4/21 உயிர்த்த ஞாயிறு தொடர் தற்கொலை தாக்குதல்களை ஐ.எஸ். ஐ.எஸ். சர்வதேச பயங்கரவாதிகள் முன்னெடுத்ததாக சித்திரிக்க, விசேட வலையமைப்பொன்றூடாக நடவடிக்கைகளை முன்னெடுத்ததாகக் கூறப்படும் தடை செய்யப்பட்ட தேசிய தெளஹீத் ஜமாஅத் அமைப்பின் உறுப்பினர் ஒருவரை விளக்கமறியலில் வைக்க கோட்டை நீதிவான் ரங்க திஸாநாயக்க நேற்று உத்தரவிட்டார். கொழும்பு கிங்ஸ்பெரி ஹோட்டலில் நடாத்தப்பட்ட தற்கொலை தாக்குதல் விவகார விசாரணைகளின் போது சந்தேக நபர் தொடர்பில் தகவல் வெளிப்படுத்தப்பட்டு, பயங்கரவாத தடைச்சட்டத்தின் கீழ் கைது செய்யப்பட்டு தடுத்து வைத்து விசாரணைகள் முன்னெடுக்கப்பட்ட நிலையில் சந்தேக நபர் நேற்று கோட்டை நீதிமன்றில் ஆஜர் செய்யப்பட்டார். இதன்போதே அவரை எதிர்வரும் 18 ஆம் திகதிவரை விளக்கமறியலில் வைக்க கோட்டை நீதிவான் ரங்க திஸாநாயக்க உத்தரவிட்டார்.
அஹமது முஹம்மது அர்ஷாத் எனும் குறித்த சந்தேக நபர், தற்போதும் சி.ஐ.டி. பொறுப்பில் விசாரிக்கப்பட்டுவரும் தேசிய தெளஹீத் ஜமாஅத் உறுப்பினர் பஸ்ஹுல் சஹ்ரான் எனும் சந்தேக நபரின் ஆலோசனைக்கமைய, இந்த தாக்குதல்களை ஐ.எஸ். ஐ.எஸ். அமைப்பின் தாக்குதலாக சித்திரிக்க, யாரும் ஊடறுத்து கேட்க முடியாத விசேட வலையமைப்பொன்றின் ஊடாக நடவடிக்கைகளை முன்னெடுத்துள்ளதாக விசாரணை அதிகாரியான சி.ஐ.டி.யின் டிஜிட்டல் பகுப்பாய்வு அறையின் பொறுப்பதிகாரி பிரதான பொலிஸ் பரிசோதகர் சேனாரத்ன நீதிமன்றில் தெரிவித்தார்.
அத்துடன் சந்தேக நபர் தொடர்பில் விசேட மேலதிக விசாரணை அறிக்கை ஒன்றினையும் நீதிவானுக்கு வழங்கிய அவர், சந்தேக நபரை பயங்கரவாத தடைச்சட்டத்தின் 7 (2) ஆம் அத்தியாயத்தின் கீழ் ஆஜர் செய்வதாகக் கூறினார்.
குறித்த சந்தேக நபரை கடந்த ஒரு மாதத்துக்கு முன்னர் காத்தான்குடி பகுதியில் வைத்து இராணுவ புலனாய்வுப் பிரிவினர் கைது செய்து விசாரணைகளுக்காக சி.ஐ.டி.யிடம் கையளித்துள்ளனர். அதன்படி முன்னெடுக்கப்பட்ட விசாரணைகளில், சந்தேக நபர் விசேட வலையமைப்பு ஊடாக ஐ.எஸ்.ஐ.எஸ். அமைப்புடன் தொடர்புகளைக் கொண்டிருந்துள்ளமை வெளிப்படுத்தப்பட்டுள்ளதாக சி.ஐ.டி.யின் அறிக்கை ஊடாக சுட்டிக்காட்டப்பட்டுள்ளது.
இந்நிலையிலேயே சந்தேக நபரை எதிர்வரும் 18 ஆம் திகதிவரை விளக்கமறியலில் வைக்க உத்தரவிட்ட நீதிவான், அன்றைய தினம் மேலதிக விசாரணை நிலைவரம் தொடர்பில் அறிவிக்க உத்தரவிட்டார்.
vidivelli