மக்காவின் புனித இடங்களில் அதிக வெப்பநிலை நிலவுவதால் வெப்பத்தை தணிக்கும் ஒரு செயற்றிட்டத்தை செயற்படுத்த புனித நகரங்களின் நடைபாதைப் பரப்புக்களில் பல்வேறு செயற்பாடுகள் முன்னெடுக்கப்பட்டுள்ளன.
அதன் முதற்கட்டமாக மினாவிலிருந்து ஜமாரத் நோக்கிச் செல்லும் பகுதியில் சுமார் 3,500 சதுர அடிப்பரப்பில் வெப்பத்தை நிலத்தோடு உள்வாங்கக்கூடிய தொழில்நுட்ப முறையில் வெப்பம் குறைக்கப்பட்டுள்ளது.
ஜப்பானிய நிறுவனமான ஸுமிடோமோ கூட்டமைப்பின் அனுசரணையின் கீழ் இந்த செயற்றிட்டம் வெற்றிகரமாக செய்து முடிக்கப்பட்டதாக புனித தலங்களின் பணிப்பாளர் நாயகம் அஹமத் மன்ஷி தெரிவித்தார்.
“இந்த செயற்றிட்டம் ஷய்பென் நடைப் பிரதேசத்தின் வெப்பநிலையை குறைப்பதை நோக்கமாகக் கொண்டதாகும். இது ஜமாரத்துடைய வசதிவாய்ப்புக்களை மேம்படுத்த வாய்ப்பாக அமைவதுடன் புனித பகுதிகளின் ஏனைய நடைபகுதிகளின் வசதி வாய்ப்புகளையும் இது மேம்படுத்தும்.” என அவர் தெரிவித்தார்.
இந்த செயற்றிட்டத்தின் மூலம் 15 – 20 டிகிரி செல்சியஸ் வரையான வெப்பநிலையயை குறைக்கலாம். இந்த காலத்தில் ஒவ்வொரு 10 செக்கனுக்கும் சென்சர்கள் மூலம் வெப்பநிலையை அளவிட்டு பதிவிடும் தொழில்நுட்பம் நிலத்துக்கு கீழ் பொருத்தப்பட்டுள்ளது என மன்ஷி தெரிவித்தார்.
இந்த ஹஜ் காலத்தில் வெப்பநிலையை சரியான முறையில் அளவிட்டு யாத்திரிகர்களை பாதுகாக்கும் வழிமுறைகளை பிரயோகிப்பதே இந்த செயற்றிட்டத்தின் வெற்றியாகும் என அவர் தெரிவித்தார்.
நாங்கள் இரண்டு புனித பள்ளிவாசல்களின் பாதுகாப்பு தொடர்பாகவும் ஹஜ் உம்ரா கற்கைகள் தொடர்பான ஆய்வுகளில் பரிசோதனைகளை மேற்கொண்டு ஏனைய பிரதேசங்களிலும் இதன் சாத்தியம் குறித்த ஆய்வுகளை மேற்கொள்கிறோம். இதன் மூலம் யாத்திரிகர்களுக்கு உயர்ந்த சேவைகளை வழங்குவதே நோக்கமாகும்.
தற்போது புனித மலைத்தொடரான ஜபல் அல் ரஹ்மா, மினா மற்றும் முஸ்தலிபா ஆகிய இடங்களில் இந்த செயற்றிட்டம் நிறைவு செய்யப்பட்டுள்ளது. புனித நகரங்களில் யாத்திரிகர்களின் உயர்ந்தபட்ச வசதி மற்றும் பாதுகாப்பு என்பவற்றை உறுதிப்படுத்தும் நோக்கில் இந்த செயற்றிட்டம் அமுல்படுத்தப்பட்டுள்ளது.
மேலும் யாத்திரிகர்களின் நடைப்பாதையில் இன்டர்லொகிங் டைல்ஸ் பொருத்தப்பட்டுள்ளதுடன் பாதையின் இருமருங்கிலும் யாத்திரிகர்கள் ஓய்வெடுப்பதற்காக வேண்டி இருக்கைகளும் பெருத்தப்பட்டுள்ளன.
யாத்திரிகர்களை சூரிய வெப்பத்தில் இருந்து பாதுகாப்பதற்காக நிழலைப் பெற்றுக்கொள்ளும் நடவடிக்கைகளும் முன்னெடுக்கப்பட்டுள்ளன. மேலும் நடைபாதைகளில் வாகனங்கள் உட்செல்லாமல் இருக்க ஆங்காங்கே கொங்ரீட் தடைகள் பொருத்தப்பட்டுள்ளன. அத்துடன் நடைபாதையை ஒளியூட்டுவதற்காக வேண்டி உயர்ந்தபட்ச போல்ஸ் தொழில்நுட்பமும் சாதாரண மின் விளக்குகளுக்கு மாற்றமாக எல்.ஈ.டி. மின்குமிழ்களும் பொருத்தப்பட்டுள்ளன.
எம்.ஏ.எம். அஹ்ஸன்
vidivelli