குண்டு தாக்குதல் மேற்கொண்டோரால் உள்நாட்டு முஸ்லிம்களுக்கு பிரச்சினை
இவர்களை பாதுகாக்க பயங்கரவாதிகள் முன்வரார் என்கிறார் சம்பிக
பயங்கரவாத தற்கொலை குண்டுத் தாக்குதல்களை மேற்கொண்டவர்களால் உள்நாட்டு முஸ்லிம்களுக்குப் பல்வேறு பிரச்சினைகள் ஏற்பட்டன. இவர்களுக்கு பாதுகாக்க இந்த பயங்கரவாதிகள் முன்வரப்போவதில்லை என்று பெருநகர் மற்றும் மேல் மாகாண அபிவிருத்தி அமைச்சர் சம்பிக ரணவக்க தெரிவித்தார்.
சிலாபத்தில் நடைபெற்ற ‘தேசிய வழி’ நிகழ்ச்சியில் கலந்துகொண்டு உரையாற்றும்போதே அமைச்சர் இதனைத் தெரிவித்தார். அங்கு அவர் தொடர்ந்தும் தெரிவித்தாவது :
உயிர்த்த ஞாயிறு குண்டுத் தாக்குதல்கள் இடம்பெற்று மூன்று மாதங்கள் நிறைவடைந்துள்ள நிலையில் அதனுடன் தொடர்புடைய குழுவில் ஒரு பகுதியினர் கைது செய்யப்பட்டுள்ளனர். இன்னொரு பகுதியினர் அழிக்கப்பட்டுள்ளனர். எனினும் அவர்கள் நாட்டில் ஏற்படுத்திச் சென்ற அழிவை மறந்துவிட முடியாது. இதில் ஆயிரக்கணக்கானவர்கள் தொடர்புபட்டுள்ளனர். அவர்களில் பலர் இன்று சுதந்திரமாக வெளியில் உலாவிக் கொண்டிருக்கிறார்கள் என்பதையும் நாம் மறக்கவில்லை.
பயங்கரவாத தற்கொலை குண்டுத் தாக்குதல்களை மேற்கொண்டவர்களால் உள்நாட்டு முஸ்லிம்களுக்கு பல்வேறு பிரச்சினைகள் ஏற்பட்டன. இவர்களுக்கு ஆதரவளிக்க இந்த பயங்கரவாதவாதிகள் முன்வரப்போவதில்லை.
சிரியா, லிபியா, ஈராக் மற்றும் ஈரான் ஆகிய நாடுகளில் முஸ்லிம்களுக்கு எதிராக முன்னெடுக்கப்படும் செயற்பாடுகளுக்கும் இலங்கையிலுள்ள கிறிஸ்தவர்களுக்கும் என்ன தொடர்பு இருக்கிறது என்று எமக்குப் புரியவில்லை. அவற்றைக் காரணம் காட்டி எமது நாட்டு கிறிஸ்தவர்களை பழிவாங்கியதையும் ஏற்றுக்கொள்ள முடியாது.
இஸ்லாமிய கடவுளைத் தவிர வேறு எந்த கடவுள் உண்மையானவர் அல்ல. இஸ்லாத்தைத் தவிர வேறு மதங்களை பின்பற்றுபவர்களைத் தவிர ஏனைய மதத்தவர்கள் வாழக்கூடாது என்பதே இந்த இஸ்லாமிய அடிப்படைவாதிகளின் எண்ணமாகும்.
இன்று அரசியல்வாதிகள், புலனாய்வுப்பிரிவு மற்றும் பாதுகாப்புப் பிரிவு ஆகியவற்றுக்கிடையில் பாரிய இடைவெளி காணப்படுகின்றது. இந்த பயங்கரவாதத்தை முற்றாக ஒழிப்பதற்கு இந்த மூன்று துறைகளும் ஒன்றிணைந்து செயற்பட வேண்டும். இதுவே காலத்தின் தேவையாக உள்ளது.
ஆயுதங்கள், நிதி உள்ளிட்ட பல்வேறு விடயங்களில் மிகுந்த அவதானத்துடன் செயற்பட வேண்டும். அதற்கான நடவடிக்கைகளை அனைவரும் ஒன்றிணைந்து முன்னெடுப்பார்கள் என்று எதிர்பார்க்கின்றோம். இந்நிலையில் பாதுகாப்பு பிரிவினருக்கு நன்றி தெரிவிக்க விரும்புகின்றேன். மிகக் குறுகிய காலத்திற்குள் பயங்கரவாதத் தாக்குதல்களுடன் தொடர்புடையவர்களை கைது செய்தது மாத்திரமின்றி அவர்களுக்கு எதிரான நடவடிக்கைகளை பாதுகாப்புத்துறை துரிதமாக முன்னெடுத்துள்ளது.
அதேபோன்று குண்டுத்தாக்குதல்களுடன் தொடர்புடைய ஏனைய குற்றவாளிகளையும் கண்டறிந்து அவர்களுக்கு எதிராகவும் நடவடிக்கை எடுக்கப்பட வேண்டும். ஆனால் இவ்வாறான அடிப்படைவாத தாக்குதல்களை முற்றாக ஒழிப்பதற்கு அடிப்படைவாதிகளை ஒழிப்பதால் மாத்திரம் தீர்வுகாண முடியாது. அவர்களது எண்ணங்களை மாற்றவும் நடவடிக்கை எடுக்கப்பட வேண்டும்.
vidivelli