ஹஜ் கடமையை மேற்கொள்வதற்காக நாடெங்கும் ஆயிரக்கணக்கான முஸ்லிம்கள் தயார் நிலையில் இருக்கிறார்கள். இலங்கையிலிருந்து ஹஜ் யாத்திரிகர்களைச் சுமந்து கொண்டு கட்டுநாயக்கா விமான நிலையத்திலிருந்து நேற்று முன்தினம் மாலை இரண்டு விமானங்கள் சவூதி அரேபியாவின் ஜித்தாவுக்கு புறப்பட்டுச் சென்றன.
நேற்று முன்தினம் இலங்கையிலிருந்து பயணமான முதற் தொகுதி ஹஜ் யாத்திரிகர் குழுவில் 156 பயணிகள் அடங்கியிருந்தனர்.
சவூதி அரேபியாவின் ஹஜ் அமைச்சு இலங்கைக்கு இவ்வருடம் 4000 ஹஜ் கோட்டா வழங்கியிருந்தது. ஆரம்பத்தில் 3500 ஹஜ் கோட்டாவே வழங்கப்பட்டிருந்தது. முஸ்லிம் சமய விவகார அமைச்சர் எம்.எச்.ஏ.ஹலீம் சவூதி மன்னரிடம் விடுத்த வேண்டுகோளையடுத்து சில வாரங்களுக்கு முன்பு மேலதிகமாக 500 ஹஜ் கோட்டா வழங்கப்பட்டமை குறிப்பிடத்தக்கதாகும்.
கடந்த வருடங்களைப் போலல்லாது இவ்வருடம் ஹஜ் ஏற்பாடுகள் சுமுகமாக இடம்பெற்றமை குறிப்பிடத்தக்கதாகும். கடந்த வருடங்களைப் போல் கோட்டாவைப் பகிர்ந்து கொள்வதில் ஹஜ் முகவர்கள் சண்டையிட்டுக் கொள்ளவில்லை. 500 மேலதிக கோட்டாவைப் பகிர்வதிலும் எவ்வித பிரச்சினைகளும் ஏற்படவில்லை.
முஸ்லிம்களுக்கு எதிராக, முஸ்லிம்களின் உரிமைகளுக்கெதிராக நாட்டில் சவால்கள் விடுக்கப்பட்டுள்ள நிலையில் ஹஜ் முகவர்கள் ஹஜ் ஏற்பாடுகளிலும், ஹஜ் கோட்டா பெற்றுக் கொள்வதிலும் முரண்பட்டுக் கொள்ளாமை சமூகத்தை ஆறுதல் படுத்தியுள்ளது.
நாடெங்கிலுமிருந்து சுமார் 4000 ஹஜ் யாத்திரிகர்கள் வயது வித்தியாசமின்றி ஆண்கள், பெண்கள் என ஹஜ் கடமைக்காக சவூதி அரேபியா நோக்கிச் செல்வதற்கு கட்டுநாயக்கா சர்வதேச விமானத்தை வந்தடைந்த வண்ணமுள்ளனர். அவர்களில் பெரும் எண்ணிக்கையிலானோர் முதற் தடவையாக விமானப் பயணத்தை மேற்கொள்பவர்கள். வயோதிபர்களும் தொற்றா நோயான நீரிழிவு போன்ற நோய்களுக்கு உட்பட்டவர்களும் இவர்களில் அடங்குகின்றனர்.
அநேகமானோர் முதற்தடவையாகவே விமான நிலையத்துக்கு வருகை தருகின்றனர். அவர்கள் விமானப் பயணத்தை எவ்வாறு மேற்கொள்வது, விமான நிலையங்களில் எவ்வாறு நடந்து கொள்வது என்பது தொடர்பில் தெளிவூட்டப்பட வேண்டும். இது ஹஜ் முகவர்களினதும் ஹஜ் வழிகாட்டிகளினதும் பொறுப்பாகும்.
