நாட்டில் மிக முக்கியமான ஜனாதிபதித் தேர்தல் நடந்து முடிந்துள்ளது எதிர்பார்த்தபடி சிங்கள மக்களின் பெரிய ஆதரவுடன் கோத்தாபய ராஜபக் ஷ வெற்றி பெற்றுள்ளார்.
சிலர் மேலோட்டமான கண்ணோட்டத்துடன் இந்தத் தேர்தல் வெற்றிக்கு நாட்டில் திட்டமிடப்பட்ட இனவாதம்தான் காரணமெனக் கூறினாலும் அதற்கப்பால் பல பொருளாதார, சமூகவியல் காரணிகள் இருக்கின்றன.
மஹிந்த ராஜபக் ஷ, யுத்தத்துக்குப் பின் கிடைத்த அருமையான சந்தர்ப்பத்தை எவ்வாறு நழுவ விட்டாரோ அதேபோன்று ரணில் அரசாங்கமும் இந்த நாட்டை முன்னேற்றுவதற்கும், ஒழுங்குபடுத்துவதற்கும் கிடைத்த மிக அருமையான சந்தர்ப்பத்தை நழுவ விட்டது.
நாட்டின் கல்வி, பொருளாதாரம், வாழ்க்கைத்தரம் போன்றவற்றில் குறிப்பிட்டு சொல்லக்கூடிய அளவிற்கு ஒரு மாற்றத்தை ஏற்படுத்துவதற்கு இருந்த அரசினால் முடியாமல் போனது. அதேபோன்று நாட்டில் ஆங்காங்கே உருவான கலவரங்களை முகாமை செய்வதில் விட்ட குறைபாடும் இந்தப் பயங்கரத் தோல்விக்கான காரணமாகும்.
சிங்கள மக்கள் மிகத்தெளிவான தீர்மானத்தை எடுத்துள்ளனர். இது இந்த நாட்டின் அரசியல் வரலாற்றில் ஒரு தீர்க்கமான முடிவாக காணப்படும் என்பதில் சந்தேகமில்லை. நாங்கள் சில நேரம் சிங்கள மக்களின் இந்த மனோநிலையை பிழையாக விளங்கி கொள்கின்றோம். உண்மையில் சிறுபான்மை மக்களின் உரிமைகளையும் தேவைகளையும் பேரம் பேசும் அரசியல் ஊடாகத்தான் பெறமுடியும் என சிறுபான்மை மக்களின் மனதில் பதியவிட்டு அரசியல் செய்த சிறுபான்மை அரசியல்வாதிகள் மிகப்பெரிய தவறை செய்துள்ளனர்.
உண்மையில் நாடு என்கின்ற போதும் தமிழ், சிங்கள, முஸ்லிம் மக்கள் ஒரே பாணியில் சிந்திப்பதும் ஒரே பாதையில் பயணிப்பதும் நாட்டின் அபிவிருத்திக்கு முக்கியமானது. தனித் தனி இனக் குழுக்களாக சிந்திப்பது எந்த வகையிலும் நாட்டிற்கு ஆரோக்கியமானதல்ல.
ரணில் அரசாங்கம் முஸ்லிம் சமூகத்தின் மீதான தாக்குதலை தடுத்து நிறுத்துவதற்குப் பதிலாக மிக நுணுக்கமாக அதனை வளரவிட்டது என்பதே உண்மையாகும். சுருக்கமாகச் சொன்னால் அவர்கள் முஸ்லிம் வாக்கு வங்கியை காத்துக் கொள்வதற்காக அரசியல் செய்தனர் கோத்தாபய என்ற பேய் முஸ்லிம் சமூகத்தை அழிக்க வருகின்றது என்ற மனோநிலையை முஸ்லிம் மக்கள் மத்தியில் பதித்து, முஸ்லிம்களின் வாக்குகளை பெறுவதில் மிகவும் கவனமாக இருந்தனர் அதில் வெற்றியும் அடைந்தனர்.
கோத்தாபய தரப்பில் காணப்பட்ட இனவாதிகளும் முஸ்லிம் மக்களையும் தமிழ் மக்களையும் ஒரு பக்கமாகத் தள்ளிவிட்டனர். இது இந்த நாட்டிற்கு எந்த வகையிலும் ஆரோக்கியமானதல்ல.
