முஸ்லிம்களின் புனித நகரான மக்காவின் ஹரம் ஷரீப்பள்ளிவாசல் அபிவிருத்திப் பணிகளின்போது அப்பகுதியில் அமைந்திருந்த இலங்கையின் “சிலோன் ஹவுஸ்” எனும் விடுதிக்கட்டிடம் சவூதி அரசாங்கத்தினால் சுவீகரிக்கப்பட்டு நஷ்ட ஈடாக சுமார் 100 மில்லியன் அமெரிக்க டொலர்களுக்கும் மேற்பட்ட தொகை வழங்கப்பட்டுள்ளது. அந்தப் பணத்துக்கு என்ன நடந்தது எனத்தெரியவில்லை என ஹஜ் கமிட்டி தெரிவித்துள்ளது.
இந்த கொடுக்கல் வாங்கலுடன் முன்னைய சிரேஷ்ட அமைச்சரொருவரும் சவூதியிலுள்ள இலங்கை வர்த்தகர்கள் சிலரும் தொடர்புபட்டுள்ளதாகவும் இது தொடர்பில் விசேட விசாரணையொன்றினை மேற்கொண்டு இந்நிதிக்கு என்ன நேர்ந்துள்ளது? இதனுடன் தொடர்புபட்டவர்கள் யார் என்பதைக் கண்டறியுமாறு பிரதமர் மஹிந்த ராஜபக் ஷவிடம் வேண்டியுள்ளதாகவும் தெரிவிக்கப்பட்டுள்ளது.
அண்மையில் ஹஜ் உடன்படிக்கையில் கைச்சாத்திடுவதற்காக சவூதி அரேபியாவுக்குச் சென்ற ஹஜ்குழு இது தொடர்பான விபரங்களைத்திரட்டி வந்துள்ளதாக கூறப்படுகிறது.
இவ்விவகாரம் தொடர்பில் ஹஜ் குழுவின் உறுப்பினர் அப்துல் சத்தார் கருத்து தெரிவிக்கையில்;
இலங்கைக்கு சொந்தமான “சிலோன் ஹவுஸ்” ஹரம்ஷரீபுக்கு அருகில் மக்காவில் அமைந்திருந்தது. இந்தப் பிரதேசம் விலைமதிப்பிட முடியாத பகுதியாகும். இந்தப் பகுதியில் அமைந்திருந்த சிலோன் ஹவுஸே சவூதி அரசாங்கத்தினால் சுவீகரிக்கப்பட்டு 100 மில்லியனுக்கும் மேற்பட்ட டொலர்கள் நஷ்டஈடாக வழங்கப்பட்டுள்ளது.
2006 ஆம் ஆண்டு இலங்கையின் பிரதிநிதிகள் சிலர் சவூதி அரசாங்கத்துடன் பேச்சுவார்த்தை நடத்தியுள்ளனர். அப்போது சிலோன் ஹவுஸ் அமைந்திருந்த காணிக்கு 100 மில்லியன் அமெரிக்க டொலர் வழங்குவதற்கு சவூதி அரசாங்கம் இணக்கம் தெரிவித்தது.
மர்ஹும் ரி.பி. ஜாயா உட்பட முஸ்லிம் புத்திஜீவிகளின் உதவியுடன் நிர்மாணிக்கப்பட்ட சிலோன் ஹவுஸ் கட்டிடம் இலங்கையின் அமைப்பொன்றின் மூலம் நிர்வகிக்கப்பட்டு வந்துள்ளது. இந்த கட்டிடத்துக்காக சவூதி அரசினால் வழங்கப்பட்ட இந்தப் பெருந்தொகை நிதி சவூதி அரசாங்கத்தின் சட்ட திட்டங்களுக்கு அமைய சிலோன் ஹவுஸ் அமைப்புக்கே வழங்கப்பட்டுள்ளது.
இந்த கொடுக்கல் வாங்கலுடன் முன்னாள் சிரேஷ்ட அமைச்சரொருவரும் அவருக்கு நெருக்கமான சவூதியில் வாழும் இலங்கை வர்த்தகர்கள் சிலரும் சம்பந்தப்பட்டுள்ளதாகத் தெரியவந்துள்ளது. கிடைக்கப்பெற்ற நஷ்டஈட்டைப் பயன்படுத்தி இலங்கை ஹஜ் யாத்திரிகர்கள் சவூதியில் தங்குவதற்கு விடுதி வசதிகள் ஏற்பாடு செய்திருந்தால் அது குறைந்த செலவில் இலங்கை யாத்திரிகர்கள் தங்குவதற்கு உதவியாக இருக்கும்.
சிலோன் ஹவுஸ் கட்டிடத்துக்காக வழங்கப்பட்ட நஷ்டஈட்டுத் தொகையில் ஊழல்கள் இடம்பெற்றுள்ளன. பல்வேறு அரசியல் அழுத்தங்கள் காரணமாக இந்த ஊழல்கள் மறைக்கப்பட்டுள்ளதாகவும் அவர் தெரிவித்தார்.
இவ்விவகாரம் தொடர்பில் ஹஜ் குழுவின் தலைவர் மர்ஜான் பளீலை தொடர்பு கொண்டு வினவியபோது இவ்விவகாரம் தொடர்பில் ஆராய்ந்து உண்மை நிலையினை கண்டறியுமாறு பிரதமரிடம் வேண்டியுள்ளதாகத் தெரிவித்தார்.-Vidivelli
- ஏ.ஆர்.ஏ. பரீல்