குறைந்த கட்டணத்தில் உம்ராவுக்கு அழைத்துச் செல்வதாக வாக்குறுதியளித்து மக்களிடமிருந்து போலி உம்ரா உப முகவர்கள் பணம் வசூலித்து வருவதாகவும் அதனால் பொது மக்கள் எச்சரிக்கையாக இருக்குமாறும் அரச ஹஜ் குழு வேண்டுகோள் விடுத்துள்ளது.
பொது மக்கள், முஸ்லிம் சமய பண்பாட்டலுவல்கள் திணைக்களத்தினால் அங்கீகரிக்கப்பட்டு அனுமதிப்பத்திரம் வழங்கப்பட்டுள்ள ஹஜ், உம்ரா முகவர் நிலையங்களினூடாகவே தங்களது பயணங்களை மேற்கொள்ளுமாறும் அறிவுறுத்தப்பட்டுள்ளார்கள். அங்கீகரிக்கப்பட்டுள்ள ஹஜ், உம்ரா முகவர் நிலையங்களின் விபரங்களை முஸ்லிம் சமய பண்பாட்டலுவல்கள் திணைக்களத்தைத் தொடர்பு கொண்டு பெற்றுக்கொள்ளுமாறும் வேண்டப்பட்டுள்ளார்கள்.
போலி முகவர்களிடம் உம்ரா பயணத்துக்காக முற்பணம் வழங்கி ஏமாற்றப்படும் பயணிகள் தொடர்பில் முஸ்லிம் சமய பண்பாட்டலுவல்கள் திணைக்களத்தினால் சட்ட நடவடிக்கைகளை மேற்கொள்ள முடியாது என்பதால், பயணிகள் திணைக்களத்தினால் அங்கீகரிக்கப்பட்ட முகவர் நிலையங்களூடாகவே தங்கள் பயணங்களை ஏற்பாடு செய்யும்படி அரச ஹஜ் குழுவின் தலைவர் கலாநிதி எம்.ரி. சியாத் வேண்டுகோள் விடுத்துள்ளார்.
இதேவேளை, 5 வருடகால எல்லைக்குள் ஒன்றுக்கு மேற்பட்ட ஹஜ் பயணங்களை மேற்கொள்ளும் யாத்திரிகர்களிடம் சவூதி அரசு அறவிட்டு வந்த 2000 ரியால் கட்டணம் தற்போது நீக்கப்பட்டுள்ளமை குறிப்பிடத்தக்கது.
ஏ.ஆர்.ஏ.பரீல்
vidivelli