சர்வாதிகாரத்தினால் ஜனநாயகத்தை மிதித்த ஹிட்லர், கடாபியின் மரணங்கள் எவ்வாறு அமைந்தன என்பது உலகுக்கே தெரியும்
மைத்திரி - மஹிந்த இதனை நினைவிற்கொள்ள வேண்டும் என்கிறார் பிமல்
சர்வாதிகாரத்தை கையிலெடுத்து ஜனநாயகத்தை மிதித்த ஹிட்லர், கடாபி ஆகியோரின் மரணங்கள் எவ்வாறு அமைந்தன என்பது இந்த உலகுக்கே தெரியும். இன்று சர்வாதிகாரத்தை கையில் எடுத்துள்ள மைத்திரி – மஹிந்த இருவரும் இதனை நினைவில் வைத்துக்கொள்ள வேண்டும் என ஜே.வி.பி. பாராளுமன்ற உறுப்பினர் பிமல் ரத்நாயக்க தெரிவித்தார்.
மஹிந்த – -மைத்திரி கூட்டணி இவ்வாறே ஜனநாயக விரோதமாக ஆட்சியை கொண்டுசென்றால் நாட்டில் மக்கள் புரட்சிக்கு முகங்கொடுக்க வேண்டிவரும் எனவும் அவர் குறிப்பிட்டார்.
பாராளுமன்றத்தில் நேற்று ஐக்கிய தேசியக் கட்சியின் உறுப்பினர் ஆசு மாரசிங்க கொண்டுவந்த சபை ஒத்திவைப்பு வேளை பிரேரணைமீது உரையாற்றும் போதே அவர் இதனைக் குறிப்பிட்டார். அவர் மேலும் கூறுகையில்,
வழமையாக ஆட்சியிலுள்ள அரசாங்கம் மக்கள் ஆணையை முழுமையாக மதிக்காமலேயே செயற்படும். 60 வீதமேனும் சர்வாதிகார போக்கில்தான் அரசாங்கம் செயற்படும். ஆனால் இன்று ஜனாதிபதியும் அவரது அரசாங்கமும் நூறு வீதம் ஜனநாயகத்தை மீறிவிட்டனர். தாம் ஆட்சியில் நிலைக்க வேண்டுமென்ற காரணத்திற்காக அரசியலமைப்பினையும், மக்கள் ஆணையையும் மீறி செயற்பட்டுவிட்டனர். இன்று மக்கள் ஆணையை முழுமையாக மீறி சர்வாதிகார ஆட்சியை தக்கவைத்து வருகின்றனர். ஜனாதிபதி அமைத்த இடைக்கால அரசாங்கத்தை எந்தவொரு சர்வதேச நாடும் ஏற்றுக் கொள்ளவில்லை. குறைந்தபட்சம் மாலைதீவுகள், சீசெல்ஸ் நாடுகள்கூட ஏற்றுக்கொள்ளவில்லை. இதுவே ஜனாதிபதியின் ஆட்சியின் பலவீனத்தை வெளிப்படுத்தியுள்ளது.
இன்று நாட்டின் பொருளாதாரம் முற்றாக வீழ்ச்சி யடைந்துள்ளது. இலங்கையின் உள்நாட்டு உற்பத்திகள் முழுமையாக வீழ்ச்சி கண்டுள்ளது. வெறும் அதிகார மோகத்தில் ஜனநாயகத்தை வீழ்த்திவிட்டனர். ஆகவே மைத்திரி -– மஹிந்த ஆட்சியை விரட்டியடிக்க வேண்டும் என்ற ஒரே நோக்கமே இன்று அனைவருக்கும் உள்ளது. சிறிசேனவின் நிலைமை இன்று தற்கொலை குண்டுதாரி போன்றாகிவிட்டது. தனது அதிகாரத்தை மட்டுமே கருத்திற்கொண்டு நாட்டை அழிக்கவே முயற்சித்து வருகின்றார். ஒரு பேய் போன்று செயற்பட்டு வருகின்றார். தனது சேட்டைகள் அனைத்தையும் தனது வீட்டுக்குள் வைத்துகொள்ள வேண்டுமென அவருக்கு எச்சரிக்கின்றோம்.
