வன்முறைகள், அச்சுறுத்தல்கள் நிறுத்தப்படாவிடின் முஸ்லிம்கள் நாட்டை விட்டு வெளியேறுவர்
ஐ.நா. விசேட அறிக்கையாளர் எச்சரிக்கை
இலங்கையில் முஸ்லிம்களுக்கு எதிரான வன்முறைகளும் அச்சுறுத்தல்களும் தொடர்ந்தும் நிகழ்வதை தடுத்து நிறுத்த நடவடிக்கை எடுக்கப்படாவிடின் அவர்கள் நாட்டை விட்டு வெளியேறும் அபாயம் ஏற்படுமெனத் தெரிவித்துள்ள மத சுதந்திரம் தொடர்பான ஐ.நா. விசேட அறிக்கையாளர் அஹ்மத் ஷஹீத், இவ்வாறான வன்முறைகளின் சூத்திரதாரிகளை சட்டத்தின் முன் நிறுத்துவதிலும் சிறுபான்மையினருக்கு பாதுகாப்பு வழங்குவதிலும் பொலிசார் தோல்வியடைந்துள்ளதாகவும் சுட்டிக்காட்டினார்.
மதச் சுதந்திரம் தொடர்பான ஐக்கிய நாடுகள் சபையின் விசேட அறிக்கையாளர் அஹ்மட் ஷஹீத் இலங்கைக்கு மேற்கொண்ட உத்தியோகபூர்வ விஜயத்தின் இறுதியில் நேற்று மாலை கொழும்பிலுள்ள ஐக்கிய நாடுகள் அலுவலகத்தில் ஊடகவியலாளர்களை சந்தித்து கருத்து வெளியிடுகையிலேயே இவ்வாறு குறிப்பிட்டார்.
கடந்த 15 ஆம் திகதி உத்தியோகபூர்வ விஜயமொன்றை மேற்கொண்டு இலங்கைக்கு வந்திருந்ததுடன், நேற்று திங்கட்கிழமை வரை தங்கியிருந்து இலங்கையில் மதசுதந்திரம் தொடர்பில் உள்ள நிலைவரத்தை ஆராய்ந்திருந்தார்.
தலைநகர் கொழும்பிற்கு மேலதிகமாக வடக்கு, வடமேல், கிழக்கு, மத்திய மாகாணங்களின் பல்வேறு பிரதேசங்களுக்கும் விஜயம் மேற்கொண்ட ஷஹீட் அங்கு மதம் சார்பான வன்முறைகளால் பாதிக்கப்பட்டவர்கள், மதத்தலைவர்கள், முறைப்பாட்டாளர்கள், மனித உரிமை செயற்பாட்டாளர்கள் உள்ளிட்ட பல தரப்பினரையும் சந்தித்தார். இந் நிலையில் குறித்த சந்திப்புகள் மற்றும் கள விஜயங்களின் போது தான் திரட்டிய தகவல்களின் அடிப்படையில் அவர் மேலும் கருத்து வெளியிடுகையில்,
கடந்த ஏப்ரல் மாதம் உயிர்த்த ஞாயிறு தினத்தன்று ஐ.எஸ். இயக்கத்துடன் தொடர்புடையவர்கள் இலங்கையில் மேற்கொண்ட பயங்கரவாதத் தாக்குதல்களாலும், அதனைத் தொடர்ந்து முஸ்லிம்களுக்கு எதிராக இடம்பெற்ற வன்முறைகளாலும் மிகுந்த அதிர்ச்சி அடைந்தோம். முதலில் உயிர்த்த ஞாயிறு தினத் தாக்குதல்களாலும், ஏனைய வன்முறைகளாலும் உயிரிழந்தவர்களை நினைவுகூருவதுடன், அவர்களது உறவினர்களுக்கு எமது அனுதாபங்களைத் தெரிவித்துக் கொள்கின்றேன். அத்தோடு தாக்குதல்களில் காயமடைந்தவர்கள் விரைவில் குணமடைவதற்கும் பிரார்த்திக்கின்றேன். அத்தோடு என்னுடைய இந்த விஜயத்தின் போது மதச் சுதந்திரம் தொடர்பில் நான் அவதானித்த, ஆராய்ந்த, உள்வாங்கிய விடயங்கள் மற்றும் பரிந்துரைகள் அடங்கிய எனது அறிக்கை எதிர்வரும் 2020 மார்ச் மாதம் நடைபெறும் கூட்டத்தொடரில் ஐக்கிய நாடுகள் மனித உரிமைகள் பேரவையில் சமர்ப்பிக்கப்படும்.
