ஜனாதிபதி கோட்டாபய ராஜபக்ஷ இலங்கை மக்களை ஒருமுகப்படுத்துவாரா?

By vidivelli Last updated Dec 1, 2019

அண்மையில் இடம்பெற்ற ஜனாதிபதித் தேர்தலில் கோட்டாபய ராஜபக் ஷ பெற்றுக் கொண்ட தீர்க்கமான வெற்றியானது முன்னைய ஆட்சியின்போதான தேசிய பாதுகாப்பு அச்சுறுத்தல், பொருளாதார மந்தநிலை மற்றும் செயற்திறனற்ற ஆட்சி நிர்வாகம் என்பவற்றின் மீதான வாக்காளர்களின் அதீத கரிசனையை வெளிக்காட்டி நிற்கும் அதேவேளை இன ரீதியாக நாடு இரு துருவ நிலைக்குக் கூர்மைப்படுத்தப்பட்டுள்ள ஆபத்தான அறிகுறியையும் தெள்ளத் தெளிவாக சுட்டிக் காட்டுகிறது.

சிங்கள தேசியவாதத்தை முன்னிறுத்தும் ஒருவராக அறியப்பட்ட கோட்டாபய ராஜபக் ஷ முஸ்லிம்களுக்கு எதிரான பிரசாரத்தை முன்னெடுத்துச் செல்வாரோ என்றும் தமிழ் சமூகத்தைத் தனிமைப்படுத்தும் நடவடிக்கைகளில் ஈடுபடுவாரோ என்றும் பலர் அஞ்சுகின்றனர்.

நிகழ்ந்தது என்ன?

இலங்கையில் மூன்று தசாப்தங்களுக்கு மேலாக தொடர்ந்த உள்நாட்டு யுத்தத்தின் இறுதிக் கட்டப் பகுதியில் இலங்கையின் பாதுகாப்புச் செயலாளராக செயற்பட்டு வெற்றிகரமாக யுத்தத்திற்கு முடிவு கட்டிய கோட்டாபய ராஜபக் ஷ கடந்த நவம்பர் 16இல் இடம்பெற்ற ஜனாதிபதித் தேர்தலில் மக்களின் பெரும் ஆதரவுடன் வெற்றிவாகை சூடி இலங்கை நாட்டின் ஜனாதிபதியானார்.

கோட்டாபய ராஜபக் ஷவின் வெற்றி பாரியளவில் ஆச்சரியத்தைத் தராவிட்டாலும் பல இலட்சக் கணக்கான வாக்கு வித்தியாசத்தில் பெருவாரியான வெற்றியை சுவீகரித்துக் கொண்டமையானது பல அரசியல் அவதானிகளின் எதிர்வுகூறல்களைப் பொய்ப்பித்துள்ளது. ஸ்ரீ லங்கா பொதுஜன பெரமுனவின் ஜனாதிபதி வேட்பாளரும் முன்னாள் ஜனாதிபதி மஹிந்த ராஜபக் ஷவின் சகோதரருமான கோட்டாபய ராஜபக் ஷ 52.25 சதவீத வாக்குகளைச் சுவீகரித்து வெற்றியைத் தனதாக்கிக் கொண்டார். அவருக்கெதிராக களமிறங்கிய பிரதான போட்டியாளராகக் கருதப்பட்ட ஐக்கிய தேசிய முன்னணியின் ஜனாதிபதி வேட்பாளர் சஜித் பிரேமதாச 41.99 சதவீத வாக்குகளையே பெற்றுக் கொண்டார்.

உள்நாட்டு யுத்தத்தின் இறுதிக் காலப் பகுதியில் நிகழ்த்தப்பட்டதாகக் கூறப்படும் போர்க் குற்றங்களுடன் தொடர்புபடுத்தப்பட்டிருந்த கோட்டாபய ராஜபக் ஷ உண்மையில் தன்னீர்ப்பும் தன்முனைப்பும் கொண்ட மக்களை ஒருமுகப்படுத்திய ஆளுமையாகத் தற்போது நோக்கப்படுகிறார். அதேவளை தேர்தல் முடிவுகளானது இனத்துவ குழுமங்களுக்கும் தேர்தல் தொகுதிகளுக்கும் இடையிலான தொடர்பை எளிதாகக் கோடிட்டுக் காட்டியிருந்தது.

