வத்தளை பிரதேசத்தில் அமைந்துள்ள சுப்பர் மார்க்கட் ஒன்றில் நிகாப் அணிந்து சென்ற முஸ்லிம் பெண் ஒருவரை வீடியோ பதிவு செய்து சமூக வலைத்தளங்களில் நேரடியாக ஒளிபரப்பிய நபர் ஒருவருக்கு அப் பெண் துணிச்சலுடன் அளித்த பதில் குறித்தே இன்று பலரும் பேசி வருகின்றனர்.
2019 உயிர்த்த ஞாயிறு குண்டுத் தாக்குதலுக்குப் பின்னர் இவ்வாறான சம்பவங்கள் நூற்றுக் கணக்கில் பதிவாகியுள்ளன. இவற்றில் பெரும்பாலானவை இவ்வாறே சமூக வலைத்தளங்களில் பெரும்பான்மையினத்தவர்களால் பதிவிடப்பட்டன. இவற்றை அடிப்படையாகக் கொண்டு பல்வேறு வாதப்பிரதிவாதங்கள் தோற்றம் பெற்றதுடன் சம்பவ இடங்களில் பொலிசார் தலையிட்டு நிலைமையை கட்டுப்படுத்த வேண்டிய தேவையும் ஏற்பட்டது. சில சம்பவங்கள் நீதிமன்றம் வரைக்கும் சென்றன. எனினும் அவ்வாறான சந்தரப்பங்களிளெல்லாம் சம்பந்தப்பட்ட முஸ்லிம்கள் அடக்கியே வாசித்தனர். பெரும்பான்மையினருடன் எதிர்த்து நின்று வாதிடாது அமைதிகாத்தனர். இருப்பினும் வத்தளையில் சில தினங்களுக்கு முன்னர் குறித்த முஸ்லிம் பெண்மணி சம்பந்தப்பட்ட நபரை எதிர்த்த நின்று கேள்விகேட்டமை ஏனைய பெண்களுக்கும் தைரியத்தை வழங்கியுள்ளது.
நாட்டின் சூழலில் நிகாப் அணிந்து வெளியில் நடமாடுவது ஆரோக்கியமானதல்ல என்ற போதிலும் நிகாப் அணியக் கூடாது எனக் கூறுவதற்கு யாருக்கும் உரிமை கிடையாது. நிகாபுக்கு விதிக்கப்பட்ட தடையும் அவசர காலச் சட்டம் நீக்கப்பட்டதுடன் நீங்கிவிட்டது. எனினும் நிகாப் விடயத்தில் சமயோசிதமாக நடந்து கொள்ளுங்கள் என்றே உலமா சபை உள்ளிட்ட சகலரும் ஆலோசனை வழங்கியிருக்கிறார்கள்.
இப் பின்னணியில்தான் எதிர்காலத்திலும் இவ்வாறு நிகாப் அணிந்து செல்பவர்களை வேண்டுமென்றே அசெளகரியப்படுத்த பலர் முனையக் கூடும். வத்தளை விவகாரத்தில் முஸ்லிம் பெண்ணின் தைரியத்தை ஒரு சாரார் மெச்சுகின்ற அதேநேரம் குறித்த பெண்ணை வீடியோ எடுத்த பெரும்பான்மை இன நபரை அவரது சமூகத்தின் ஒருசாரார் துணிச்சல்மிக்கவராக அடையாளப்படுத்துகின்றனர் என்பதையும் நாம் கருத்தில் கொள்ள வேண்டியது அவசியமாகும்.
எனவேதான் எதிர்காலத்திலும் இவ்வாறான சம்பவங்கள் மேலும் நிகழலாம்.
சில சந்தர்ப்பங்களில் வன்முறைகளைக் கட்டவிழ்க்கவும் தீய சக்திகள் முனையக் கூடும். பொதுத் தேர்தல் ஒன்று நெருங்குகின்ற நிலையில் சிறு சிறு பிரச்சினைகளைப் பூதாகரப்படுத்தி இனவாதத்தை தூண்டுவர் என்பதில் எந்தவித சந்தேகமுமில்லை. ஆக எல்லா தருணங்களிலும் எதிர்த்து நிற்பதும் சமயோசிதமானதாக அமையப் போவதில்லை. நிலைமைகளுக்கு ஏற்றவாறு நமது சகோதர சகோதரிகள் நிதானமாக நடந்து கொள்ள வேண்டியது அவசியமாகும்.
இருப்பினும் இவ்வாறான துன்புறுத்தல்களைத் தடுப்பதற்கான நடவடிக்கைகளை ஜனாதிபதி கோத்தாபய ராஜபக் ஷ முன்னெடுக்க வேண்டும் என வலியுறுத்த விரும்புகிறோம். இவ்வாறான சம்பவங்கள் இதன் பின்னரும் இடம்பெறாதவாறு கட்டுப்படுத்த வேண்டியது ஜனாதிபதியினதும் பாதுகாப்புத் தரப்பினரதும் பொறுப்பாகும்.
சுதந்திர தின உரையில் இந்த நாட்டில் வாழும் சகல மக்களினதும் மத சுதந்திரத்தை உறுதிப்படுத்துவது தனது பொறுப்பு என ஜனாதிபதி அழுத்தமாகக் குறிப்பிட்டிருந்தார். அந்தப் பொறுப்புக்கமைய இந்த நாட்டில் வாழுகின்ற சகல இன, மத மக்களும் தத்தமது மதங்களை சுதந்திரமாக பின்பற்றவும் தத்தமது கலாசார ஆடைகளை அணியவும் சுதந்திரம் வழங்கப்பட வேண்டும்.
இதனைத் தடுக்க முனைகின்ற சக்திகள் தண்டிக்கப்பட வேண்டும்.
இல்லாதவிடத்து நாம் அனுபவிக்கும் சுதந்திரம் அர்த்தமற்றதாகிவிடும்.-Vidivelli