இந்திய குடியுரிமைச் சட்ட திருத்த போராட்டங்களின் எதிரொலி: ஜாமிஆ மில்லியா இஸ்லாமியா பல்கலைக்கழக மாணவர்கள் மீது பொலிஸார் தாக்குதல்
குடியுரிமைச் சட்டத் திருத்தத்தைத் திரும்பப் பெறக்கோரி கடந்த ஒரு வாரமாக இந்தியாவின் பல மாநிலங்களில் தொடர் போராட்டங்கள் நடந்து வருகின்றன. அரசியல் தலைவர்கள், பொதுமக்கள் மாணவர்கள் எனப் பல்வேறு தரப்பினர் போராட்டம் நடத்தி வருகின்றனர். இதே கோரிக்கையை வலியுறுத்தி நேற்று முன்தினம் மாலை டெல்லி ஜாமிஆ மில்லியா இஸ்லாமியா (ஜே.எம்.ஐ) பல்கலைக்கழக மாணவர்கள் பேரணியில் ஈடுபட்டனர்.
இதன்போது அவர்களைத் தடுக்க முயன்ற காவலர்களுக்கும் மாணவர்களுக்கும் இடையே தகராறு ஏற்பட்டது. இதையடுத்து பொலிஸார் தடியடி நடத்தியும், கண்ணீர்ப் புகைக் குண்டுகள் வீசியும் மாணவர்களைக் கலைத்துள்ளனர். மேலும் ஜே.எம்.ஐ. பல்கலைக்கழகத்துக்குள் நுழைந்தும் காவலர்கள் கண்ணீர்ப் புகைக்குண்டுகளை வீசியுள்ளனர். இந்தச் சம்பவம் பெரும் சர்ச்சையை ஏற்படுத்தியுள்ளது.
பொலிஸாருக்கும் மாணவர்களுக்கும் இடையே நடந்த மோதலில் 4 டெல்லிப் பேருந்துகள் தீக்கிரையாகியுள்ளன. மேலும், சில வாகனங்கள் சேதப்படுத்தப்பட்டுள்ளன. தொடர்ந்து போராட்டத்தில் ஈட்டுபட்ட 50 மாணவர்களை பொலிஸார் கைது செய்துள்ளனர். ஆனால் அமைதியான முறையில் போராட்டம் நடத்திய எங்கள் மீது தாக்குதல் நடத்தி வன்முறைக்கு வித்திட்டது காவலர்கள்தான் என மாணவர்கள் குற்றம்சாட்டியுள்ளனர். பொலிஸ் தடியடிக்குக் கண்டனம் தெரிவித்தும் கைது செய்யப்பட்டவர்களை விடுவிக்கக் கோரியும் நேற்று முன்தினம் இரவு டெல்லி பொலிஸ் தலைமை அலுவலகம் முன்பு ஆயிரக்கணக்கான மாணவர்கள் திரண்டு ஆர்ப்பாட்டத்தில் ஈடுபட்டனர்.
இதையடுத்து கைது செய்யப்பட்டவர்கள் விடுவிக்கப்பட்டு காயமடைந்தவர்கள் மருத்துவமனையில் அனுமதிக்கப்பட்டனர். டெல்லியில் நடக்கும் மாணவர்கள் போராட்டத்துக்கு ஆதரவாகவும் காவலர்களின் தடியடிக்கு எதிர்ப்பு தெரிவித்தும் உத்தரப்பிரதேசம் , கேரளா போன்ற பல மாநிலங்களில் நேற்று முன்தினம் இரவும் நேற்றும் மாணவர்கள் போராட்டம் நடத்தினர். மாணவர்கள் போராட்டத்தின் வீரியத்தைக் குறைக்கும் நோக்கில் தெற்கு டெல்லி முழுவதும் உள்ள பள்ளி, கல்லூரிகளுக்கு விடுமுறை அறிவிக்கப்பட்டுள்ளது. மேலும், சில மெட்ரோ ரயில் நிலையங்கள் மூடப்பட்டுள்ளன.
மாணவியின் வாக்குமூலம்
இதற்கிடையில், நேற்று முன்தினம் காவல்துறையினர் டெல்லி ஜாமியா மில்லியா இஸ்லாமியா பல்கலைக்கழகத்துக்குள் நுழைந்தபோது அங்கு என்ன நடந்தது என்பதைப் பற்றியும் தன் மனநிலை குறித்தும் செய்தியாளர்களிடம் கண்ணீர் மல்கத் தெரிவித்துள்ளார் ஜே.எம்.ஐ பல்கலைக்கழகத்தைச் சேர்ந்த ஒரு மாணவி.
