ஏப்ரல் 21 பயங்கரவாத தாக்குதலுடன் தொடர்புடையோருக்கு மரண தண்டனை வழங்க வேண்டும்
ஜனாதிபதி மைத்திரிபால சிறிசேன தெரிவிப்பு
ஏப்ரல் 21ஆம் திகதி இடம்பெற்ற பயங்கரவாத தாக்குதலுடன் சம்பந்தப்பட்ட அனைவரும் தற்போது கைது செய்யப்பட்டுள்ளனர். அவர்களுக்கெதிராக தெளிவான சாட்சிகள் உள்ளன. எனவே சட்டத்திற்கு அமைவாக அவர்களுக்கு மரண தண்டனை வழங்கப்பட வேண்டுமென்று ஜனாதிபதி மைத்திரிபால சிறிசேன தெரிவித்துள்ளார். பெலேந்த ரஜமகா விகாரையில் புதிதாக நிர்மாணிக்கப்பட்டுள்ள தாதுகோபுரம், நூல் நிலையம் மற்றும் சமய உரை மண்டபம் ஆகியவற்றை மகாசங்கத்தினரிடம் கையளிக்கும் நிகழ்வு செவ்வாய்க்கிழமை மாலை இடம்பெற்றது.
இந்நிகழ்வில் கலந்துகொண்டு உரையாற்றும்போதே ஜனாதிபதி இவ்வாறு தெரிவித்தார்.
அங்கு தொடர்ந்தும் உரையாற்றிய ஜனாதிபதி தெரிவித்ததாவது :
மரண தண்டனையை நீக்குவதற்கு பாராளுமன்றத்தில் சட்டமூலமொன்றை கொண்டு வருவதற்கு முயற்சி மேற்கொள்ளப்படுகிறது. இந்த முயற்சி ஏப்ரல் 21ஆம் திகதி இடம்பெற்ற அழிவுகளின் மூலம் சுமார் 300 அப்பாவி மக்களின் உயிர்களை பழியெடுத்த கொடூர பயங்கரவாத நடவடிக்கைக்கு வகைகூற வேண்டியவர்களுக்கு வழங்கப்படவேண்டிய தண்டனையை தவிர்ப்பதற்காக எடுக்கப்படும் முயற்சியாகும்.
நாட்டின் குற்றவியல் சட்டத்திற்கேற்ப கொலை, இராஜதுரோகம் போன்ற பயங்கரவாத நடவடிக்கைகளுக்காக குற்றவாளியாக இனங்காணப்பட்டால் மரண தண்டனை வழங்கப்படும். அத்துடன் மரண தண்டனையை நீக்குவதற்கு அரசாங்கத்திலுள்ள சிலர் எடுக்கின்ற முயற்சியின் மூலம் எந்தவொரு குற்றவாளிக்கும் தண்டனை வழங்க முடியாமல் போகும்.
மத்திய வங்கி கொள்ளைக்குப் பொறுப்பான அனைத்து வகைகூற வேண்டியவர்களும் தற்போது இனங்காணப்பட்டுள்ளனர். அவர்கள் கைது செய்யப்பட்டிருக்கின்றனர். நாட்டுக்கு வெளியே உள்ளவர்களுக்கு சர்வதேச பிடியாணை பிறப்பிக்கப்பட்டுள்ளது. அர்ஜுன் மகேந்திரனை நாட்டுக்கு கொண்டு வருவதற்காக சிங்கப்பூர் பிரதமருடன் தனிப்பட்ட முறையில் கலந்துரையாடியிருக்கின்றேன். இந்த அனைத்து விசாரணை நடவடிக்கைகளும் தொடர்ச்சியாக இடம்பெற்று வருகின்றன.
ஏப்ரல் 21ஆம் திகதி இடம்பெற்ற பயங்கரவாத தாக்குதலுடன் சம்பந்தப்பட்ட அனைவரும் தற்போது கைது செய்யப்பட்டுள்ளனர். அவர்களுக்கு எதிரான விசாரணைகள் தொடர்ச்சியாக இடம்பெறுகின்றன. அவர்களுக்கெதிராக தெளிவான சாட்சிகள் உள்ளன. எனவே சட்டத்திற்கு அமைவாக அவர்களுக்கு மரண தண்டனை வழங்கப்பட வேண்டும்.
சமூகத்தை நல்வழிப்படுத்துவதற்கு அரச நிர்வாகத்தில் தண்டனைகளை நடைமுறைப்படுத்த வேண்டும். தண்டனைக்கு பயப்படுவதன் மூலம் சமூகத்தில் குற்றங்கள் குறைந்து சிறந்ததொரு நாட்டையும் சமூகத்தையும் கட்டியெழுப்ப முடியும்.
vidivelli