ஏப்ரல் 21 ஆம் திகதி நடத்தப்பட்ட தற்கொலைக் குண்டுத்தாக்குதல்களையடுத்து நாட்டினதும் நாட்டு மக்களினதும் பாதுகாப்பு கருதி அவசரகால சட்டம் அமுல்படுத்தப்பட்டது. அவசரகால சட்டத்தின் கீழ் முஸ்லிம் பெண்கள் அணியும் முகத்திரைக்கும் தடை விதிக்கப்பட்டது. தடையினையடுத்து நிகாப், புர்காவுக்குப் பழகிப் போயிருந்த முஸ்லிம் பெண்கள் சட்டத்துக்கு கட்டுப்பட்டு செயற்பட்டார்கள். வெளியில் செல்லும்போது நிகாப், புர்காவைத் தவிர்த்திருந்தார்கள்.
இந்நிலையில் கடந்த ஆகஸ்ட் மாதம் 23 ஆம் திகதி அவசரகாலச் சட்டம் நீக்கப்பட்டது. அவசரகால சட்டம் நீக்கப்பட்டதும் அச்சட்டத்தின் கீழ் அமுலுக்கு வந்த நிகாப், புர்கா மற்றும் முகத்திரைக்கான தடை நீங்கியுள்ளதா என்பது தொடர்பில் பாதுகாப்பு பிரிவினராலோ சம்பந்தப்பட்ட அமைச்சினாலோ தெளிவுகள் வழங்கப்படவில்லை. அவசரகாலச் சட்டம் நீக்கப்பட்டு விட்டாலும் ஏப்ரல் தாக்குதல்களையடுத்து நிகாப், புர்கா மற்றும் முகத்திரை தொடர்பான அச்ச நிலையிலிருந்து மக்கள் மீளவில்லை. அதனால் முஸ்லிம் பெண்கள் பொது இடங்களில் முகத்திரை அணிவதால் ஏற்படக்கூடிய அசாதாரண நிலைமைகளைத் தவிர்ந்து கொள்ள வேண்டும் என அகில இலங்கை ஜம்இய்யத்துல் உலமா சபை கோரியிருந்தது.
இதேவேளை, “முகத்திரைக்கான தடை தற்போது அமுலில் இல்லை. நிகாப், புர்கா மற்றும் முகத்திரை தொடர்பான சட்டம் அவசரகாலச் சட்ட விதிகளின் கீழேயே அமுலில் இருந்தது. தற்போது அவசரகாலச் சட்டம் அமுலில் இல்லாததால் முகத்திரைகான தடையும் நீங்கியுள்ளது” என பிரதி பொலிஸ்மா அதிபர் அஜித் ரோஹண முஸ்லிம சமய விவகார அமைச்சருக்கு உத்தியோகபூர்வமாக அறிவித்துள்ளார்.
அவசரகாலச் சட்டத்தின் கீழ் அமுலுக்கு வந்த முஸ்லிம் பெண்களின் முகத்திரைக்கான தடை நீங்கியுள்ளதா என தெளிவுபடுத்தும்படி அமைச்சர் ஹலீம் பொலிஸ்மா அதிபரை வேண்டியிருந்தார். அதற்குப் பதிலளித்து அனுப்பி வைத்துள்ள கடிதத்திலே முகத்திரைக்கான தடை நீங்கியுள்ளதை பிரதி பொலிஸ்மா அதிபர் உத்தியோகபூர்வமாக தெரிவித்துள்ளார்.
கடந்த ஆகஸ்ட் மாதம் 23 ஆம் திகதி அவசரகாலச் சட்டம் நீக்கப்பட்டு முகத்திரைக்கான தடை நீங்கியிருந்தாலும் முஸ்லிம் பெண்களின் முகத்திரைக்கான நிலைப்பாட்டில் அகில இலங்கை ஜம்இய்யத்துல் உலமா சபை தொடர்ந்தும் ஏற்கனவே வழங்கியுள்ள வழிகாட்டல் நிலைப்பாட்டிலே இருப்பதாகத் தெரிவித்துள்ளது.
