முகத்திரை அணிந்தால் அசெளகரியம் ஏற்படலாம்
இனவாதிகளுக்கு இடமளியாது புத்திசாதுர்யத்துடன் நடந்துகொள்க முஸ்லிம் பெண்களிடம் ஜம்மிய்யதுல் உலமா வேண்டுகோள்
முகத்திரை அணிந்து பொது இடங்களுக்குச் செல்வதால் பல்வேறு அசௌகரியங்கள் ஏற்பட வாய்ப்பிருப்பதாக தெரிவித்துள்ள அகில இலங்கை ஜம்இய்யத்துல் உலமா, நாட்டில் தற்போது நிலவும் சூழ்நிலையில் இனவாத சக்திகளுக்கு இடமளியாது நடந்துகொள்ளுமாறும் இலங்கை வேண்டுகோள் விடுத்துள்ளது.
பெண்களின் முகத்திரை தொடர்பில் ஜம்இய்யா விடுத்துள்ள அறிவித்தலில் மேற்கண்டவாறு சுட்டிக்காட்டப்பட்டுள்ளது,
அகில இலங்கை ஜம்இய்யத்துல் உலமாவின் பிரசாரக் குழு செயலாளர் அஷ்ஷெய்க் எச். உமர்தீன் வெளியிட்டுள்ள குறித்த அறிவித்தலில் மேலும் தெரிவிக்கப்பட்டுள்ளதாவது,
ஆடைச் சுதந்திரம் என்பது மனிதனின் அடிப்படை உரிமைகளில் ஒன்றாகும். எமது நாட்டின் யாப்பின் பிரகாரம் அனைவருக்கும் அச்சுதந்திரம் வழங்கப்பட்டுள்ளதை யாவரும் அறிவோம்.
இந்நிலையில் நாட்டில் நடைபெற்ற துன்பியல் நிகழ்வைத் தொடர்ந்து நாட்டில் அசாதாரண நிலை காணப்பட்டதுடன் அவசரகால சட்டமும் அமுல் செய்யப்பட்டது. அவசரகால சட்டத்தின்போது முஸ்லிம் பெண்கள் அணியும் முகத்திரைக்கான தற்காலிக தடையும் விதிக்கப்பட்டது. எனினும் கடந்த 08.23 ஆம் திகதியுடன் அவசரகால சட்டம் நீக்கப்பட்டு பாதுகாப்புக்கான அனைத்து நடவடிக்கைகளையும் மேற்கொள்ளும் அதிகாரம் பாதுகாப்புத் தரப்பினருக்கு வழங்கும் விஷேட வர்த்தமானி அறிவிப்பு வெளியிடப்பட்டுள்ளது. எனினும் நாட்டு மக்களின் அச்சமும் மனோபாவமும் முழுமையாக மாறியதாக தெரியவில்லை.
இந்நிலையில் முஸ்லிம் சகோதரிகள் முகத்திரை அணிந்து வெளியேறும்போது பல்வேறு அசௌகரியங்களுக்கு ஆளாக இடமுண்டு. அத்துடன் நாட்டில் தற்போது நிலவும் அரசியல் சூழ்நிலையில் இனவாத சக்திகளுக்கு இடமளிக்காமல் பார்த்துக் கொள்வது எமது பொறுப்பாகும்.
எனவே, முகத்திரை அணிந்து பொது இடங்களுக்குச் செல்வதால் ஏற்படும் அசௌகரியங்களைத் தவிர்ந்து கொள்ளுமாறும் கால நேர சூழ்நிலைகளை கவனத்திற்கொண்டு புத்தி சாதுர்யமாகவும், அவதானத்தோடும் நடந்து கொள்ளுமாறும் அகில இலங்கை ஜம்இய்யத்துல் உலமா அனைவரையும் அன்புடன் வேண்டிக் கொள்கிறது. எமது அவதானமான செயற்பாடுகள் எமது உரிமைகளை உரிய முறையில் பாதுகாக்க நிச்சயம் உதவுமென்ற எதிர்பார்ப்பு ஜம்இய்யாவுக்கு இருக்கின்றது.
இலங்கை முஸ்லிம்கள் வரலாறு நெடுகிலும் அனுபவித்து வந்த மதச் சுதந்திரமும், உரிமைகளும், கலாசாரமும் தொடர்ந்தும் பாதுகாக்கப்பட வேண்டுமென்பதே அகில இலங்கை ஜம்இய்யத்துல் உலமாவின் நிலைப்பாடாகும் என தெரிவிக்கப்பட்டுள்ளது.
vidivelli