உயிர்த்த ஞாயிறு தாக்குதலுக்குப் பின்னர் ஆயிரக்கணக்கான முஸ்லிம்கள் கைது செய்யப்பட்டு அவர்களில் கணிசமானோர் விடுவிக்கப்பட்டுள்ள நிலையில், இலங்கையின் முன்னணி இஸ்லாமிய பிரசாரகரும் பிரதான இஸ்லாமிய இயக்கங்களுள் ஒன்றான ஜமாஅதே இஸ்லாமியின் சிரேஷ்ட தலைவருமான உஸ்தாத் ரஷீத் ஹஜ்ஜுல் அக்பர் கைது செய்யப்பட்ட சம்பவம் இலங்கை முஸ்லிம்கள் மத்தியில் பலத்த அதிர்ச்சியை தோற்றுவித்துள்ளது.
மாவனெல்லை,- முருத்தவல பகுதியில் உள்ள அவரது வீட்டில் வைத்து சி.சி.டி. எனப்படும் கொழும்பு குற்றத்தடுப்புப் பிரிவினரால் இவர் கைது செய்யப்பட்டதாக பொலிஸ் பேச்சாளர் பொலிஸ் அத்தியட்சர் ருவன் குணசேகர தெரிவித்திருந்தார்.
அடிப்படைவாத குழுக்களுக்கு உதவியமை மற்றும் இனங்களுக்கிடையே முரண்பாடுகளை தோற்றுவிக்க நடவடிக்கை எடுத்தமை உள்ளிட்ட சில குற்றச்சாட்டுக்கள் தொடர்பில் சந்தேகத்தின் பேரில் அவரைக் கைது செய்ததாக கொழும்பு குற்றத்தடுப்புப் பிரிவு தெரிவித்திருந்தது.
நீண்ட விசாரணைகளின் பின்னர் அவர் கைது செய்யப்பட்டதாகவும் அவரை கொழும்புக்கு அழைத்து வந்து மேலதிக விசாரணைகளை ஆரம்பித்துள்ளதாகவும் கொழும்பு குற்றத்தடுப்புப் பிரிவினர் தெரிவித்தனர்.
உஸ்தாத் ஹஜ்ஜுல் அக்பர் தடை செய்யப்பட்ட அமைப்பொன்றின் உறுப்பினர் அல்லாத போதும், அவர் இலங்கையில் தடை செய்யப்பட்ட அமைப்புக்களுக்கு உதவி ஒத்தாசை புரிந்துள்ளமை தொடர்பில் கிடைத்துள்ள தகவல்களை மையப்படுத்தியே விசாரணைகளை ஆரம்பித்ததாகவும் மாவனெல்லை புத்தர் சிலை உடைப்பு விவகாரத்தில் கைது செய்யப்பட்டுள்ள இப்ராஹீம் மெளலவி எனும் பிரதான சந்தேக நபர்களில் ஒருவர், உஸ்தாத் ஹஜ்ஜுல் அக்பரின் சகோதரர் என்ற வகையிலும் விசாரணைகள் மேற்கொள்ளப்படுவதாக பொலிஸார் தெரிவித்தனர்.
அதிகாலையில் வந்து கைது செய்தனர்
இந்தக் கைது தொடர்பில் துருக்கியை தளமாக கொண்டு செயற்படும் ‘அனடொலு ஏஜன்சி’ செய்திச் சேவைக்கு உஸ்தாத் ஹஜ்ஜுல் அக்பரின் உறவினர் ஒருவர் தெரிவிக்கையில், ”ஐந்து பொலிஸ் அதிகாரிகள் ஞாயிற்றுக்கிழமை அதிகாலை வேளையில் மாவனெல்லையில் உள்ள வீட்டுக்கு வந்து உஸ்தாத் இருக்கிறாரா எனக் கேட்டார்கள்.
