300 பேர் கடத்தி சித்திரவதைகளுக்கு உட்படுத்தி கொல்லப்பட்டுள்ளனர்
வெள்ளை வேன் சாரதியொருவர் ஊடக சந்திப்பில் விளக்கம்
முன்னாள் ஜனாதிபதி மஹிந்த ராஜபக் ஷவின் ஆட்சிகாலத்தில் இடம்பெற்ற வெள்ளைவேன் கடத்தல் விவகாரத்தின் பிரதான சூத்திரதாரியாக செயற்பட்டவர் கோத்தாபய ராஜபக் ஷவே என்றும் இவ்வாறு அண்ணளவாக 300 பேர் கடத்தப்பட்டு சித்திரவதைகளுக்கு உட்படுத்தி கொல்லப்பட்டுள்ளதாகவும், இவ்வாறு கடத்தப் பயன்படுத்திய வெள்ளை வேன் ஒன்றின் சாரதியாக பணியாற்றியதாகக் கூறப்படும் அந்தனி டக்லஸ் பெர்னாண்டோ என்ற நபர் தெரிவித்தார்.
கிருலப்பனையில் அமைந்துள்ள ஜனநாயக தேசிய அமைப்பு காரியாலயத்தில் நேற்று ஞாயிற்றுக்கிழமை அமைச்சர் ராஜித்த சேனாரத்னவின் தலைமையில் விசேட ஊடகவியலாளர் சந்திப்பொன்று இடம்பெற்றது. இதில் கலந்துகொண்டபோதே அவர் இவ்வாறு குறிப்பட்டார்.
இதன் போது அவர் தொடர்ந்தும் கூறுகையில்,
வெள்ளை வேன் கடத்தலுடன் தனக்குத் தொடர்பில்லையென்று கோத்தாபய தற்போது தெரிவித்து வருகின்றார். ஆனால் அவரே இதன் பிரதான சூத்திரதாரியாக செயற்பட்டவர். இவ்வாறு கடத்தப் பயன்படுத்திய வேன்களின் ஒன்றினது சாரதியாக நானும் பணிபுரிந்துள்ளேன்.
இந்தக் கடத்தலுக்கு பொலிஸாரும், இராணுவத்தினரும் பெரிதும் ஒத்துழைப்புகளை வழங்கினர். கடத்தல் தொடர்பில் கோத்தாபய பிரிகேடியர் ஒருவருக்கும், மேஜர் ஒருவருக்கும் ஆலோசனைகளை வழங்குவார். அவர்களே இதனை வெற்றிகரமாக செயற்படுத்துவர். இதன்போது நபர்களை கடத்துவதற்கு வாகனமொன்று பயன்படுத்தப்படுவதுடன், அவரை மறைத்து வைத்து சித்திரவதைகளுக்கு உட்படுத்தும் இடத்திற்கு பிறிதொரு வாகனத்திலேயே அழைத்துச் செல்வார்கள்.
இந்த இடங்களில் அவர்கள் மறைத்து வைக்கப்பட்டு விசாரணைக்குட்படுத்தப்படுவார்கள். பின்னர் மேலதிக தகவல்களை பெறுவதற்காக அவர்கள் சித்திரவதைகளுக்கும் ஆளாக்கப்படுவார்கள். இவ்வாறு பல கொடுமைகள் செய்த பின்னர் அவர்கள் கொலை செய்யப்படுவார்கள். பின்னர் சடலத்தின் உள்ளுறுப்புகளை அகற்றிவிட்டு மொனராகலை -– சீத்தாவக்கை காட்டுப் பகுதியிலுள்ள குளமொன்றில் போடுவார்கள். அந்தக் குளத்திலே 100 க்கும் அதிகமான முதலைகள் வாழ்கின்றன. இன்றும்கூட நீங்கள் அந்தக் குளத்தை சோதனையிட்டால் மனித எலும்பும்கூடுகள் கிடைக்கப்பெறும். நான் இவர்களுடன் இணைந்து செயற்பட்டபோது இருவர் இவ்வாறு கடத்தப்பட்டு கொலை செய்யபட்டனர். அதில் இரண்டாவது நபரான 60 வயதுடைய ஒருவரை கடத்தும்போது இவரது பிள்ளை பெபா என்று கதறியதை பார்த்ததும் எனக்கு அங்கிருக்க மனவருத்தமாக இருந்தது. பின்னர் இங்கிருந்து சென்று விகாரையொன்றில் வாழ்ந்து வந்தேன். ஆனால் மக்களை காப்பாற்ற வேண்டும் என்று பின்னர் இவர்களுக்கு எதிராக முறைபாடளிக்க நடவடிக்கை எடுத்தேன்.
இந்த விவகாரம் தொடர்பில் மிரிஹான பொலிஸ் நிலையத்தில் முறைப்பாடளித்தபோது, நிலையப் பொறுப்பதிகாரி வசந்த நாணயக்கார அதனை விசாரணைக்குட்படுத்தாமல் மறைத்து விட்டார். பின்னர் ஊடகங்களுக்குத் தெரிவிக்கலாமென்று அவர்களிடம் பேச்சுவார்த்தை நடத்தியபோது ஊடகங்களும் இதனை வெளியிட மறுத்துவிட்டன.
இந்நிலையிலே அமைச்சர் ராஜித்த சேனாரத்ன இந்த விடயம் தொடர்பில் அக்கறை கொண்டுள்ளதாகத் தெரியவந்ததை அடுத்து அவரிடம் தெரிவித்தேன். பின்னர் அவர் எனக்கு உதவுவதாகக் கூறினார். அதற்காகவே இன்று ஊடக சந்திப்பை மேற்கொண்டு தெரிவிக்கின்றேன்.
நாட்டு மக்கள் விழிப்பாக செயற்பட வேண்டும். ஜனாதிபதி தேர்தலின்போது மீண்டும் ஒரு கொலைகார அரசாங்கத்தை உருவாக்காமல் மக்கள் நிம்மதியாக வாழக்கூடிய சூழ்நிலையை யார் அமைத்துக் கொடுப்பார்களோ அவர்களுக்கு வாக்களியுங்கள். நாட்டில் மீண்டும் வெள்ளை வேன் கலாசாரம் ஏற்படுவதற்கு வழிவகுக்காதீர்கள் என்றும் தெரிவித்தார்.-Vidivelli