‘பின்னர் ஆண் பெண் கலப்பான இந்திரியத் துளியில் இருந்து நிச்சயமாக மனிதனை நாமே படைத்தோம், அவனை சோதிப்பதற்காக அவனை கேட்பவனாகவும், பார்ப்பவனாகவும் ஆக்கினோம்’: ஸூரத்துத் தஹ்ர் (வசனம் 2)
‘யாழினிதென்பார், குழலினிதென்பார் மழலை மொழி கேளாதார்’ என்ற வரியினை பிற்படுத்தி, மேற்போந்த புனித அல் குர்ஆன் வசனத்தோடு இணங்கி சிந்திக்கையில், குழந்தைச் செல்வத்தின் பெறுமதியினையும், நானே உணவளிக்கிறேன் என இறைவன் பொறுப்பேற்பதனூடாக அவன் மனிதனை படைத்து போஷிப்பதன் முக்கியத்துவத்தையும் உள்ளங்கை நெல்லிக் கனியாக அறிவுடையோரும் சிந்தியாதோரும் தெளிவு பெறலாம்.
பாதைகள் தோறும் சாக்கடைகள் முழுதும் குப்பைத் தொட்டிகளிலும் குழந்தைகள் எறியப்படுவது என்னவோ அறிவிருந்தும் சிந்திக்க மறந்த மூடர்களின் செயல் தான் எனலாம். பழிக்குப் பயந்தும், வறுமைக்காகவும், கௌரவத்திற்காகவும் செய்யப்படும் சிசுக் கொலைகள் ஒரு விதம் எனில், சிசுவாய் பரிணமித்து இந்த பூமியின் சுக துக்கங்களை கண்டிட முன்பே இருட்டறையில் செய்யப்படும் கொலைகளுக்கு ‘கருக்கலைப்பு‘ என நாகரிகமாகப் பெயர் சூட்டப்படுகின்றது. தற்சமயம் கருக்கலைப்பு நாகரிக போதையின் விளைவென்றால் அதுவும் மிகையல்ல.
ஏன் கருக்கள் கலைக்கப்படுகின்றன?
தனக்குள் இருக்கும் உயிரினை வதம் செய்வதற்கு பல்வேறு தரப்பினர் பல்வேறு காரணிகளை முன் வைக்கின்றனர். பாலியல் வல்லுறவின் மூலம் பெறப்பட்ட சிசு, குறைந்த வயதில் கர்ப்பம், தாயின் உயிரை காக்கும் பொருட்டான பாதுகாப்புக் காரணிகள் என்பவை குறிப்பிடத்தக்கவை. ஆனால் இன்றைய மனிதாபிமானமற்ற உலகிலே அத்தகைய அவசியங்களையும் தாண்டி வறுமை, பகட்டு, இடைவெளியில்லாது கருவுற்றமை, அதிக எண்ணிக்கையிலான பிள்ளைகள் காணப்படுகின்றமை மற்றும் அழகு குறைந்து விடும் போன்ற ஏற்றுக் கொள்ளப்பட முடியாத காரணிகளும் கருக்கலைப்பினை நியாயப்படுத்த சமூகத்தில் முன்வைக்கப்படுகின்றன.
கொழும்பில் காணப்படும் இரண்டு கருக்கலைப்பு நிலையங்களில் மேற்கொள்ளப்பட்ட ஆய்வின் அடிப்படையில் கருக்கலைப்பினை விரும்பும் 90 சதவீதமானோர் திருமணமானவர்களாக இருப்பதுடன், தாமே விரும்பி கருக்கலைப்பினை நாடிச் செல்கின்றனர். இவர்களது சிசு வதைக்கான காரணங்களாக முன்னரே குறிப்பிடப்பட்ட அதிமுக்கியமான தேவைகள் காணப்படுமா என்பது கேள்விக்குறியே.
