வஸீம் கொலையாளிகளை உடன் கைது செய்யுங்கள்: நீதிமன்றம் சி.ஐ.டி.க்கு உத்தரவு
சந்தேக நபர்களை அடையாளம் காண நாஸாவின் உதவியை நாடியுள்ள விசாரணையாளர்கள்
- எம்.எப்.எம்.பஸீர்
பிரபல றக்பி வீரர் வஸீம் தாஜுதீனை கொலை செய்த கொலையாளிகளை உடனடியாகக் கைது செய்து நீதிமன்றில் ஆஜர் செய்யுமாறு கொழும்பு மேலதிக நீதிவான் இசுரு நெத்திகுமார நேற்று சி.ஐ.டி.க்கு உத்தரவிட்டார். உண்மையான கொலையாளிகளை இதுவரை சி.ஐ.டி. கைது செய்யவில்லை என்பதை சுட்டிக்காட்டிய நீதிவான் இசுரு நெத்திகுமார, தேவையற்ற தாமதங்களை தவிர்த்து உடன் உண்மைக் கொலையாளிகளை கைது செய்யுமாறு சி.ஐ.டி.க்கு கண்டிப்பான உத்தரவை விடுத்தார். இந்நிலையில் வஸீம் தாஜுதீன் படுகொலையில் குற்றவாளிகளைக் கைதுசெய்ய சி.ஐ.டி. அமெரிக்காவின் தேசிய வானூர்தியியல் மற்றும் விண்வெளி நிர்வாகம் எனப்படும் நாஸாவின் (National Aeronautics and Space Administration – NASA) உதவியை நாடியுள்ளது. தாஜுதீன் கொலை சந்தேக நபர்களை அடையாளம் காண்பதற்காக கொலை இடம்பெற்ற தினம், குறிப்பிட்ட நேரத்தில் நாஸாவின் செயற்கைக் கோளினால் பிடிக்கப்பட்ட படங்கள், வீடியோக்களை தமக்கு பெற்றுத்தருமாறு கோரியுள்ளதாக வஸீம் தாஜுதீன் படுகொலை விவகாரத்துக்கு பொறுப்பான உதவி பொலிஸ் அத்தியட்சர் இந்திக லொக்குஹெட்டி நீதிமன்றுக்கு நேற்று அறிவித்தார்.
வஸீம் தாஜுதீன் படுகொலை விவகாரம் தொடர்பிலான வழக்கு விசாரணைகள் நேற்று பிற்பகல் கொழும்பு மேலதிக நீதிவான் இசுரு நெத்திகுமார முன்னிலையில் விசாரணைக்கு வந்தது.
இதன்போது இந்த விவகாரத்தில் சாட்சிகளை மறைத்தமை, மாற்றியமை மற்றும் கொலைச் சதியில் தொடர்புள்ளதாக சந்தேகத்தின் அடிப்படையில் கைது செய்யப்பட்டு பிணையில் உள்ள நாரஹேன்பிட்டி பொலிஸ் நிலைய முன்னாள் குற்றவியல் பொறுப்பதிகாரி அங்கொடகே சுமித் சம்பிக்க, மேல் மாகாணத்துக்கு பொறுப்பான முன்னாள் சிரேஷ்ட பிரதிப் பொலிஸ்மா அதிபர் அனுர சேனநாயக்க மற்றும் கொழும்பு முன்னாள் சட்ட வைத்திய அதிகாரி ஆனந்த சமரசேகர ஆகியோர் மன்றில் ஆஜராகியிருந்தனர்.
சட்டமா அதிபர் சார்பில் வழமையாக மன்றில் ஆஜராகும் பிரதி சொலிசிட்டர் ஜெனரால் டிலான் ரத்நாயக்க வெளிநாடு சென்றுள்ளதால் அவர் ஆஜராகாத நிலையில், சி.ஐ.டி. சார்பில் விசாரணை அதிகாரிகளான மனிதப் படுகொலை குறித்த விசாரணை அறையின் உதவி பொலிஸ் அத்தியட்சகர் இந்திக லொக்குஹெட்டி, அதன் பொறுப்பதிகாரி பிரதான பொலிஸ் பரிசோதகர் ரஞ்ஜித் முனசிங்க மற்றும் சார்ஜன்ட் ரத்னப்பிரிய ஆகியோர் மேலதிக விசாரணை அறிக்கையுடன் மன்றில் ஆஜராகினர்.
