ஐ.தே.க.வின் ஜனாதிபதி வேட்பாளர் ஓரிரு தினங்களில் அறிவிக்கப்படுவார்
கட்சியின் தவிசாளர் கபீர் ஹாசிம் தெரிவிப்பு
ஐக்கிய தேசியக் கட்சி ஜனநாயக ரீதியில் செயற்படும் ஒரு கட்சியாகும். அந்த வகையில் குடும்ப ஆட்சியை கொண்டு நடத்தாத ஐக்கிய தேசியக் கட்சி எதிர்வரும் ஜனாதிபதித் தேர்தலில் மக்கள் விரும்பக்கூடிய அல்லது மக்கள் ஆதரிக்கக் கூடிய ஒரு வேட்பாளரை நிறுத்தும்.
அதற்கான அறிவிப்பு இன்னும் ஓரிரு தினங்களில் வெளியாகும். அதன்போது வேட்பாளரை நாம் நியமிப்போமென ஐக்கிய தேசியக் கட்சியின் தவிசாளரும், நெடுஞ்சாலைகள், வீதி அபிவிருத்தி மற்றும் பெற்றோலிய வள அபிவிருத்தி அமைச்சருமான கபீர் ஹாசிம் தெரிவித்தார்.
கினிகத்தேனை மினுவான்தெனிய இட்டிகேகம, உடபொல்கஸ்வத்த ஊடாக தெரணியகல செல்லும் பிரதான வீதியை காபட் வீதியாக செப்பனிட்டு மக்கள் பாவனைக்கு கையளிக்கும் நிகழ்வு நேற்று மினுவான்தெனிய பகுதியில் இடம்பெற்றது.
சுமார் 8 கிலோ மீற்றர் கொண்ட இந்த காபட் வீதிக்கு நெடுஞ்சாலைகள், வீதி அபிவிருத்தி மற்றும் பெற்றோலிய வள அபிவிருத்தி அமைச்சின் ஊடாக 300 மில்லியன் ரூபா செலவிடப்பட்டுள்ளது.
இந்நிகழ்வில் ஐக்கிய தேசியக் கட்சியின் நுவரெலியா மாவட்ட பாராளுமன்ற உறுப்பினர் கே.கே.பியதாஸ, வீதி அபிவிருத்தி அதிகார சபை அதிகாரிகள் மற்றும் பலரும் கலந்து கொண்டனர்.
இந்நிகழ்வில் பிரதம அதிதியாகக் கலந்துகொண்டு மக்கள் மத்தியில் உரையாற்றும்போதே அவர் இவ்வாறு தெரிவித்தார்.
அவர் மேலும் தெரிவித்ததாவது,
ஐக்கிய தேசியக் கட்சியின் ஊடாக ஜனாதிபதி வேட்பாளர் ஒருவரை நியமிப்பதில் கட்சிக்குள் எந்தப் பிரச்சினையும் இல்லையெனத் தெரிவித்த அவர், தாம் வேட்பாளராக வர வேண்டுமெனக் கட்சியை சார்ந்த ஐவர் விண்ணப்பித்துள்ளனர். இவர்களில் எவரை ஜனாதிபதி வேட்பாளராக மக்கள் விரும்புகின்றார்களோ அவரை வேட்பாளராக ஐக்கிய தேசிய கட்சி நிறுத்தும் எனவும் தெரிவித்தார்.
அதேநேரத்தில் சில கட்சிகள் தற்போது ஜனாதிபதி வேட்பாளரை அறிவித்திருந்தாலும், இது தொடர்பாக ஏனையவர்களிடம் கலந்தாலோசனை செய்யாது நிறுத்தியுள்ளனர். ஆனால் ஐக்கிய தேசியக் கட்சிக்கு ஜனநாயகத்தை பின்பற்றக்கூடிய நிலை உள்ளதால் அவசரமின்றி வேட்பாளர் ஒருவரை நியமிக்க கட்சியின் கொள்கைக்கேற்ப நடவடிக்கைகள் முன்னெடுக்கப்படும்.
இந்த நாட்டை 20 வருடமாக ஆட்சி செலுத்திய சிலர் இப்போது நாட்டை எம்மிடம் தாருங்கள் என்று கேட்கின்றனர். ஆனால் கடந்த காலங்களில் இவர்கள் நாட்டு மக்களின் பொதுவான பிரச்சினைகளை கூட முறையாக தீர்க்கவில்லை. இந்த நிலையில் நாட்டை ஆளக்கூடிய பொறுப்பை மக்கள் எம்மிடம் வழங்கினர். நாம் இந்தப் பொறுப்பை ஏற்கும்போது நாடு கடன் சுமை, குப்பை மற்றும் சைட்டம் ஆகிய பிரச்சினைகளுடன் பொறுப்பேற்றோம்.
நல்லாட்சி என்ற வகையில் நாம் செயற்பட்டிருந்த போதிலும் கடந்த 6 மாத காலமாக தனியான அமைச்சரவை அந்தஸ்துடன் செயற்பட்டு வருகின்றோம். ஐக்கிய தேசியக் கட்சி இந்த நாட்டை பொறுப்பேற்ற பின் இதுவரை 6,500 கோடி ரூபாய் கடன் செலுத்தப்பட்டுள்ளது.
இதில் 4000 கோடி ரூபாய் கடன் மஹிந்த ராஜபக் ஷவின் ஆட்சிக் காலத்தில் அவர்கள் முன்னெடுத்த பணிகளுக்கு செலுத்தப்பட்டுள்ளது. இருந்த போதிலும் இந்நிலையில் எமக்கு எதிராக நம்பிகையில்லா பிரேரரணைகளை கொண்டு வந்தார்கள். மக்களை தூண்டி விட்டு போராட்டங்களை நடத்தினார்கள்.
இவை அனைத்தையும் எதிர்கொண்டு ஆட்சியை நடத்தி வருகின்றோம்.
எமது ஐக்கிய தேசியக் கட்சியின் ஆட்சி காலப்பகுதியில் பாடசாலைகள் அபிவிருத்தி செய்யப்பட்டுள்ளன. பாடசாலை மாணவர்களுக்கு காப்புறுதிகள் வழங்கப்பட்டுள்ளன. சமுர்த்தி உதவி பெறுபவர்களுக்கு கொடுப்பனவு அதிகரிக்கப்பட்டுள்ளது. தற்போது பிரதமர் தலைமையில் தொழில் வாய்ப்புகளும் அதிகரிக்கப்பட்டுள்ளன.
இவ்வாறாக நாட்டை முன்னெடுத்து செல்ல பல்வேறு வேலைத்திட்டங்கள் தற்போது முன்னெடுக்கப்பட்டு வருவதாக அவர் மேலும் தெரிவித்தார்.
(ஹட்டன் நிருபர்)
vidivelli