ஜமாஅத்தே இஸ்லாமி, ஸலாமா அமைப்புகளை தீவிரவாத அமைப்பென முஸம்மில் கூறியது தவறு

முஸ்லிம்களை பாதுகாப்பற்ற நிலைக்கு தள்ளாதீர் என்கிறார் ம.வி.மு. உறுப்பினர் சகீப்

By vidivelli On Jul 23, 2019

அஸாத் ஸாலி, ஹிஸ்புல்லா, முஸம்மில் உள்ளிட்ட அரசியல்வாதிகளும் அப்துல் ராஸிக் போன்றவர்களும் ஊடகங்களுக்குப் பல கருத்துக்களை கூறி நாட்டு மக்களை உசுப்பேற்றிக் கொண்டிருக்கின்றனர். இவர்கள் பிரச்சினையை தடுப்பதற்குப் பதிலாக இதனை மேலும் வளர்ப்பதற்கான வேலைகளையே செய்தனர். இஸ்லாமிய நிறுவனங்கள் பற்றி விமல் வீரவங்சவின் கட்சிக்காரரான முஸம்மில் குறிப்பிட்டிருந்த கருத்து மிகவும் கண்டிக்கத்தக்கது. ஜமாஅத்தே இஸ்லாமி மற்றும் ஸலாமா போன்ற அமைப்பை அவர் தீவிரவாத அமைப்புகள் என குறிப்பிட்டிருந்த கருத்து தவறானதாகும் என பாத்தஹேவாஹெட்ட பிரதேச சபை மக்கள் விடுதலை முன்னணியின் உறுப்பினரும் சோசலிச இளைஞர் சங்கத்தின் முக்கியஸ்தருமான சகீப் சாம் நிஜாம் தெரிவித்தார்.

சோசலிச இளைஞர் சங்கத்தின் சகோதரத்துவ தினத்தை முன்னிட்டு “இன்னுமொரு கறுப்பு ஜூலை வேண்டாம்” எனும் தலைப்பில் நடத்தப்படும் நிகழ்ச்சித்திட்டம் குறித்து பத்தரமுல்லையிலுள்ள மக்கள் விடுதலை முன்னணியின் தலைமையகத்தில் நேற்றுமுன்தினம் இடம்பெற்ற ஊடகவியலாளர் சந்திப்பில் கலந்துகொண்டு உரையாற்றும்போதே அவர் இவ்வாறு தெரிவித்தார்.
மேலும் கருத்து தெரிவித்த அவர், “நாட்டையே உலுக்கிய கோர சம்பவமான கறுப்பு ஜூலை சுமார் 36 வருடங்களுக்கு முன் அதாவது, 1983 ஜூலை மாதம் 23ஆம் திகதி கட்டவிழ்க்கப்பட்டது. அதனை தொடர்ந்து நாடு முழுவதும் இனவாத வன்முறைகள் பல நாட்கள் நீடித்ததுடன் பல்லாயிரம் உயிர்களும் கோடிக்கணக்கான உடைமைகளும் சேதமாக்கப்பட்டன. அது மட்டுமில்லாமல் 30 வருட ஆயுதப் போராட்டத்திற்கு நாட்டை இட்டுச் சென்றதும், ஆயிரக்கணக்கான விதவைகள், அனாதைகள் உருவானதும், நாட்டை பின்னடையச் செய்ததும் இந்த கறுப்பு ஜூலை சம்பவமே.”

நாடறிந்த துரதிஷ்டவசமான இந்தக் கொடூர வரலாற்றை நினைவு கூருவது மட்டுமன்றி மீண்டும் எமது நாட்டில் ஒரு கறுப்பு ஜூலை ஏற்பட வழிவகுக்காது தடுப்பதற்கே சோசலிச இளைஞர் சங்கம் பல வேலைத்திட்டங்களை மேற்கொண்டு வருகிறது. எமது நாட்டில் இனங்களுக்கிடையே நிலவும் பிளவுகளை யுத்தத்தால் தீர்க்க முடியாது என நம்பும் நாம், யுத்த காலத்திலிருந்தே பல நல்லிணக்க நடவடிக்கைகளை மேற்கொண்டு வருகின்றோம்.