இதன்போது மன்றில் மேலதிக விசாரணை அறிக்கையை சமர்ப்பித்து உதவி பொலிஸ் அத்தியட்சகர் இந்திக லொக்குஹெட்டி விசாரணைகளை தெளிவுபடுத்தினார்.
கனம் நீதிவான் அவர்களே, இந்த விவகாரத்தில் 1,2,3 ஆம் சந்தேக நபர்கள் தொடர்பில் சட்டமா அதிபர் எமக்கு சில தெளிவுபடுத்தல்களை நீதிமன்ற உத்தரவுப் பிரகாரம் கடந்த 23 ஆம் திகதி அனுப்பி வைத்துள்ளார்.
அதன்படி முதலாவது சந்தேக நபரான நாரஹேன்பிட்டி பொலிஸ் நிலைய முன்னாள் குற்றவியல் பொறுப்பதிகாரி சுமித் ரணசிங்க, 2 ஆவது சந்தேக நபரான முன்னாள் சிரேஷ்ட பிரதிப் பொலிஸ் மா அதிபர் அனுர சேனநாயக்க ஆகியோர் தண்டனை சட்டக் கோவையின் 198 மற்றும் 215 ஆம் அத்தியாயங்களின் கீழும், மூன்றாம் சந்தேக நபரான சட்ட வைத்திய அதிகாரி தண்டனை சட்டக் கோவையின் 198 ஆம் அத்தியாயத்தின் கீழும் தண்டனைக்குரிய குற்றங்களை புரிந்ததாக சுட்டிக்காட்டப்பட்டுள்ளது.
இதுவரை முன்னெடுக்கப்பட்டுள்ள விசாரணைகளுக்கமைய வெளிப்படுத்தப்பட்டுள்ள சாட்சிகளின் அடிப்படையில், இம்மூன்று சந்தேக நபர்களும் தண்டனை சட்டக் கோவையின் 198 ஆவது அத்தியாயத்துக்கு அமைவாக சாட்சிகளை மறைத்தமை மற்றும் 215 ஆம் அத்தியாயத்துக்கமைய அரச அதிகாரிகளாக இருந்துகொண்டு பொய்யான அறிக்கைகளை முன்வைத்தமை ஆகிய குற்றங்கள் தொடர்பில் வெளிப்படுத்தல்கள் செய்யப்பட்டுள்ளதாக சுட்டிக்காட்டப்பட்டுள்ளது.
உண்மையில் இக்குற்றம் நாரஹேன்பிட்டி பொலிஸாரால் முதலில் வாகன விபத்தாகக் கருதியே விசாரிக்கப்பட்டது. பல வருடங்களின் பின்னரேயே இது குற்றப் புலனாய்வுப் பிரிவுக்கு கையளிக்கப்பட்ட நிலையில் கொலையென விசாரணை ஊடாக ஊர்ஜிதமானது.
இதுவரை இந்த விடயத்தில் நாம் 1200 வரை வாக்குமூலங்களை பதிவு செய்துள்ளோம்.
22 இலட்சம் தொலைபேசி அழைப்புக்களை பகுப்பாய்வு செய்துள்ளோம். டிபெண்டர் வண்டியொன்று இந்த சம்பவத்தில் தொடர்புபட்டுள்ளதாகக் கண்டறிந்தோம். அதன்படி சி.ஐ.டி.யால் முன்னெடுக்கப்பட்ட வேறு ஒரு விசாரணையில் வழக்குப் பொருளான அந்த வண்டியை நாம் கையேற்று அரச இரசாயன பகுப்பாய்வாளர்களை அழைத்து சோதனை செய்தோம். அதன் முடிவு இன்னும் கிடைக்கவில்லை.
அத்துடன் வஸீமின் கையடக்கத் தொலைபேசியை நாம் நீதிமன்ற உத்தரவுப் பிரகாரம், சி.ஐ.டி.யின் டிஜிடல் பகுப்பாய்வு ஆய்வுகூடத்தில் சோதனைக்குட்படுத்தினோம். அதன் அறிக்கை எமக்கு கிடைத்துள்ளது. 172 பக்கங்களைக் கொண்ட அவ்வறிக்கையில் உள்ள விடயங்களை மேலதிக விசாரணைகளுக்காக ஆராய்ந்து வருகின்றோம்.