அந்தவகையில் அரசாங்கத்தினால் உருவாக்கப்பட்ட தேசிய ஒற்றுமை மற்றும் நல்லிணக்கத்திற்கான அலுவலகத்தினால் சமூகங்களுக்கிடையில் நல்லிணக்கத்தை ஏற்படுத்தும் முயற்சிகள் மேற்கொள்ளப்பட்டிருக்கின்றன. அதேபோன்று பல்வேறு மதங்களைப் பிரதிநிதித்துவப்படுத்துகின்ற மதத்தலைவர்களும் நல்லிணக்கத்தைக் கட்டியெழுப்புவதற்கு முன்வந்துள்ளமை வரவேற்கத்தக்கது. நாடொன்றின் மதச்சுதந்திரம் என்று குறிப்பிடுகையில் அதில் இருவிதங்களில் அரசாங்கம் தொடர்புபடுகின்றது. முதலாவது, நாட்டு மக்களின் மதச்சுதந்திரம் மற்றும் நம்பிக்கைகளில் அரசாங்கம் தலையிடக்கூடாது. இரண்டாவது, ஒருவரின் மதச்சுதந்திரம் மற்றும் நம்பிக்கைகள் என்பனவற்றில் வேறெவரும் தலையிடாத வகையில் பாதுகாப்பை உறுதிசெய்தல் ஆகும்.
பௌத்தர்கள் சிறுபான்மையாக வாழும் பிரதேசங்களில் கூட பௌத்த விகாரைகளையும், புத்தர் சிலைகளையும் அமைப்பதற்கு அரசாங்கம் அனுமதி வழங்குகின்றது. எனினும் பௌத்தர்கள் பெரும்பான்மையாக வாழும் பிரதேசங்களில் ஏனைய மதத்தவர்கள் தமது மதம் சார்ந்த வழிபாடுகளை சுதந்திரமாக முன்னெடுக்க முடிவதில்லை என்ற விடயம் பல்வேறு சமூகத்தைச் சார்ந்தவர்களாலும் சுட்டிக்காட்டப்பட்டது.
இலங்கையின் அரசியலமைப்பின் பிரகாரம் பௌத்த மதத்திற்கு முன்னுரிமை வழங்கப்படுகின்றது. இவ்வாறு நாடொன்று குறித்தவொரு மதத்திற்கு முன்னுரிமை வழங்குவதற்கு சர்வதேச சட்டங்கள் எதிர்ப்புத் தெரிவிக்கவில்லை. ஆனால் அதேவேளை, அந்நாட்டின் அரசாங்கம் நாட்டிலுள்ள ஏனைய மதங்களைப் பின்பற்றுவோரை எவ்வித பக்கச்சார்புமின்றி நடத்துவதுடன், அவர்களது உரிமைகளையும் உறுதிசெய்ய வேண்டியது அவசியமாகும்.
அதேபோன்று பெரும்பான்மையினத்தவரால் சிறுபான்மையினத்தவர் மீது வன்முறைகள் கட்டவிழ்த்து விடப்பட்ட போது, குற்றவாளிகள் காணொலிகள் மூலமாக அடையாளங் காணப்பட்டாலும் கூட இன்னமும் சட்டத்தின் முன் நிறுத்தப்படவில்லை. கடந்த 2014 ஆம் ஆண்டில் இடம்பெற்ற அளுத்கம வன்முறையை இங்கு குறிப்பிட முடியும்.
மேலும் உயிர்த்த ஞாயிறுதினத் தாக்குதல்களின் பின்னர் முகத்தை மறைக்கும் வகையில் ஆடையணிவது தடை செய்யப்பட்ட நிலையில், இவ்விடயத்தில் முஸ்லிம் பெண்களை இலக்குவைத்து அச்சுறுத்தலுக்கு உள்ளாக்கப்பட்ட சம்பவங்கள் பதிவாகியுள்ளன. தொடர்ந்து முஸ்லிம் விவாக, விவாகரத்துத் திருத்தச்சட்ட விவகாரத்திலும் பெண்களின் திருமண வயதெல்லை, காதி நீதிமன்றங்களில் பெண் நீதிபதிகள் நியமிக்கப்படாமை போன்ற விடயங்கள் அவதானத்திற்குக் கொண்டுவரப்பட்டுள்ளன. அதுமாத்திரமன்றி சமூக வலைத்தளங்களின் ஊடாக அடிப்படைவாத, தீவிரவாதக் கருத்துக்கள் மற்றும் மதம் சார்பான வெறுப்புணர்வுப் பேச்சுக்கள் பரப்பப்படுவதைக் கட்டுப்படுத்துவதற்கான நடவடிக்கைகள் மேற்கொள்ளப்பட வேண்டும்.
