தேசிய மக்கள் சக்தியின் ஜனாதிபதி வேட்பாளர் அனுரகுமார திசாநாயக
காலி முகத்திடலில் நடைபெற்ற பேரணியில் அறிவிப்பு
மக்கள் விடுதலை முன்னணி தலைமையிலான “தேசிய மக்கள் சக்தியின்” ஜனாதிபதி வேட்பாளராக ஜே.வி.பி. யின் தலைவர் அனுரகுமார திசாநாயக நேற்று அறிவிக்கப்பட்டார்.
ஆயிரக்கணக்கான ஆதரவாளர்களை காலி முகத்திடலுக்கு அழைத்து வந்து தமது ஜனாதிபதி தேர்தல் போட்டியை ஆரம்பித்தது தேசிய மக்கள் சக்தி அமைப்பு.
2020 ஆம் ஆண்டுக்கான ஜனாதிபதி தேர்தலில் மக்கள் விடுதலை முன்னணி தனித்து களமிறங்குவதாக அறிவித்திருந்த நிலையில் மக்கள் விடுதலை முன்னணியின் தலைமையில் சிவில் அமைப்புகள், தொழிற்சங்கங்கள், விவசாய அமைப்புகள், இளைஞர் அணியினர், பெண்கள் நலன் அமைப்பு, சுகாதார சேவயர் சங்கம் உள்ளிட்ட பல சங்கங்கள் வடக்கு, கிழக்கு, தெற்கு மற்றும் மலையகத்தை பிரதிநிதித்துவப்படுத்தும் மக்கள் ஒன்றிணைந்த ‘தேசிய மக்கள் சக்தி” யின் மாநாடு நேற்று கொழும்பு காலிமுகத்திடலில் பிற்பகல் 4 மணியளவில் ஆரம்பிக்கப்பட்டது.
இலங்கையில் சகல பிரதேசங்களில் இருந்தும் மக்கள் விடுதலை முன்னணியின் ஆதரவாளர்கள் ஆயிரக்கணக்கானோர் நேற்று காலிமுகத்திடலில் தமது ஜனாதிபதி வேட்பாளருக்கு ஆதரவு வழங்கும் விதத்தில் மக்கள் கூட்டத்தில் கலந்து கொண்டனர். இந்த நிகழ்வில் சட்டத்தரணி லால் விஜயநாயக, சிவில் சமூக பிரதிநிதியான முனீர் முழப்பர், சோஷலிச புரட்சி முன்னணியின் செயலாளர் வசந்த திசாநாயக்க, தேசிய கலைஞர்கள் அமைப்பின் தலைவர் ஜயதிலக கன்னல்லவீர, பொறியியலாளர் மயில்வாகனம் சூரியசேகரன், ஜகத் மனுவர்ண, பெண்கள் உரிமைகளுக்கான அமைப்பின் உறுப்பினர் சரோஜா சாவித்திரி உள்ளிட்ட முக்கிய பிரதிநிதிகள் உரையாற்றினர். இதன்போது தேசிய மக்கள் சக்தியின் கொள்கைத்திட்டமும் வாசிக்கப்பட்டது. ஊழல் மோசடிகள் இல்லாத ஆட்சியையும், மக்களை பாதுகாக்கும் ஜனநாயகத்தை உருவாக்கும், மனித உரிமைகளை பலப்படுத்தும் தூய்மையான ஆட்சியை உருவாக்கி அதன் மூலமாக நாட்டின் பொருளாதரத்தை கட்டியெழுபுவோம் என்ற தமது நோக்கத்தை இதன்போது அறிவித்தனர். அதனைத் தொடர்ந்து தேசிய மக்கள் சக்தியின் ஜனாதிபதி வேட்பாளர் யார் என்ற அறிவிப்பு தமிழ், சிங்கள மொழிகளில் அறிவிக்கப்பட்டது. இதன்போது தேசிய மக்கள் சக்தியின் ஜனாதிபதி வேட்பாளராக அனுரகுமார திசநாயாக அறிவிக்கப்பட்ட வேளையில் அனுரகுமார திசாநாயக மேடைக்கு வருகைதந்தார். மக்களின் பலத்த கரகோஷத்துடன் மக்களின் உற்சாகமான வரவேற்புடன் தனது தலைமைத்துவத்தை ஏற்றுகொண்ட அவர் தனது பிரதான உரையை நிகழ்த்தினார். “எம்மை நம்பி கைகோர்க்கும் மக்களை ஒருபோதும் ஏமாற்ற மாட்டோம்” என்ற பிரதான அறைகூவலுடன் தனது உரையினை அவர் முடித்துக்கொண்டார்.
இறுதியாக ஜே.வி.பி. யின் பொதுச் செயலாளர் ரில்வின் சில்வா உரையாற்றினார். மக்கள் நம்பும், மக்கள் எதிர்பார்க்கும் மிகச் சிறந்த தலைமைத்துவம் உருவாக்கப்பட்டுள்ளது. இந்த நாட்டின் ஊழல் வாத, குற்றங்கள் நிறைந்த இரண்டு பிரதான கட்சிகளுடன் போராடத் தயாராகிவிட்டோம். இந்த ஊழல் ஆட்சியை வீழ்த்தி தூய்மையான பலமான அரசாங்கம் ஒன்றினை உருவாக்குவோம் என்ற நம்பிக்கை எமக்கு உள்ளது. இதில் மனித நேயம் கொண்ட ஜனநாயக தன்மை நிறைந்த ஆட்சியை எம்மால் உருவாக்கிக்கொடுக்க முடியும். இன மத பேதம் இன்றி அனைத்து மக்களும் எம்முடன் கைகோர்த்து நல்லாட்சியை உருவாக்குவோம் என்றார்.
ஆர்.யசி, இ. ஹஷான்
vidivelli