தங்களை பாதுகாக்குமாறு மஹிந்த தரப்பினர் கோரினர்
பொது பெரமுனாவினருக்கு அது தெரியாது என்கிறார் ஜனாதிபதி
ஒக்டோபர் அரசியல் கிளர்ச்சியின்போது சுதந்திரக் கட்சியை கைவிட்டு மொட்டுவுடன் இணைந்த சிலர் பாராளுமன்றத்தில் எந்த கட்சியைப் பிரதிநிதித்துவப்படுத்துகிறார்கள் என்று சபாநாயகரால் கேள்வியெழுப்பப்பட்டது. அதன்போது மஹிந்த ராஜபக் ஷவுடன் அவரது தரப்பினர் என்னை சந்தித்து அவர்களை பாதுகாக்குமாறு கோரினார்கள். அவர்களை நாமே பாதுகாத்தோம். இன்றும் அவர்களை நாமே பாதுகாத்துக் கொண்டிருக்கின்றோம் என ஜனாதிபதி மைத்திரிபால சிறிசேன தெரிவித்துள்ளார்.
இரத்தினபுரி மாவட்டத்தில் சீவலி மைதானத்தில் நேற்று இடம்பெற்ற சுதந்திரக் கட்சியின் மாவட்ட சம்மேளனத்திலேயே ஜனாதிபதி இவ்வாறு தெரிவித்தார்.
அங்கு தொடர்ந்தும் உரையாற்றிய ஜனாதிபதி மைத்திரிபால சிறிசேன தெரிவித்ததாவது:
கடந்த 2015 ஆம் ஆண்டு தேர்தலில் பொது வேட்பாளராகக் களமிறங்கி தேர்தல் பிரசாரத்திற்காக இரத்தினபுரி மாவட்டத்திற்கு வருகை தந்த போது என்மீதும் இவ்வாறு தாக்குதல்கள் நடத்தப்பட்டன. எனவே இவ்வாறு தாக்குதல்களை நடத்துபவர்களிடம், அன்று இது போன்ற தாக்குதல்களால் பாதிக்கப்பட்டாலும் இறுதியில் நானே வெற்றி பெற்றேன் என்பதை கூறிக்கொள்ள விரும்புகின்றேன்.
ஜனாதிபதித் தேர்தலில் போட்டியிடவுள்ள வேட்பாளர் தொடர்பில் அரச சார்பற்ற அமைப்புக்கள் அல்லது நிறுவனங்கள் சில மக்களிடம் கருத்து கணிப்புக்களை மேற்கொண்டுள்ளன. அவற்றின் அறிக்கைகளின்படி தற்போதுள்ள எந்தவொரு வேட்பாளருக்கும் நூற்றுக்கு 40 வீதத்தை விடவும் அதிக வாக்குகள் இல்லை என்று அறியக் கிடைத்தது. எனவே எந்த வேட்பாளராக இருந்தாலும் இன்னும் 11 -– 12 வீத வாக்குகளை சேகரித்தேயாக வேண்டும் என்பது கட்டாயமாகும். அதனை ஸ்ரீலங்கா சுதந்திரக் கட்சியின் ஆதரவைப் பெற்றால் மட்டுமே பெறமுடியும் என்று உறுதியாகக் கூறுகின்றேன். எந்தவொரு கட்சியாலும் அடுத்து தனி அரசாங்கம் அமைக்க முடியாது. எனவே அடுத்த அரசாங்கத்தை தீர்மானிக்கும் பலமும் சுதந்திரக் கட்சியிடமே இருக்கிறது.
குறிப்பிட்ட காலம் அரசாங்கமும் இல்லாமல், எதிர்க்கட்சியும் இல்லாமல் இலங்கையில் ஆட்சி செய்த ஒரேயொரு ஜனாதிபதி நான் மாத்திரமே. 2015 இல் ஐ.தே.கவுடன் இணைந்து தேசிய அரசாங்கத்தை அமைத்தோம். எனினும் இடைநடுவில் ரணில் விக்கிரமசிங்க ஊழல் மோசடியின் உச்சகட்டத்துக்கு சென்றுவிட்டதால் தேசிய அரசாங்கத்திலிருந்து வெளியேற வேண்டிய நிலைமை ஏற்பட்டது.
அதன் பின்னர் ஒக்டோபரில் ரணில் விக்கிரமசிங்கவை பிரதமர் பதவியிலிருந்து நீக்கி மஹிந்தவை பிரதமராக நியமித்தேன். எனினும் அதனை ஐ.தே.க. அரசியல் சூழ்ச்சி என்று விமர்சித்தது. உண்மையில் அது அரசியல் சூழ்ச்சியல்ல. அரசியல் கிளர்ச்சியாகும். அந்த சந்தர்ப்பத்தில் சுதந்திரக் கட்சியை கைவிட்டு மொட்டுடன் இணைந்த சிலர் பாராளுமன்றத்தில் எந்த கட்சியைப் பிரதிநித்துவப்படுத்துகிறார்கள் என்று சபாநாயகரால் கேள்வியெழுப்பட்டது. அதன் போது மஹிந்த ராஜபக் ஷவுடன் அவரது தரப்பினர் என்னை சந்தித்து அவர்களை பாதுகாக்குமாறு கோரினார்கள்.
பின்னர் மஹிந்த அமரவீர, நிமல் சிறிபால டி சில்வா உள்ளிட்டோருடன் கலந்துரையாடி அவர்கள் ஐக்கிய மக்கள் சுதந்திர கூட்டமைப்பின் உறுப்பினர்கள் என்று சபாநாயகருக்கு கடிதம் அனுப்பி அவர்களை நாமே பாதுகாத்தோம். இன்றும் அவர்களை நாமே பாதுகாத்துக் கொண்டிருக்கின்றோம் என்பதை நினைவுபடுத்த விரும்புகின்றேன். இந்த விடயம் பொதுஜன பெரமுனவின் கீழ் மட்ட உறுப்பினர்களுக்கு புரியவில்லை.
எனவே, சுதந்திரக் கட்சியின் கொள்கை மற்றும் தனித்துவத்தன்மை என்பவற்றை பாதுகாத்துக் கொண்டும், யாரையும் காட்டிக் கொடுக்காது பொதுஜன பெரமுனவுடனான பேச்சுவார்த்தை முன்னெடுக்கப்படும் என்று உறுதியளிக்கின்றேன். 1994 ஆம் ஆண்டு முன்னாள் ஜனாதிபதி சந்திரிகா குமாரதுங்க தேர்லில் போட்டியிட்டபோது ஊழல் மோசடியை ஒழிப்பதற்கு ஒத்துழைப்பு வழங்குமாறு கோரினார். அதனையே 2015 இல் நானும் கோரினேன். ஆனால் இதுவரையில் யாராலும் ஊழல் மோசடியை முற்றாக ஒழிக்க முடியவில்லை. இதற்கு காரணம் அரசியல் தலைவர்கள் ஊழல் மோசடிகளுக்கு தலைமை தாங்குகின்றமையேயாகும்.
எனவே, எதிர்காலத்திலேனும் ஊழல் மோசடியை முற்றாக ஒழிக்கக் கூடிய அரசாங்கத்தை உருவாக்க அனைவரும் ஒன்றிணைவோம் என்றார்.
vidivelli