கொள்கை ரீதியில் மஹிந்த அரசைவிட நல்லாட்சி அரசு முஸ்லிம்களுக்கு சாதகமாக இருந்தது சஜித் ஜனாதிபதியானால் கசப்பான சம்பவங்களுக்கு இடமளிக்கமாட்டார்.
திருகோணமலை மாவட்ட பாராளுமன்ற உறுப்பினர் இம்ரான் மஹ்ரூப்.
தேர்தலுக்கு இன்னும் மூன்று நாட்கள் மாத்திரம்தான் இருக்கின்றன. இந்நிலையில் புதிய ஜனநாயக முன்னணி சார்பில் அன்னம் சின்னத்தில் போட்டியிடும் ஐக்கிய தேசியக் கட்சியின் பிரதித்தலைவர் சஜித் பிரேமதாசவின் வெற்றி வாய்ப்புகள் எப்படி இருக்கின்றன?
உண்மையை கூறவேண்டுமென்றால் சஜித் பிரேமதாச ஜனாதிபதி வேட்பாளராக அறிவிக்கப்பட்ட பின்னர் நாம் பிரசாரத்தை ஆரம்பிக்கும்போது எமக்கு இந்தப் பயணம் மிகவும் சவாலாகவே காணப்பட்டது. அதுவும் உயிர்த்த ஞாயிறு தாக்குதலின்பின் பெரும்பான்மை மக்கள் மத்தியில் இனவாதம் பரப்பப்பட்டது. அதைத் தொடர்ந்து நாட்டின் பாதுகாப்பை உறுதிப்படுத்த கோத்தாபய ராஜபக் ஷவே பொருத்தமானவர் என்ற மனநிலையை பெரும்பான்மை சமூகம் மத்தியில் அவர்கள் விதைக்க அவர்கள் பாரிய இனவாத பிரச்சாரங்களை முன்னெடுத்தனர்.
ஆனால் இந்த தடைகள் அனைத்தையும் தகர்த்தெறியுமுகமாக சஜித் பிரேமதாச நாடு முழுவதும் மேற்கொண்ட பிரசாரங்கள் எமக்கு பாரிய வெற்றியளித்துள்ளன. குறிப்பாக சொல்ல வேண்டுமானால் பெரும்பான்மை அடிமட்ட மக்கள் மத்தியில் இந்தப் பிரசாரம் பாரிய மாற்றத்தை ஏற்படுத்தியுள்ளது.
இதனால் நாம் தேர்தல் பிரசாரத்தை ஆரம்பிக்கும்போது இருந்ததைவிட எமக்கு ஏழு தொடக்கம் பத்து சதவீத வாக்குகள் அதிகரித்துள்ளன.
அத்துடன் பீல்ட் மார்ஷல் சரத் பொன்சேகா பாதுகாப்பு அமைச்சராக நியமிக்கப்படுவாரென அறிவிக்கப்பட்டமை, உயிர்த்த ஞாயிறு தாக்குதலின் பின்னால் கோத்தாபயவே உள்ளதாக தற்போது பரவலாக பேசப்படுகின்றமை, ரதன தேரர், ஹிஸ்புல்லாஹ், ராசிக் போன்றோர் ஒரே அணியில் இருக்கின்றமை போன்றன அவர்கள் மேற்கொண்ட இனவாத பிரசாரத்தின் தாக்கங்களை குறைத்துள்ளன,
அதுபோன்று கோத்தாபய ராஜபக் ஷவின் செய்தியாளர் சந்திப்பை அடுத்து அவர்மீது பெரும்பான்மை மக்கள் கொண்டிருந்த மாயை தகர்க்கப்பட்டுள்ளது. மேலும் முன்னாள் ஜனாதிபதி சந்திரிகா பண்டாரநாயக்க உள்ளிட்ட சுதந்திரக் கட்சி செயற்பாட்டாளர்களின் இணைவு ஆகியன சஜித் பிரேமதாசவின் வாக்கு வங்கியில் பாரிய அதிகரிப்பை உண்டுபண்ணியுள்ளது.
எனவே, தற்போதுள்ள சூழ்நிலையில் சஜித் பிரேமதாசவே முன்னிலையில் உள்ளார்.
சிறுபான்மையினரின் வாக்குகளை நம்பியிருக்கும் ஐக்கிய தேசியக் கட்சி தொடர்ந்தும் சிங்கள மக்களின் வாக்குகளை பெறத் தவறி வருகின்றது. இம்முறை புதிய தலைமையொன்றை களமிறக்கியமையால் சிங்கள வாக்காளர் மத்தியில் மாற்றங்கள் ஏதும் நிகழ வாய்ப்பிருக்கிறதா?