பிரதான ஜனாதிபதி வேட்பாளர்களான இருவரும் பெரும்பான்மைச் சிங்கள சமூகத்தைச் சேர்ந்தவர்கள் எனினும், சிங்கள தேசியவாதத்தை தனது முக்கிய கருப்பொருளாக முன்னிறுத்திப் பிரசாரத்தை முன்னெடுத்திருந்த கோட்டாபய ராஜபக் ஷ சிறுபான்மையினரின் வாக்குகளின் துணையின்றி ஜனாதிபதி பதவியைச் சுவீகரித்துக் கொண்டார் என்று சொல்லக் கூடியளவு பெருவாரியான பெரும்பான்மையினரின் வாக்குகளைத் தன் பக்கம் ஈர்ப்பதில் வெற்றி கண்டிருந்தார். அதேவேளை சிறுபான்மையினரான தமிழர், முஸ்லிம்களின் வாக்குகள் சஜித் பிரேமதாசவிற்கு அமோகமாக கிடைத்திருந்தன.

இலங்கை ஜனாதிபதி தேர்தலில் வரலாற்றுச் சாதனையாக 35 பேர் ஜனாதிபதி வேட்பாளர்களாக கட்டுப்பணம் செலுத்தியிருந்தபோதும் இரு வேட்பாளர்களே பெரிதும் எதிர்பார்க்கப்பட்டிருந்தனர். இடதுசாரிக் கட்சியான ஜனதா விமுக்தி பெரமுன சார்பாக களமிறங்கியிருந்த அனுர குமார திசாநாயக்க 3.16 சதவீத வாக்குகளையும் முன்னாள் இராணுவத் தளபதி மகேஷ் சேனாநாயக்க 0.5 சதவீத வாக்குகளையும் பெற்றுக் கொண்டனர்.

இம்முறை ஜனாதிபதி தேர்தல் மற்றும் தேர்தல் பிரசாரப் பணிகள் என்பன குறிப்பிட்டுச் சொல்லக் கூடிய மிகச் சொற்பளவிலான வன்முறைச் சம்பவங்களே பதிவான, அமைதியான முறையில் இடம்பெற்ற ஒரு ஜனாதிபதித் தேர்தலாக அமைந்திருந்தது. எனினும், இம்முறை தேர்தல் பிரசாரம் தொடர்பில் முன்னெப்போதுமில்லாத அளவு போலித் தகவல்கள் சமூக வலைத்தளங்கள் ஊடாகவும் வெகுசன ஊடகங்கள் வழியாகவும் பரப்பப்பட்டிருந்ததாக தேர்தல்கள் ஆணையாளர் மஹிந்த தேசப்பிரிய சுட்டிக்காட்டியிருந்தார்.

தமிழ் மக்களின் வாக்குகளை சுவீகரிக்கும் நோக்குடன் தமிழ் தேசியக் கூட்டமைப்புடன் இரகசிய ஒப்பந்தமொன்றில் சஜித் பிரேமதாச கைசாத்திட்டுள்ளதாக போலிச் செய்தியொன்றை பொதுஜன பெரமுன சார்பான பத்திரிகை வெளியிட்டிருந்தமை உள்ளிட்ட பல வதந்திகளும் போலிச் செய்திகளும் சஜித் பிரேமதாசவை இலக்கு வைத்தே பரப்பப்பட்டன.

கோட்டாபய ராஜபக் ஷவின் தீர்க்கமான வெற்றிக்கு வித்திட்டவை

முன்னைய ஆட்சியின்போது தேசிய பாதுகாப்புக்கு விடுக்கப்பட்டிருந்த அச்சுறுத்தல், நாட்டின் பொருளாதார தேக்க நிலை, ஆளும் கட்சி உறுப்பினர்களுக்கு மத்தியில் நிலவிய சண்டை சச்சரவுகள் என்பவற்றுடன் முத்தாய்ப்பாக ஸ்ரீ லங்கா பொதுஜன பெரமுனவின் அமைப்பாளர்களின் கட்டமைப்புப் பலம் என்பன கோட்டாபய ராஜபக் ஷவின் தீர்க்கமான வெற்றிக்கு வித்திட்டன என்றால் மிகையாகாது.

சஜித் பிரேமதாசவிற்கும் வெற்றி வாய்ப்புக்கள் இருப்பதாக கணிப்பிடப்பட்டிருந்தாலும் பந்தயத்தின் முன் கள வீரராக ஆரம்பத்தில் இருந்தே கோட்டாபய ராஜபக் ஷவே கருதப்பட்டு வந்தார். பொதுவாக சிங்கள மக்கள் மத்தியில் ஜனரஞ்சகத் தன்மை வாய்ந்தவர் எனக் கருதப்படுபவரும் நாட்டின் அரசியலமைப்பின் பிரகாரம் இன்னொரு தடவை ஜனாதிபதி தேர்தலில் போட்டியிட முடியாதவருமான மஹிந்த ராஜபக் ஷவின் முற்று முழுதான ஆதரவுடனும் வழிநடத்தலுடனும் பந்தயத்தில் களமிறங்கிய அவரது சகோதரரான கோட்டாபய ராஜபக் ஷவை எதிர்த்துக் களமிறக்கப்பட்டவர் குழப்பங்களும் சர்ச்சைகளும் நிறைந்த, மக்களின் வெறுப்பை சம்பாதித்துக் கொண்ட, செயற்திறனற்ற அரசாங்கமொன்றில் அமைச்சராகவிருந்த சஜித் பிரேமதாச ஆவார்.

