ஜனாதிபதி சட்டத்தரணி அலிசப்ரிக்கு எதிராக 500 மில்லியன் ரூபா நஷ்டஈடு கோரி வழக்கு தாக்கல் செய்யவுள்ளதாக விளையாட்டுத்துறை அமைச்சர் ஹரின் பெர்னாண்டோ தெரிவித்தார். ஞாயிற்றுக்கிழமை கொழும்பில் ஏற்பாடு செய்யப்பட்டிருந்த ஊடகவியலாளர் சந்திப்பில் கலந்து கொண்ட அலி சப்ரி, ஹரின் பெர்னாண்டோவும் அவரது தந்தையும் உயிர்த்த ஞாயிறு தாக்குதல் தொடர்பான தகவல்களை மறைத்து பொதுமக்கள் 300 பேர் உயிரிழக்க காரணமாகினர் என குற்றம் சுமத்தியிருந்த நிலையில், இதற்கு எதிராகவே அவர் இவ்வாறு வழக்கு தாக்கல் செய்யவுள்ளதாகத் தெரிவித்தார்.
கொழும்பில் நேற்று திங்கட்கிழமை நடைபெற்ற ஊடகவியலாளர் சந்திப்பில் இதனை தெரிவித்த அவர் மேலும் கூறியதாவது :
கோத்தாபய ராஜபக் ஷவின் அமெரிக்க குடியுரிமை தொடர்பில் கலவரமடைய வேண்டிய தேவையோ அல்லது அதைப்பற்றி தேர்தல் பிரசார மேடைகளில் பேச வேண்டிய தேவையோ சஜித் பிரேமதாசவுக்கு கிடையாது. காரணம் தேர்தலில் கோத்தாபய ராஜபக் ஷவே எம்மால் இலகுவாக தோல்வியடையச் செய்யக் கூடியவராவார்.
இவ்வாறு சகோதரரின் பின்னால் செல்லும் கோத்தாபய நிச்சயம் தேர்தலில் போட்டியிட வேண்டும் என்பதே எமது எதிர்பார்ப்பாகும். எனினும், அவரது அமெரிக்க குடியுரிமை தொடர்பில் மீண்டும் ஒரு பிரச்சினை ஏற்பட்டமையினாலேயே நான் எனது டுவிட்டர் பதிவில் அது குறித்து பதிவொன்றை இட்டிருந்தேன். எனினும் அது இப்போது பூதாகரமான பிரச்சினையாகியுள்ளது.
அமெரிக்க குடியுரிமையை நீக்கிக் கொண்டவர்கள் பட்டியலில் கோத்தாபய ராஜபக் ஷவின் பெயர் ஏன் உள்ளடக்கப்படவில்லை என்பதே தற்போது காணப்படும் பாரிய பிரச்சினையாகும். அமெரிக்க தூதரகம் ஏன் இதுபற்றி எந்தக் கருத்தையும் கூறாமலிருக்கிறது? கோத்தாபய ராஜபக் ஷ அமெரிக்கப் பிரதிநிதியா? அல்லது அமெரிக்காவின் துப்பறிவாளரா? சோபா ஒப்பந்தத்தை ஏற்படுத்திக் கொள்வதற்கு அமெரிக்கா கோத்தாபயவை பயன்படுத்திக் கொள்ள முயற்சிக்கிறதா?
மேலும், ஞாயிற்றுக்கிழமை ஜனாதிபதி சட்டத்தரணி அலிசப்ரி பங்குபற்றியிருந்த ஊடகவியலாளர் சந்திப்பில் நானும் என்னுடைய தந்தையும் 300 பொது மக்களை கொன்றதாகக் கூறினார். இந்தக் கூற்றை கண்டிப்பதோடு, அவருக்கு எதிராக 500 மில்லியன் ரூபா நஷ்ட ஈடு கோரி வழக்கு தொடரவுள்ளேன். என்மீதும் தந்தை மீதும் இவ்வாறு அநாவசியமான போலி குற்றச்சாட்டுக்கள் முன்வைத்தமை ஏற்றுக் கொள்ள முடியாததாகும். காரணம், கோத்தாபய ராஜபக் ஷவை களத்திற்கு கொண்டுவருவதற்காகவே பொதுஜன பெரமுனவினரால் உயிர்த்த ஞாயிறு தற்கொலை குண்டு தாக்குதல் மேற்கொள்ளப்பட்டது. சஹ்ரான் போன்ற பயங்கரவாதிகளுக்கும் இவர்களே ஊக்கம் கொடுத்தனர். தற்போது அந்த பழியை எம்மீது சுமத்த முயல்கின்றனர். அதனை ஏற்றுக்கொள்ள முடியாது.-Vidivelli