அத்துடன் இந்த விவகாரத்தில் நாம் பொறுப்பேற்றுள்ள சி.சி.ரி.வி. ஆதாரங்களில் தெளிவான முடிவுகளைப் பெறுவதற்காக அவற்றை ‘ சேர்ட்’ நிறுவனத்துக்கு பகுப்பாய்வுகளுக்காக அனுப்பியுள்ளோம். வஸீம் தாஜுதீனை பிறிதொரு வாகனத்தில் துரத்தும் காட்சிகள் அதில் உள்ளன. எனினும் அதில் உள்ள சந்தேக நபரை தெளிவாக அடையாளம் காண நடவடிக்கை எடுக்கப்பட்டுள்ளது. அவர் அணிந்திருக்கும் ரீ சேர்ட் மற்றும் அதில் உள்ள பெயர் உள்ளிட்ட விபரங்களை பெறவே ‘சேர்ட்’ நிறுவனத்துக்கு பகுப்பாய்வுக்கு அதனை அனுப்பியுள்ளோம் என்றார்.
இதன்போது இந்த விடயத்தில் முன்னெடுக்கவுள்ள மேலதிக விசாரணைகள் தொடர்பில் நீதிவான் சி.ஐ.டி.யிடம் கேள்வி எழுப்பினார்.
இதற்குப் பதிலளித்த உதவி பொலிஸ் அத்தியட்சகர் இந்திக லொக்குஹெட்டி,
வஸீம் தாஜுதீன் இறுதியாக நின்றிருந்த இடமான ஹெவலொக் பகுதியின் லாப் நிறுவனம் அருகே இருந்து வாகனத்தில் துரத்தப்படுவது சி.சி.ரி.வி. காணொளிகள் ஊடாக அவதானிக்கப்பட்டுள்ளன. இந்நிலையில் அவ்வாறு தொடர்ந்து வாகனத்தில் துரத்திச் செல்வோர் கண்டிப்பாக எவருக்கேனும் அப்போது அழைப்பை ஏற்படுத்தியிருப்பர். அல்லது அவர்களுக்கு அழைப்புகள் வந்திருக்கும். இது எமது அனுமானம். அந்த அனுமானத்தின் பிரகாரம், நாம் தற்போது நடவடிக்கை எடுத்துள்ளோம்.
அதாவது, குறித்த திகதியில், நாளில், நேரத்தில் அப்பகுதியில் உள்ள தொலைபேசி கோபுரம் ஊடாக பரிமாறிய உள்வந்த, வெளி வந்த அழைப்புக்கள் தொடர்பில் அவதானம் செலுத்தியுள்ளோம். அனைத்து தொலைபேசி சேவை வழங்குநர் நிறுவனம் ஊடாகவும் அறிக்கை பெற்று அவற்றை பகுப்பாய்வு செய்து சந்தேகத்துக்கிடமான அழைப்புக்களை மையப்படுத்தி சந்தேக நபர்களை விசாரிக்கவுள்ளோம்.
இதனைவிட, நாம் நாஸா நிறுவனத்திடம் செயற்கைக் கோள் படங்களையும் கோரியுள்ளோம். சம்பவதினமன்று எடுக்கப்பட்ட செயற்கைக்கோள் படங்களையும் வீடியோக்களையும் தருமாறும் அதனூடாக அவ்விடத்திலுள்ள வாகனங்கள் மற்றும் நபர்களை அடையாளம் கண்டு அதிலிருந்து சந்தேக நபர்களைக் கைது செய்யும் நடவடிக்கைகளையும் முன்னெடுத்துள்ளோம் என்றார்.
இதனையடுத்து சந்தேக நபர்கள் சார்பில் ஆஜரான சிரேஷ்ட சட்டத்தரணி அஜித் பத்திரண, கடந்த ஆறரை வருடங்களில் இதுவரை கொலை குற்றவாளியை பொலிஸார் கண்டுபிடிக்கவில்லை என்பதை சி.ஐ.டி. மிகத் தெளிவாக மன்றுக்கு அறிவித்துள்ளதாகக் கூறினார்.