“நாங்கள் போராட்டத்தில் கலந்துகொள்ளவில்லை, அமைதியான முறையில் பல்கலைக்கழக வளாகத்தில்தான் இருந்தோம். ஆனால், அங்கு நுழைந்த காவலர்கள் கண்மூடித்தனமாக எங்கள் மீது தடியடி நடத்தினர். நாங்கள் வளாகத்தைவிட்டு வெளியேறுவதற்காக எங்கள் பைகளை எடுக்கவே உள்ளே சென்றோம். எங்களைக் குற்றவாளிகளைப் போல காவல்துறை நடத்தியது. கல்லூரியிலிருந்த உணவகம், நூலகம் இன்னும் நிறைய வகுப்பறைகள் போன்ற அனைத்தையும் சேதப்படுத்திவிட்டனர். இதற்கும் மேலாகப் பல்கலைக்கழகத்தில் இருந்த பள்ளிவாசலுக்குள்ளும் காவலர்கள் நுழைந்து அங்கு பிரார்த்தனையில் ஈடுபட்டிருந்த மாணவர்களைத் துன்புறுத்தினார்கள். தங்களைப் பாதுகாத்துக்கொள்ள சில மாணவர்கள் கல்லூரியின் அடித்தளத்தில் (basement) பதுங்கியிருந்தனர். நேற்று இரவு நாங்கள் கண்ட காட்சி மிகவும் பயங்கரமாக இருந்தது. வளாகத்திலிருந்த மின் விளக்குகள் அணைக்கப்பட்டுத் தாக்குதல் நடத்தப்பட்டது. என் நண்பர்கள் படுகாயமடைந்துள்ளனர்.
மாணவர்களுக்கு மிகவும் பாதுகாப்பான இடம் கல்லூரி வளாகம் என நினைத்திருந்தோம். அதனால் எங்களுக்கு எந்தவித அசம்பாவிதமும் நேராது என நான் நம்பிக்கொண்டிருந்தேன். ஆனால், இன்று அனைத்தும் பொய்யாகிவிட்டது. நேற்று இரவு முழுவதும் நாங்கள் அழுதுகொண்டிருந்தோம். இப்போதும் அழுகிறோம். என்ன நடக்கிறது என்றே புரியவில்லை.
இந்த மொத்த நாட்டிலும் நான் பாதுகாப்பாக இருப்பதாக உணரவில்லை. இனிமேல் நாங்கள் வேறு எங்கு செல்வது என்றும் தெரியவில்லை. எங்கு சென்றாலும் தாக்குதல் நடக்கிறது. நாளை என் நண்பர்கள் இந்தியக் குடிமக்களாக இருப்பார்களா என்பது சந்தேகமாக உள்ளது. நான் இஸ்லாமியப் பெண் கிடையாது, இருந்தும் போராடுகிறேன். உண்மையின் பக்கம் நிற்காமல் போனால் நான் படித்த கல்வி அர்த்தமற்றதாகிவிடும்” என அழுதவாறே ஊடகங்களுக்கு கருத்துத் தெரிவித்துள்ளார்.
மாணவியைத் தொடர்ந்து பேசிய மற்றொரு மாணவர், “கல்லூரிக்குள் கலவரம் வெடிக்கும்போது நாங்கள் நூலகத்திலிருந்தோம். வளாகத்துக்குள் நிலைமை மிகவும் மோசமாக இருப்பதாக நண்பர்கள் எங்களுக்கு போனில் தெரிவித்தனர். நாங்கள் நூலகத்தை விட்டு வெளியேறலாம் என முடிவெடுத்துச் சென்றோம். அப்போது மொத்த மாணவர்களும் உள்ளே வந்துவிட்டனர்.
அடுத்த 30 நிமிடங்களில் நூலகம் நிரம்பியது. பின்னர் நாங்கள் கைகளைத் தூக்கியவாறே வெளியில் நடந்து சென்றோம். இறுதியில் எங்கள் விடுதிக்குச் சென்றுவிட்டோம். அப்போது சக மாணவர் ஒருவர் ஓடி வந்து, “பெண் காவலர்கள் விடுதிக்குள் நுழைந்துள்ளார்கள். அவர்கள் நம்மைத் தாக்குவதற்காக வருகிறார்கள்” எனத் தெரிவித்தார். உடனடியாக நாங்கள் அங்கிருந்த புதருக்குள் சென்று மறைந்துகொண்டோம். நள்ளிரவு சத்தம் சற்று அடங்கியது. மீண்டும் எங்கள் விடுதிக்குத் திரும்பினோம். ஆனால் அங்கு என் நண்பர்கள் பலர் ரத்த வெள்ளத்தில் கிடந்ததைப் பார்த்தேன்” என்று தெரிவித்துள்ளார்.