ஐக்கிய நாடுகள் சபையினால் கிராமப் புறங்களில் மேற்கொள்ளப்பட்ட கணக்கெடுப்பின் படி ஒவ்வொரு 1000 சனத்தொகைப் பரம்பலுக்கும் 54 கருக்கலைப்பு சம்பவங்கள் இடம்பெறுவதாக அறிக்கையிடப்பட்டுள்ளது. கருக்கலைப்பிற்கு ஏற்றுக் கொள்ளக்க கூடிய காரணங்கள் ஒருபுறமிருக்க கருக்கலைப்பிற்கு காரணிகளை தேடித் திரிபவர்கள் கண்டிக்கவும் தண்டிக்கவும்படக் கூடியவர்கள்.
கருக்கலைப்பு தொடர்பாக இலங்கை சட்டம் என்ன கூறுகிறது?
வெள்ளையன் அன்று விட்டுச் சென்ற குற்றவியல் சட்டமானது தற்போது வரைக்கும் சில மாற்றங்களுடன் நடைமுறையில் இருக்கும் பட்சத்தில், 1883 ஆம் ஆண்டின் இலங்கை குற்றவியல் சட்டமானது கருக்கலைப்புச் செய்வதனை தண்டிக்கப்படக் கூடிய குற்றமாக இனங்காணுகின்றது. ஆகவே, இலங்கையைப் பொறுத்தவரையில் கருவானது தனது வளர் நிலையில் கலைக்கப்படுதல் தண்டனைக்குரிய குற்றம் என்பதுடன் இலங்கையின் நீதவான் நீதிமன்றில் அது தொடர்பில் வழக்குகளை தொடர முடியும்.
இலங்கையில் காணப்படும் குற்றவியல் சட்டத்தின் படி, தாயின் உயிரைப் பாதுகாக்கும் நன்னோக்கம் இல்லாது வேண்டுமென்றே கருக்கலைப்பினை மேற்கொண்டமை ஊர்ஜிதப்படுத்தப்பட்டால் 3 வருடங்களுக்கு மேற்படாத சிறை அல்லது தண்டப்பணம் அல்லது இரண்டும் தண்டனையாக விதிக்கப்படும். குறித்த தண்டனையானது தனக்குத் தானே கருக்கலைப்பு செய்து கொள்ளும் தாய்க்கும் பொருந்தக் கூடியதாகும். மேற் சொன்ன சட்டத்தின் பிரிவு 303 இன் ஏற்பாடாகும். அதனைத் தவிர பிரிவு 304 இன் பிரகாரம் தாயின் சம்மதம் இல்லாது மூன்றாம் நபர் குறித்த தாய்க்கு கருக்கலைப்புச் செய்வாரானால் 20 வருடங்களுக்கு குறையாத சிறைத் தண்டனைக்கும் தண்டப்பண செலுத்துகைக்கும் ஆளாக நேரிடும். அத்தோடு கருக்கலைப்பின் போது தாய் இறக்கும் நிலை ஏற்படுமானாலும் கூட 20 வருடங்கள் சிறை தண்டனை விதிக்கப்பட முடியும் என்பதுடன் குறித்த கருக்கலைப்பு செயற்பாடானது இறப்பை ஏற்படுத்தும் என கருக்கலைப்பை மேற்கொண்டவர் அறிந்திருப்பது அவசியமில்லை என்பது பிரிவு 305 நமக்கு அளிக்கும் விளக்கமாகும்.
இந்த ஏற்பாடுகள் வழியாக நாங்கள் கவனிக்க வேண்டிய முக்கிய விடயம் என்னவெனில், தாயின் உயிரை பாதுகாக்கும் நன்னோக்கம் இல்லாது வேண்டுமென்றே தேவையற்ற காரணங்களுக்காக செய்யப்படும் கருக்கலைப்பிற்கு தகுந்த தண்டனை காணப்படுகின்றது என்பதே.