அவரை கைது செய்வதற்கான நீதிமன்ற உத்தரவு எதுவும் அச்சமயம் பிறப்பிக்கப்பட்டிருக்கவில்லை. உஸ்தாதுக்கு எதிராக முறைப்பாடு ஒன்று செய்யப்பட்டுள்ளதாகவும் அது தொடர்பில் சிறியதொரு விசாரணையை மேற்கொள்ள வேண்டியுள்ளது எனக் கூறியே பொலிசார் அழைத்துச் சென்றார்கள். எனினும் ஞாயிற்றுக்கிழமை மாலையில் ஊடகங்கள் மூலமாகவே அவர் கைது செய்யப்பட்ட செய்தியை நாம் அறிந்து கொண்டோம்” எனக் குறிப்பிட்டுள்ளார்.
உறவினர்கள், சட்டத்தரணிகள் சந்திக்க அனுமதியில்லை
கடந்த ஞாயிற்றுக் கிழமை அதிகாலை கைது செய்யப்பட்ட உஸ்தாத் ஹஜ்ஜுல் அக்பரை சந்திப்பதற்கு அவரது உறவினர்களுக்கோ அல்லது சட்டத்தரணிகளுக்கோ நேற்று வரை அனுமதி வழங்கப்படவில்லை என அவரது குடும்பத்தினர் தெரிவிக்கின்றனர்.
குடும்பத்தினரும் சட்டத்தரணிகளும் அவரை சந்திப்பதற்கான வேண்டுகோள்களை உத்தியோகபூர்வமாக விடுத்த போதிலும் அதற்கு சாதகமான பதில்கள் கிடைக்கவில்லை.
எதிர்வரும் ஞாயிற்றுக்கிழமையே குடும்பத்தினர் அவரை சந்திக்க முடியும் என குற்றத் தடுப்புப் பிரிவினர் தெரிவித்துள்ளனர்.
தொடர்ந்தும் தடுப்புக் காவலில்
கடந்த ஞாயிற்றுக்கிழமை கைது செய்யப்பட்ட உஸ்தாத் ஹஜ்ஜுல் அக்பர் இதுவரை விடுதலை செய்யப்படவில்லை. இந்நிலையில் அவர் பயங்கரவாத தடை சட்டத்தின் கீழ் 90 நாள் தடுப்புக் காவலில் வைத்து விசாரிக்கப்பட்டு வருகிறாரா அல்லது ஐ.சி.சி.பி.ஆர் சட்டத்தின் கீழ் தடுத்து வைக்கப்பட்டுள்ளாரா என்பது குறித்து இதுவரை பொலிசார் தகவல்கள் எதனையும் தெரிவிக்கவில்லை.
இதனிடையே உஸ்தாத் ஹஜ்ஜுல் அக்பர் தொடர்பில் இடம்பெறும் விசாரணைகளில், பயங்கரவாதி சஹ்ரானின் சகாக்களாக கருதப்படும், மாவனெல்லை புத்தர் சிலை உடைப்பு விவகாரத்தின் பிரதான சந்தேக நபர் ஒருவருக்கு சிரியாவுக்கு சென்று பயிற்சி பெற உதவி ஒத்தாசை வழங்கினாரா எனவும், உஸ்தாத் ஹஜ்ஜுல் அக்பரின் சொத்துக்கள் தொடர்பிலும் அவதானம் செலுத்தப்பட்டுள்ளதாக சி.சி.டி. தகவல்கள் தெரிவித்தன.
இதனைவிட விஷேடமாக உஸ்தாத் ஹஜ்ஜுல் அக்பரின் நகர்வுகள் இலங்கையில் இஸ்லாமிய இராஜ்ஜியம் ஒன்றினை உருவாக்குவதை மையப்படுத்தி இருந்துள்ளதாக தகவல்கள் கிடைக்கப் பெற்றுள்ளதால் அது தொடர்பிலும், அந்த இலக்கினை அடைய அவர் அரச நிறுவனங்களுக்குள் தனது கொள்கையின் கீழ் செயற்படுவோரை தற்போதும் பணிகளில் அமர்த்தியுள்ளாரா என்பது தொடர்பிலும் விஷேட விசாரணை ஒன்று இடம்பெறுவதாகவும் சி.சி.டி. தகவல்கள் மேலும் தெரிவித்தன.
