“மொட்டு கட்சியில் கண்டி மாவட்டத்தில் முஸ்லிம் பிரதிநிதித்துவத்தை உறுதி செய்யும் முக்கிய கூட்டம் ஒன்று 17 ஆம் திகதி வெள்ளியன்று நடைபெறவுள்ளது. மத்திய மாகாண அரசியல் ஒன்றியம் இதனை ஏற்பாடு செய்துள்ளது. கண்டி மாவட்ட ஜம்இய்யத்துல் உலமாவும் கண்டி மாவட்ட மஸ்ஜித் சம்மேளனமும் இணைந்தே சென்ரல் புரோவின்ஸ் பொலிடிகல் போரம் என்ற அமைப்பை உருவாக்கியுள்ளது” என்ற செய்தி ஊடகங்களில் வெளியாகியிருந்தது.
இந்த செய்தியை முழுமையாக வாசிக்கும் போது எதிர்வரும் பொதுத் தேர்தலில் கண்டி மாவட்டத்தில் மொட்டு கட்சி சார்பாக களமிறங்கவுள்ள பாரிஸ் ஹாஜியாரை வெற்றியடைய செய்யும் ஒரு முயற்சியாக இக்கூட்டம் ஏற்பாடு செய்யப்பட்டுள்ளதாக விளங்கினாலும், பாரிஸ் ஹாஜியார் இக்கூட்டத்தில் கலந்து கொள்ளவில்லை என்றும் மொட்டு கட்சியில் போட்டியிட முயற்சித்துக் கொண்டிருக்கும் புர்கான் ஹாஜியாரும், இஸ்திகாரும் கலந்து கொண்டனர் என்றும் மூன்று போட்டியாளர்களினதும் ஆதரவாளர்கள் கலந்து கொண்டதாகவும் அறியக் கிடைத்தது. எப்படியாயினும் கண்டி மாவட்ட ஜம்இய்யத்துல் உலமாவும், கண்டி மாவட்ட மஸ்ஜிதுகளின் சம்மேளனமும் இணைந்து சென்ரல் புரோவின்ஸ் பொலிடிகல் போரம் அல்லது மத்திய மாகாண அரசியல் ஒன்றியம் என்ற பெயரில் அமைப்பொன்றை ஏற்படுத்தி கண்டி மாவட்டத்தில் மொட்டு கட்சியில் முஸ்லிம் ஒருவரை வெற்றியடையச் செய்யும் முயற்சியாக தெரிகின்றது. இதற்கு முக்கிய மூன்று காரணங்கள் இருக்கலாம். முதலாவது ஆளும் கட்சியில் முஸ்லிம் ஒருவர் பாராளுமன்ற உறுப்பினராக இருக்க வேண்டும் என்பது.
இரண்டாவது, ஜனாதிபதி உட்பட ஆளும் கட்சி தலைவர்கள், முஸ்லிம்கள் அவர்களுக்கு வாக்களிப்பதில்லை என்று சொல்லப்படும் குற்றச்சாட்டை இல்லாமலாக்குவதற்கு, மூன்றாவது ஒரு வகையான அச்சம், எப்படியோ ஆளும் கட்சியின் சார்பில் ஒரு முஸ்லிம் பாராளுமன்ற உறுப்பினர் தெரிவு செய்ய முடிந்தால் நல்லதுதான் என்பதற்கு மாற்றுக் கருத்து இருக்க மாட்டாது. இருந்தாலும் இங்கு முக்கியமாக கவனிக்க வேண்டிய விடயம் அகில இலங்கை ஜம்இய்யத்துல் உலமா அல்லது கண்டி மாவட்ட ஜம்இய்யத்துல் உலமா இதுவரை அரசியல் சாயம் பூசிக் கொள்ளவில்லை. பதவிக்கு வரும் அரசாங்கங்களுக்கு ஆதரவாக இணைந்து செயல்பட்டனர். முதன்முதலாக கண்டி மாவட்ட ஜம்இய்யத்துல் உலமா அரசியல் களத்தில் இறங்கியுள்ளதாக விளங்குகின்றது. அநேகமான பொது மக்களினது கருத்தும் ஜம்இய்யத்துல் உலமா சபை அரசியல் சாயம் பூசிக்கொள்ளக் கூடாது என்பதுதான். அடுத்தது கண்டி மாவட்ட மஸ்ஜிதுகளின் சம்மேளனம் அங்குரார்ப்பணம் செய்து வைத்து இன்னும் ஒரு மாதம் கூட ஆகாத நிலையில் அரசியல் சாயத்தை பூசிக் கொள்வதால் சம்மேளனத்தின் வளர்ச்சி எப்படி அமையும் என்பது யோசிக்க வேண்டியுள்ளது.
