்ததாக சாட்சியமளித்திருந்தார்கள். இந்த விடயங்கள் அறிக்கையில் எழுதப்பட்டிருக்கின்றன.
அப்படியாயின் முன்னாள் ஜனாதிபதி பாராளுமன்ற தெரிவுக்குழுவுக்கு பொய் சாட்சியம் தெரிவித்திருக்கின்றார். அத்துடன் தாக்குதல் சம்பவம் தொடர்பாக அறிந்துகொண்டுதான் அவர் இவ்வாறு செயற்பட்டாரா என்ற சந்தேகம் எமக்கு எழுகின்றது. அதனால் அரசாங்கம் இதுதொடர்பாக மைத்திரிபால சிறிசேனவை விசாரிக்கவேண்டும்.
அத்துடன் எதிர்வரும் பாராளுமன்ற தேர்தலுக்கு பின்னர் அரசாங்கம் அமைக்கும் கூட்டணியின் தவிசாளராக நியமிக்கப்பட்டிருப்பது, தாக்குதல் சம்பவத்தின் பிரதான குற்றவாளியாக தெரிவிக்கப்படும் மைத்திரிபால சிறிசேன. இவ்வாறு இருக்கும்போது ஏப்ரல் குண்டுத் தாக்குதலின் பின்னணியில் இந்த இரண்டு தரப்பினரும்தான் இருக்கின்றார்களா என்ற சந்தேகம் எமக்கு எழுகின்றது. அத்துடன் மைத்திரிபால சிறிசேனவையும் இந்த அரசாங்கம் விசாரிக்கப்போவதில்லை என்றார்.-Vidivelli
- எம்.ஆர்.எம்.வஸீம்