எனினும், கொழும்பு குற்றத்தடுப்புப் பிரிவினர் முன்னெடுக்கும் விசாரணைகளில், இந்த குற்றச்சாட்டுக்கள் அனைத்தையும் உஸ்தாத் ஹஜ்ஜுல் அக்பர் முற்றாக மறுத்துள்ளதாக அறிய முடிகின்றது. இந் நிலையிலேயே மேலதிக விசாரணைகள் தொடர்கின்றன.
குற்றச்சாட்டுக்கள் அடிப்படையற்றவை :
ஜமாஅத்தே இஸ்லாமி
இந்தக் கைது விவகாரம் தொடர்பில் அறிக்கை ஒன்றை வெ ளியிட்டுள்ள இலங்கை ஜமாஅதே இஸ்லாமி அமைப்பு, இலங்கை ஜமாஅத்தே இஸ்லாமிக்கோ அதன் முன்னாள் தலைவர் உஸ்தாத் ரஷீத் ஹஜ்ஜுல் அக்பருக்கோ தடைசெய்யப்பட்ட தேசிய தவ்ஹீத் ஜமாஅத் அமைப்புடனோ அல்லது வேறு எந்தப் பயங்கரவாத அமைப்புகளுடனோ எத்தகைய உறவும் இல்லை என தெரிவித்துள்ளது. இது விடயமாக அவ்வமைப்பு வெளியிட்டுள்ள ஊடக அறிக்கையில் மேலும் தெரிவிக்கப்பட்டுள்ளதாவது,
இது எத்தகைய அடிப்படைகளுமற்ற ஒரு குற்றச்சாட்டாகும் என்பதை இலங்கை ஜமாஅத்தே இஸ்லாமி மிக உறுதியாகத் தெரிவித்துக்கொள்ள விரும்புகிறது. இலங்கை ஜமாஅத்தே இஸ்லாமி 1954 ஆம் ஆண்டு முதல் இயங்கி வரும் ஒரு பதிவு செய்யப்பட்ட, நடுநிலையான சிந்தனையின் அடிப்படை யில் செயல்படும் சமூக, சமய இயக்கமாகும். அது சட்டபூர்வமான வழிமுறைகளில் வெளிப்படைத்தன்மையோடு இயங்கும் ஒரு அமைப்பு என்பதுடன் எல்லாவிதமான தீவிரவாதங்களுக்கும் எதிரானதாகும்.
உஸ்தாத் ரஷீத் ஹஜ்ஜுல் அக்பர் கடந்த 24 வருடங்களாக இலங்கை ஜமாஅத்தே இஸ்லாமியை நடுநிலைச் சிந்தனையோடு வழிநடத்திய ஒருவர் என்பதை பொதுவாக இந்த நாட்டு மக்களும் குறிப்பாக முஸ்லிம் சமூகத்தினரும் நன்கறிவர்.
இலங்கை ஜமாஅத்தே இஸ்லாமிக்கோ அதன் முன்னாள் தலைவர் உஸ்தாத் ரஷீத் ஹஜ்ஜுல் அக்பருக்கோ தடைசெய்யப்பட்ட தேசிய தவ்ஹீத் ஜமாஅத் அமைப்புடனோ அல்லது வேறு எந்த பயங்கரவாத அமைப்புகளுடனோ எத்தகைய உறவும் இல்லை என்பதை ஜமாஅத் திட்டவட்டமாக கூற விரும்புகிறது. இந்த விசாரணைகளை மேற்கொள்கின்ற சட்டம் ஒழுங்கை நிலைநாட்டும் தரப்பினர் நீதியான விசாரணைகளை மேற்கொண்டு உஸ்தாத் ரஷீத் ஹஜ்ஜுல் அக்பர் தொடர்பில் நியாயம் வழங்குவார்கள் என்று இலங்கை ஜமாஅத்தே இஸ்லாமி உறுதியாக நம்புகிறது என தெரிவிக்கப்பட்டுள்ளது.