ஆம், நிச்சயமாக நான் மேலே குறிப்பிட்டது போன்று சஜித் பிரேமதாச மேற்கொண்ட தேர்தல் பிரசாரங்கள் மூலம் இப்பொழுதே பெரும்பான்மை வாக்குகள் ஏழு தொடக்கம் பத்து வீதம் அதிகரித்துள்ளன.
அவரின் பிரசாரங்கள் அடிமட்ட சிங்கள மக்கள் மத்தியில் பாரிய மாற்றங்களை ஏற்படுத்தியுள்ளன. அதை நீங்கள் தேர்தல் முடிவுகள் வெளிவரும்போது உணர்வீர்கள்.
அத்துடன் சஜித் பிரேமதாச ஜனாதிபதியாகத் தெரிவுசெய்யப்பட்ட பின் அவரின் தந்தைபோன்று அவரும் பெரும்பான்மையினர் மதிக்கும் ஜனரஞ்சகம் மிக்க தலைவராக உருவெடுப்பார். இது ஐக்கிய தேசியக் கட்சியின் பெரும்பான்மை வாக்கு வங்கியில் பாரிய அதிகரிப்பை ஏற்படுத்தும்.
அது சஜித் பிரேமதாசவின் வெற்றிவாய்ப்பை இலகுபடுத்துமென எதிர்பார்க்கிறீர்களா?
நிச்சயமாக. சிறுபான்மையினரின் எண்பது சதவீதத்துக்கு மேற்பட்ட வாக்குகளை பெற்றுக்கொள்ளவுள்ள சஜித் பிரேமதாசவுக்கு பெரும்பான்மை வாக்கு வங்கியில் ஏற்படும் அதிகரிப்பானது அவருக்கு கிடைக்கும் வெற்றி வீதத்தை மேலும் அதிகரிக்கும்.
ஐக்கிய தேசியக் கட்சியின் மீதும் நல்லாட்சி அரசாங்கத்தின் மீதும் அதிருப்தியிருப்பதால் இம்முறை முஸ்லிம், தமிழ் மக்கள் மத்தியில் செல்வாக்கு குறைவடைந்திருப்பதாக கூறப்படுகின்றது. இதனை நீங்கள் எப்படி நோக்குகின்றீர்கள்?
ஆட்சியிலுள்ள அரசின் மீது பொதுமக்களுக்கு அதிருப்தி ஏற்படுவது வழமையே. ஆனால் சிறுபான்மையினர் மத்தியில் குறிப்பாக, முஸ்லிம் மக்கள் மத்தியில் அதிருப்தியேற்படக் காரணம் திகன, குருநாகல், மினுவாங்கொடையில் ஏற்பட்ட கலவரங்களின்போது அதைக் கட்டுப்படுத்த அரசு தவறியமையாகும்.
ஆனால், இந்த தாக்குதல்களின் சூத்திரதாரிகள் ராஜபக் ஷ சகோதரர்கள் என்பதை மக்கள் அறிந்துள்ளார்கள். அத்துடன் மைத்திரிபால சிறிசேன, சஜித் போன்றவர்களல்ல என்பதை மக்கள் அறிவார்கள். ஆகவே சஜித்தின் ஆட்சியில் இவ்வாறான சம்பவங்கள் ஏற்பட அவர் இடமளிக்கமாட்டாரென நான் நம்புகிறேன். மக்களும் அதை நம்புவார்கள் என நினைக்கிறேன்.
இந்த தாக்குதலை கட்டுபடுத்த எமது அரசாங்கம் உரிய நடவடிக்கைகளை எடுக்கவில்லை என்பதைவிட இந்த தாக்குதலை மேற்கொண்டவர்களை தோற்கடிக்க வேண்டும் என்பதில் மக்கள் உறுதியாக உள்ளார்கள். எனவே, கடந்த முறை மைத்திரிபால சிறிசேனவுக்கு அளிக்கப்பட்ட வாக்குகளைவிட இம்முறை சஜித் பிரேமதாசவுக்கு அதிகமான சிறுபான்மை வாக்குகள் கிடைக்கும்.
