புரட்சிகர மாற்றத்தை ஏற்படுத்த கொள்கைக்கு அப்பால் செயற்பட வேண்டிய தேவையுள்ளது
பதுளையில் அமைச்சர் சஜித் பிரேமதாச
“புதிய பயணத்தை நாம் அனைவரும் ஒன்றிணைந்து ஆரம்பிப்போம். புதிய இலங்கையை கட்டியெழுப்புவோம். தேசிய பாதுகாப்புக்கு முக்கியத்துவம் வழங்குவோம். இளைய தலைமுறையினரின் திறன்கண்டு தலைமைத்துவத்தைப் பெற்றுக்கொடுத்து நாட்டை முன்னேற்ற வாய்ப்பளிப்பேன். என் தந்தை பிரேமதாச வழியில் நாட்டுக்காக, மக்களுக்காக என் உயிரையும் விடத் தயாராகியிருக்கிறேன். எதிர்வரும் நவம்பர் மாதம் நான் போக வேண்டிய இடத்துக்கு நிச்சயம் செல்வேன். அதை யாராலும் தடுத்து நிறுத்திவிட முடியாது” என அமைச்சர் சஜித் பிரேமதாச தெரிவித்தார்.
அமைச்சர் ஹரீன் பெர்னாண்டோ தலைமையில் பதுளை வீல்ஸ் பார்க் மைதானத்தில் நேற்று முன்தினம் நடைபெற்ற மாபெரும் வரவேற்புக்கூட்டத்தில் உரையாற்றுகையிலேயே அவர் இவ்வாறு குறிப்பிட்டார்.
அமைச்சர் ரவீந்திர சமரவீரவின் வரவேற்புரையோடு ஆரம்பமான இக்கூட்டத்தில் அமைச்சர் சஜித் மேலும் தொடர்ந்து உரையாற்றுகையில்,
“ஆங்கிலேயரைத் தோற்கடித்த இந்த ஊவா மண்ணிலிருந்து எமது புதிய பயணத்தை ஆரம்பிப்பதில் பெருமையடைகிறோம். இப்புதிய பயணத்தில் வருடம் முழுவதும் தேசிய பாதுகாப்புக்கு முக்கியத்துவம் கொடுப்போம். 61 இலட்சம் குடும்பங்களுக்கும் 231 இலட்சம் மக்களுக்கும் தேவையான சக்தியைப் பெற்றுக்கொடுக்க நாம் அர்ப்பணிப்புடன் செயற்படுவோம்.
ஆட்சி அதிகாரம் தற்காலிகமானது. அது பொது மக்களுக்கான சேவைக்கான ஆணையாகும். நாட்டின் எதிர்கால பயணத்தை அடிப்படையாகக் கொண்டு ஆட்சியை கொண்டு செல்லவேண்டும்.
எமது கூட்டணியுடன் இணையுங்கள். நாட்டை வெற்றிபெறச் செய்யுங்கள். மக்கள் எமக்கு அதிகாரம் அளிப்பது சுகபோகம் அனுபவிக்க அல்ல. நாட்டு மக்களைப் பலப்படுத்தி சேவை செய்வதற்காகவேயாகும்.
நாட்டின் பொருளாதாரத்தை முன்னோக்கிக் கொண்டு செல்ல சிறிய மற்றும் நடுத்தர வியாபாரங்களுக்கு முன்னுரிமையளித்து தேசிய பொருளாதாரத்திற்கு முன்னுரிமையளிக்க வேண்டும். சிறிய, நடுத்தர கைத்தொழிலாளர்கள் தான் பொருளாதாரத்தின் சக்திகள். சிறிய நடுத்தர வர்த்தகங்களை வலுப்படுத்தி அனைத்து நாடுகளும் பலம் பெற்றுள்ளன. இவ்வர்த்தகங்களை இலக்கு வைத்து புதிய பொருளாதார பொறிமுறையை உருவாக்க வேண்டும்.
