ஜனாதிபதித் தேர்தலுக்கான தயார்படுத்தல்களில் கட்சிகள் தீவிரமாக இறங்கியுள்ளன. பொது ஜன பெரமுனவின் வேட்பாளராக கோத்தாபய ராஜபக்ச பெயரிடப்பட்டுள்ளதுடன் சிவில் அமைப்புகளுடன் இணைந்து மக்கள் விடுதலை முன்னணி உருவாக்கியுள்ள ‘தேசிய மக்கள் சக்தி’ எனும் புதய கூட்டணியின் வேட்பாளராக அநுர குமார திசாநாயக்க பெயரிடப்பட்டுள்ளார். எனினும் நாட்டின் இரு பிரதான அரசியல் கட்சிகளான ஸ்ரீ லங்கா சுதந்திரக் கட்சியும் ஐக்கிய தேசியக் கட்சியும் தமது வேட்பாளர்கள் குறித்து இதுவரை தீர்மானம் ஒன்றுக்கு வரவில்லை.
ஐக்கிய தேசியக் கட்சியின் வேட்பாளராக அக் கட்சியின் பிரதித் தலைவர் சஜித் பிரேமதாசவை பெயரிட வேண்டும் எனும் அழுத்தம் கட்சிக்கு உள்ளேயும் வெளியேயும் பலமாக முன்வைக்கப்பட்டு வருகின்ற போதிலும் அதற்கு கட்சித் தலைவர் ரணில் விக்ரமசிங்க இசைந்து கொடுப்பதாக தெரியவில்லை. இதன்காரணமாக அக் கட்சிக்குள் பெரும் பனிப்போர் நிலவுகிறது. ரணிலா? சஜித்தா? கருவா? என்ற கேள்விக்கு விடை கிடைக்கும்போது அக் கட்சிக்குள் பாரிய பிளவொன்று ஏற்படக் கூடும் என்பதே அரசியல் அவதானிகளின் எதிர்வு கூறலாகவுள்ளது.
மறுபுறம் ஜனாதிபதி தலைமையிலான சுதந்திரக் கட்சியினர் பொது ஜன பெரமுன வேட்பாளரை ஆதிரிப்பார்களா இன்றேல் தமது கட்சி சார்பில் வேட்பாளரை நிறுத்துவார்களா என்ற கேள்விக்கு விடை காணப்படவில்லை. அக் கட்சியால் தனித்து வேட்பாளர் ஒருவரை நிறுத்தி வெற்றி பெற முடியாது என்ற வகையில் அவர்கள் ஏதேனும் ஒரு கூட்டணி ஒன்றுக்குச் செல்வார்கள் என்பதே எதிர்பார்ப்பாகவுள்ளது.
இதற்கிடையில் ஒக்டோபர் 26 இல் இடம்பெற்ற அரசியல் மாற்றம் போன்று, ஜனாதிபதித் தேர்தலுக்கு முன்னராக ஜனாதிபதி ஐ.தே.கட்சியின் உட்பிளவைப் பயன்படுத்தி அரசியல் மாற்றம் ஒன்றைக் கொண்டுவரலாம் என்ற அவதானங்களும் உள்ளன. எனினும் ஏற்கனவே அந்த முயற்சியில் சூடுபட்ட ஜனாதிபதி அவ்வாறானதொரு விஷப் பரீட்சைக்கு மீண்டும் செல்வாரா என்பதும் கேள்விக்குரியதே.
இத் தேர்தலிலும் வழமைபோன்று சிறுபான்மை மக்களின் வாக்குகளே தீர்மானிக்கும் சக்திகளாக விளங்கும் என்ற வகையில் தமிழ் கட்சிகளிதும் முஸ்லிம் கட்சிகளினதும் நிலைப்பாடுகள் தற்போது அரசியல் அரங்கில் முக்கியத்துவம் பெறுகின்றன. த.தே.கூட்டமைப்பு ஐ.தே. முன்னணியின் வேட்பாளரையே ஆதரிக்கும் என்ற போதிலும் தமக்கு விருப்பமான வேட்பாளரைப் பெயரிட வேண்டும் எனும் அழுத்தத்தை தொடர்ச்சியாக வழங்கி வருகின்றது. இதுவே ஐ.தே.கட்சிக்குள் நெருக்குவாரங்கள் ஏற்படக் காரணமாகும்.
மறுபுறம் மற்றொரு தீர்மானிக்கும் சக்தியான முஸ்லிம் கட்சிகள் இதுவரை தீர்மானம் ஒன்றுக்கு வரவில்லை. குறிப்பாக ஸ்ரீ லங்கா முஸ்லிம் காங்கிரஸ் மற்றும் அகில இலங்கை மக்கள் காங்கிரஸ் ஆகிய கட்சிகள் சகல வேட்பாளர்களும் பெயரிடப்பட்ட பின்னரே தமது ஆதரவை வெளிப்படுத்தலாம் எனக் கூறி வருகின்றன. இதற்கிடையே தான் ஜனாதிபதித் தேர்தலில் வேட்பாளராக களமிறங்கப் போவதாக முன்னாள் கிழக்கு மாகாண ஆளுநர் எம்.எல்.ஏ.எம். ஹிஸ்புல்லாஹ் அறிவித்துள்ளார். இந்த அறிவிப்பும் சமூகப் பரப்பில் வாதங்களுக்கு வித்திட்டுள்ளது.
இருந்தபோதிலும முஸ்லிம் சமூகத்தின் வாக்குப் பலத்தைப் பயன்படுத்தி இந்த ஜனாதிபதித் தேர்தல் ஊடாக சமூகத்தின் அபிலாஷைகளை வென்றெடுப்பதற்கான எந்தவொரு ஆக்கபூர்வமான முயற்சிகளையும் காண முடியவில்லை. வழமைபோன்று முஸ்லிம் கட்சிகள் சமூகத்தின் நலனையன்றி கட்சிகளின் நலன்களையும் எதிர்கால பொதுத்தேர்தல் வெற்றிகளையும் அடிப்படையாகக் கொண்டே தீர்மானங்களுக்கு வர முயற்சிக்கின்றன. இது துரதிஷ்டவசமானதாகும்.
ஏப்ரல் 21 இன் முன்னரும் பின்னரும் சமூகம் எதிர்நோக்கிய, எதிர்நோக்கி வருகின்ற பல்வேறு தேசிய மற்றும் பிராந்திய மட்ட பிரச்சினைகளுக்கு தீர்வு காணப்பட வேண்டியுள்ளது. இவற்றைத் தீர்க்கக் கூடிய வேட்பாளரையே சமூகம் ஆதரிக்க வேண்டியுமுள்ளது. அவ்வாறாயின் சமூகம் சார்பில் முக்கிய கோரிக்கைகள் அடங்கிய ஆவணம் வேட்பாளர்களிடம் வழங்கப்பட்டு அவர்களது இணக்கப்பாடு எழுத்து மூலம் பெறப்பட வேண்டும். அதன் பின்னரே அவர்களுக்கு ஆதரவு வழங்குவது பற்றிச் சிந்திக்க வேண்டும். மாறாக ஒட்டுமொத்த சமூகத்தையும் உணர்ச்சி அரசியல் அலையின் பின்னால் இழுத்துச் செல்ல முஸ்லிம் தலைமைகள் முற்படக் கூடாது.
vidivelli