ஏனென்றால் சம்மேளனத்தில் பலதரப்பட்ட கட்சியை சார்ந்தவர்கள் இருக்கலாம்.
எப்படி இருப்பினும் ஒரு முயற்சியில் காலடி வைத்துள்ளார்கள். இம்முயற்சியை எப்படி வெற்றியடைய செய்யலாம் என பார்ப்போம். கண்டி மாவட்டத்தை பொறுத்தவரையில் கடந்த ஜனாதிபதி தேர்தலில் ஐந்து வீதத்துக்கு குறைந்த முஸ்லிம் வாக்குகளே மொட்டு கட்சிக்கு கிடைத்துள்ளன. 2015 ஜனாதிபதி தேர்தலிலும் மஹிந்த ராஜபக் ஷவுக்கும் அப்படியே கிடைத்தது. ஆனால் கண்டி மாவட்டத்தில் ஸ்ரீ லங்கா சுதந்திர கட்சி முஸ்லிம்களின் ஆதரவு சுமார் 25 வீதம் இருந்து வந்துள்ளதை 2015 ஆம் ஆண்டுக்கு முன் நடைபெற்ற தேர்தல் முடிவுகளை அவதானித்தால் விளங்கும். கண்டி மாவட்டத்தில் சுமார் ஒரு இலட்சம் முஸ்லிம்கள் தான் வாக்களிக்கின்றனர். அப்படியானால் ஸ்ரீ லங்கா சுதந்திரக் கட்சி சார்ந்த அனைவரும் வாக்களித்தாலும் 25 வீதம் என்பது 25000 வாக்குகள். கண்டி மாவட்டத்தைப் பொறுத்தவரை இம்முறை பொதுத் தேர்தலில் மொட்டுக் கட்சியாக இருந்தாலும் ஐக்கிய தேசியக் கட்சியாக இருந்தாலும் சுமார் 70 – 75 ஆயிரம் விருப்பு வாக்குகள் பெற்றால்தான் ஒரு அபேட்சகர் வெற்றியடைய முடியும். ஆகவே மொட்டு கட்சி வேட்பாளரை வெற்றியடைய செய்ய இன்னும் சுமார் 40 – 50 ஆயிரம் முஸ்லிம் வாக்குகளை மொட்டு கட்சி பக்கம் இழுக்க வேண்டும். சரி எப்படியோ அப்படி முஸ்லிம்களை மொட்டு கட்சிப் பக்கம் திருப்பும்போது ஐக்கிய தேசியக் கட்சி சார்பில் போட்டியிடும் இரு முஸ்லிம்களும் நிச்சயம் தோல்வியடைவர். ஆகவே முஸ்லிம்களை மாற்றி மொட்டு கட்சிக்கு வாக்களிக்க வைக்கும்போது எமக்கு இரண்டு முஸ்லிம் வேட்பாளர்களை நிறுத்துமாறு கட்சி மேலிடத்தில் கட்டாயம் வேண்டுகோள் விடுக்க வேண்டும். அப்படியானால் தான் பல வருடங்களாக பாதுகாத்து வந்த இரண்டு பாராளுமன்ற உறுப்பினர்களைத் தக்க வைத்துக் கொள்ள முடியும்.
இதில் இன்னும் ஒரு முக்கிய விடயம்தான். ஏற்கனவே கூறியபடி மொட்டு கட்சிக்கு இன்னும் 40 – 50 வாக்குகளை திருப்பிக் கொள்ள முடியாமல் போய் ஐக்கிய தேசியக் கட்சி சார்பாகவுள்ள சுமார் 20 – 25 முஸ்லிம் வாக்குகளை மட்டும் திருப்ப முடிந்தால் மொட்டு கட்சி, ஐக்கிய தேசியக் கட்சி இரண்டு கட்சிகளிலும் போட்டியிடும் முஸ்லிம் வேட்பாளர்கள் தோல்வியடைவார்கள்.
