கல்முனை தமிழ் செயலகம் தரமுயர்வு சாய்ந்தமருதுக்கும் உள்ளூராட்சி சபை
சாய்ந்தமருதுக்கும் தனியான உள்ளூராட்சி மன்றம் ; ஹக்கீம் உறுதி
கல்முனை வடக்கு தமிழ் உப பிரதேச செயலகம் தரமுயர்த்தப்படுகின்ற அதேவேளை சாய்ந்தமருதுக்கான தனி உள்ளூராட்சி சபையும் உருவாக்கித் தரப்படும் என ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீம் உறுதியளித்துள்ளார்.
சாய்ந்தமருது பெரிய பள்ளிவாசல், கல்முனை மாநகர சபையின் சாய்ந்தமருது தோடம்பழ சுயேட்சைக்குழு, முஸ்லிம் காங்கிரஸின் சாய்ந்தமருது மத்திய குழு ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீம் தெரிவித்தார்.
சாய்ந்தமருதுக்கு தனியான உள்ளூராட்சி மன்றம் வழங்குவது தொடர்பில், சாய்ந்தமருது சுயேச்சைக்குழு உறுப்பினர்கள் மற்றும் கட்சி பிரதிநிதிகளுடனான பரஸ்பர சந்திப்பு நேற்றைய தினம் ரவூப் ஹக்கீமின் இல்லத்தில் நடைபெற்றது.
இச்சந்திப்பில் பாராளுமன்ற உறுப்பினர் எச்.எம்.எம். ஹரீஸ், கல்முனை மாநகர சபையின் சுயேச்சைக்குழு உறுப்பினர்கள், சாய்ந்தமருது ஜும்ஆ பள்ளிவாசல் தலைவர் வை.எம். ஹனீபா, சட்டம் ஒழுங்கு அமைச்சின் மேலதிக செயலாளர் ஏ.எல்.எம். சலீம் மற்றும் மு.கா. சாய்ந்தமருது பிரதிநிதிகளான யஹ்யாகான், அப்துல் பஷீர், ஏ.எல்.எம். புர்கான், அலியார் நஸார்தீன், மன்சூர் பாமி, எம். முபாரக் ஆகியோர் கலந்துகொண்டனர்.
இங்கு கருத்து தெரிவித்த ரவூப் ஹக்கீம் மேலும் கூறியதாவது;
கல்முனையை நான்காக பிரித்து சாய்ந்தமருதுக்கு சபை வழங்கும் தீர்மானம் இருக்கத்தக்க நிலையில், தற்போது கல்முனை வடக்கு பிரதேச செயலக பிரச்சினை பூதாகரமாகியுள்ளது. பேரினவாத சக்திகளுடன் இணைந்து இப்பிரச்சினை தேசிய பிரச்சினையாக உருமாற்றம் பெற்றுள்ளது. மக்கள் செல்வாக்கை இழந்துள்ள தமிழ் அரசியல்வாதிகள் சிலர் இப்பிரச்சினையில் அரசியல் இலாபம் தேட முனைகின்றனர்.
அரசாங்கத்துக்கு எதிராக கொண்டுவரப்பட்ட நம்பிக்கையில்லா பிரேரணையை சாதகமாகப் பயன்படுத்தி, கல்முனை வடக்கு பிரதேச செயலகத்துக்கு கணக்காளரை நியமிப்பதற்கான முஸ்தீபு மேற்கொள்ளப்பட்டது. அந்த சமயத்தில் அரசாங்கம் தோற்றுப்போகக்கூடாது என்ற சூழ்நிலை காணப்பட்டது. நம்பிக்கையில்லா பிரேரணை நிறைவேறுவது அரசாங்கத்துக்கு மாத்திரமல்ல எங்களுக்கும் பிரச்சினைதான்.
நாங்கள் தமிழ்த் தேசியக் கூட்டமைப்பின் தலைமையுடன் பேசித்தான் இதற்கு நிரந்தர தீர்வு காணவேண்டும். கல்முனை விடயத்தில் தமிழ்த்தரப்பு எவ்வளவு தூரம் விட்டுக்கொடுப்பு செய்வார்கள் என்பதுதான் இதிலுள்ள பிரச்சினை. முஸ்லிம் தரப்பில் விட்டுக்கொடுப்பு செய்தாலும் அதற்கும் சில எல்லைகள் இருக்கின்றன. இந்த சந்தர்ப்பத்தில் எந்த தரப்புக்கும் பாதிப்பில்லாமல் தீர்வை பெற்றுத்தர வேண்டிய தார்மீகப் பொறுப்பு பிரதமருக்கு இருக்கின்றது. முன்னைய ஆட்சியின்போதே கல்முனை பிரச்சினையை தீர்த்திருக்கலாம் என்று சிலர் கூறுகின்றனர். ஆனால், கல்முனையில் வாழும் தமிழ், முஸ்லிம் மக்களின் இணக்கப்பாடின்றி சர்வாதிகார ரீதியில் இதற்கு தீர்வுகாண முடியாது. இந்த சூழ்நிலையில் எங்களை கைவிட்டு விடவேண்டாமென மருதமுனை மக்களும் நற்பிட்டிமுனை மக்களும் இப்போது கூறத் தொடங்கியுள்ளனர். ஏக காலத்திலேயே இவை எல்லாவற்றும் தீர்வுகாணப்பட வேண்டும்.
தமிழ்த் தேசியக் கூட்டமைப்புடன் ஓர் இணக்கப்பாட்டுக்கு வந்து, கல்முனையிலுள்ள நிர்வாக ரீதியான பிரச்சினைகள் அனைத்தும் விரைவில் தீர்க்கப்படும். கல்முனையை ஏக காலத்தில் நான்காகப் பிரித்து, எல்லாப் பிரச்சினைகளுக்கும் தீர்வுவரும் நேரத்தில் சாய்ந்தமருதுக்கும் தனியான உள்ளூராட்சி மன்றம் வழங்கப்படும் என்றார்.
அஸ்லம் எஸ்.மௌலானா
vidivelli