72 ஆவது சுதந்திர தினக் கொண்டாட்டத்தில் ஜனாதிபதி கோத்தாபய ராஜபக் ஷ தலைமையிலான அரசாங்கம் சிங்களத்தில் மட்டுமே தேசிய கீதம் இசைக்கப்படுமென அறிவித்ததையடுத்து மக்கள் பலதரப்பட்ட எதிர்வினைகளை வெளிக்காட்டினர். நிச்சயமாக இந்த முடிவு சிங்கள பெளத்தரிடையே மகிழ்ச்சியையும் சிறுபான்மையினராக இருப்போரிடம் விஷேடமாக தமிழரிடையே சிறு கோபத்தையும் தூண்டியிருக்கிறது. இதனை மனதிற்கொண்டு கடந்த பெப்ரவரி நான்காம் திகதி பொரளை மயான சுற்று வட்டாரத்தில் அரசாங்கத்தின் முடிவுக்குத் தமது உடன்பாடின்மையை வெளிப்படுத்துமுகமாக ஒரு குழுவினர் ஒன்றாக இணைந்து தேசிய கீதத்தை தமிழிலும் சிங்களத்திலும் பாடினர்.
அந்தக் குழுவினரோடு பேசிய போது,
கொள்கை எம்மை அழிக்கிறது
நடைபெற்ற சுதந்திரதின நிகழ்வில் சிங்களத்தில் மட்டும் தேசிய கீதம் பாடப்பட்டதை எதிர்த்தே நாம் அரச கரும மொழிகளான சிங்களத்திலும் தமிழிலும் பாடுவதற்கு ஏற்பாடு செய்துள்ளோம்.
தமிழ் பேசும் மக்களின் மொழி சார்ந்த கட்டுப்பாடுகளினால் ஏற்படுகின்ற துன்பத்தை நாம் புரிந்துகொள்கிறோம். கடந்த மூன்று தசாப்தங்களாக சிங்களம் மட்டும் என்ற கொள்கையினால் இன ரீதியான பிரச்சினைகள் எழுந்து நாடு அழிந்தது. நாம் சுதந்திரமான, சமத்துவமான இலங்கையையே எதிர்பார்க்கிறோம். அரசினால் முன்னெடுக்கப்படுகின்ற திட்டங்களில் சமத்துவமும் நீதியும் பேணப்படும்வரை எமது போராட்டத்தை தொடருவோமென சமூக செயற்பாட்டாளரும் நிகழ்வின் ஒருங்கிணைப்பாளருமான மரிஸா டி சில்வா குறிப்பிட்டார்.
அரசியல் யாப்பு
ஒரு நாட்டின் சுதந்திர தினமானது எல்லாக் குடிமக்களுக்கும் தனித்துவமான நாளொன்றாகும். தேசிய கீதம் அத்தினத்தின் சின்னமாக விளங்குகிறது. அரசியல் யாப்பும் தேசியகீதம் தமிழ் மற்றும் சிங்கள மொழிகளில் பாடப்பட வேண்டுமெனக் கூறுகிறது. ஆனால், கோத்தாபய ராஜபக் ஷ அரசாங்கம் தமிழ் பேசும் மக்கள் தேசிய கீதத்தை தமது தாய்மொழியில் பாட முடியாதென தடை விதித்துள்ளது. அரசாங்கமும் சுதந்திரதின நிகழ்வில் அப்படிப் பாட முடியுமா? முடியாதாவென மிகத் தெளிவாக அறிவிக்கவில்லை.
அதனாலேயே நாமின்று ஒன்றுகூடி இரு மொழிகளிலும் தேசிய கீதத்தை பாடி தமிழ் மக்களுடன் இணைந்து நிற்பதை வெளிக்காட்டியுள்ளோம் என கூறுகிறார் சிறிதுங்க ஜயசூரிய – ஐக்கிய சோசலிச கட்சி
கீதத்தின் அர்த்தம்
சிலரால் தேசிய கீதத்தின் அர்த்தத்தைச் சரிவரப் புரிந்துகொள்ள முடியாதுள்ளது. அதனாலேயே தமிழ் மக்களுக்கு ஆதரவளிக்கு முகமாக இரு மொழிகளிலும் தேசிய கீதம் பாடப்படுகின்ற இந்த நிகழ்வில் கலந்து கொண்டேன் என்கிறார் சட்டத்தரணியான ஷனிகா சில்வா.
இது ஒரு முன்னுதாரணமான முடிவு
சிங்கள மக்களைப் போன்றே தமிழ் பேசும் மக்களும் அரசினால் பார்க்கப்பட வேண்டும். அதனாலேயே அரசின் அறிக்கைக்கு எமது உடன்பாடின்மையை வெளிப்படுத்துகிறோம். இந்த நாட்டின் சக பிரஜைகளாக தமிழ்மொழி பேசுபவர்களுக்கு துணையாக நிற்க வேண்டுமென இளம் ஆய்வாளர் பஸன் ஜயசிங்க தெரிவித்தார்.
மக்கள் பிளவுபட்டிருக்கின்றனர்
தேசிய கீதம் சிங்கள மொழியில் மட்டுமே பாடப்பட வேண்டுமென்ற அரசின் அறிவித்தல் பற்றி நாம் கரிசனை கொண்டோம். நான் இந்நாட்டின் ஒரு பிரஜையாகவே வந்தேன். ஒரு குழுவினரால் தேசியகீதம் பாடப்பட முடியாதெனில் எம்மாலும் அது பாட முடியாதென நான் நம்புகிறேன். எமது நாட்டின் வரலாற்றில் எமது மக்கள் மொழியால் வேறுபட்டிருப்பதைக் காணமுடிகிறது.
நாம் பல கலவரங்கள் ஏற்படுவதை தடுக்கப் போராடியிருக்கிறோம். என்னைப் பொறுத்தவரை எமக்குத் தேவையானது ஒரு கீதமோ கொடியோ அல்ல. எம் அனைவராலும் தேசிய கீதமென்பது பாடப்படக் கூடியதாக இருக்க வேண்டும். தமிழ் மக்கள் மீதான எமது அன்பை வெளிப்படுத்த வேண்டும் என செனல் வன்னியாரச்சி கருத்து தெரிவித்தார்.
பன்மைத்துவ நாடு
தமிழில் தேசியகீதம் பாடப்படுவதைத் தடுக்கின்ற சில காரணிகள் காணப்படு கின்றன. நாம் பன்மைத்துவம் கொண்ட நாட்டில் வாழ்கிறோம். இன ரீதியான அடையாளங் களை மதிக்கவும் பாதுகாக்கவும் முன்வரும் முதிர்ந்த சமூகமாக நாமிருக்க வேண்டுமென கிறிஸ்தவ மதபோதகர் சரத் இத்தமல்கொட கூறினார்.
நன்றி: டெய்லி மிரர்-Vidivelli
- ஆங்கிலத்தில்: காமந்தி விக்ரமசிங்க
தமிழில்: ஷிப்னா சிராஜ்