மக்கள் மத்தியில் நல்லிணக்கம், சமத்துவம், சகோதரத்துவம் மற்றும் இன ஐக்கியத்தை வளர்ப்பதற்கு எதிர்வரும் 30 ஆம் திகதி கொழும்பில் சமாதான மாநாடொன்று ஏற்பாடு செய்யப்பட்டுள்ளது.
ஜனாதிபதி மைத்திரிபால சிறிசேன தலைமையில் கொழும்பு தாமரை தடாகத்தில் நடைபெறவுள்ள இம்மாநாட்டில் அஸ்கிரிய பீடம், மல்வத்து பீடம், ராமன்ய நிகாய, அமரபுர நிகாய என்பனவற்றின் சமயத் தலைவர்களும் கிறிஸ்தவ மதத்தலைவர் கார்டினல் மல்கம் ரஞ்சித் ஆண்டகை, அகில இலங்கை ஜம் இய்யத்துல் உலமா சபைத் தலைவர் அஷ்ஷெய்க் ரிஸ்வி முப்தி மற்றும் இந்து மதத் தலைவர்கள் கலந்து கொள்ளவுள்ளனர்.
உலக முஸ்லிம் லீக்கின் பொதுச் செயலாளரும் விஷேட பிரதிநிதியாக கலந்து கொள்ளவுள்ளார்.
இச்சமாதான மாநாட்டில் கலந்து கொள்வதற்காக கண்டி அஸ்கிரிய மற்றும் மல்வத்து பீட மகாநாயக்க தேரர்களை முஸ்லிம் சமய விவகார அமைச்சர் எம்.எச்.ஏ. ஹலீம், மேல்மாகாண ஆளுநர் எம்.ஜே.எம். முஸம்மில் மற்றும் இன ஐக்கியத்துக்கான தேசிய வேலைத்திட்டத்தின் தலைவர் அப்துல்காதர் மசூர் மௌலானா ஆகியோர் நேரில் சந்தித்து அழைப்பு விடுத்தனர். இந்த சமாதான மாநாட்டை அஞ்சல் சேவைகள் மற்றும் முஸ்லிம் சமய விவகார அமைச்சும், மேல்மாகாண ஆளுநர் அலுவலகமும் இணைந்து ஏற்பாடு செய்யவுள்ளன.
இக்பால் அலி, காதிர்கான்