மற்றும் சட்ட பிரிவுகளுக்கு இணங்க இலங்கை, கருக்கலைப்பு தொடர்பில் மிகக் கடுமையான சட்டப் போக்கினை கொண்டுள்ளமை தெளிவாவதுடன், கருக்கலைக்கப்பட்டமையானது நீதிமன்றத்தில் வழக்கு தொடுப்பதன் ஊடாக நிரூபிக்கப்படும் போது குற்றவாளி சட்டத்திடமிருந்து தப்பிக்க முடியாது.
தாயின் உயிரை பாதுகாக்கும் நன்னோக்கம் என்ற அங்கமானது எவ்வாறான அடிப்படைகளைக் கொண்டது என்பதற்கு எந்த விதமான பொருள் கோடலோ விளக்கங்களோ கொடுக்கப்படாத நிலையில் மருத்துவ சான்றறிக்கை மூலம் கரு மேலும் வளர்வது தாயின் உயிருக்கு ஆபத்து என உறுதிப்படுத்தப்படுவது போதுமானதாகக் கருதப்பட்டு பரவலாக அரச வைத்தியசாலைகளில் கருக் கலைப்பு மேற்கொள்ளப்படுகின்றது.
கருக்கலைப்பு ஏன் அவசியம்?
நாகரிகப் பகட்டில் கருக்கலைப்பினை நாடும் கயவர்களுக்கு மத்தியில் கருக்கலைப்பிற்கு அனுமதி அவசியம் எனவும் அதன் வழி இலங்கையில் காணப்படும் இறுக்கமான கருக்கலைப்பு சட்டத்தினை நெகிழ்வுப்படுத்தி அதனை சற்றே சட்ட ரீதியாக்க வேண்டும் எனவும் ஒரு தரப்பினர் கோஷம் எழுப்பிக் கொண்டிருக்கின்றனர்.
கற்பழிப்பு மற்றும் குடும்ப உறவுகளுக்கிடையில் ஏற்பட்ட தகாத உறவுகளினால் உருவான கருக்களை சட்ட ரீதியாக கலைப்பதற்கு அனுமதி பெற்றுத் தரும் படியும் அல்லது சட்டத்தை இலகுவாக்கி வைக்கும் படியும் இந்த சாரார் கோஷமிடுகின்றனர்.
1995, 2011 மற்றும் 2013 என தொடர்ச்சியாக எடுத்தியம்பப்பட்ட சட்டத்தில் திருத்தம் கொண்டு வருவதற்கான கோரிக்கையானது 2017 ஆம் ஆண்டு நீதிபதி அலுவிகாரேவினால் எழுத்து மூலமான பரிந்துரையாகவே முன்வைக்கப்பட்டது. அவரது கோரிக்கை, ‘‘கற்பழிப்பு, குடும்ப உறவுகளுக்கு இடையில் ஏற்பட்ட தகாத உறவுகளினால் உண்டான கரு, 16 வயதிற்கு கீழ்பட்ட பிள்ளைகள் கருவுற்றால் மற்றும் தீவிரமான கருச்சிதைவின் காரணமாக தாயின் உயிருக்கு ஆபத்து ஏற்படும் எனில் கருக்கலைப்பு செய்து கொள்ள முடியும்’‘ என்றவாறு அமைந்ததுடன், குறித்த பரிந்துரைகளுக்கு நியாயங்களாக இலங்கையில் 12.5 வீதத்திற்கு மேற்பட்ட தாய் வழி மரணங்கள் நிகழ்வதுடன் அந்த மரணங்களுக்கு அஸ்பிரின் பாவனை, பாரம்பரிய கருக்கலைப்பு முறைகள் போன்ற சட்டத்திற்கு முரணான கருக்கலைப்பு முறைகளே காரணங்கள் என்ற அம்சம் முன்வைக்கப்படுகின்றது. எனவே, சட்டத்தை நெகிழ்வாக்குவதன் மூலம் அல்லது பாதுகாப்பான கருக்கலைப்பு முறைகளை சட்டத்திற்கு உட்பட்டு பயன்படுத்துவதன் மூலம் உயிரிழப்பை தடுக்க முடியும்.
