ஏப்ரல் 21 தாக்குதல் விவகாரம்: இருவருக்கு நிபந்தனையுடன் பிணை
61 பேரின் விளக்கமறியல் 14 ஆம் திகதி வரை நீடிப்பு
உயிர்த்த ஞாயிறு தாக்குதலின் பின்னர் சந்தேகத்தின்பேரில் கைது செய்யப்பட்டு விளக்க மறியலில் வைக்கப்பட்டுள்ள காத்தான்குடி மற்றும் காத்தான்குடியை அண்டிய பிரதேசங்களைச் சேர்ந்த 63 பேரில் இரண்டு பேர் நிபந்தனையுடன் கூடிய பிணையில் நேற்று விடுதலை செய்யப்பட்டதுடன் ஏனைய 61 பேரினதும் விளக்கமறியல்எதிர்வரும் 14 ஆம் திகதி வரை நீடிக்கப்பட்டுள்ளது.
கடந்த 21.4.2019 உயிர்த்த ஞாயிறன்று இடம் பெற்ற தாக்குதலின் பின்னர் ஸஹ்றான் குழுவோடு தொடர்புடையவர்கள் என்றும் ஹம்பாந்தோட்டை மற்றும் நுவரெலியா போன்ற இடங்களுக்கு பயிற்சிக்காக சென்றார்கள் என்ற சந்தேகத்தின் பேரிலும் கைது செய்யப்பட்ட குறித்த சந்தேக நபர்கள் மட்டக்களப்பு நீதிவான் நீதிமன்ற நீதிபதி ஏ.சி. ரிஸ்வான் முன்னிலையில் நேற்று செவ்வாய்க்கிழமை ஆஜர்படுத்தப்பட்டபோதே இரண்டு பேர் நிபந்தனையுடன் கூடிய பிணையில் விடுதலை செய்யப்பட்டதுடன் ஏனைய 61 பேரினதும் விளக்கமறியல் எதிர்வரும் 31 ஆம் திகதி வரை நீடிக்கப்பட்டுள்ளது.
பிணையில் விடுதலை செய்யப்பட்ட குறித்த இரண்டு சந்தேக நபர்களும் தலா ஐந்து இலட்சம் ரூபா இரண்டு சரீரப் பிணையிலும் 25000 ருபா ரொக்கப் பிணையிலும் விடுதலை செய்யப்பட்டதுடன் இவர்களுக்கு வெளிநாடு செல்லவும் தடை விதிக்கப்பட்டுள்ளது.
இவர்கள் தமது முகவரியை மாற்றுவதாயின் பொலிசாருக்கு அறிவிக்க வேண்டும் எனவும் விசாரணைகளுக்கு ஒத்துழைப்பு வழங்க வேண்டும் என்றும் நீதிவானினால் உத்தரவு பிறப்பிக்கப்பட்டுள்ளது.
இவ்விரண்டு சந்தேக நபர்களும் மோட்டார் சைக்கிள் விற்பனை செய்பவர்கள் எனவும் இவர்கள் ஸஹ்றானின் சகோதரர்களின் மோட்டார் சைக்கிளை விற்பனை செய்தவர்கள் என்ற சந்தேகத்தின் பேரில் கைது செய்யப்பட்டு விளக்கமறியலில் வைக்கப்பட்டவர்கள் என்றும் தெரிய வருகின்றது.
கடந்த 21.4.2019 உயிர்த்த ஞாயிறன்று இடம்பெற்ற தாக்குதலின் பின்னர் கைது செய்யப்பட்டு விளக்கமறியலில் வைக்கப்பட்டுள்ள சந்தேக நபர்கள் அனைவரும் பலத்த பாதுகாப்புக்கு மத்தியில் நேற்று மட்டக்களப்பு நீதிமன்றுக்கு அழைத்து வரப்பட்டதுடன் நீதிமன்றத்தின் பாதுகாப்பும் பலப்படுத்தப்பட்டிருந்தது.
குறித்த சந்தேக நபர்கள் கடந்த மாதம் வரை மட்டக்களப்பு சிறைச்சாலையில் விளக்கமறியலில் வைக்கப்பட்டிருந்த நிலையில் இவர்களில் பலர் தற்போது நாட்டில் வெவ்வேறு பாகங்களிலுள்ள சிறைச்சாலைகளுக்கு மாற்றப்பட்டுள்ளமை குறிப்பிடத்தக்கது.-Vididvelli
- எம்.எஸ்.எம்.நூர்தீன்