இதனையடுத்து அனைத்தையும் ஆராய்ந்த நீதிவான் பின்வருமாறு அறிவித்தார். தற்போதுள்ள மூன்று சந்தேக நபர்களுக்கும் எதிராக தண்டனை சட்டக் கோவையின் 198, 215 ஆம் அத்தியாயத்தின் கீழ் குற்றச்சாட்டுக்கள் தெளிவாக உள்ளன. அது தொடர்பில் மேலதிக விசாரணை தேவைப்படுமானால் குற்றவியல் சட்டத்தின் 115 ஆம் பிரிவின் கீழ் அனுமதி வழங்கலாம்.
குற்றவியல் சட்டத்தின் 113 அ பிரிவுடன் இணைத்து கூறப்படும் 296 ஆம் பிரிவின் கீழ்வரும் அந்தக் குற்றச்சாட்டு இம்மூன்று சந்தேக நபர்கள் தொடர்பிலும் தொடர்ந்து முன்வைக்கப்படுமா இல்லையா என்பது குறித்து தெளிவு தேவை. கொலை தொடர்பில் இன்னும் சந்தேக நபர்கள் எவரும் கைது செய்யப்படாத நிலையில் இவர்களுக்கு எதிராக அக்குற்றச்சாட்டை தொடர்வதா? என நீதிவான் கேள்வி எழுப்பினார்.
இதற்குப் பதிலளித்த உதவி பொலிஸ் அத்தியட்சகர் இந்திக லொக்குஹெட்டி, அடுத்த தவணையில் அது தொடர்பில் பிரதி சொலிசிட்டர் ஜெனரல் டிலான் ரத்நாயக்க அறிவிப்பாரெனக் கூறினார்.
இதனை கருத்திற்கொண்ட நீதிவான் நெத்திகுமார, அடுத்த தவணையில் அதுகுறித்து அறிவிக்க வேண்டுமென குற்றவியல் சட்டத்தின் 173 ஆவது பிரிவின் கீழ் நிர்ணயம் செய்தார்.
இந்நிலையில் தொடர்ந்து திறந்த மன்றில் உத்தரவுகளை பிறப்பித்த நீதிவான் இசுரு நெத்திகுமார மேலும் கூறியதாவது,
இங்கு கொலை தொடர்பிலான சாட்சிகள் இந்த மூன்று சந்தேக நபர்களுக்கும் எதிராக இல்லை. கொலை தொடர்பில் குறிப்பிட்ட சந்தேக நபர் ஒருவர் இல்லை. இவர்கள் மூவருக்கும் கொலை குற்றச்சாட்டு சுமத்துவதானால் அது தொடர்பில் சாட்சிகளை முன்வையுங்கள். இல்லையெனில் தற்போது வெளிப்பட்டிருக்கும் சாட்சிகளின் பிரகாரம் சாட்சிகளை அழித்தமை தொடர்பில் தனியாக வழக்குப் பதிவு செய்யுங்கள்.
இந்நிலையில் இப்படுகொலை விவகாரத்தின் கொலையாளிகளை உடனடியாகக் கைது செய்யுங்கள். கைது செய்து இந்த மன்றில் நிறுத்துங்கள். தேவையற்ற தாமதங்களை தவிர்த்து அந்தக் குற்றவாளிகளைக் கைது செய்யுங்கள்.
இங்குள்ள மூன்று சந்தேக நபர்களுக்கும் கொலையுடன் நேரடியான தொடர்பில்லை. கொலையின் பின்னர் அவர்கள் தொடர்புபட்டுள்ளமை தெரிகின்றது. எனவே கொலையாளிகளை உடன் கைது செய்யுங்கள் என உத்தரவிட்டார்.
அத்துடன் இந்த விவகாரத்தில் பல தேவையான முக்கிய ஆவணங்களை கடற்படை அழித்துவிட்டதாக கூறப்படும் விடயம் தொடர்பிலும் விசாரணை செய்து அடுத்த வழக்குத் தவணையில் மன்றுக்கு அறிக்கை சமர்ப்பிக்குமாறு நீதிவான் இசுரு நெத்திகுமார சி.ஐ.டி.க்கு உத்தரவிட்டு வழக்கை அடுத்த வருடம் பெப்ரவரி மாதம் 28 ஆம் திகதிக்கு ஒத்திவைத்தார்.
கடந்த 2012 மே 17 ஆம் திகதி வஸீம் தாஜுதீனின் சடலம் அவரது காருக்குள்ளிருந்து நாரஹேன்பிட்டி சாலிகா மைதானத்துக்கு அருகில் இருந்து மீட்கப்பட்டமை குறிப்பிடத்தக்கது.
-Vidivelli