சில பிரதம தெரிவத்தாட்சி அலுவலர்களின் நியமனங்களால் நம்பிக்கையீனம் நிலவுகிறது.

அட்டாளைச் சேனை காணி மீட்பு கூட்டத்தை தடுத்ததும் தவறு; பேராசிரியர் ஹூல்

By vidivelli On Nov 14, 2019

எமது பிரதேச தெரிவத்தாட்சி அதிகாரிகள் தேர்தலில் வெற்றி வாய்ப்புள்ள வேட்பாளர்களுக்கிடையில் சமநிலையினைப் பேணுவதில் ஆற்றல் மிக்கவர்களாக இருக்கிறார்கள். தேர்தலின் பின்பும் இது விடயத்தில் தங்கள் பங்களிப்பினைச் செய்கிறார்கள். பதவி வெற்றிடங்கள் ஏற்படும்போது வெற்றிபெற்றவர் மூலம் அவற்றைப் பெற்றுக்கொள்கிறார்கள். பதவியுயர்வின்போது அவர்களது பதவிநிலை கவனத்திற்கொள்ளப்பட வேண்டும். ஆனால் அரசாங்க அதிபர்கள் எதுவும் கவனத்திற் கொள்ளப்படாது பிரதம தெரிவத்தாட்சி அதிகாரிகளாக நியமனம் பெறுகிறார்கள். இதனால் இந்த நடைமுறையில் நம்பிக்கை இழக்கப்படுகிறது என தேர்தல் ஆணைக்குழுவின் உறுப்பினர் பேராசிரியர் ரத்ன ஜீவன் ஹுல் தெரிவித்துள்ளார்.

கொழும்பு ஊடகமொன்றுக்கு அனுப்பி வைத்துள்ள அறிக்கையிலேயே அவர் இவ்வாறு கூறியுள்ளார். அவர் மேலும் தெரிவித்துள்ளதாவது; அண்மையில் அரச சார்பற்ற நிறுவனமொன்று அம்பாறை மாவட்டத்தின் காணிப் பிரச்சினைகளுக்கு தீர்வு காணுவதற்காக அட்டாளைச் சேனையின் மனித எழுச்சி நிறுவனம் நிகழ்வொன்றினை ஏற்பாடு செய்திருந்தது. அட்டாளைச்சேனையில் இந்நிகழ்வு ஏற்பாடு செய்யப்பட்டிருந்தது. நிலைமை கட்டுப்பாட்டை மீறியதால் அந்நிகழ்வு தடைசெய்யப்பட்டது. பாராளுமன்ற உறுப்பினர்களும் இந்நிகழ்வில் கலந்து கொண்டிருந்தனர். நிகழ்வு ஆரம்பிக்கப்படுவதற்கு முன்பே உதவி தெரிவத்தாட்சி அதிகாரி பெரேரா கூட்ட மண்டபத்தை மூடுவதற்கு உத்தரவிட்டார். அம்பாறை உதவி தேர்தல் ஆணையாளரும் இதற்கு ஒத்துழைத்தார். தேர்தல் சட்டங்களை மீறுவதாகக் குறிப்பிட்டே கூட்டம் நிறுத்தப்பட்டது.

நிகழ்வினை ஏற்பாடு செய்திருந்த மனித எழுச்சிக்கான நிறுவனம் கூட்டத்திலிருந்து அனைத்து அரசியல் வாதிகளையும் வெளியேற்றுவதாக உதவி தேர்தல் ஆணயாளரிடமும், பெரேராவிடமும் உறுதியளித்தது. என்றாலும் அது ஏற்றுக்கொள்ளப்படவில்லை.

தேர்தல் ஆணைக்குழுவின் கடிதத் தலைப்பில் கூட்டத்தை நிறுத்துவதற்கான உத்தரவு வழங்கப்பட்டது. காணி உரிமையாளரிடம் காரியாலயத்தை மூடி விடுமாறு உத்தரவில் தெரிவிக்கப்பட்டது. அங்கு கலவரமான நிலை காணப்பட்டது.

இச்சம்பவம் குறித்து மனித எழுச்சி நிறுவனம் தேர்தல் ஆணைக்குழுவுக்கு முறைப்பாடு செய்தது. உடனடியாக விசாரணை ஆரம்பிக்கப்பட்டது. அச்சந்தர்ப்பத்தில் தேர்தல் ஆணைக்குழு என்ற தலைப்பில் வழங்கப்பட்ட கடிதம் போலியானது என நிரூபிக்கப்பட்டது. அத்தோடு அரச சார்பற்ற நிறுவனத்துக்கு உத்தரவுகள் வழங்க எமக்கு அதிகாரமில்லை எனவும் தெரிவிக்கப்பட்டது.