பிரமுகர்கள் கருத்து
இதேவேளை, வேறு பல பிரமுகர்களும் இந்தக் கைது கண்டித்து அறிக்கைகளை வெளியிட்டுள்ளதுடன் அவரது நற்பண்புகள் குறித்தும் பிரஸ்தாபித்துள்ளனர்.
தேசிய ஷூரா கவுன்சிலின் உப தலைவர்களுள் ஒருவரும் சிரேஷ்ட இஸ்லாமிய பிரசாரகருமான அஷ்ஷெய்க் எஸ்.எச்.எம். பளீல் இது தொடர்பில் விடுத்துள்ள அறிக்கையில் , இந்த தகவல் கிடைத்தவுடன் மிகுந்த கவலையும் ஆச்சரியமும் ஏற்பட்டது. 1980 களிலிருந்து எனக்கு அவரைத் தெரியும். அவரிடம் பல நற்பண்புகள் காணப்பட்டன.
எந்தவொரு ஆழமான கருத்தையும் மிக எளிமையான உதாரணங்களோடும் ஆழமான உவமேயங்களோடும் விளக்கும் ஆற்றலை அவருக்கு அல்லாஹ் வழங்கியிருக்கிறான். தான் சரியெனக் கருதும் எக்கருத்தையும் எடுத்துரைக்கும் துணிச்சல் அவருக்கிருந்தது. தஃவாவில் சமயோசிதமும் தூர நோக்கும் அவசியம் என்பதை தனது உரைகள் மற்றும் எழுத்துக்கள் வாயிலாகவும் சதாவும் அவர் வலியுறுத்தி வந்திருக்கிறார்.அவரும் மனிதன் என்ற வகையில் தப்புத் தவறுகள் இடம் பெற்றிருக்கலாம். அதற்காக அவர் மன்னிப்புக்கு அப்பாற்பட்டவர் எனக் கூற முடியாது.
தனது உடன்பிறந்த சகோதரரும் அவர் புத்திரர்களும் கடும்போக்காளர்களாக இருப்பதை அடையாளம் கண்ட போது அவர்களை இயக்கத்தை விட்டும் ஓரம்கட்ட அவர் நடவடிக்கை எடுத்தமை குடும்ப உறவை விட இஸ்லாம் பாதுகாக்கப்பட வேண்டும் என்பதில் அவருக்கிருந்த அக்கறைக்கு சான்றாகும். இந்த இலங்கைத் திருநாட்டில் முஸ்லிம்கள் சமாதான சகவாழ்வை மேற்கொள்ள இந்த தீவிரவாதம் தடையாக அமையும் என்று அவர் நம்பினார்.இதனால் தான் ஈஸ்டர் தினத்தில் அரங்கேற்றப்பட்ட அடாவடித்தை அவர் கடுமையாகக் கண்டித்தார். எமது அறிவுக்கு எட்டியவரையில் அவரது சிந்தனைகளும் செயற்பாடுகளும் நாட்டின் இறைமைக்கு குந்தகம் விளைவிக்கும் வகையில் அமையவில்லை என்பதற்கும் அப்பால் அவர் சமூக நல்லிணக்கத்துக்காகவும் தேச நலனுக்காகவும் உழைத்திருக்கிறார். அத்தகைய ஒருவர் கைது செய்யப்பட்டிருப்பது ஆச்சரியமாக இருக்கிறது. அவர் பிழையாகப் புரியப்படிருக்கிறார். அல்லது அவர் பிழையாகப் புரியப்பட வேண்டும் என்று கங்கணம் கட்டிச் செயற்படும் சிலரால் பிழையாக இனம்காட்டப்பட்டிருக்கிறார். அவர் குற்றவாளியாக இருப்பின் தண்டிக்கப்பட வேண்டும் என சட்டமும் மனசாட்சியுடன் கூறுகின்றன.
