அடிப்படைவாதத்துக்கு யாரும் இடமளிக்காதீர்
உயிர்த்த ஞாயிறு போன்ற செயற்பாடுகளை நிறுத்தி விடுங்கள்: கிறிஸ்மஸ் ஆராதனையில் பேராயர் கர்தினால் ரஞ்சித் ஆண்டகை
சக மனிதனுக்கு கவலையும் கஷ்டத்தையும் கொடுக்குமாறு எந்தவொரு சமயத்திலும் கூறப்படவில்லை. எனவே உயிர்த்த ஞாயிறு தாக்குதலின் பின்புலத்தில் உள்ளவர்களிடம் இவ்வாறான செயற்பாடுகளை நிறுத்திவிடுமாறும் அடிப்படைவாதத்துக்கு இனி வாழ்நாளில் இடம்கொடுக்க வேண்டாம் என்றும் கேட்டுக் கொள்வதாக பேராயர் கர்தினால் மெல்கம் ரஞ்சித் ஆண்டகை தெரிவித்தார்.
நீர்கொழும்பு – கட்டுவாப்பிட்டி புனித செபஸ்தியார் தேவாலயத்தில் நேற்று நள்ளிரவு பேராயர் தலைமையில் இடம்பெற்ற கிறிஸ்மஸ் விஷேட ஆராதனைகளின் போதே அவர் இவ்வாறு தெரிவித்தார்.
மேலும் உயிர்த்த ஞாயிறு தினத்தன்று தற்கொலை குண்டு தாக்குதலுக்கு உள்ளான கொழும்பு – கொச்சிக்கடை புனித அந்தோனியார் திருத்தலம் மற்றும் மட்டக்களப்பு சியோன் தேவாலயம் உள்ளிட்ட நாடளாவிய ரீதியிலுள்ள தேவாலயங்களிலும் விஷேட ஆராதனைகள் பாதுகாப்புகளுக்கு மத்தியில் இடம்பெற்றன. ஆராதனையின் போது தொடர்ந்தும் உரையாற்றிய பேராயர் கூறியதாவது, உயிர்த்த ஞாயிறு தினத்தன்று மேற்கொள்ளப்பட்ட குண்டு தாக்குதல்களைப் போன்ற சம்பவங்கள் வாழ்க்கையை புதிதாக சிந்திக்க வைத்துவிட்டது. எனினும் நாம் ஒருபோதும் இவ்வாறான தாக்குதலை ஏற்படுத்தியவர்கள் மீது கோபம் கொள்ளவில்லை. இறைவனை நேசிப்பவர்களுக்கு மனிதர்களை கொல்ல முடியாது.
நான் உங்கள் அனைவரையும் நேசிக்கின்றேன். நீங்கள் என்னுடைய பிள்ளைகள். நான் எந்த சந்தர்ப்பத்திலும் உங்களுடன் இருப்பேன். இன்னொரு மனிதனுக்கு கவலையையும் கஷ்டத்தையும் கொடுக்குமாறு எந்தவொரு கடவுளும் கூறவில்லை. எந்த சமயத்தில் அவ்வாறு கூறப்பட்டிருக்கிறது? ஏதேனுமொன்றில் அவ்வாறு கூறப்பட்டிருக்குமாயின் அது சமயம் அல்ல. அரசியலாகும். உயிர்த்த ஞாயிறு தாக்குதலின் பின்புலத்தில் உள்ளவர்களிடம் கேட்டுக் கொள்கின்றேன். இவ்வாறான செயற்பாடுகளை நிறுத்திவிடுங்கள். அடிப்படை வாதத்துக்கு உங்கள் வாழ்நாளிலில் இடம் கொடுக்காதீர்கள் என்றார்.-Vidivelli