சட்டத் திருத்த மசோதா ஏற்றுக் கொள்ளப்பட்ட போதிலும் குறித்த மசோதா சட்டமாக்கப்படாது தடுத்து வைக்கப்பட்டதுடன் மதத் தலைவர்களது எதிர்ப்பு தான் குறித்த மசோதா, மசோதாவாகவே காணப்படுவதற்கு காரணம் என நம்பப்படுகின்றது.
கருக்கலைப்பு பற்றி இஸ்லாம் பேசுகிறதா?
ஸூறத்துல் அன்ஆமின் 151 ஆவது வசனம், ‘வறுமைக்குப் பயந்து உங்கள் குழந்தைகளை கொல்லாதீர்கள், ஏனெனில் அவர்களுக்கும் உங்களுக்கும் நாமே உணவளிக்கின்றோம்’ என்பது வல்ல இறைவனின் கட்டளையாகும்.
இஸ்லாம் ஓர் அழகிய மார்க்கம். எல்லாக் காலத்திற்குமான சன்மார்க்கமுமாகும். ஆகவே, சிசுக் கொலை என்பது எவ்வழியிலும் இஸ்லாத்தில் தடுக்கப்பட்டதாகவே காணப்படுகின்றது. எத்தனையோ குர்ஆன் வசனங்களும், ஹதீஸ்களும் அதற்கு சான்று பகர்கின்ற அதேவேளை, நிர்ப்பந்த சூழ்நிலைகளில் கருக்கலைப்பிற்கு அனுமதி வழங்குகின்ற தற்கால பத்வாக்களும் காணப்படுகின்றன.
அந்த வகையில் சவூதி அரேபிய நாட்டின் மக்கா நகரில் அமைந்துள்ள உலக முஸ்லிம் லீக்கின் இஸ்லாமிய பிக்ஹு சபையானது, ‘120 நாட்களை எட்டிய கருவினை கலைத்தல் அனுமதிக்கப்படாது என்பதுடன், அவ்வாறு கருவினை தொடர்ந்து வளரச் செய்வதானது தாயின் உயிரை பாதிக்கும் என கண்டறியப்படுமானால் கருக்கலைப்பினை செய்து கொள்ளலாம்’ என அனுமதிக்கிறது.
மேலும் இஸ்லாத்தின் சில அறிஞர்கள் கற்பழிப்பு, குடும்ப உறவுகளுக்கிடையிலான தகாத உறவின் மூலம் உண்டான சிசு, முறைகேடான உறவுமுறையால் உருவான கரு என்பவற்றை கலைப்பதற்கு அனுமதிக் கொடுத்தாலும் சிலர் அதனை ஏற்றுக் கொள்ளவில்லை. இஸ்லாத்தைப் பொறுத்தவரையில் தேவையற்ற விதத்தில் உருவான கருவாக இருப்பினும் தாயின் உயிருக்கு பாதிப்பில்லாத போது அதனை கலைக்க முடியாது என்பதே நிதர்சனமான உண்மை.
ஆனால், அதற்கு மாறாக பொஸ்னியாவில், இராணுவத்தினரால் பெண்கள் கற்பழிக்கப்பட்ட போது கருவானது 120 நாட்கள் வளர்ச்சியை எட்ட முன்னர் கலைக்கப்பட முடியும் என பத்வா வழங்கப்பட்டது. இதேபோன்ற அனுமதி அல்ஜீரியாவிலும் வழங்கப்பட்டமை குறிப்பிடத்தக்கதாகும்.