கட்டுநாயக்கா விமான நிலையத்தில் தொழுகைக்கு உரிய நேரங்களில் பல இடங்களில் ஹஜ் பயணிகள் தொழுகையை நிறைவேற்றுவதைக் காணக்கூடியதாக இருக்கிறது. இந்நிலைமை ஏனைய விமான பயணிகளுக்கு அசௌகரியங்களை ஏற்படுத்தலாம். தொழுகைக்கென விமான நிலையத்தில் முதலாம் மாடியில் பிரத்தியேக இடமொன்று ஒதுக்கப்பட்டுள்ளது. ஹஜ் பயணிகள் அவ்விடத்தையே தொழுகைக்காக பயன்படுத்த வேண்டும்.
அத்தோடு வுழூ செய்வதற்கும் இடம் ஒதுக்கப்பட்டுள்ளது. பயணிகள் சிறுநீர் கழிக்கும் இடங்களையும், கழிவறைகளையும் வுழூ செய்வதற்குப் பயன்படுத்தக் கூடாது. விமான நிலையம் சர்வதேச விமான நிலையமாகும். இவ்விமான நிலையம் ஒரு சமூகத்துக்கு மாத்திரமானதல்ல. பல நாடுகளைச் சேர்ந்த பல்லின பயணிகள் அங்கு வருகை தருவதை ஹஜ் பயணிகள் கருத்திற் கொள்ள வேண்டும்.
ஹஜ் முகவர்களும், ஹஜ் வழிகாட்டிகளும் உரிய அறிவுறுத்தல்களை வழங்கினால் மாத்திரமே ஹஜ் பயணிகளிடம் இந்தப் பண்புகளை எதிர்பார்க்க முடியும். குடியகல்வு படிவங்களை பயணிகள் நிரப்ப வேண்டியுள்ளது. போதிய கல்வி அறிவற்ற ஹஜ் பயணிகள் இது விடயத்தில் சிரமங்களை எதிர்கொள்ளலாம். ஹஜ் முகவர்கள் உரிய படிவங்களை முன்கூட்டியே பெற்று படிவங்களைப் பூர்த்தி செய்து கையளிப்பது அசௌகரியங்களைத் தவிர்ப்பதாக அமையும்.
ஹஜ் பயணிகளுடன் அதிக எண்ணிக்கையிலானோர் விமான நிலையத்துக்குள் பிரவேசிக்க முடியாது எண்ணிக்கை மட்டுப்படுத்தப்பட்டுள்ளது. அதனால் ஹஜ் பயணிகளுடன் அதிகமானோர் விமான நிலையத்துக்குப் பயணிப்பது தவிர்க்கப்பட வேண்டும்.
நாடெங்கிலுமிருந்து ஹஜ் பயணத்தை மேற்கொள்ளும் யாத்திரிகர்கள் தங்கி ஓய்வெடுத்து தயாராகி விமான நிலையம் செல்வதற்கு மினுவாங்கொடை மற்றும் மாபோலை பள்ளிவாசல்களில் ஏற்பாடுகள் இம்முறையும் செய்யப்பட்டுள்ளன.
இந்தப் பள்ளிவாசல்களை அசுத்தப்படுத்தி விடாது முறையாகப் பயன்படுத்திக் கொள்வது யாத்திரிகர்களின் கடமையாகும். அடுத்து வரும் வருடங்களில் ஹஜ் பயணத்தை மேலும் சட்டரீதியாக சீர்படுத்துவதற்கு முஸ்லிம் சமய விவகார அமைச்சு நடவடிக்கை எடுத்துள்ளது.
ஹஜ் ஏற்பாடுகளுக்கென தனியான சட்டம் ஒன்று இயற்றிக் கொள்ளப்படவுள்ளது. அதற்கான சட்டவரைபு தற்போது தயாரான நிலையில் இருக்கிறது. சமூக நலன் சார்ந்த சட்டங்கள் மூலம் எமது உரிமைகள் உறுதிப்படுத்தப்பட வேண்டியது அவசியமாகும்.
vidivelli
Haj operators all cheaters. Starting from end. First of all first with out vaccinations handing over the vaccine book. Then collecting extra money secondly joining the laddies with gents for maharam. Coming back abaya and cigarettes bringing back for business