அரச தலைவர்களும், மதத் தலைவர்களும் மதம் சார்பான வெறுப்புணர்வுப் பேச்சுக்கள் மற்றும் அடிப்படைவாதத்திற்கு எதிரான நிலைப்பாட்டையும் பாதிக்கப்பட்ட, பின்தள்ளப்பட்ட சமூகத்துடனான தமது ஒன்றிணைவையும் வெளிப்படுத்த வேண்டும். மதத்தையும், அரசியலையும் தனித்தனியாகப் பிரிக்க முடியாது. அரசியல் செயற்பாடுகள் மத நடவடிக்கைகளில் தாக்கத்தை ஏற்படுத்தும். எனவே அரசியல்வாதிகள் ஒற்றுமையை ஊக்குவிக்க வேண்டும்.
அதேபோன்று அடிப்படைவாதம் என்ற சவாலை எதிர்கொள்ள வேண்டுமெனில், முதலில் சட்டத்தின் ஆட்சி வலுவானதாக இருக்க வேண்டும். எந்தவொரு நபரால் நாடு நிர்வகிக்கப்பட்டாலும் சட்டத்தின் ஆட்சி மற்றும் வெறுப்புணர்விற்கு எதிரான நிலைப்பாடு என்பவற்றினால் அடிப்படைவாத சவாலுக்கு முகங்கொடுக்க முடியும். முஸ்லிம் சமூகத்தினர் வழங்கிய தகவல்கள் மற்றும் உதவியின் ஊடாகவே உயிர்த்த ஞாயிறுதினத் தாக்குதல்களுடன் தொடர்புடையவர்களைக் கைது செய்து, நிலைமையைக் கட்டுப்பாட்டிற்குள் கொண்டுவர முடிந்ததாக பொலிஸார் தெரிவித்திருக்கின்றனர். இவ்வாறு சமூகங்களுக்கு இடையில் பிணைப்பையும், ஒன்றிணைவையும் ஏற்படுத்துவதன் ஊடாக தீவிரவாதத்தை வெற்றிகொள்ள முடியும்.
மேலும் உயிர்த்த ஞாயிறு தின தாக்குதல்களுக்குப் பின்னர் முஸ்லிம் பிரதேசங்களை இலக்குவைத்து வன்முறைச் சம்பவங்கள் கட்டவிழ்த்துவிடப்பட்ட போது பொலிஸார் அவற்றைத் தடுக்கவில்லை என்ற கருத்து பாதிக்கப்பட்ட தரப்பினரால் முன்வைக்கப்படுகின்றது. அத்தோடு ஏற்பட்ட பாதிப்புக்களுக்கான இழப்பீடுகளும் வழங்கப்படவில்லை. இவை கவனத்திற்கொள்ளப்பட வேண்டியவையாக இருக்கின்றன.
இந்நிலையில் இலங்கை அரசாங்கம் வன்முறைச் சம்பவங்களுடன் தொடர்புடைய நபர்களைச் சட்டத்தின் முன் நிறுத்துவதற்குரிய நடவடிக்கையை மேற்கொள்வதுடன், வெறுப்புணர்வை முற்றாக இல்லாதொழித்து, அத்தகைய வெறுப்புணர்வு வன்முறைகளால் பாதிக்கப்பட்டவர்கள் நீதியைப் பெற்றுக்கொள்வதற்கான சூழ்நிலையை உருவாக்க வேண்டும். அதேபோன்று சர்வதேச சட்டங்களுக்கும், தரநியமங்களுக்கும் அமைவாக வெறுப்புணர்வுப் பேச்சுக்களைக் கண்காணிப்பதற்கான கட்டமைப்பு ஒன்றை அரசாங்கம் உருவாக்க வேண்டும்.
மேலும் அரச தலைவர்களும், மதத்தலைவர்களும் வெறுப்புணர்வுப் பேச்சுக்கள் மற்றும் செயற்பாடுகள் என்பவற்றுக்கு எதிராக வெளிப்படையாகத் தமது கருத்துக்களைத் தெரிவிக்க வேண்டும். சுதந்திரமானதும், அமைதியாதுமான சூழல் ஒன்றில் வாழ்வதற்கு ஏதுவான சிறார்களை உருவாக்கும் வகையில் கல்விக் கொள்கையில் விரைவான மறுசீரமைப்புக்கள் ஏற்படுத்தப்பட வேண்டும் என்றார்.
vidivelli