இந்திய புலனாய்வுத் துறையின் முன்னெச்சரிக்கை கிடைக்கப் பெற்றும்கூட கிறிஸ்தவ தேவாலயங்கள் மற்றும் நட்சத்திர ஹோட்டல்கள் மீது நடத்தப்பட்ட ஈஸ்டர் பயங்கரவாத தாக்குதல்களைத் தடுக்கத் தவறியமை தொடர்பில் நாட்டு மக்களின் அதிருப்தியையும் ஆத்திரத்தையும் முன்னைய அரசாங்கம் சம்பாதித்துக் கொண்டிருந்த நிலையில், கோட்டாபய ராஜபக் ஷ தனது தேர்தல் பிரசாரங்களின்போது ‘தேசிய பாதுகாப்பு’ மற்றும் ‘தீவிரவாத ஒழிப்பு’ போன்ற மையக் கருக்கள் மீது அழுத்தம் கொடுத்து வாக்குறுதிகளை வழங்கியிருந்தமை முனைப்பான விடயமாகும்.

மூன்று தசாப்தங்களுக்கும் மேலாக தனி நாடு கோரி உள்நாட்டு யுத்தத்தில் ஈடுபட்டிருந்த தமிழீழ விடுதலைப் புலிகளை வேரோடு அழித்து வெற்றி கொண்ட இறுதி இராணுவ நடவடிக்கையின்போது செயற்திறன் மிக்க பாதுகாப்புச் செயலாளராக சேவையாற்றிய கோட்டாபய ராஜபக் ஷவின் வகிபாகத்தை என்றும் மனதில் இருத்திய பெரும்பான்மை சிங்கள மக்கள் மத்தியில், ‘தேசிய பாதுகாப்புக்கும் சிங்கள தேசியவாதத்துக்கும் முன்னுரிமை அளிப்பேன்’ என்பதாக கோட்டாபயவினால் வழங்கப்பட்டிருந்த வாக்குறுதிகள் பெருமளவில் எதிரொலித்தன.

‘இலங்கை வாழ் பௌத்த சிங்கள மக்களின் நீடித்த இருப்புக்கு தமிழர்களும் முஸ்லிம்களும் பாரிய அச்சுறுத்தல்’ என்பதாக கற்பிதமொன்றை நீண்ட காலமாக சிங்கள மக்கள் மனதில் விதைக்க பெரும் பிரயத்தனங்களை மேற்கொண்டு வரும் செல்வாக்கு மிக்க சில பௌத்த தேரர்களின் ஆதரவும் பிரசாரங்களும் கோட்டாபயவின் வெற்றிக்குத் தூண்களாயின என்றால் மிகையாகாது. ஈஸ்டர் தாக்குதல்கள் மேற்குறித்த கற்பிதத்திற்கு மேலும் வலுவூட்டின.

ராஜபக் ஷ குடும்பத்திற்கு சிங்கள மக்கள் மத்தியில் பிரவாகித்த அபரிமிதமான ஜனரஞ்சகத் தன்மையைக் கருத்திற் கொள்கையில் சஜித் பிரேமதாச வெற்றி பெற வேண்டுமானால் தமிழர், முஸ்லிம்களின் ஒட்டுமொத்த வாக்குகளை சுவீகரித்தாக வேண்டும் என்ற இக்கட்டான நிலை தோன்றியது. இந்நிலை ‘சஜித் பிரேமதாச வெற்றியீட்டினால் தமிழர், முஸ்லிம்களின் ஜனாதிபதியாகவே அவர் திகழ்வார்’ என்று பொதுஜன பெரமுன தமக்கு அனுகூலமாக வாதம் செய்வதற்கு வழிசமைத்தது.

ஐக்கிய தேசியக் கட்சி அரசாங்கத்தின் கையாலாகத்தனமும் கோட்டாபயவின் தேர்தல் பிரசாரத்தில் பாரிய சாதக விளைவை ஏற்படுத்தியது. பொருளாதார வளர்ச்சி வீதத்தின் மந்த நிலை மற்றும் நாட்டின் அதிகரித்த கடன் தொகை என்பன ஐக்கிய தேசியக் கட்சி அரசாங்கத்தின் செயற்திறனுக்கு பாரிய பங்கம் விளைவித்தன. ஈஸ்டர் தாக்குதல்களை அடுத்த சுற்றுலாத்துறை வீழ்ச்சி பொருளாதார மந்தநிலைக்கான காரணங்களில் முக்கியமானதாகும்.