பாராளுமன்ற பிரதிநிதித்துவம்கொண்ட சிறுபான்மை கட்சிகளின் முழுமையான ஆதரவு ஜனாதிபதி வேட்பாளர் சஜித் பிரேமதாசவுக்கு இருக்கிறது. எனினும், கடந்த கால தாக்குதல்கள் மற்றும் வன்முறைகளை மையப்படுத்தி முஸ்லிம்கள் அநுரகுமார திசாநாயக்க, கோத்தாபய ராஜபக் ஷ போன்ற வேட்பாளர்கள் பக்கம் நகர்வதை அவதானிக்க முடிகிறதே?
இந்த தாக்குதலை காரணம் காட்டி முஸ்லிம்கள் கோத்தாவின் பக்கம் செல்வார்கள் என நம்பவில்லை.
ஏனெனில், அந்த தாக்குதல்களின் சூத்திரதாரிகள் ராஜபக் ஷவினரே என்பதை முழு முஸ்லிம் சமூகமும் அறியும்.ஆனால், மிகவும் குறைந்தளவு வாக்குகள் அநுரகுமாரவின் பக்கம் செல்லலாம்.
ஆனால் அநுரகுமாரவின் பெரும்பான்மை வாக்குகளில் கோத்தாபய ராஜபக் ஷவுக்கு செல்லவுள்ள வாக்குகளை பிரிப்பதால் முஸ்லிம்களிடமிருந்து அவருக்கு செல்லும் சொற்பளவிலான வாக்குகள் எமது வெற்றியில் தாக்கம் செலுத்தாதென நினைக்கிறேன்.
நல்லாட்சி அரசாங்கம் இருந்தபோது முஸ்லிம்களுக்கு எதிராக தாக்குதல்கள் மேற்கொள்ளப்பட்டன. இந்த தாக்குதல்களின் பின்னணியில் பொதுஜன பெரமுனவினர் இருப்பதாக குற்றம் சாட்டப்படுகின்றது. எனினும், இந்த தாக்குதல்கள் இடம்பெற்றபோது நல்லாட்சி அரசாங்கம் நடவடிக்கை எடுக்காது வேடிக்கை பார்த்ததாகக் குற்றம் சுமத்தப்படுகின்றது. இந்நிலையில், சஜித் பிரேமதாசவின் ஆட்சியில் முஸ்லிம்களுக்கு எதிரான திட்டங்கள் முன்னெடுக்கப்படாது என எப்படி நம்பலாம்?
நான் அதை முழுமையாக நம்புகிறேன். நான் அரசியல் வாழ்வை ஆரம்பித்த ஒன்பது வருடங்களாக அவருடன் இணைந்து அரசியல் செய்துள்ளேன். நான் பார்த்ததில் அவர் ஒரு சிறந்த பௌத்தர். அனைத்து மதங்களையும் சமமாக மதிக்கின்றவர். இனவாதம், மதவாதம் போன்றவற்றில் நம்பிக்கை இல்லாதவர். அவரின் முழுமையான நோக்கமும் வறுமை ஒழிப்பே.
இந்த இனவாதத் தாக்குதல்கள் அரசியல் நோக்கங்களுக்காக செய்யப்பட்டவை என்பது அனைவருக்கும் தெரியும். இந்த தேர்தலில் கோத்தாபய ராஜபக் ஷ தோல்வியுற்றால் இலங்கையில் இனவாதம் மூலம் அரசியலை மேற்கொண்டு வெற்றிபெறமுடியாது என்ற செய்தி உலகுக்கு சொல்லப்படும். கோத்தாபயவின் தோல்வி என்பது இனவாதத்துக்கு கிடைத்த தோல்வியாகக் கருதப்படும். அதன்பின் யாரும் தேர்தலில் வெற்றிபெற இனவாதத்தை கையிலெடுக்க மாட்டார்கள்.
நீங்கள் மேலே குறிப்பிட்ட தாக்குதல்களின்போது அரசாங்கம் நடவடிக்கை எடுத்துள்ளது. ஆனால் அதை கட்டுப்படுத்த விரைவாக நடவடிக்கை எடுக்கவில்லை. அளுத்கம கலவரத்தை மேற்கொண்டோர் யாரும் கைது செய்யப்படவில்லை. ஆனால் திகன, மினுவாங்கொடை கலவரத்தில் ஈடுபட்டோர் கைது செய்யப்பட்டுள்ளனர்.