என்றாலும் தேர்தல் ஆணைக்குழுவின் தீர்மானம் மனித எழுச்சி நிறுவனத்துக்கு அறிவிக்கப்படவில்லை. அவர்கள் என்ன தீர்மானம் எடுத்தீர்கள் என்று என்னிடம் விடாப்பிடியாக வினவினார்கள். இந்த விபரங்களே அவர்களுக்கான எனது பதிலாகும்.

நான் கேட்க விரும்புகிறேன், பெரேரா தெரிவத்தாட்சி அதிகாரியாக இருப்பதற்கு பொருத்தமானவரா? அவர் தொடர்ந்தும் பதவியிலிருந்தால் அட்டாளைச்சேனை மக்கள் எங்களது தேர்தல் நடவடிக்கையில் எவ்வளவு நம்பிக்கை கொள்வார்கள்?

ஆணைக்குழுவின் தீர்மானத்தை ஏன் நாம் மனித எழுச்சி நிறுவனத்துக்கு அறிவிக்கவில்லை? நாங்கள் எமது உத்தியோகத்தரை பாதுகாக்கிறோமா?

கொழும்பு பிரதம தெரிவத்தாட்சி அதிகாரி சுனில் கன்னங்கராவும், பல விடயங்களில் தவறியுள்ளார். 2018 ஆம் ஆண்டு ஒக்டோபர் மாதம் பாராளுமன்றத்தில் பெரும்பான்மையாக இருந்த கட்சியை பகிரங்கமாக எதிர்த்தார். அந்தப் பிரச்சினை நீதிமன்றம் மூலம் தீர்க்கப்பட்டதால், அவர் தப்பினார். அமைச்சர் மங்கள சமரவீர ஒரு வாரத்திற்கு முன்பு ரூபவாஹினி தொலைக்காட்சி நிகழ்ச்சியில் கன்னங்கராவின் செயற்பாடுகள் பற்றித் தெரிவித்துள்ளார். ஒரு சந்தர்ப்பத்தில் வேட்பாளர் ஒருவருக்கு தவறாக பேசியபோது அவரது பாதுகாப்பு உத்தியோகத்தர்கள் அவரை தாக்குவதற்கு முயற்சித்துள்ளார்கள். அப்போது மஹிந்த தேசப்பிரிய நண்பர் ஒருவரை அனுப்பியதால் அவர் பாதுகாக்கப்பட்டார்.

இன்னும் சில விடயங்கள் தொடர்பில் நான் குறிப்பிட வேண்டும். கொழும்பில் கிராம சேவையாளர்கள் ஊழல்கள் புரிந்துள்ளார்கள். சில வாக்காளர்களின் பெயர்களை வாக்காளர் இடாப்பில் நீக்கியுள்ளார்கள். இது தொடர்பில் நான் அறிவித்ததையடுத்து அமைச்சரவையில் கலந்துரையாடப்பட்டது. முறைப்பாடும் செய்யப்பட்டது. தேர்தல் ஆணைக்குழுவின் தலைவர் இது தொடர்பில் ஆராய ஓய்வு பெற்ற தேர்தல் ஆணையாளர் ஒருவரை நியமிக்க திட்டமிட்டார். அதனால் கன்னங்கராவை கண்காணிக்க முடிந்தது.

அரசாங்க அதிபர்கள் தொடர்பிலும் முறைப்பாடுகள் உள்ளன. ஒருகட்சிக்கு ஆதரவு வழங்கியதால் ஒரு அரசாங்க அதிபர் யாழ்ப்பாணத்திலிருந்தும் இடமாற்றம் செய்யப்பட்டார். அவர் ஆணைக்குழுவுக்கு வந்தார். அவர் கடமை நேரத்தில் அதிக மதுபோதையில் இருந்ததை நான் கண்டேன். 2012 இன் பின்பு வவுனியாவுக்கு அரசாங்க அதிபராக நியமிக்கப்பட்டவர் வவுனியாவில் நாமல்கம போன்ற சிங்கள கிராமங்களை நிறுவினார்.