ஆனால், அவர் நிரபராதியாயின் அவர் பற்றிய அவதூறைக் கூறி அவரை குற்றவாளிக் கூண்டில் நிறுத்தியவர்கள் இனம்காணப்பட்டு தண்டிக்கப்பட வேண்டும் என தனது அறிக்கையில் குறிப்பிட்டுள்ளார்.
நல்லாட்சிக்கான தேசிய முன்னணியின் தவிசாளர் சிராஜ் மஷ்ஹூர் இது தொடர்பில் விடுத்துள்ள அறிக்கையில், இலங்கை ஜமாஅதே இஸ்லாமி யின் முன்னாள் அமீர் உஸ்தாத் ரஷீத் ஹஜ்ஜுல் அக்பர், கைது செய்யப்பட்டு தடுத்து வைக்கப்பட்டிருக்கும் செய்தி மிகுந்த அதிர்ச்சியளிப்பதாக உள்ளது. இயல்பிலேயே மென்மையும் அமைதியும் மிகுந்த சுபாவமுடையவர் அவர். எப்போதும் பயங்கரவாதத்திற்கும் வன்முறைக்கும் எதிரான கருத்துடையவராகவே இருந்து வந்தவர். சமூகப்பணியில் நீண்ட அனுபவம் கொண்டவர்.
அறிவாளுமையும் சிந்தனைத் தெளி வும் மிக்க அவர், பயங்கரவாத சக்திகளுக்கு துணை போயிருப்பதாக சுமத்தப்படும் குற்றச்சாட்டுகள் எவ்வித அடிப்
டையுமற்றவையாகும்.
வன்முறையற்ற, ஜனநாயக வழியிலான சமூக மாற்றத்தின் மீது நம்பிக்கை கொண்டிருந்த அவரை, கைது செய்திருப்பதன் பின்புலம் குறித்து கடுமையான சந்தேகங்கள் எழவே செய்கின்றன.
வைத்தியர் ஷாபி, சமூக செயற்பாட்டாளர் டில்ஷான் போன்றோர் கைது செய்யப்பட்டதன் தொடரிலேயே இதையும் நோக்க வேண்டியிருக்கிறது. ஆதலால், உஸ்தாத் ரஷீத் ஹஜ்ஜுல் அக்பர் உடனடியாக விடுதலை செய்யப்பட வேண்டும். அவருக்கு நீதி கிடைக்க வேண்டும் என வலியுறுத்துவோம். அதற்காக நம்மால் முடிந்த அழுத்தங்களைப் பிரயோகிப்போம். அப்பாவிகள் அநியாயமான முறையில் தண்டிக்கப்படக் கூடாது என்பதை மீள மீள வலியுறுத்துவோம் எனத் தெரிவிக்கப்பட்டுள்ளது.
வட மாகாண சபையின் முன்னாள் உறுப்பினர் அய்யூப் அஸ்மின் இந்தக் கைது தொடர்பில் விடுத்துள்ள அறிக்கையில்,
ஈஸ்டர் குண்டுத்தாக்குதல்களின் உண்மையான சூத்திரதாரிகளை இதுவரை இலங்கை அரசாங்கம் நெருங்கவுமில்லை அல்லது அவர்களை நெருங்கப்போவதுமில்லை. இவ்வளவு பெருந்தொகையான வெடிமருந்துகளை பயங்கரவாதிகளுக்கு விநியோகித்தவர்கள் தொடர்பில் இலங்கையின் புலனாய்வுத்துறை கவனம் செலுத்தியதாக ஒரு தகவலும் கிடையாது. ஆனால் நல்லிணக்கம், சமூக அமைதி குறித்துப்பேசியவர்களை இலக்குவைத்து வேட்டைகள் தொடர்கின்றன.