இன்று வெளிநாட்டு சுற்றுலா பயணிகளுக்கு இலங்கை குறித்து பாரிய சந்தேகம் எழுந்துள்ளது. குறிப்பாக ஐரோப்பிய நாடுகளின் சுற்றுலா பயணிகளுக்கு இது வலியுறுத்தப்படுகின்றது. அதேபோல் ஐரோப்பிய நாடுகளுக்கே எமது ஏற்றுமதி அதிகமாகும். அதிலும் பாதிப்பேற்பட்டுள்ளது. ஜனாதிபதி கடந்த 26 ஆம் திகதி இவ்வாறு ஒரு தீர்மானம் எடுப்பாரென எவரும் நினைத்துப்பார்க்கவில்லை. அதிகாரமில்லாத நிலையில் ஜனாதிபதி ஒருவர் இவ்வாறு செயற்படுவார் என்றால் நிறைவேற்று ஜனாதிபதியாக இருந்தால் இன்று நிலைமை எவ்வாறு இருக்கும். ஜனாதிபதியுடன் கூட்டணி அமைத்துள்ள அனைவருக்கும் இன்று நீதிமன்ற வழக்குகள் உள்ளன. மஹிந்த ராஜபக் ஷவிற்கு தைரியமிருந்தால் தனக்கு சபையில் நம்பிக்கை உள்ளது என்ற பிரேரணையை கொண்டுவர வேண்டும். அதில் அவர் தன்னை நிரூபிக்க வேண்டும். இன்று இவர்கள் கறுப்பு ஊடக கலாசாரத்தை வைத்துகொண்டு மக்களை ஏமாற்றி வருகின்றனர். எனினும் இந்த ஆட்சியை நீதிமன்றம், பாராளுமன்றம், சர்வதேச நாடுகள் மட்டுமல்ல, நாட்டின் பெரும்பான்மை மக்களும் ஏற்றுக்கொள்ளவில்லை. வெறுமனே கறுப்பு ஊடகங்கள்தான் இவர்களை பிரசித்தப்படுத்தி வருகின்றன.
சர்வாதிகார ஆட்சியாளர்களின் இறுதிக்கட்ட முடிவு எவ்வாறு அமைந்தது என்பது உலக நாடுகள் அனைத்திற்கும் நன்றாக தெரியும். அடொல்ப் ஹிட்லர் இறுதியாக பதுங்குகுழியில் இறந்துபோனார், முஅம்மர் கடாபி ஒரு மதகுக்கு அடியில் அடித்துக்கொல்லப்பட்டார். இவ்வாறு மிகவும் மோசமான வகையில் அவர்கள் இறந்தனர். ஆகவே சர்வாதிகாரத்தை கையிலெடுக்கும் நபர்கள் இறுதியில் மோசமான விளைவுகளை எதிர்கொள்ள வேண்டி வரும். ஆகவே மைத்திரிபால சிறிசேன – மஹிந்த ராஜபக் ஷ இருவரும் இதனை மனதில் வைத்துகொள்ள வேண்டும். ஜனநாயகத்தை மிதித்து நசுக்கினால் இறுதியில் மோசமான விளைவுகளை சந்திக்க வேண்டி வரும். அதேபோல் அரசாங்கம் இல்லாது சர்வாதிகாரமாக தொடர்ந்தும் ஆட்சியை கொண்டுசெல்ல இவர்கள் முயற்சித்தால் இந்த ஆட்சி முடிவுக்கு வரும் முன்னரே ஜனநாயகப் புரட்சியொன்றினை சந்திக்கவேண்டிய நிலைமையும் உருவாகும் எனக் குறிப்பிட்டார்.
-Vidivelli