பெளத்த விகாரைகளுக்கு மட்டும் நிதி ஒதுக்கப்பட்டு அபிவிருத்திகள் முன்னெடுக்கப்படுகின்றன. அப்படியல்லாது ஏனைய மத அபிவிருத்திகளுக்கும் நடவடிக்கை எடுக்க வேண்டும். நல்லிணக்கம் என்பது இரண்டு தரப்பினரின் ஒத்துழைப்போடு உருவாக்கப்படுவதாகும் என அமைச்சர் சஜித் பிரேமதாச மீது சபையில் வாசுதேவ எம்.பி. சாடினார்.
பாராளுமன்றத்தில் நேற்று புதன்கிழமை மத்திய கலாசார நிதியம் தொடர்பிலான விவாதம் இடம்பெற்ற வேளையில் அது தொடர்பிலான விவாதத்தில் கலந்துகொண்டு உரையாற்றிய எதிர்க்கட்சி உறுப்பினர் வாசுதேவ நாணயக்கார, “மத நல்லிணக்கம் என்பது வெறுமனே ஒரு தரப்பை பலப்படுத்துவதைக் கொண்டு கையாள முடியாது. பெளத்த விகாரைகள் குறித்து மட்டும் அல்லாது ஏனைய மத அபிவிருத்திகளுக்கும் நடவடிக்கை எடுக்க வேண்டும். நல்லிணக்கம் என்பது இரண்டு தரப்பினரின் ஒத்துழைப்போடு உருவாக்கப்படுவதாகும். பொது இணக்கப்பாடு எட்டப்பட வேண்டும். ஆனால் அதில்தான் சிக்கலே உள்ளது. உரிமை கூறும் தன்மையில்தான் பிரச்சினை எழுகின்றது. ஆனால் அதனையும் தாண்டி நல்லிணக்கத்தை உருவாக்க வேண்டும் என்றே நாமும் கூறுகின்றோம்” என்றார்.
இதனை அடுத்து அமைச்சர் சஜித்துக்கும் வாசுதேவ எம்.பிக்கும் இடையில் வாத பிரதிவாதம் உருவாகியது.
சஜித்:- உரிமை கோரலில் எந்தப் பிரச்சினைகளும் இல்லை, மத அபிவிருத்திகள் நல்லிணக்க அடிப்படையில் முன்னெடுக்கவே முயற்சிகளை எடுக்கின்றோம்.
வாசுதேவ:- ஆனால் ஒரு மதத்தவருக்கு செய்யும் நடவடிக்கை இன்னொரு மதத்தவருக்கு அவமானமாக கருதப்படும் என்றே நான் கூறுகின்றேன்.
சஜித்:- அது உண்மையே. விகாரைகள் எவ்வாறு அபிவிருத்தி செய்யப்படுமோ அதேபோல் கடந்த காலங்களில் நாசமாக்கப்பட்ட இஸ்லாமிய பள்ளிவாசல்களும் அபிவிருத்தி செய்யப்படும். கம்பஹா, கண்டி, குருநாகல் மாவட்டங்களில் நாசமாக்கப்பட்ட சகல பள்ளிவாசல்களும் திருத்தப்படும். புத்தசாசனத்துக்கு கொடுக்கும் அதே முக்கியத்துவத்தை ஏனைய மதங்களுக்கும் கொடுத்து அனைவரையும் பாதுகாக்கவே நாம் நடவடிக்கை எடுக்கின்றோம்.
வாசுதேவ :- இனவாதம், மதவாதத்தை தூண்டும் தேவை யாருக்கு உள்ளது. நாட்டில் மக்கள் மத்தியில் பிளவுகளை ஏற்படுத்தும் நபர்களுக்கே இந்த தேவை உள்ளது. ஆனால் எமக்கு அவ்வாறான எந்தவொரு நோக்கமும் இல்லை.
சஜித்:- நீங்கள் அவ்வாறு செயற்படும் நபரல்ல. ஆனால் உங்களின் அணியின் கண்ணாடியில் சென்று பார்த்தால் அவ்வாறு செயற்படுவது யாரென்று தெரியும்.
வாசுதேவ :- மக்களின் எண்ணங்களில் மாற்றங்கள், தன்மைகளில் மாற்றங்கள், உணர்வுகளில் பாரமான மாற்றங்கள் இருக்க முடியும். ஐக்கிய தேசிய கட்சி 1958இலும் அதேபோல் 1983 ஆம் ஆண்டிலும் கலவரங்களை செய்து இனவாத, மதவாத குழப்பங்களை ஏற்படுத்தும் தலைவர்களை கொண்ட கட்சி. இந்த குற்றத்தை எமது பக்கம் சுமத்த முயற்சிப்பதென்றால் அதனை ஆதாரங்களுடன் கூறவேண்டும். எமது பக்கம் இனவாதம் பரப்பும் தலைவர்கள் இல்லை. பண்டா -– செல்வநாயகம் உடன்படிக்கைக்கு எதிராக ஜே.ஆர்.ஜயவர்தன செயற்பட்டதை நீங்கள் மறந்திருக்க முடியும். 1983 ஆம் ஆண்டு சிறில் மத்தியூ வீதியில் இறங்கி தமிழ் மக்களுக்கு எதிராக கலவரம் செய்ததை நீங்கள் மறந்திருக்க முடியும். இதெல்லாம் நீங்கள் மறந்திருக்க முடியும். ஆனால் எமக்கு இனவாத, மதவாத பிளவுகள் தேவையில்லை. வேலை செய்யும் மக்களை ஒன்றிணைக்க வேண்டும் என்பதே எமது நோக்கம். பண்டாரநாயக்க -– செல்வநாயகம் உடன்படிக்கையை அன்று எதிர்த்ததே ஐக்கிய தேசிய கட்சிதான் . ஆதரங்களுடன் நாம் கூறுகின்றோம், ஆனால் ஆதாரம் இல்லாத கருத்துக்களை நீங்கள் கூறுகின்றீர்கள் என்றார்.
இதனை அடுத்து ஐக்கிய தேசிய கட்சியின் உறுப்பினர்கள் வாசுதேவ எம்.பிக்கு எதிராகக் குரல் எழுப்பினர். எனினும் அவர்களின் கருத்துக்களை நிராகரித்த வாசுதேவ எம்.பி, சஜித் பிரேமதாச ஜனாதிபதி வேட்பாளராக களமிறங்குவது குறித்தே இன்று பாராளுமன்றத்தில் விவாதம் இடம்பெற்று வருகின்றது. சஜித் ஜனாதிபதி வேட்பாளரானால் நான் அவருக்கு எதிராகவே செயற்படுவேன். ஆனால் அவருக்கு வாழ்த்துக்களை தெரிவித்துக்கொள்வேன். ஏனென்றால் எமக்கு தேர்தலில் போட்டியிட புதிய எதிராளி ஒருவருடன் நாம் போட்டியிடுவோம். அதில் எம்மால் இருக்கும் நிலைமைக்கு அப்பால் உறுதியாக வெற்றியொன்றை பெற்றுக்கொள்ளும் போராட்டத்தை முன்னெடுக்க முடியும். அப்படி நான் நினைக்கின்றேன் எனவும் குறிப்பிட்டார்.
vidivelli