முன்னைய அரசாங்கத்தின் கொள்கை உருவாக்கம் எப்போதும் குழப்பகரமானதாகவும் நடைமுறைச் சாத்தியமற்றதாகவுமே அமைந்திருந்தன. முன்னைய அரசாங்கத்தின் ஜனாதிபதி மைத்திரிபால சிறிசேன மற்றும் பிரதமர் ரணில் விக்கிரமசிங்கவிற்கும் இடையிலான முரண்பாடுகளுடன்கூடிய இழுபறி உறவானது அரசாங்கத்தின் செயற்திறனின்மைக்கு பாரிய பங்களிப்புச் செய்தது.

2018 ஒக்டோபரில் அப்போதைய ஜனாதிபதி மைத்திரிபால சிறிசேன பிரதமர் ரணில் விக்கிரமசிங்கவை தன்னிச்சையாக அகற்றி விட்டு புதிய பிரதமராக மஹிந்த ராஜபக் ஷவை நியமித்துப் பின்னர் அம்முன்னெடுப்பு அரசியலமைப்புக்கு அப்பாற்பட்டதாக உயர் நீதிமன்றம் அறிவித்ததும் மீளவும் ரணில் விக்கிரமசிங்க பிரதமராக பதவியேற்ற நகைப்புக்கிடமான நிகழ்வும் அப்போதைய அரசாங்கத்தின் தராதரத்தை சர்வதேசளவில் எடுத்துக்காட்டப் போதுமான அம்சமாகத் திகழ்ந்தது. இவ்வாறானதோர் அரசாங்கத்தில் அங்கம் வகித்த சஜித் பிரேமதாச தான் அதனிலிருந்தும் அப்பாற்பட்ட தனித்துவமானவர் என்பதை நிரூபித்து மக்களின் ஜனரஞ்சகத் தன்மையைப் பெற்றுக் கொள்ளும் வாய்ப்புக்கள் கடினமாகியே போயின.

நாடளாவிய ரீதியிலான பொதுஜன பெரமுனவின் அமைப்பாளர் கட்டமைப்புப் பலமும் கோட்டாபயவின் வெற்றிக்கு காரணமாயின. ராஜபக் ஷ சகோதரர்களும் அவர்களது ஆதரவாளர்களும் 2016இல் பொதுஜன பெரமுன கட்சியை ஸ்தாபித்தது முதல் இன்று வரை படிப்படியாக அடிமட்ட மக்கள் வரை அதன் ஜனரஞ்சகத் தன்மையை வளர்த்துச் சென்ற விதம் தனித்துவமானது. ராஜபக் ஷ குடும்பம் மீளவும் ஆட்சிக் கதிரையில் அமர்வதற்கான வாகனமாக அக்கட்சியை சிறப்பாக வளர்த்தெடுத்துள்ளனர். 2018 உள்ளூராட்சித் தேர்தலில் பொதுஜன பெரமுன பெற்றுக் கொண்ட அமோக வெற்றியானது அடிமட்ட மக்கள் வரை அக்கட்சியின் ஜனரஞ்சகத் தன்மை சென்றடைய வழிகோலியது.

கடந்த 2 வருடங்களாக கண்ணுங்கருத்துமாக மெல்ல மெல்ல அத்திபாரத்தை இட்டு கட்சியை பலப்படுத்தி ஜனாதிபதி வேட்பாளராக நமிபிக்கையுடன் களமிறங்கினார் கோட்டாபய ராஜபக் ஷ. ஆனால், சஜித் பிரேமதாசவின் நிலையோ வேறு. கட்சியின் தலைவரும் பிரதமருமான ரணில் விக்கிரமசிங்கவுடனான கசப்பான வாத விவாதங்களின் பின்னர் வேண்டா வெறுப்பாக தேர்தலுக்கு சில நாட்களுக்கு முன்னரே ஜனாதிபதி வேட்பாளராக சஜித் பிரேமதாச அறிவிக்கப்பட்டிருந்தார்.

ஆக, சஜித் பிரேமதாசவின் தேர்தல் பிரசாரப் பணிகள் ஒப்பீட்டு ரீதியில் காலம் குறைவானதும் வலிமை குறைவானதும் ஆகும். கட்சி அமைப்பாளர் கட்டமைப்புக்களும் ஊடக ஆதரவும் பலவீனமாக இருந்த நிலையிலேயே சஜித் பிரேமதாசவின் பிரசாரப் பணிகள் ஆரம்பித்தன. பெரும்பாலான தனியார் ஊடகங்கள் ராஜபக் ஷ ஆதரவாளர்களுக்குச் சொந்தமானவை. அவை கோட்டாபய ராஜபக் ஷவின் பிரசாரத்துக்கு பெரிதும் துணை போனதோடு அவற்றில் சில ஊடகங்கள் சஜித் பிரேமதாசவின் பிரசாரப் பணி தொடர்பில் போலிச் செய்திகளை வெளியிட்டமையும் இங்கே குறிப்பிடத்தக்கவை.