நான் கிழக்குக்கு விஜயம் செய்து எவ்வாறு வாக்களிக்க வேண்டும் என மக்களுக்கு தெளிவுகளை வழங்கினேன்.வாக்களிப்பை பகிஷ்கரிக்கும் குழுவினர் மக்களுக்கு வாக்களிப்பது தொடர்பில் தவறான விளக்கங்களை வழங்குகிறார்கள். யாழ்ப்பாணத்தைச் சேர்ந்த பீடாதிபதி ஒருவர் வாக்காளர்களுக்கு ஒரு X, 2 X மற்றும் 3 X கள் வாக்குச் சீட்டில் புள்ளடியிடுமாறு வேண்டியுள்ளார். இந்த மூன்று விதத்தில் ஏதாவது ஒரு முறையில் வாக்களிக்குமாறு வேண்டியுள்ளார். நிச்சயம் இந்த வாக்குகள் செல்லுபடியற்றதாகும். சி.வி.விக்னேஸ்வரன் தனது ஊடக அறிக்கையில் வாக்கை செல்லுபடியற்றதாக ஆக்கும் படி கூறியுள்ளார். அதனால் எவரும் 50% வாக்குகள் பெற மாட்டார்கள் என்று கூறியுள்ளார் (செல்லுபடியற்றதாக்கிய வாக்குகள் எண்ணப்படுவதில்லை) ஒரு ஜனாதிபதி சட்டத்தரணி கூறியுள்ளார் அவரது வீடியோ பதிவினைப் பார்வையிட்டேன் எனது ஆதரவாளரான வேட்பாளரே வெற்றி பெறுவார். முஸ்லிம்கள் அவருக்கு வாக்களிக்காவிட்டால் தேர்தல் முடிந்ததும் தாக்கப்படுவார்கள் என்ற கருத்துப்பட அவர் பேசியுள்ளார். (அவர் இதனை மறுத்துள்ளார். ஆணைக்குழுவுக்கு முறைப்பாடு செய்யப்பட்டுள்ளது. வீடியோ பதிவும் அனுப்பி வைக்கப்பட்டுள்ளது. ஆனால் இதுவரை எவ்வித நடவடிக்கையும் எடுக்கப்படவில்லை)

நான் மிகவும் வருந்துகிறேன். பெரும் எண்ணிக்கையான மக்களும் வருந்துவார்கள் எனக் கருதுகிறேன்.

நாம் சந்தேகத்துக்குள்ளான தெரிவத்தாட்சி அதிகாரிகள், உதவி மற்றும் பிரதிதேர்தல் ஆணையாளர்கள் மீது விசாரணைகள் நிலுவையில் இருக்கும் போது இவ்வாறானவர்கள் பதவியிலிருந்து இடை நிறுத்தப்பட வேண்டும். தேர்தல் ஆணைக்குழுவுக்கு கிடைக்கும் முறைப்பாடுகள் பகிரங்கப்படுத்தப்பட வேண்டும்.

வாக்காளர்களுக்கு தெரிவிக்க விரும்புகிறேன். முன்னாள் ஜனாதிபதியை ஆணைக்குழு எச்சரித்துள்ளது.

அவர் தபால் மூல வாக்களிப்பில் அவர் சார்ந்தவேட்பாளருக்கு 80% வாக்குகள் கிடைத்திருப்பதாக தெரிவித்திருந்தார். இதுதேர்தல் சட்டத்தை மீறிய செயலாகும். இது தேர்தல் சட்டத்தை மீறியமை மாத்திரமல்ல எவ்வாறு வாக்களிக்கப்பட்டுள்ளது என்று தெரிவித்துள்ளமை பெரிய தவறாகும். இந்தச் செய்தி ஒலிபரப்பப்பட்டது. இது பொய்ச் செய்தியாகும். தபால் மூல வாக்குகள் எண்ணப்படக்கூட இல்லாத நிலையில் செய்தி ஒலிபரப்பாகியுள்ளது. அவரை எச்சரிப்பதில் எந்த பிரயோசனமுமில்லை. இலங்கையருக்கு அவர் எச்சரிக்கப்பட்டுள்ளதாக கூறப்படாமல் உள்ளது. அவருக்கு அனுப்பப்பட்ட கடிதத்தில் எங்களது தீர்மானம் பற்றி தெரிவிக்கப்படாமை குறித்து நான் ஆச்சரியப்படுகிறேன்.-Vidivelli

ஏ.ஆர்.ஏ.பரீல்