இக்குண்டுத்தாக்குதல்களைக் காரணமாக வைத்து இலங்கை முஸ்லிம் சமூகத்தின் சிந்தனைத் தளங்களை இலக்குவைத்து அவர்களை வேட்டையாடி அதன்மூலம் இலங்கை முஸ்லிம் சமூகத்தைப் பலவீனப்படுத்துவதற்கான அனைத்து முயற்சிகளிலும் இலங்கை அரசு மிக மும்முரமாக தன்னை ஈடுபடுத்திவருகின்றது என்பதற்கான ஒரு குறியீடே இலங்கை ஜமா அதே இஸ்லாமியின் முன்னாள் அமீர் உஸ்தாத் ரஷீத் ஹஜ்ஜுல் அக்பரின் கைதாகும். இதற்கு முன்னரும் பல்வேறு சந்தர்ப்பங்களில் அவரிடத்தில் விசாரணைகள் முன்னெடுக்கப்பட்டிருக்கின்றன. இப்போது அவற்றையும் தாண்டி அவரைக் கைது செய்திருக்கின்றார்கள். இது இஸ்லாமிய அடிப்படைவாதத்திற்கு எதிரான நடவடிக்கை என்ற பெயரில் இடம்பெறும் ஒரு நிகழ்வாகக் காட்டப்படுகின்றது. உண்மையில் இது அவ்வாறானதல்ல, இலங்கை முஸ்லிம் புத்திஜீவிகளை இலக்குவைத்து நகர்த்தப்படும் மிக மோசமான அடக்குமுறையே இதுவாகும். இது மிகப்பாரிய ஒரு மனித உரிமைமீறல் மற்றும் அச்சுறுத்தல் நடவடிக்கையாகும்.
இதனை எக்காரணம் கொண்டும் அனுமதிக்கவோ அங்கீகரிக்கவோ முடியாது. அவரது கைதுக்கெதிராகவும், முஸ்லிம் புத்திஜீவிகள் மீதான அடக்குமுறைகளுக்கெதிராகவும் மிகப்பாரிய எதிர்வினையாற்றவேண்டியது அனைத்து மனித உரிமை ஆர்வலர்கள், அடக்குமுறைகளுக்கெதிரான செயற்பாட்டாளர்களினதும் உடனடிக் கடமையாகவும் பொறுப்பாகவும் மாறியிருக்கின்றது. இதுவிடயமாக சர்வதேச அளவிலே அழுத்தங்கள் பிரயோகிக்கப்படவும், நடவடிக்கைகள் முன்னெடுக்கப்படுவதும் அவசியமாகும் எனத் தெரிவித்துள்ளார்.
தனது தந்தை கைது செய்யப்பட்டது தொடர்பில் அவரது புதல்வர்களுள் ஒருவரான அப்பான் ஹஜ்ஜுல் அக்பர் தனது முகநூலில் இட்டுள்ள பதிவொன்றில்,
”எனது தந்தை எவ்வித அடிப்படைகளுமற்ற குற்றச்சாட்டுக்களின் பேரில் கைது செய்யப்பட்டிருக்கின்றமை அனைவரும் அறிந்ததே. ஒரு பக்கத்தில் இந்தக் கைதை குடும்பத்தினர் அனைவரும் எவ்விதக் கலக்கமுமின்றி நிதானமாக எதிர்கொண்டாலும், இன்னொரு பக்கத்தில் இந்தக் கைதானது ஏன் எமக்கு அதிர்ச்சியளிக்கும் ஒரு நடவடிக்கை என்பதையும் கட்டாயம் சொல்லியே ஆக வேண்டும்.