2009 இல், மாலைதீவிலும் கற்பழிப்பிற்கு உள்ளான பெண்கள் கருக்கலைப்பு செய்து கொள்ள அனுமதிக்கப்பட்டது. அத்துடன், 1998 ஆம் ஆண்டு அல்-அஸ்ஹர் பல்கலைக்கழகத்தின் ஷெய்க் முகம்மத் செய்யத் தன்தாவி, கற்பழிப்பின் மூலம் கருவுற்ற பெண்கள் கருக்கலைப்பு செய்து கொள்ள அனுமதி அளித்து சட்டத்தினையும் வரைந் தார். ஆனால், அவரது தீர்மானம் பலராலும் விமர்சிக்கப்பட்டது.
ஒவ்வொரு உயிரும் வாழும் உரிமையை கொண்டுள்ளது.
உலகை காணாத இளங்கருவினை இருட்டறையிலேயே கொலை செய்வது சர்வ சாதாரணமாக தற்காலத்தில் நடந்தேறுகிறது. அதன் பாரதூரமோ, பாவ கணக்கோ யாராலும் எண்ணிப் பார்க்கப்படுவதில்லை. நான் உருவாக்கிய சிசு தான் என்ற மமதை கருக்கலைப்பிற்கு வழிவகுக்குமேயானால் அது அவ்வாறில்லை. அல்லாஹ்வே படைக்கிறான், அவனே பரிபாலிக்கிறான், அவனே உணவளிக்கிறான். அவனே கேள்வி கேட்பவனாகவும் இருக்கிறான். நிச்சயமாக நாங்கள் வெளிப்படையாகவும் மறைமுகமாகவும் செய்தவை தொடர்பில் கட்டாயமாக விசாரிக்கப்படுவோம். சட்ட ஏற்பாடுகளும் விதிவலக்கானவை அல்ல, ஏற்றுக்கொள்ளப்படக் கூடிய காரணங்கள் இல்லாது கருக் கலைப்பினை செய்து கொள்பவர்கள் சட்டத்தின் முன் நிறுத்தப்படக் கூடியவர்கள். பச்சிளங் கருவின் உயிர் வாழும் உரிமையினை பறித்து அதி உயர் உரிமை மீறலினை மேற்கொள்பவர்கள் கடும் தண்டனைக்கு ஆளாகக் கூடியவர்கள். அது கருக்கலைப்பினை விரும்பி ஏற்கும் தாயாயினும் சரியே.
இருப்பினும் விதிவிலக்கான சூழலில் உண்டான கரு தொடர்பில் சற்றே சிந்திக்க வேண்டியவர்களாய் நாம் காணப்படுகின்றோம். பரவலாக இஸ்லாமிய உலக நாடுகளில் காணப்படும் அசாதாரண போர் சூழலின் காரணமாக கற்பழிக்கப்படும் பெண்கள் சுமக்கும் கரு நமக்கு கண்ணீரை தரவல்லது தான். மேலும் சாதாரண நிலையிலும் கூட்டு வன்புணர்விற்கு ஆளாகும் பெண்களின் கரு தொடர்பிலும் கலந்துரையாட வேண்டியுள்ளது.
இவ்வாறான நியாயப்படுத்தக் கூடிய காரணங்கள் எல்லாமே எதிர்பாராத நிகழ்வுகளாய் காணப்படும். குறித்த சம்பவம் தடுக்கப்பட முடியாததாகவும் அப் பெண்களின் சக்திக்கு அப்பால்பட்டதாகவும் இருந்திருக்கும். அந்த வகையில் விதி ஒன்றிருந்தால் விதி விலக்கொன்று கட்டாயமாக காணப்பட வேண்டும். இருப்பினும் சட்டங்கள் உருவாக்கப்படும் போது அதன் ஓட்டைகளை மாத்திரமே தேடி அனுபவிக்கும் கயவர்கள் தொடர்பில் தான் எனது சிந்தனை நீள்கிறது.-Vidivelli
- சட்டத்தரணி கிப்சியா செய்னுல் ஆப்தீன் LLB