கம்பஹா மாவட்டத்தில் கிரிந்திவெல மத்திய கல்லூரி பரீட்சை நிலையத்தில் க.பொ.த உயர் தர பரீட்சைக்குத் தோற்றிய முஸ்லிம் மாணவிகளை பர்தாவைக் கழற்றிவிட்டு பரீட்சை எழுத நிர்ப்பந்திக்கப்பட்ட சம்பவம் ஒன்று பதிவாகியுள்ளது. அத்துடன் நிட்டம்புவ மற்றும் வெலிமடை போன்ற பகுதிகளிலும் இவ்வாறான சம்பவங்கள் இடம்பெற்றுள்ளதாக முறைப்பாடுகள் முன்வைக்கப்பட்டுள்ளன.
கிரிந்திவெல மத்திய கல்லூரி பரீட்சை நிலையத்தில் இடம்பெற்ற சம்பவம் தொடர்பில் மேலும் தெரிய வருவதாவது,
நேற்று ஆரம்பமான க.பொ.த. உயர்தர பரீட்சையில் இஸ்லாம் பகுதி I இற்கான பரீட்சைக்கு தோற்றவந்த பூகொட குமாரிமுல்லை முஸ்லிம் மகா வித்தியாலயத்தின் நான்கு மாணவிகள் பர்தா அணிந்து பரீட்சைக்குத் தோற்ற மேற்பார்வையாளர்கள் தடை விதித்துள்ளனர்.
நேற்றுக் காலை 8.00 மணியளவில் இஸ்லாம் பாடத்திற்கான பகுதி I வினாத்தாள் விநியோகிக்கப்பட்ட போது, குறித்த மாணவிகளிடம் பர்தாவை அகற்றினாலே வினாத்தாள் வழங்கப்படும் என்று பரீட்சை நிலையப் பொறுப்பதிகாரி தெரிவித்துள்ளார். இவ்வாறு கட்டளையிட்டதனால் தாம் பர்தாவைக் கழற்றிவிட்டு பரீட்சைக்குத் தோற்ற வேண்டி ஏற்பட்டதாக மாணவிகள் குறிப்பிட்டனர்.
இதனையடுத்து பரீட்சையை எழுதிக் கொண்டிருந்த வேளையில் இம்மாணவிகளுக்கு பெற்றோர் சால்வைகளைக் (ஷோல்) கொண்டு வந்து கொடுத்துள்ளனர். இதனை அணிந்தே மாணவிகள் பரீட்சைக்குத் தோற்றியுள்ளனர்.
இது தொடர்பில் பூகொட குமாரி முல்லை முஸ்லிம் மகா வித்தியாலய அதிபர் எம்.ஆர்.மொஹம்மதிடம் வினவியபோது, இச்சம்பவம் தொடர்பாக வலயக் கல்விப் பணிப்பாளரிடமும் கம்பஹா கல்விப் பணிப்பாளரிடமும் முறையிட்டதாகவும் பரீட்சை நிலையப் பொறுப்பதிகாரியிடமும் கேட்டறிந்து கொண்டதாகவும் குறிப்பிட்டார்.
பூகொட நிருபர்
விடிவெள்ளி