மாணவிகள் ஹிஜாப் அணிந்து பரீட்சை எழுத இடையூறுகள் ஏற்படுத்தப்படுகின்றன
உயர் கல்வி அமைச்சர் தலையிட வேண்டும் என்கிறார் முஜிபுர் ரஹ்மான்
ஹிஜாப் அணிந்து உயர்தரப் பரீட்சைக்குத் தோற்றிய முஸ்லிம் மாணவிகளுக்கு சில பரீட்சை நிலையங்களில் அதிகாரிகளினால் இடையூறுகள் ஏற்படுத்தப்பட்டிருக்கின்றன. இது தொடர்பாக உயர்கல்வி அமைச்சர் உடனடியாகத் தலையிட்டு நடவடிக்கை எடுக்கவேண்டும் என ஐக்கிய தேசிய கட்சி உறுப்பினர் முஜிபுர் ரஹ்மான் தெரிவித்தார்.
பாராளுமன்றத்தில் நேற்று புதன்கிழமை இடம்பெற்ற ஹிஸ்புல்லாவின் ‘மட்டக்களப்பு கெம்பஸ்’ தொடர்பான சபை ஒத்திவைப்பு வேளை விவாதத்தில் கலந்துகொண்டு உரையாற்றுகையிலேயே இவ்வாறு குறிப்பிட்டார்.
அவர் அங்கு தொடர்ந்து தெரிவிக்கையில், உயர்தரப்பரீட்சை எழுதுவதற்காக ஹிஜாப் அணிந்து சென்ற முஸ்லிம் மாணவிகளுக்கு சில பரீட்சை மத்திய நிலையங்களில் அதிகாரிகளினால் இடையூறுகள் ஏற்படுத்தப்பட்டிருக்கின்றன. இந்தப் பிரச்சினையினால் பல மாணவிகள் உறுதியான மனோநிலையில் பரீட்சைக்குத் தோற்றமுடியாத நிலை ஏற்பட்டிருக்கின்றது.
பரீட்சைகள் திணைக்களம் ஹிஜாப் அணிந்து பரீட்சை எழுதுவதற்கு அனுமதி வழங்கியுள்ளபோதும் அதிகாரிகளே அதனை மீறி செயற்பட்டுள்ளனர். குறித்த அதிகாரிகளுக்கு எதிராக உயர் கல்வியமைச்சர் நடவடிக்கை எடுக்கவேண்டும். அத்துடன் முஸ்லிம் மாணவிகளின் கல்வி உரிமை பாதுகாக்கப்பட வேண்டும். அவர்கள் சுதந்திரமாகப் பரீட்சை எழுத அனுமதிக்கப்பட வேண்டும் என்றார்.
இதன்போது எழுந்த அத்துரலிய ரதன தேரர் எம்.பி.,
அந்த முஸ்லிம் மாணவிகள் தமது காதுகள் தெரியும் வண்ணம் ஹிஜாப் அணிந்தா சென்றார்கள் எனக்கேட்டார்.
அதற்கு முஜிபுர் ரஹ்மான் எம்.பி. பதிலளிக்கையில், ஆம். அவர்கள் தமது தேசிய அடையாள அட்டையில் உள்ளவாறு காதுகள் தெரியும் வகையிலேயே ஹிஜாப் அணிந்து சென்றார்கள். சில இடங்களில் இருந்த பரீட்சை அதிகாரிகள் தான் இவ்வாறு ஹிஜாப் அணிந்து சென்ற முஸ்லிம் மாணவிகளுக்கு பரீட்சை எழுதுவதில் இடையூறுகளை ஏற்படுத்தியுள்ளனர். எனவே இப்பிரச்சினையில் உயர் கல்வி அமைச்சர் உடனடியாக தலையிட்டு நடவடிக்கை எடுக்க வேண்டும் என்றார்.
ஆர்.யசி, எம்.ஆர்.எம்.வஸீம்
vidivelli
இத போய் பாராளுமன்றத்துல நேத்து பேசி என்ன செய்ய? இந்த மேட்டரை முன்நாள் ஆளுநர் ஆசாத் சாலி இது நடந்த அன்னிக்கே ரானுவ தளபதியுடன் பேசி தீர்த்துப்புட்டாரே.