ராஜபக் ஷ குடும்பத்தின் மீள் வருகையும் இலங்கையின் இனப் பிரச்சினைகளும்

கோட்டாபய ராஜபக் ஷவின் பிரசாரப் பணிகளின்போது தொனித்த பலமான சிங்கள தேசியவாதம், தனது வெற்றியானது ஒட்டுமொத்தமான சிங்கள பெரும்பான்மை வாக்குகளைச் சார்ந்ததே என்பதைத் தெளிவாகவே பறைசாற்றியது. அத்துடன் அவரது சகோதரர் மஹிந்த ராஜபக் ஷவின் 10 வருட கால ஆட்சியின்போது கடைப்பிடிக்கப்பட்ட கொள்கைகளும் கோட்டாபயவின் தலைமையின் கீழ் இன, மத ரீதியான பதற்றங்கள் கூர்மைப்படுத்தப்படும் என்பதையே சொல்லி நிற்கின்றன.

பௌத்த தர்மத்தைப் பாதுகாப்பதற்காகத் தோற்றுவிக்கப்பட்ட அமைப்பு என்று கூறப்படும் சில அமைப்புக்களால் கடந்த காலங்களில் முன்னெடுக்கப்பட்டு வந்த முஸ்லிம்களுக்கெதிரான வெறுப்புப் பேச்சு, இனவாத வன்முறைகள், முஸ்லிம்களுடனான பொருளாதாரப் புறக்கணிப்பு என்பன புதிய ஆட்சியில் மீளவும் உத்வேகத்துடன் புதுப் பரிமாணமொன்றைப் பெறும் என பலர் அச்சம் கொள்கின்றனர். மேற்குறித்த இனவாத அமைப்புக்கள் 2013- 2014இல் மஹிந்த ராஜபக் ஷவின் ஆட்சிக் காலத்திலேயே முதலில் உருவெடுத்தன. பொலிசார், புலனாய்வுத்துறை மற்றும் அப்போதைய பாதுகாப்புச் செயலாளராக இருந்த கோட்டாபய ராஜபக் ஷவின் ஆதரவுடன் புதுப் பொலிவு பெற்றன.

2015இல் மஹிந்த ராஜபக் ஷ ஜனாதிபதி தேர்தலில் தோல்வியடைந்ததன் பின்னர் முஸ்லிம்களுக்கெதிரான இனவாதப் போக்கு படிப்படியாக குறைவடையத் தொடங்கினாலும் அதன் பிற்பாடு இன்னும் வலிமை கொண்டு இனவாதம் பரப்பப்பட்டது. எனினும், 2018 மார்ச் மற்றும் ஈஸ்டர் தாக்குதலின் பின்னரான இனவாத வன்முறைகளில் பள்ளிவாசல்கள் மற்றும் முஸ்லிம்களின் வர்த்தக நிலையங்கள் மீதான தாக்குதல்களை மேற்கொண்டோர் பொதுஜன பெரமுன உறுப்பினர்கள் உள்ளிட்ட குழுவே என்பதற்கான வீடியோ ஆதாரங்களும் கிடைக்கப் பெற்றன.

இனவாத பௌத்த அமைப்புக்களுக்கு தான் எவ்வித ஆதரவையும் வழங்கவில்லை என கோட்டாபய ராஜபக் ஷ மறுத்தே வந்துள்ளார். எது எவ்வாறாயினும், கோட்டாபய ராஜபக் ஷ தமது சமூகத்திற்கும் இருப்புக்கும் எதிரானவராகவே பெரும்பாலான முஸ்லிம்கள் கருதுகின்றனர். முஸ்லிம் வாக்காளர்களும் முஸ்லிம் தலைமகளும் சஜித் பிரேமதாசவிற்கு பலத்த ஆதரவை வழங்கியிருந்தமையை மனதில் இருத்தி புதிய ஆட்சியினால் தாம் இலக்கு வைக்கப்படுவோம் என முஸ்லிம்கள் அஞ்சுகின்றனர். தேர்தல் முடிவுகள் அறிவிக்கப்பட்டதை அடுத்து காலியில் பள்ளிவாசல் ஒன்று தாக்கப்பட்டமையும் சமூக ஊடகங்களில் தொடரும் முஸ்லிம்களுக்கெதிரான வெறுப்புப் பேச்சும் இவ் அச்சநிலைக்கு கட்டியம் கூறி நிற்கின்றன.

