மீரிகம, பல்லேவெல பொலிஸ் பிரிவுக்குட்பட்ட பாதுராகொட பிரதேசத்தில் சட்டவிரோத மதுபானம் (கசிப்பு) உற்பத்தி செய்து விற்பனை செய்யும் வீடொன்றில் கசிப்பு அருந்திய 13 பேர் உயிரிழந்துள்ளார். இவர்களில் மேலும் 20 பேர் ஆபத்தான நிலையில் வைத்தியசாலைகளில் சிகிச்சை பெற்றுவருகின்றனர்.
சில தினங்களுக்கு முன் அப்பிரதேசத்தில் சட்டவிரோத மதுபானம் அருந்தியவர்கள் வாந்தி, வயிற்றுவலி, கண் எரிச்சல், கண்பார்வை தெரியாமை போன்ற உபாதைகளுக்கு உட்பட்டு பிரதேச வைத்தியசாலைகளில் அனுமதிக்கப்பட்டனர். அவர்களில் நேற்றுவரை 13 பேர் உயிரிழந்துள்ளதாக தகவல்கள் தெரிவிக்கின்றன.
சட்டவிரோத மதுபானம் (கசிப்பு) உற்பத்தி செய்யப்பட்ட வீட்டை வாடகைக்கு வழங்கியிருந்த உரிமையாளரை அத்தனகல நீதிவான் நீதிமன்ற நீதிவான் தரங்கா ராஜபக் ஷ இன்றுவரை விளக்கமறியலில் வைப்பதற்கு உத்தரவிட்டுள்ளார். கசிப்பு விற்பனை செய்த இருவரும் விளக்கமறியலில் வைக்கப்பட்டுள்ளனர்.
கசிப்பு என்பது ஆரம்ப காலத்தில் சீனி மற்றும் ஈஸ்ட் என்பனவற்றைக் கலந்து அதிலிருந்து உற்பத்தி செய்யப்பட்டது. பின்பு கசிப்பு உற்பத்திச் செலவினைக் குறைக்கும் முகமாக ஈஸ்ட்க்குப் பதில் யூரியா உபயோகப்படுத்தப்பட்டது. மேலும் இதனுடன் முள்ளுக்கம்பியும் சேர்க்கப்பட்டது. இந்த உற்பத்தியின் பாதகத் தன்மைகளை இன்னும் நுகர்வோர் சரிவரப் புரிந்துகொள்ளவில்லை. கசிப்பினை அருந்துவதால் ஏற்படும் விபரீதங்களையும் உயிராபத்துகளையும் மக்களுக்குத் தெளிவுபடுத்த வேண்டும். கிராமங்களில் பல்வேறு துறைகளைச் சேர்ந்த அதிகாரிகள் பணிபுரிகிறார்கள். பிரதேசங்களுக்குப் பொறுப்பாக பொலிஸ் நிலையங்கள் இருக்கின்றன. இவர்கள் சட்டவிரோத மதுபான உற்பத்தியாளர்களுக்கு எதிராக நடவடிக்கை எடுப்பதாகத் தெரியவில்லை. இவ்வாறான உற்பத்தியாளர்களிடம் இலஞ்சம் பெற்றுக்கொண்டு நடவடிக்கைகளுக்கு ஆப்பு வைத்திருக்கிறார்கள்.
கசிப்பு விலையிலும் குறைவானது. கிராமங்கள் தோறும் உற்பத்தி செய்யப்படுகிறது. கடனுக்கும் வழங்கப்படுகிறது. கசிப்புக்கு அடிமையானவர்கள் அதிலிருந்தும் மீள முடியாதவர்களாக இருக்கிறார்கள். அவர்கள் தமது உடைமைகளைக்கூட விற்று கசிப்பு அருந்த தயார் நிலையில் இருக்கிறார்கள். இவ்வாறான நிலையில் கசிப்பு விற்பனை யாளர்கள் தங்களது பைகளை நிரப்பிக்கொள்கிறார்கள். நுகர்வோரின் ஆயுட்காலம் குறைவடைகிறது. அதனால் அவர்களது குடும்பங்கள் நிர்க்கதியாகின்றன.
