செப்டெம்பர் மூன்றாம் வாரத்திலிருந்து ஜனாதிபதி தேர்தலுக்கான ஆயத்தங்கள்
சுயாதீன தேர்தல்கள் ஆணைக்குழு
செப்டெம்பர் மாதம் மூன்றாம் வாரமளவில் ஜனாதிபதித் தேர்தலுக்கு தயாராக வேண்டும். ஆனால் அன்றைய தினம் வரையில் ஜனாதிபதித் தேர்தல் தான் நடத்தப்படும் என்று உறுதியாகக் கூற முடியாது என்று தெரிவித்த சுயாதீன தேர்தல்கள் ஆணைக்குழுவின் தலைவர் மஹிந்த தேசப்பிரிய, சட்டத்திற்கமைய மாகாண சபைத் தேர்தலே நடத்தப்பட வேண்டும் என்றும் குறிப்பிட்டார்.
தேர்தல்கள் ஆணைக்குழுவில் திங்கட்கிழமை இடம்பெற்ற ஊடகவியலாளர் சந்திப்பின் போதே அவர் இதனைத் தெரிவித்தார்.
தொடர்ந்தும் ஊடகவியலாளர்கள் எழுப்பிய கேள்விகளுக்கு பதிலளித்த மஹிந்த தேசப்பிரிய தெரிவித்ததாவது,
சட்டத்திற்கமைய மாகாண சபைத் தேர்தலே முதலில் நடத்தப்பட வேண்டும். மாகாணசபைத் தேர்தலை நடத்துவதற்கு தேர்தல்கள் ஆணைக்குழு தயாராகவே இருக்கிறது. அத்தோடு செப்டெம்பர் மாதம் மூன்றாவது வாரத்திலிருந்து ஜனாதிபதித் தேர்தலுக்கு ஆயத்தமாக முடியும். எனினும் அது வரையில் ஜனாதிபதித் தேர்தல் தான் இடம்பெறும் என்று உறுதியாகக் கூற முடியாது.
எவ்வாறிருப்பினும் எதிர்வரும் ஜனவரி மாதம் 9 ஆம் திகதியிலிருந்து ஜனாதிபதித் தேர்தலை நடத்துவதற்கும் நாம் தயாராகவே இருக்கின்றோம். ஆனால் அதற்கு முன்னதாகவும் ஜனாதிபதி மைத்திரிபால சிறிசேனவால் தேர்தலை நடத்த முடியும்.
இவற்றை விடவும் பாராளுமன்ற தேர்தலை நடத்துவதற்கும் எந்த சந்தர்ப்பத்திலும் நாம் தயாராகவே இருக்கின்றோம். எந்த சந்தர்ப்பத்திலும் பாராளுமன்றத்தைக் கலைத்து பொதுத் தேர்தலுக்குச் செல்ல முடியும். ஆனால் அவ்வாறு இடம்பெறாது என்ற நம்பிக்கை இருக்கிறது. அதனால் தான் ஜனாதிபதித் தேர்தலை நடத்துவதற்கான ஆவணங்களையும் இரண்டு முறைமையிலும் மாகாண சபைத் தேர்தல்களை நடத்துவதற்காக ஆவணங்களையும் தயாரித்துள்ளோம்.
கேள்வி : பொதுஜன பெரமுனவின் தலைமைத்துவத்தை எதிர்க்கட்சி தலைவர் மஹிந்த ராஜபக் ஷ ஏற்றுக் கொண்டுள்ளார். ஆனால் அவர் ஐக்கிய மக்கள் சுதந்திர கூட்டமைப்பினூடாகவே பாராளுமன்றத்திற்கு தெரிவாகியுள்ளார். இதனால் அவருடைய பாராளுமன்ற உறுப்புரிமை கேள்விக்குறியாகுமா?
பதில் : அது தேர்தல்கள் ஆணைக்குழுவுடன் தொடர்புடைய விடயமல்ல. அரசியல் கட்சிகளுக்குரிய விடயமாகும். எமக்கு இது குறித்து உத்தியோகபூர்வமாக எதுவும் அறிவிக்கப்பட்டால் நாம் பாராளுமன்றத்திற்கு அறிவிப்போம். பாராளுமன்றத்தால் நடவடிக்கைகள் எடுக்கப்படும். தற்போது கட்சிகளுக்கிடையில் காணப்படும் உள்ளக ஒழுக்க பிரச்சினைகளில் தேர்தல்கள் ஆணைக்குழு தலையிடாது.
கேள்வி : 18 வயது பூர்த்தியான இளைஞர், யுவதிகளுக்கு வாக்குரிமை வழங்கப்பட வேண்டும் என்று வலியுறுத்தப்பட்டு வருகின்றது. அது குறித்து தேர்தல்கள் ஆணைக்குழு முன்னெடுத்துள்ள நடவடிக்கைகள் என்ன?
பதில் : வாக்காளர் பட்டியல் திருத்த சட்டமூலம் பாராளுமன்றத்தில் நிறைவேற்றப்பட்டால், அதனூடாக 18 வயதுடையவர்களுக்கு எம்மால் வாக்குரிமையை வழங்க முடியும். அதனை வலியுறுத்த வேண்டியது பாராளுமன்றத்தைப் பிரதிநிதித்துவப்படுத்தும் அரசியல் கட்சிகளிடமேயன்றி தேர்தல்கள் ஆணைக்குழுவிடம் அல்ல.
vidivelli