தமிழ், முஸ்லிம், சிங்கள இளைஞர்களுக்கு இடையிலான சகோதரத்துவமும் விட்டுக்கொடுப்பும் மாத்திரமே இன்னுமொரு கறுப்பு ஜூலை அரங்கேறாது தடுக்க முடியுமென நம்பும் கோஷலிச இளைஞர் சங்கம், ஜூலை 23ஆம் திகதியை (இன்றைய தினத்தை) சகோதரத்துவ தினமாக அறிமுகப்படுத்தி 2008 முதல் தொடர்ச்சியாகப் பல திட்டங்களை அனைத்தின இளைஞர்களையும் இணைத்துக்கொண்டு முன்னடுத்து வந்துள்ளது.

அதன் தொடர்ச்சியாக இவ்வருடமும் கறுப்பு ஜூலையை அனுஷ்டிக்கும் சகோதரத்துவ தின நிகழ்வு ஏற்பாடு செய்யப்பட்டுள்ளது. விசேடமாக கடந்த ஏப்ரல் 21ஆம் திகதி நடைபெற்ற உயிர்த்த ஞாயிறு தாக்குதலின் பின்னர் மேலும் பல கசப்பான அனுபவங்களுடன் இவ்வருட சகோதரத்துவ தினம் நடைபெறவுள்ளது.

சோசலிச இளைஞர் சங்கம் 1983 ஜூலை 23 உட்பட 2019– 4 – 21 மற்றும் 2019 – 5 – 13 வரையும் நடைபெற்ற அனைத்து இனவாத வன்முறைகளையும் வன்மையாகக் கண்டிக்கிறது. இனவாத வன்முறைகள் தமிழ், முஸ்லிம், சிங்கள எந்த சார்பினர் செய்தாலும் கண்டிக்கப்பட வேண்டுமென்பதே எமது சங்கத்தின் நிலைப்பாடாகும். எனவே இவ்வருட சகோதரத்துவ தினமானது இனவாத வன்முறைகளை தடுப்பதற்காகவும் சகோதரத்துவத்தை கட்டியெழுப்புவதற்காகவும் அனைத்தின சகோதரர்களையும் ஒன்றிணைத்த நிகழ்வாக அமைகின்றது. சுருக்கமாகக் கூறுவதெனில் ஆட்சியாளர்கள் கட்டவிழ்த்து விட்ட கறுப்பு ஜூலைக்கு சகோதரத்துவத்தை கொண்டு நிறமூட்டுவதே எமது இலக்காகும். அதாவது இன, மத பேதமின்றி இளைஞர்கள், யுவதிகள், சிறுவர்கள், கலைஞர்கள் மற்றும் சிவில் அமைப்புகளை அணி திரட்டி சகோதரத்துவத்தை வலுப்படுத்துவது எமது திட்டமாக அமைந்துள்ளது.

உயிர்த்த ஞாயிறு தாக்குதலின் பின்னர் முஸ்லிம் – சிங்களவர் மற்றும் தமிழ் – முஸ்லிம்கள் மத்தியில் எழுந்துள்ள சந்தேகங்களையும் பதற்ற நிலையையும் ஒழிப்பதற்கான முயற்சியாக சோஷலிச இளைஞர் சங்கம் ஜூலை 1 முதல் இன்றுவரை நாடு முழுவதும் பல கிராமங்களில் வீடு வீடாகச் சென்று உரையாடும் வேலைத்திட்டமொன்றையும் வெற்றிகரமாக முன்னெடுத்தது. கடந்த வருடம் திகன தாக்குதலின் பின்பும் கிராம மட்டத்தில் மூவின இளைஞர்களும் உள்ளடக்கிய பாதுகாப்பு குழுக்களை நியமித்து பல கலந்துரையாடல்கள், பாதுகாப்புத் திட்டங்களை முன்னெடுத்தோம். எனவே பல வன்செயல்கள் தடுக்கப்பட்டதாக நாம் நம்புகிறோம்.