சில மாதங்களுக்கு முன்பு ஜனாதிபதி மைத்திரிபால சிறிசேன இந்நாட்டிலிருந்து முற்றும் முழுதாக கசிப்பை துடைத்தெறிவதாகக் கூறியிருந்தார். போதையற்ற நாட்டை உருவாக்குவதாகவும் தெரிவித்திருந்தார்.
ஜனாதிபதி எத்தனை முயற்சிகள் மேற்கொண்டாலும் சம்பந்தப்பட்ட அரச அதிகாரிகள் மற்றும் பாதுகாப்பு அதிகாரிகளின் ஒத்துழைப்பு இன்றி அவரது இலட்சியம் நிறைவேறாது.
கசிப்பு அரக்கனினால் 13 உயிர்கள் பலியெடுக்கப்பட்ட பின்பு பொலிஸ் திணைக்களம் சில இடமாற்றங்களைச் செய்துள்ளது. அத்தனகலை பதில் உதவிப் பொலிஸ் அத்தியட்சகர் துசித குமார மன்னார் பொலிஸ் பிரிவிற்கு இடமாற்றம் செய்யப்பட்டுள்ளார். பல்லேவெல பொலிஸ் நிலைய பொறுப்பதிகாரி கமல் ரத்நாயக்க களுத்துறை பொலிஸ் பிரிவிற்கு உடனடி இடமாற்றம் செய்யப்பட்டுள்ளார். மேலும் 5 பொலிஸ் உத்தியோகத்தர்கள் இடமாற்றம் செய்யப்பட்டுள்ளனர்.
குறிப்பிட்ட சட்டவிரோத கசிப்பு உற்பத்தி நிலையத்துக்கு எதிராக உரிய சட்டநடவடிக்கை எடுக்கப்படாமையே இந்த இடமாற்றத்துக்குக் காரணமாகும். பொலிஸார் கசிப்பு உற்பத்தியாளர்களிடமிருந்து இலஞ்சம் பெற்றுக்கொண்டு கண்மூடி மௌனம் காப்பதாக தகவல்கள் தெரிவிக்கின்றன.
கசிப்பு அருந்தியவர்களே இவ்வாறு உயிரிழந்துள்ளதால் அவர்களது இறப்புக்கான காரணத்தைக் கண்டறிய இறந்தவர்களது உடல் உள்ளுறுப்பு பாகங்கள் இரசாயன பகுப்பாய்வுக்கு அனுப்பப்பட்டுள்ளதாகவும் தெரிவிக்கப்பட்டுள்ளது.
பாதுராகொடையின் கசிப்பு உற்பத்தி அப்பிரதேசத்தை சூழவுள்ள பல குடும்பங்களுக்கு உயிரிழப்புகளை ஏற்படுத்தியிருக்கின்றது. தொடர்ந்தும் 20 பேர் ஆபத்தான நிலையில் வைத்தியசாலைகளில் சிகிச்சைக்கு உட்படுத்தப்பட்டுள்ளனர்.
போதைப்பொருளுக்கு எதிராக போர்க்கொடி ஏந்தியுள்ள ஜனாதிபதி மைத்திரிபால சிறிசேன ஏன் மக்கள் கசிப்புக்கு உந்தப்படுகிறார்கள் என்பதைக் கண்டறிந்து அதற்குரிய நடவடிக்கை எடுக்கவேண்டும். சட்டவிரோத மதுபான உற்பத்தியாளர்களுக்கு எதிராக சட்டநடவடிக்கை எடுக்கத்தவறும் பொலிஸார் தண்டிக்கப்பட வேண்டும். அவர்களை இடமாற்றுவதால் மாத்திரம் கசிப்பு பிரச்சினைக்குத் தீர்வுகாண முடியாது என்பதை வலியுறுத்துகிறோம்.
vidivelli