பல தசாப்தங்களாகத் தொடர்ந்த, பல லட்சம் மக்களைக் காவு கொண்ட உள்நாட்டு யுத்தத்தினால் ஏற்பட்ட வடுக்களை ஆற்றுவது தொடர்பில் சிறியளவு அக்கறையே கோட்டாபய ராஜபக் ஷ காட்டியிருந்தார். அரசியல் தனிமைப்படுத்தல்கள் காரணமாக உருவெடுத்த உள்நாட்டு யுத்தம் இறுதியில் இரு தரப்பினராலும் மேற்கொள்ளப்பட்ட பல்வேறு உரிமை மீறல்கள், துஷ்பிரயோகங்களுடன் முடிவுக்கு வந்தது.

யுத்த காலப் பகுதியிலும் யுத்தம் முடிவுக்கு வந்த பிற்பாடும் அதிகாரப் பகிர்வு உள்ளிட்ட தமிழர்களின் அபிலாஷைகளை வெளிப்படுத்தும் எந்தவொரு திருத்தத்திற்கும் கோட்டாபய ராஜபக் ஷ எதிர்ப்புத் தெரிவித்தே வந்தார். ஐக்கிய தேசிய கட்சி தலைமையிலான அரசாங்கம் மாகாண சபைகளின் அதிகாரங்களை அதிகரித்தல் தொடர்பிலான முன்மொழிவொன்றைக் கொண்டு வந்த சமயம், அவ்வகையான மாற்றங்கள் தேசிய பாதுகாப்புக்கும் பௌத்த தர்மத்திற்கும் நாட்டின் ஒற்றையாட்சிக்கும் தீங்கு பயக்கும் எனக் கூறி பொதுஜன பெரமுனவும் கோட்டாபய ராஜபக் ஷவும் எதிர்ப்புத் தெரிவித்திருந்தனர்.
உள்நாட்டுப் போர் முடிவடைந்து பத்தாண்டுகள் பூர்த்தியான பின்னரும் தமிழ் மக்கள் செறிந்து வாழும் வடக்கில் பெருந்தொகையான இராணுவ துருப்புக்கள் இன்னும் நிலைநிறுத்தப்பட்டுள்ளன. விடுதலைப் புலிகளை வேரோடு அழித்தது மட்டுமல்லாமல் அதன் ஆதரவுத் தளங்களும் பலமிழக்கச் செய்யப்பட்டுள்ளன. இந்நிலையில் தமிழீழ விடுதலைப் புலிகளின் மீள் வருகைச் சாத்தியம் என்பது பூச்சியமாகும். ஒவ்வொரு கிராமத்திலும் உளவாளிகள், தகவல் வழங்குநர்கள் நியமிக்கப்பட்டு வடக்கு வாழ் தமிழர்களின் வாழ்க்கைப் போக்கு மிக உன்னிப்பாக அவதானிக்கப்பட்டும் வருவதாகக் கூறப்படுகிறது.

வடக்கில் நிலைநிறுத்தப்பட்டிருந்த செறிவான இராணுவ துருப்புக்கள் 2015 ஆட்சி மாற்றத்துக்குப் பிற்பாடு சற்றுத் தளர்த்தப்பட்டமைக்கு எதிர்ப்புத் தெரிவித்து, அம்முன்னெடுப்பு தேசிய பாதுகாப்புக்குப் பாரிய அச்சுறுத்தல் விளைவிக்கும் என்பதாக பொதுஜன பெரமுனவும் ராஜபக் ஷ சகோதரர்களும் பெரும் கணடனத்தை வெளியிட்டிருந்தனர். இனி வருங்காலங்களில் கூட தமிழர் செறிவாக வாழும் பகுதிகளில் நிலைநிறுத்தப்பட்டுள்ள இராணுவ துருப்புக்கள் தளர்த்தப்படுவதற்கான சாத்தியப்பாடுகள் குறைவானதே. யுத்த காலப்பகுதியில் இராணுவத்திடம் சரணடைந்த தமது கணவன்மார்கள் காணாமலாக்கப்பட்டமை தொடர்பில் தொடர்ந்தும் 1000ஆவது நாளாக கணவனை இழந்த பெண்கள் போராட்டத்தில் ஈடுபட்டு வந்த நிலையிலேயே ஜனாதிபதித் தேர்தலும் இடம்பெற்றுள்ளது.

ஜனாதிபதி கோட்டாபய ராஜபக் ஷவின் முன்னெடுப்புக்கள் எவ்வாறு அமையப் போகின்றன?