ஏனென்றால் ஐக்கிய தேசியக் கட்சிக்கு உள்ள 20 – 25 முஸ்லிம் வாக்குகள் குறையும் போது அதில் கேட்கும் முஸ்லிம் வேட்பாளர்கள் 40 – 50 இற்கு மேல் வாக்குகள் பெறமுடியாது. அதேபோல் மொட்டு கட்சியில் போட்டியிடும் முஸ்லிம் வேட்பாளரும் தோல்வியடைவார். அப்படி வாக்குகளை பிரித்து போட்டு இரண்டு கட்சிகளிலும் போட்டியிட்ட முஸ்லிம் வேட்பாளர்கள் தோல்வியுற்றால் 60 வருடங்களுக்கு மேலாக பாதுகாத்து வந்த கண்டி மாவட்ட முஸ்லிம் பாராளுமன்ற பிரதிநிதித்துவத்தை இழந்து விடுவோம். அப்படி ஒரு நிலை ஏற்பட்டால் கண்டி மாவட்ட ஜம்இய்யத்துல் உலமா, கண்டி மாவட்ட மஸ்ஜிதுகளின் சம்மேளனம் சார்ந்த மத்திய மாகாண அரசியல் ஒன்றியம் முஸ்லிம்களின் பெரும் பழிச்சொல்லுக்கு ஆளாக நேரிடும்.
ஆகவே, கண்டி மாவட்ட ஜம்இய்யத்துல் உலமா, கண்டி மாவட்ட மஸ்ஜிதுகளின் சம்மேளனம் மற்றும் மத்திய மாகாண அரசியல் ஒன்றியம் கட்சி மேலிடத்துடன் பேசி உறுதிமொழி பெற்றுக் கொள்ள வேண்டும். ஒரு குறிப்பிட்ட விருப்பு வாக்குகள் முஸ்லிம் வேட்பாளர் பெற்றும் கண்டி மாவட்டத்தில் முஸ்லிம்கள் எவரும் வெற்றிபெறாவிட்டால் தேசிய பட்டியல் மூலம் கண்டி மாவட்டத்துக்கு ஒரு முஸ்லிம் பாராளுமன்ற உறுப்பினராக நியமிக்க வேண்டும் என்று அப்படி இல்லாவிட்டால் கையில் உள்ள பறவையை பறக்கவிட்டு மரத்தில் உள்ள பறவையைப் பிடிக்க போன கதையாகிவிடும்.
அதேபோல் ஐக்கிய தேசியக் கட்சி ஆதரவாளர்களும் கட்சி தலைமையகத்துடன் பேசி உறுதிமொழி பெற்றுக் கொள்ள வேண்டும். முஸ்லிம்கள் எவரும் தெரிவாகாத பட்சத்தில் தேசிய பட்டியல் மூலம் முஸ்லிம் ஒருவரை நியமனம் செய்ய வேண்டும் என்று.
இரண்டு கட்சிகளும் சுமார் 40 ஆயிரத்துக்கு குறையாமல் வாக்குகள் பெற்று முஸ்லிம் வேட்பாளர்கள் வெற்றியடையாவிட்டால் தேசிய பட்டியல் மூலம் நியமனம் செய்ய வேண்டும் என உறுதிமொழி பெற்றுக் கொள்வது சிறந்ததாகும்.
ஏனென்றால் கிழக்கு மாகாணத்துக்கு வெளியே முஸ்லிம் பாராளுமன்ற உறுப்பினர்களை ஓரளவு பெறக்கூடிய மாவட்டங்கள் கொழும்பு – கண்டி மட்டுமே. இம்மாவட்டங்களிலும் எமது பிரதிநிதித்துவத்தை இழந்துவிட்டால் மீண்டும் எப்போதும் பெற முடியாமல் போய்விடும்.-Vidivelli
- அபூ ரனாஸ்