எனது தந்தை நிதானம் தவறாத ஒருவர். தன்னை மிக மோசமாக தூற்றுபவர்களைக் கூட திருப்பி ஏசாதவர். தன்னைக் கேவலப்படுத்துபவர்களைக் கூட புன்னகையோடு எதிர்கொள்பவர். வீட்டிலிருக்கும் போது கூட நாட்டைப் பற்றிய சமூகத்தைப் பற்றிய சிந்தனையோடு பேனையும் கையுமாக உட்கார்ந்து ஏதாவது வழிகாட்டல்களை எழுதிக் கொண்டிருப்பவர்.
வன்முறைக்கும் தீவிரவாதத்துக்கும் எதிராக வருடக் கணக்காக எழுதியும் பேசியும் வந்தவர். ஆயுதத்தில் தீர்வில்லை என்பதை அழுத்தம் திருத்தமாக சொல்லி வந்தவர். நடுநிலையான போக்கை அனைத்திலும் கடைப்பிடித்தவர்.
பன்மைத்துவத்தை நாட்டிலும் சரி சமூகத்திலும் சரி அங்கீகரித்தவர். இத்தகைய நடுநிலைப் போக்கிலிருந்து திசைமாறுகிறார்கள் என்று கண்ட போது தனது சொந்த சகோதரன் என்றும் பாராமல் தான் தலைமை வகித்த அமைப்பை விட்டும் நீக்கியவர். வன்முறையாளர்களோடு சம்பந்தமிருக்கிறதா என்று விசாரிக்க வந்தவர்களை மென்மையாக வரவேற்று உபசரித்து அவர்களுக்கு முழுமையாக ஒத்துழைத்தவர். அவர்கள் பொலிஸ் ஜீப்பில் ஏற்றி அழைத்துச் சென்று விசாரித்த போதும், வீடு தேடி வந்து வாக்குமூலம் பெற்ற போதும் புன்னகை மாறாமல் ஒத்துழைப்பு வழங்கியவர்.
உங்களுக்கு வெளிநாட்டுக் காசு வருகிறதா என்று கேட்ட போது, வீட்டையும் அதிலிருக்கும் தளபாடங்களையும் சுட்டிக்காட்டி ‘இவற்றையெல்லாம் பார்த்தால் உங்களுக்கே இக்குற்றச்சாட்டு நம்பும் படியாகவா இருக்கிறது?’ என்று நகைச்சுவையாக கேட்டவர். தொடராக முஸ்லிம்களை இலக்கு வைத்து இடம்பெற்ற வன்முறைகளால் மனதளவில் பாதிக்கப்பட்ட ஆயிரக்கணக்கான முஸ்லிம் இளைஞர்கள் வன்முறையை நாடாமல் ஜனநாயக வழியை நாடுவதற்கான தூண்டுகோலாக அமைந்தவர். இந்த நாட்டின் ஐக்கியத்துக்காகவும் இன நல்லிணக்கத்துக்காகவும் தொடர்ந்தும் குரல் கொடுத்து வந்தவர்.
மறைந்தோ தனித்தோ வாழாமல் அனைவரோடும் கலந்து வாழ்ந்தவர். தனது பயணங்களுக்காக பொதுப் போக்குவரத்தையே மிக அதிகமாக பயன்படுத்தியவர்.
இத்தகைய ஒருவர் ஏன் அதிரடியாக குற்றவாளி போல் கைது செய்யப்பட்டு குடும்பத்தவர்களோ தனது சட்டத்தரணிகளோ கூட சந்திக்க முடியாதவாறு மறைவாக தடுத்து வைக்கப்பட்டிருக்கிறார்? என்பதே எனக்கு முன்னாலுள்ள அதிர்ச்சியான கேள்வியாகும்” எனக் குறிப்பிட்டுள்ளார்.