செல்வந்தர்கள் மாத்திரம் வருமானத்தை அனுபவிக்கும் காலத்தை மாற்றியமைப்போம். 231 இலட்சம் மக்களும் அனுபவிக்கும் நாட்டை உருவாக்குவோம். இப்புதிய பயணத்தில் புரட்சிகரமான மாற்றத்தை ஏற்படுத்த கொள்கைக்கு அப்பால் செயற்பட வேண்டிய தேவையுள்ளது. பழைய பொறிமுறைகளை மாற்றி புதிய நாட்டை படைக்க இளைஞர் அபிவிருத்தி செயலணிகள் கிராமங்கள் தோறும் உருவாக்கம் பெறும். கிராமங்கள் ரீதியாக கைத்தொழில் பேட்டைகளும் உருவாகும்.
இளைஞர்களுக்கு தலைமைத்துவத்தைப் பெற்றுக் கொடுத்து நாட்டை முன்னோக்கிச் செல்ல வாய்ப்பளிக்க வேண்டும். இளைய தலைமுறையினருக்கு சகல துறைகளிலும் முன்னுரிமை வழங்க வேணடும். இதன் மூலம் சர்வதேச மதிப்பைப் பெற முடியும். புதிய அரசியல் கொள்கைகள் வரவேற்கப்பட வேண்டும்.
கல்வித் துறையில் புதிய விடயங்கள் உள்வாங்கப்பட்டால் அனைத்துத் துறைகளிலும் முன்னேற்றமடைய முடியும். எழுத்து வீதத்தை வைத்தே ஒரு நாட்டின் முன்னேற்றம் மதிப்பிடப்படும். காலத்திற்கேற்ப கல்வித்துறையில் மாற்றங்கள் ஏற்படுத்தப்படும். பலமான பொருளாதாரத்தின் ஊடாகவே நாட்டை சிறந்த முறையில் கட்டியெழுப்ப முடியும். தேசிய வெற்றிக்கு இலக்கு பலமாக இருக்க வேண்டும்.
நான் வாக்கு மாறுபவன் அல்ல. இன்றொன்று நாளைவேறொன்றோ அல்லது இந்த மாதமோ அடுத்த வருடமோ ஒவ்வொன்றை மாற்றிச் சொல்பவனும் அல்ல. நான் உண்மையைச் சொல்பவன்.
மலையக பெருந்தோட்டத் தொழிலாளர்கள் பெரிய செல்வந்தர்கள் அல்லர். வறுமை நிலையில் இருப்பவர்கள். எனது தந்தையே மலையக மக்களுக்கு ஒன்று நூறல்ல; இலட்சக்கணக்கில் காணி உரிமைகளைப் பெற்றுக் கொடுத்தவர் என்பதையும் இங்கு சொல்லிக் கொள்ள விரும்புகிறேன். மலையக மக்களின் தேவைகளும் உரிமைகளும் நிறைவேற்றப்பட வேண்டும்.
நான் பயந்தாங்கொள்ளி அல்ல. உயிருக்குப் பயப்படுபவனும் அல்லன். எனக்கு 52 வயது. தந்தை வழியில் இன்னுமின்னும் சிறப்புற சேவையாற்றவே விரும்புகிறோம். இந்த நாட்டுக்காக, எனது மக்களுக்காக நான் எனது தந்தையார் வழியில் நட்ட நடுவீதியில் என் உயிரையும் விட்டுவிட எப்போதும் தயாராயிருக்கிறேன். என் உயிரைவிட எனது வாக்கை, மக்களைப் பெரிதாக நினைக்கிறேன்.
புதிய பயணத்தில் எம்மோடு அனைவரும் கைகோருங்கள். புதிய இலங்கையைக் கட்டியெழுப்புவோம். இன, மொழி, மத, குல, பிரதேச, கட்சி, நிற பேதமில்லாமல் அனைவரும் ஒற்றுமைப்பட்டு எமது நாட்டை முன்னேற்றிச் செல்வோம்.
உங்கள் அனைவருக்கும் இனிய வந்தனங்கள். கூடவே இன்று ஹஜ் பெருநாளைக் கொண்டாடும் முஸ்லிம் அன்பர்கள் அனைவருக்கும் எனது அஸ்ஸலாமு அலைக்கும். ஈத் முபாரக்!” என்றார்.
வாஹிட் குத்தூஸ்
vidivelli