கோத்தாபய ராஜபக் ஷ இனிவருங்காலங்களில் ஜனாதிபதியின் அதிகாரங்களை அதிகரித்துக் கொள்வதற்கான ஏற்பாடுகளை மேற்கொள்வார் என எதிர்பார்க்கப்படுகிறது. 2015இல் மஹிந்த ராஜபக் ஷவின் தோல்வியை அடுத்து ஜனாதிபதியின் அதிகாரங்களைக் குறைத்து நிறைவேற்றப்பட்ட 19ஆம் திருத்தம் தொடர்பில் அண்மையில் மஹிந்த ராஜபக் ஷ விமர்சனத்தை வெளியிட்டிருந்தமை இங்கு கவனிக்கத்தக்கது.

பிரதமரின் அதிகாரங்களை அதிகரித்தல், இரு தடவைக்கு மேல் ஒருவர் ஜனாதபதியாக பதவி வகித்தலை தடை செய்தல், மனித உரிமைகள், பொலிஸ், நீதித்துறை மற்றும் சிவில் சேவைகள் தொடர்பில் சுயாதீன ஆணைக்குழுக்களை மீள நிறுவுதல் என்பன 19ஆம் திருத்தத்தின் முனைப்பான மாற்றங்களாகும். பலம் பொருந்திய நிறைவேற்று அதிகாரமிக்க ஜனாதிபதித்துவ முறைமையின் ஒழிப்பு தொடர்பில் பலரும் தமது ஆதரவை வெளியிட்டிருந்த அதேவளை நிறைவேற்று அதிகாரங்களை பிரதமருக்கும் ஜனாதிபதிக்குமிடையில் பகிர்வதனால் பலவீனமான செயற்திறனற்ற ஓர் அரசாங்கமே உருவாகும் என சிலர் விமர்சனம் தெரிவித்திருந்தனர்.

பொதுஜன பெரமுன பாராளுமன்றத்திற்கு அழுத்தங்களை வழங்கி 19ஆம் திருத்தத்தில் மீளாய்வுகளைச் செய்து மீண்டும் ஜனாதிபதியிடம் நிறைவேற்று அதிகாரங்களைக் குவிக்கும் ஏற்பாடுகளில் ஈடுபடும் என்பதை மஹிந்த ராஜபக் ஷவின் அண்மைய அறிக்கை மூலம் அனுமானிக்கக் கூடியதாகவுள்ளது. ஜனாதிபதியிடம் நிறைவேற்று அதிகாரங்கள் மீளக் குவிக்கப்படுமாக இருந்தால் 2015 தொடக்கம் அனுபவித்து வந்த சுயாதீனத் தன்மையை நீதித்துறையும் பொலிஸும் இழக்க வேண்டி நேரிடும் என்பது பாதக நிலையாகும்.

கோட்டாபய மற்றும் அவரது குடும்பத்தினர், ஆதரவாளர்கள் மீது நீதிமன்றத்தில் நிலுவையில் இருக்கும் பல்வேறு குற்றச்சாட்டு வழக்குகளுக்கான நீதி வழங்கும் முறைமை இனிமேல் மிகவும் மந்தகதியிலேயே அமையப் போகிறது என்பதை ஊகிக்கலாம். தம் மீது சுமத்தப்பட்ட குற்றச்சாட்டுக்கள் அனைத்தும் குறுகிய அரசியல் நோக்கங்களைக் கொண்டவை எனக் கூறி மஹிந்த ராஜபக் ஷ மறுதலிக்க முயன்றார். அரசியல் படுகொலைகள், ஆட்கடத்தல்கள், காணாமலாக்குதல் மற்றும் ஊடகவியலாளர்கள் மீதான தாக்குதல்கள் உள்ளிட்ட பல குற்றச்சாட்டுக்கள் மஹிந்த ராஜபக் ஷ ஆட்சிக் காலத்தின்போது நிகழ்ந்தன. 2015 தொடக்கம் அவ்வழக்குகள் இயலுமான வேகத்தில் விசாரணைக்குட்படுத்தப்பட்டன. எனினும், இனிமேல் அவ்வகையான வழக்குகள் தொடர்ந்தும் விசாரணைக்குட்படுத்தப்படாது கைவிடப்படலாம்.

