சிறுபான்மை இனங்களை பிரதிநிதித்துவப்படுத்தும் கட்சிகளுக்கு எதிராக செயற்படும் ஜனநாயக விரோத சக்திகளுக்கு சவாலாகும் வகையில் திறந்த சக்தி மிக்க அமைப்பு ஒன்று விரைவில் உருவாக்கப்படவுள்ளதாக ஸ்ரீ.மு.காங்கிரஸ் தலைவரும் முன்னாள் அமைச்சருமான ரவூப் ஹக்கீம் தெரிவித்தார்.
நேற்று முன்தினம் பொல்கொல்ல மஹிந்த ராஜபக் ஷ அரங்க மண்டபத்தில் நடைபெற்ற ஸ்ரீலங்கா முஸ்லிம் காங்கிரஸின் 29 ஆவது வருடாந்த மாநாட்டில் கலந்துகொண்டு உரையாற்றும்போதே ரவூப் ஹக்கீம் மேற்கண்டவாறு தெரிவித்தார்.
அவர் இங்கு தொடர்ந்தும் உரையாற்றும்போது இவ்வாறு உருவாக்கப்படும் பலம் மிக்க அமைப்பு ஐக்கிய தேசியக் கட்சி போன்ற பிரபலமான கட்சிகளை பின்தள்ளிவிடும் நிலை ஏற்படலாம். தமிழ் தேசியக் கூட்டணி, மக்கள் விடுதலை முன்னணி மற்றும் சில சிவில் அமைப்பு முக்கியஸ்தர்களின் கூட்டுடன் பலமான கூட்டமைப்பு உருவாக்கப்பட திட்டமிடப்பட்டுள்ளது.
பாராளுமன்ற ஜனநாயகத்திற்கு சவால் விடும் வகையில் முயற்சிகளை மேற்கொள்ளும் சக்திகளுக்கு எதிராக ஒரே மேடையில் போராடத் தயாராகவுள்ளோம்.
ஜனாதிபதித் தேர்தல் முடிவுற்று ஒரு சிறிய இடைவெளியில் பொதுத் தேர்தலை நடத்துவதன் மூலம் வெற்றியைப் பெற்றுக்கொள்ளலாம் என்று ஜனாதிபதித் தேர்தலில் வெற்றிபெற்ற கட்சி கருதுகின்றது.
என்றாலும் விகிதாசார தேர்தல் முறையின் கீழ் பொதுத்தேர்தல் நடைபெறும் நிலையில் ஜனாதிபதித் தேர்தலில் பெற்றுக்கொண்ட பெரும்பான்மையை இதில் பெற்றுக்கொள்ள முடியாது என்பது அரசியல் விஷேட ஆய்வாளர்கள் நன்கு அறிந்த ஒன்றாகும்.
ஸ்ரீலங்கா முஸ்லிம் காங்கிரஸ் உள்ளிட்ட முக்கிய எதிர்ப்புக் குழுவினர் தற்போதைய அரசு கூட்டணிக்கு எதிராக செயற்படும் என்பதனைக் குறிப்பிட்டார்.
என்றாலும் ஸ்ரீலங்கா முஸ்லிம் காங்கிரஸைப் போன்று ஏனைய கட்சிகள் ஒன்றுபட்டு இப்பிரச்சினைக்கு விரைவில் தீர்வு காண்பது மட்டுமல்ல, எதிர்வரக்கூடிய பாராளுமன்ற தேர்தலில் பாராளுமன்ற அதிகாரத்தைப் பெற்றுக்கொள்வதற்கான ஒரு பிரவேசமாக அமையும் என்றும் அமைச்சர் ரவூப் ஹக்கீம் சுட்டிக்காட்டினார்.-Vidivelli
- செங்கடகல நிருபர்