துரதிஷ்டவசமாக குறுகிய அரசியல் இலாபத்திற்காக சில தீய சக்திகள் மூலம் இனவாத கருத்துக்கள் இளைஞர்கள் மத்தியில் பிரசாரம் செய்யப்படுவதுடன், இனவாத செயல்களுக்கு அவர்களைத் தூண்டிவிடுகின்றது. சில மதத் தலைவர்களும் ஊடகங்களும் இதில் பாரிய பங்கு வகிக்கின்றன. உயிர்த்த ஞாயிறு தீவிரவாத தாக்குதலின்பின் நாட்டில் நிலவிய பதற்றமான அசாதாரண சூழ்நிலைக்கு அஸாத் ஸாலி, ஹிஸ்புல்லாஹ், முஸம்மில், அப்துர் ராஸிக் போன்றவர்கள் ஊடகங்களுக்கு வழங்கிய கருத்துக்களும் காரணங்களாக அமைந்திருக்கின்றன. அவர்கள் நாட்டுமக்களை உசுப்பேற்றுவதற்காகவே கருத்துக்களை முன்வைக்கின்றனர். இதனால் பிரச்சினை தணிவதற்குப் பதிலாக வளர்கின்றன.

தேசிய சுதந்திர முன்னணி உறுப்பினர் முஸம்மில் இஸ்லாமிய நிறுவனங்களின் பெயர்களை குறிப்பிட்டு அவர்களை தீவிரவாத இயக்கங்களாக பட்டியலிடுகின்றார். ஜமாஅத்தே இஸ்லாமி, ஸலாமா போன்ற அமைப்புகளையும் தீவிரவாத அமைப்புகளாக சித்திரித்திருக்கிறார். இது ஒரு பொய்ப்பிரசாரமாகும். அத்துடன் இக்கருத்துக்கள் மிகவும் தவறானதாகும். அவரின் இவ்வாறான தான்தோன்றித்தனமான கருத்துக்களை நாம் வன்மையாகக் கண்டிக்கிறோம்.

இவர்கள் போன்ற போலித் தலைமைகளால் முஸ்லிம்கள் பாதுகாப்பற்ற நிலைக்குத் தள்ளப்படுகின்றனர்.

இவ்வாறான கசப்பான விளைவுகளை ஏற்படுத்தக்கூடிய செயற்பாடுகளை அரச அங்கீகாரத்துடனோ அல்லது அரசின் கவனயீனம் காரணமாகவோ தொடர்ச்சியாக முன்னெடுத்து வருகின்றனர். இவற்றிற்கு பொதுஜன பெரமுனவின் நேரடியான அனுசரணை கிடைக்கிறது என்பது யாவரும் அறிந்த இரகசியம். எனவே மிகவும் பாரதூரமான, அபாயகரமான, அசாதாரண சூழ்நிலையில் சோஷலிச இளைஞர் சங்கத்தினால் முன்னெடுக்கப்படும் பல வேலைத்திட்டங்களின் ஊடாக சகோதரத்துவத்தையும் இன ஐக்கியத்தையும் ஏற்படுத்தி நிலையான சமாதானத்தையும் அமைதியையும் ஏற்படுத்த முயற்சிகள் மேற்கொள்ளப்படுகின்றன. எனவே 23ஆம் திகதி (இன்று) மாலை 3.00 மணிக்கு சுதந்திர சதுக்கத்தில் நடைபெறவிருக்கும் எதிர்ப்பு போராட்டம் மற்றும் கலைநிகழ்ச்சிகளில் கலந்து கொள்ளுமாறு முற்போக்கு சிந்தனையாளர்கள் உட்பட மூவின இளைஞர்களையும் அழைக்கிறோம் என்றார்.

ஊடக சந்திப்பில் சோசலிஷ இளைஞர் சங்கத்தின் தேசிய ஒருங்கிணைப்பாளர் எரங்க குணசேகர மற்றும் மத்திய குழு உறுப்பினர் அருண் ஹேமசந்திர ஆகியோர் கருத்து தெரிவித்தனர்.

vidivelli