சர்வதேச நாடுகளுடனான பாதுகாப்பு மற்றும் பொருளாதார உறவுகள்
போருக்குப் பின்னரான நல்லிணக்கமும் பொறுப்புக்கூறலும் தொடர்பில் முன்னெடுப்புக்களை மேற்கொண்டு வந்த சர்வதேச நாடுகள் மற்றும் அமைப்புக்களுக்கு, ராஜபக் ஷ குடும்பத்தின் மீள் வருகையும் அவர்களின் சிங்களவாத நிகழ்ச்சி நிரலும் பெரும் தலையிடியாய் மாறிப் போயுள்ளது என்றால் மிகையாகாது. முன்னைய ஐ.தே.க. அரசாங்கம் அவற்றுக்கு ஆதரவளித்தமையாலேயே உள்நாட்டு வாக்கு வங்கியை இழக்க நேரிட்டதாகக் கூறப்படுகிறது.
நல்லிணக்கமும் பொறுப்புக்கூறலும் தொடர்பில் முன்னைய ஐ.தே.க. அரசாங்கத்தின் சக அனுசரணையில் இடம்பெற்ற மனித உரிமைகளுக்கான ஐக்கிய நாடுகள் மன்றத்தின் (United Nations Human Rights Council) தீர்மானங்களுக்கு தமது அரசாங்கம் பொறுப்புக்கூறப் போவதில்லை என்பதனை கோத்தாபய ராஜபக் ஷ தெளிவுபடுத்தியுள்ளார்.

இலங்கையின் யுத்த காலப் பகுதி யில் இடம்பெற்றதாகக் கூறப்படும் வன்முறைகளுக்குத் தீர்வு காணும் வகையில் 4 நிலைமாறுகால நீதிப்பொறிமுறை தாபனங்களை நிர்மாணிக்குமாறு UNHRC இன் தீர்மானம் வலியுறுத்துகிறது. அவற்றில் உண்மை அறியும் ஆணைக்குழு (truth-seeking commission) மற்றும் போர்க்காலப் பகுதியில் இடம்பெற்றதாகக் கூறப்படும் சர்வதேச குற்றங்களை விசாரித்து தண்டனை வழங்கும் விசேட நீதிமன்றம் ஆகிய இரு தாபனங்களின் உருவாக்கம் சர்ச்சைகளைக் கிளறும் என ஐ.தே.க. அரசாங்கம் கருதியது. எனினும், மற்ற இரு தாபனங்களான காணாமற்போனோர் அலுவலகம் மற்றும் இழப்பீட்டுக்கான அலுவலகம் என்பன வெற்றிகரமாக ஆரம்பிக்கப்பட்டு இயங்கி வந்தன. எனினும், கோத்தாபயவின் ஆட்சியின் கீழ் அத்தாபனங்களின் செயற்பாடுகள் பலவீனப்படுத்தப்படும் அல்லது தாபனங்கள் கலைக்கப்படும் என எதிர்பார்க்கப்படுகிறது.

சீனாவுடனான சர்வதேச உறவுகளை கோத்தாபய ராஜபக் ஷ மேலும் வலுப்படுத்திக் கொள்வார் என இந்தியா, ஜப்பான் மற்றும் மேற்குலக நாடுகள் எதிர்பார்க்கின்றன. இலங்கை மற்றும் சீனாவுக்கு இடையிலான அரசியல்– பொருளாதார உறவுகள் மஹிந்த ராஜபக் ஷவின் ஆட்சிக் காலத்தின்போதே வலுப்பெற்றன. சீனாவின் நிதியுதவியுடன் நிர்மாணிக்கப்பட்டு தற்போது சீனாவுக்கு நீண்ட கால குத்தகைக்கு விடப்பட்டுள்ள ஹம்பாந்தோட்டை துறைமுகம் சிறந்த உதாரணமாகும். இறுதியில் ஹம்பாந்தோட்டை துறைமுகம் சீனாவினால் இராணுவ தளமாக மாறக்கூடும் என மேற்குலகும் இந்தியாவும் கொண்டுள்ள அச்சம் ராஜபக் ஷ சகோதரர்கள் மீண்டும் ஆட்சிக்கு வந்ததன் பிற்பாடு மேலும் அதிகரித்துள்ளது.

எனினும், சீனாவின் நோக்கங்களை மாத்திரம் நிறைவேற்றும் அரசாங்கமாக அல்லாது இலங்கைக்கு நிதியுதவி வழங்கும் நாடுகள் மற்றும் வர்த்தக உறவுகளைப் பேணும் நாடுகளுடனும் சமநிலை உறவுகைப் பேண கோத்தாபய அரசாங்கம் முயற்சிக்க வேண்டும். ஏனைய அரசுகளிடமிருந்து தொடர்ச்சியான பொருளாதார ஒத்துழைப்புக்களை பெற்றுக் கொள்வதற்கு சீனாவுடனான அதிகரித்த உறவைப் பயன்படுத்திக் கொள்ள முடியும் என ராஜபக் ஷ சகோதரர்கள் நம்புகின்ற அதேவேளை சீனாவிடம் இலங்கையை இழந்து விடும் அபாயமும் உள்ளது.-vidivelli

ஆங்கிலத்தில்: அலன் கீனன், சர்வதேச நெருக்கடிகள் குழுவின் இலங்கைக்கான பணிப்பாளர்
தமிழில்: ஹஸன் இக்பால்