இந்தத் தேர்தல் முடிவிற்கு இன்னொரு முக்கிய காரணம் நாட்டில் ஏற்பட்ட அசாதாரண காலநிலை மாற்றமாகும். குறிப்பாக தென்னிலங்கையில் கடந்த ஆறு மாதங்களாக பொழியும் மழையின் விளைவாக மக்கள் தொழிலின்றி அவதிப்பட்டனர். அவர்கள் இதற்கு இயற்கையை காரணம் பார்க்காமல் அரசுதான் இதற்குப் பொறுப்பென எண்ணியதன் விளைவு இந்தத் தேர்தல் முடிவுகளில் தாக்கம் செலுத்தியது.
இனி யாருக்கும் இனவாதத்தை வைத்து அரசியல் செய்வது கடினம். நாட்டின் பிரச்சினையை இப்போதும் முஸ்லிம்களை காட்டி மூடிமறைக்க முடியாது. நாட்டின் உண்மையான பிரச்சினை ஊழலும் மோசடியும் திட்டமிடாத முகாமையும் என்பது யாரும் அறிந்த விடயம். புதிய ஜனாதிபதி இந்த சவாலை எதிர்கொள்வது என்பது அவ்வளவு இலகுவான விடயமல்ல. ஏனெனில், அரசியலில் சுவைகண்ட பலர் அவருடன் இருக்கின்றனர். அவர்கள் எப்போதும் அரசையும் அரசியலையும் தமது சுயலாபத்திற்காக பயன்படுத்தியது என்பதே வரலாறாகும். இந்த தரப்புக்களை கோத்தாபய ராஜபக் ஷ எவ்வாறு முகாமை செய்வது என்பதிலே அவர்களின் வெற்றி தங்கியுள்ளது.
சிறுபான்மை மக்கள் தமது அரசியல் பாதை தொடர்பில் மிகத்தெளிவான தீர்மானங்களை எடுக்க வேண்டும். சிங்கள தேசியவாத சக்திகளுடன் ஒரு முறுகல் அரசியல் செய்வதா அல்லது இலங்கையர் என்ற தேசத்தை கட்டியெழுப்புவதற்கான இணக்க அரசியல் செய்வதா என்பதைத் தெளிவாகத் தீர்மானிக்க வேண்டும்.
புதிய ஜனாதிபதிக்குள்ள மிகப்பெரிய சவால் நாட்டின் பொருளாதாரத்தை கட்டியெழுப்புவதாகும். ரணில் அரசாங்கம் கிட்டத்தட்ட எல்லா முஸ்லிம் நாடுகளையும் ஒதுக்கி அமெரிக்கா, இந்தியா ஆகிய இரு சக்திகளையும் அடிப்படையாகக்கொண்டு ஆட்சி நடத்தியது. அதே தவறை எதிர்கால அரசு விடுமாயின் நிச்சயமாக அது நாட்டின் அபிவிருத்தியை பெருமளவிற்கு பாதிக்கும்.
இலங்கையை சூழவுள்ள நாடுகள் குறிப்பாக வங்காளதேசம், இந்தோனேஷியா, மலேசியா போன்ற நாடுகள் நல்ல பொருளாதார வளர்ச்சியை கண்டுவருகிறது. பிராந்திய சக்தியாக இந்தியா பொருளாதார வளர்ச்சியில் அண்மைக்காலமாக ஒரு பெரிய வீழ்ச்சியை கண்டுவருகிறது. குறிப்பாக, இயற்கை அனர்த்தங்கள், சூழல் மாசடைதல் போன்ற காரணிகள் இந்தியாவின் பொருளாதாரத்தை பெருமளவு பாதித்துள்ளது.
எனவே, புதிய அரசு முழுமையாக சீனாவின் பக்கம் சாராமலும் , முழுமையாக இந்தியாவின் பக்கம் சாராமல் ஒரு நடுநிலை வெளிநாட்டுக் கொள்கையை மேற்கொள்வதே நாட்டின் அபிவிருத்திக்கு முக்கியமானது.
புதிய ஜனாதிபதி நாட்டின் சிறுபான்மை மக்களின் மனதை வெல்வதற்கு செயற்படவேண்டும். அதுவே மொத்த நாட்டின் அபிவிருத்திக்கு முக்கியமானது என்பதை அவர் உணர்ந்து செயல்படுவாரெனப் பெரிதும் எதிர்பார்க்கிறோம்.-Vidivelli
- எம்.என்.முஹம்மத்
ஆசிரிய ஆலோசகர்
களுத்துறை