முகத்திரைக்கான தடை நீக்கப்பட்டு விட்டாலும் இன்றைய சூழலில் முகத்திரை அணிந்து செல்லும் பெண்களை ஏனைய சமூகத்தினர் அடிப்படைவாதிகளாகவே நோக்குகின்றனர். அவர்களுக்குள் உருவான அச்ச நிலை இன்னும் மாற்றம் பெறவில்லை. மாற்றத்தை ஏற்படுத்தவும் பெரும்பான்மை சமூகம் விரும்பவில்லை. எனவே முஸ்லிம் பெண்கள் அவதானமாக நடந்து கொள்ள வேண்டும். இனவாதிகளுக்கு சந்தர்ப்பம் வழங்குவதற்கு இடமளிக்கக் கூடாது.
முகத்திரைக்கான தடை நீக்கப்பட்டு விட்டாலும் பொதுப் போக்குவரத்துச் சேவை பஸ் வண்டிகளில் முகத்திரை அணிந்து பயணிப்பது தடை செய்யப்பட்டுள்ளது. அதற்கான அறிவித்தல் பஸ் வண்டிகளில் காட்சிப்படுத்தப்பட்டுள்ளது. சில வைத்தியசாலை வளாகங்கள், அரச, தனியார் நிறுவனங்களிலும் முகத்திரை தடை அமுல்படுத்தப்பட்ட போது ஒட்டப்பட்ட அறிவித்தல்கள் இன்னும் அகற்றப்படவில்லை. தடை நீங்கியுள்ள நிலையில் அவற்றை அகற்ற வேண்டியது சம்பந்தப்பட்டவர்களின் பொறுப்பாகும்.
சட்டம் வெறுமனே எழுத்தில் மாத்திரம் இருக்கக் கூடாது. சட்டம் அமுல்படுத்தப்பட வேண்டும். இதற்கு சட்டத்தை அமுல்படுத்தும் பொலிஸ் உட்பட ஏனைய நிறுவனங்கள் முன்வர வேண்டும். முகத்திரைக்கான தடை நீங்கியிருந்தாலும் முகத்திரை அணிந்து செல்லும் பெண்கள் தொடர்ந்தும் அசௌகரியங்களை எதிர்நோக்க வேண்டியேற்படும். இந்நிலைமை இல்லாமற் செய்யப்பட வேண்டும்.
முஸ்லிம் பெண்கள் அணியும் முகத்திரைக்கான தடை நீங்கப்பட்டமைக்கு பல தரப்பினர் எதிர்ப்புகளையும் வெளியிட்டுள்ளனர். “நிகாப், புர்கா மற்றும் முகத்திரைக்கான தடை நீங்கப்பட்டுள்ளமை நாட்டின் தேசிய பாதுகாப்புக்கு சவாலாக மாறியுள்ளது. இவற்றைத் தடை செய்யவேண்டும்” என பாராளுமன்ற உறுப்பினர் மஹிந்த அமரவீர தெரிவித்துள்ளார்.
அத்தோடு “முஸ்லிம் மக்களின் வாக்குகளைக் கவர்வதற்காகவே இத்தடை நீக்கப்பட்டுள்ளது. நாட்டினதும் நாட்டு மக்களினதும் பாதுகாப்பு குறித்து சிந்திக்காமல் தடை நீக்கப்பட்டுள்ளது. இத்தடை மீண்டும் நடைமுறைப்படுத்தப்பட வேண்டும் என்பதே நாட்டு மக்களதும் எமதும் நிலைப்பாடாகும்” என பாராளுமன்ற உறுப்பினர் திலும் அமுனுகம தெரிவித்துள்ளார்.
இவ்வாறான எதிர்ப்புகள் நாட்டு மக்களை முஸ்லிம் பெண்களின் முகத்திரைக்கு எதிராக அணித்திரளச் செய்வதாக அமையும் என்பதில் சந்தேகமில்லை.
முகத்திரை தடை நீக்கம் தொடர்பில் மக்களுக்கு தெளிவுபடுத்தப்பட்டு முறையான நடவடிக்கைகள் மேற்கொள்ளப்பட வேண்டும்.
vidivelli