ஜமாஅதுஸ் ஸலாமா அமைப்பின் தலைவர் உஸ்தாத் ஆஸாத் அப்துல் முயீத் இது குறித்து விடுத்துள்ள அறிக்கையில், உஸ்தாத் ஹஜ்ஜுல் அக்பர் கைது செய்யப்பட்டு சில நாட்களாகின்றன. அவரை அவதானித்தவர்கள், அவர்களது எழுத்துக்கள், உரைகளை செவிமடுத்தவர்கள் உஸ்தாத் ஹஜ்ஜுல் அக்பர் யார் என்பதை இலகுவாகப் புரிந்து கொள்வர்.
நாட்டுப் பற்றுடன் தனது செயல்களை அமைத்துக் கொண்ட உஸ்தாத் அவர் கள், குறிப்பாக முஸ்லிம் சமூகத்ததை அதற்கேற்றவாறு வழிகாட்டியவர். நடுநிலையான இஸ்லாமியப் போதனை களை மக்களுக்கு எத்திவைப்பதில் சுமார் மூன்று தசாப்தங்களாக அயராது உழைத்த சிறந்த ஒரு வழிகாட்டியாகும்.
இலங்கை மண் ஈன்றெடுத்த மிகச் சிறந்த ஆளுமைகளில் உஸ்தாத் ஹஜ்ஜுல் அக்பரும் ஒருவர் என்றால் அது மிகையாகாது. ஆழ்ந்த அனுபவம், கருத்துக்களிலும், அதனை முன்வைப்பதிலும் காணப்படும் முதிர்ச்சி உஸ்தாதில் மிக முக்கிய பண்பு களாகும்.
ஆனால் குறிப்பாக முஸ்லிம் சமூகமும், பொதுவாக இலங்கை மக்களும் இவரது வழிகாட் டல்களை பெற்றுக் கொள்வதில் எவ்வளவு அக்கறை காட்டினார்கள் என்பது பற்றி நாம் சிந்திக்க வேண்டும். இலங்கை புலனாய்வுப் பிரிவினர் நேர்மையாகவும், நீதியாகவும் நடந்துகொள்கிறார்கள் என்பதற்கு அண்மைய நிகழ்வுகள் சான்றாகும். இந்த நம்பிக்கை இன்னும் இருக்கின்றது. எனவே, உஸ்தாத் அவர் களுக்கு மிக விரைவில் நீதி கிடைக்கும் என்று நாம் நம்புகின்றோம் எனத் தெரிவித்துள்ளார்.
அரசியல் தலைமைகள் கலந்துரையாடல்
இதேவேளை, உஸ்தாத் ஹஜ்ஜுல் அக்பரின் கைது தொடர்பில் முஸ்
லிம் அமைச்சர்கள், பாராளுமன்ற உறுப்பினர்கள் கலந்துரையாடல் ஒன்றை நடத்தி ஆராய்ந்துள்ளனர். உஸ்தாத் ஹஜ்ஜுல் அக்பர் தொடர்பில் ஜனாதி பதி, பிரதமர் மற்றும் பாதுகாப்புத் தரப்பின் உயர் அதிகாரிகளுக்கு எடுத்துக் கூறுவது என்று இதன்போது தீர்மானிக்கப்பட்டுள்ளது.
சிவில் அமைப்புகளும் அக்கறை
இந்தக் கைது குறித்து முஸ்லிம் சிவில் அமைப்புகளும் சந்தித்து கலந்துரையாடல்களை நடத்தியுள்ளன. இதன்போது உஸ்தாத் ஹஜ்ஜுல் அக்பர் நிரபராதி என் பதை தெளிவு படுத்துவதற்கான வேலைத் திட்டங் களை முன்னெடுப்பது என்றும் அவரது விடுதலையை வலியுறுத்தி கூட்டறிக்கை ஒன்றை வெளியிடவும் தீர் மானித்துள்ளமை குறிப்பிடத்தக்கது.
எம்.எப்.எம்.பஸீர்
vidivelli