இந்தக் கலவரத்தை கட்டுப்படுத்த அரசாங்கம் விரைவாக நடவடிக்கை மேற்கொள்ளாததற்கு முழுப் பொறுப்பையும் ஜனாதிபதி மைத்திரிபால சிறிசேனவே ஏற்க வேண்டும். பாதுகாப்பு அமைச்சராக இருந்த அவர் இதற்கான நடவடிக்கை எடுப்பதில் அசமந்தமாக இருந்தார் என்பதே உண்மை.
கொள்கைரீதியாக மஹிந்த அரசைவிட நல்லாட்சி அரசு முஸ்லிம்களுக்கு சாதகமாகவே இருந்தது. மஹிந்த ராஜபக் ஷ பீ.பீ.சீ. நேர்காணலின் போது அளுத்கம கலவரங்களுக்கான பொறுப்பை முஸ்லிம்கள் மீதே சாட்டும் வகையில் பேட்டியளித்தார்.
ஆனால் நல்லாட்சி அரசாங்கத்தின்போது அதிலிருந்த சம்பிக ரணவக கூட அவ்வாறு முழுப் பொறுப்பையும் முஸ்லிம்கள் மீது சாட்டும் வகையில் கருத்து வெளியிடவில்லை.
ஆகவே, சஜித் பிரேமதாச போன்று தைரியமாக முடிவெடுக்கும் ஒருவர் ஜனாதிபதியாகும்போது இந்த கசப்பான சம்பவங்கள் நடைபெற இடமளிக்கமாட்டார்.
தீர்க்கப்படாத முஸ்லிம் சமூகப் பிரச்சினைகள் பலவற்றிற்கு தீர்வைப் பெற்றுத்தருவதாக சஜித் பிரேமதாச வாக்குறுதியளித்திருக்கிறார். குறிப்பாக, சாய்ந்தமருது உள்ளூராட்சி மன்ற கோரிக்கை, ஒலுவில் துறைமுக விவகாரம் குறித்த பிரச்சினைகள், நுரைச்சோலை வீட்டுத்திட்டம், அருவாக்காலு திண்மக்கழிவு சர்ச்சை அத்துடன், தொல்பொருள் திணைக்களத்துடன் தொடர்புடைய காணிப்பிரச்சினைகள் என வாக்குறுதிப்பட்டியல் நீண்டுகொண்டே செல்கிறது. இவற்றிற்கு தீர்வு கிட்டுமென எதிர்பார்க்க முடியுமா?
சஜித் பிரேமதாசவின் கடந்தகால வரலாற்றை எடுத்து நோக்கினால் அவர் சொல்வதை செய்பவர். இருந்தும் தேர்தல் கால வாக்குறுதிகளை நிறைவேற்றுவாரா இல்லையா என்பதற்கு காலமே பதில் சொல்லும். ஆனால் முன்னைய ஆட்சியாளர்கள் இந்தப் பிரச்சினைகளை கையாண்டதைவிட சஜித் பிரேமதாச இவற்றைத் திறம்படக் கையாள்வார் என்பது எனது தனிப்பட்ட அபிப்பிராயம்.
கடந்த தேர்தலின்போதும் முஸ்லிம்களின் உரிமைகள், பாதுகாப்பு என்பவற்றை கருத்திற்கொண்டே மைத்திரிபால சிறிசேனவை ஆதரித்தனர். இந்த தேர்தலிலும் துரதிஷ்டவசமாக தீர்க்கப்படாத அந்தப் பிரச்சினைகள் மேலும் தீவிரமடைந்திருக்கின்றன. இம்முறையாவது முஸ்லிம்களின் பாதுகாப்பு உறுதிப்படுத்தப்பட்டு, உரிமைகள் நிலைநாட்டப்படும் என எதிர்பார்க்கலாமா?
ஆம், நான் மேலே குறிப்பிட்டது போன்று சஜித் ஒரு சிறந்த பௌத்தர். அனைத்து மதங்களையும் சமமாக மதிக்கின்றவர்.
இனவாதம், மதவாதம் போன்றவற்றில் நம்பிக்கையில்லாதவர். அவர் ஒரு காலத்திலும் இனவாதத்தை கையிலெடுக்க மாட்டார். இனவாத நடவடிக்கைகளுக்கும் ஆதரவளிக்கமாட்டார்.
ஆகவே, சஜித்தின் ஆட்சியில் முஸ்லிம்கள் மட்டுமல்லாது அனைத்து இனத்தவர்களின் உரிமை, பாதுகாப்பு உறுதிப்படுத்தப்படும் என நான் நம்புகிறேன்.-Vidivelli
- நேர்காணல்:
எஸ்.என்.எம்.ஸுஹைல்