மாணவர்கள் கல்லூரிக்குள் தாக்கப்பட்ட விவகாரம் தேசிய அளவில் பெரும் விவாதப் பொருளாக மாறியுள்ளது.
பிரதமர் மோடி கருத்து
குடியுரிமை திருத்தச் சட்டம் தொடர்பான வன்முறைப் போராட்டங்கள் துரதிஷ்டவசமானவை, ஆழமான வருத்தத்தை தருபவை என்று பிரதமர் நரேந்திர மோடி டுவிட்டரில் தெரிவித்துள்ளார்.
“விவாதம், உரையாடல், மாறுபாடு ஆகியவை ஜனநாயகத்தின் அவசியமான அம்சங்கள். ஆனால், பொதுச் சொத்துக்கு சேதம் விளைவித்தல், சகஜ வாழ்க்கையை கெடுத்தல் ஆகியவை நமது விழுமியங்களில் இல்லை” என்றும் அவர் தெரிவித்திருந்தார்.
பேருந்துகளுக்கு பொலிசாரே தீவைப்பது போல காட்டும் வீடியோக்கள் வெளியாவது குறித்தோ, பொலிசார் மாணவர்கள் மீது தடியடி நடத்தியது குறித்தோ அவர் எந்தக் கருத்தும் தெரிவிக்கவில்லை.
தொடரும் போராட்டங்கள்
ஞாயிற்றுக்கிழமை ஜாமிஆ பல்கலைக்கழக மாணவர்கள் மீது நடத்தப்பட்ட தாக்குதலை கண்டித்து நேற்று இந்தியா முழுவதும் போராட்டங்கள் நடைபெற்றன.
நேற்றுக் காலையில் லக்னோ நட்வா கல்லூரி மாணவர்கள் போராட்டத்தில் ஈடுபட்டனர்.
லக்னோ மாணவர் போராட்டங்கள் குறித்து பொலிஸ் கண்காணிப்பாளரான கலாநிதி நைதானி கூறுகையில், கிட்டத்தட்ட 30 வினாடிகள் அளவுக்கு கல்லெறி சம்பவங்கள் நடந்தன. ஏறக்குறைய 150 பேர் இந்தப் போராட்டத்துக்கு வந்து கோஷங்கள் எழுப்பினர். தற்போது மாணவர்கள் வகுப்பறைகளுக்கு திரும்பி கொண்டிருக்கின்றனர்’ என்று கூறினார்.
இதேபோல் குடியுரிமை சட்டத் திருத்த மசோதாவிற்கு எதிர்ப்பு தெரிவித்து புதுச்சேரி மத்திய பல்கலைக்கழகத்தில் ஆயிரத்திற்கும் மேற்பட்ட மாணவர்கள் போராட்டத்தில் ஈடுபட்டு வருகின்றனர்.
வழக்கு தொடருவோம்
டெல்லி ஜாமிஆ மில்லியா இஸ்லாமியா பல்கலைக்கழக மாணவர்கள் போராட்டம் மற்றும் பொலிசாரின் நடவடிக்கைகளை குறித்து நேற்று பல்கலைக்கழக துணைவேந்தர் நஜ்மா அக்தர் செய்தியாளர்களை சந்தித்தார்.
இது குறித்து அவர் செய்தியாளர்களிடம் கூறுகையில், ”எங்கள் பல்கலைக்கழக வளாகத்தில் பொலிசார் நுழைந்ததற்கு எதிராக நாங்கள் வழக்கு தொடரவுள்ளோம். பல்கலைக்கழக வளாகத்தில் ஏற்பட்ட சேதங்களை சரிசெய்து வளாகத்தை புதுப்பிக்கமுடியும். ஆனால் மாணவர்களுக்கு நிகழ்ந்ததை நீங்கள் சரிசெய்ய முடியாது” என்று கூறினார்.
மேலும் அவர் கூறுகையில், ”நடந்த சம்பவங்கள் குறித்து உயர் அளவு விசாரணை நடத்த நாங்கள் கோரிக்கை வைப்போம்” என்றார்.
”மாணவர்கள் நடத்தப்பட்ட விதத்தை கண்டு நான் வேதனை அடைகிறேன். இந்த போராட்டத்தில் மாணவர்கள் மட்டும் தனியாக இல்லை என்பதை இந்நேரத்தில் தெரியப்படுத்துகிறேன். நானும் அவர்களுடன் இருக்கிறேன்” என்றார்.-Vidivelli