ஏப்ரல் 21 ஆம் திகதி இடம்பெற்ற தற்கொலை குண்டுத் தாக்குதல்களையடுத்து முஸ்லிம் சமூகம் எதிர்நோக்கிய நெருக்கடி நிலைக்குத் தீர்வாக முஸ்லிம் பாராளுமன்ற உறுப்பினர்கள் தாம் வகித்த அமைச்சுப் பதவிகளிலிருந்தும் கடந்த ஜூன் மாதம் 3 ஆம் திகதி இராஜினாமா செய்து கொண்டனர்.
முஸ்லிம் பாராளுமன்ற உறுப்பினர்கள் தங்கள் அமைச்சுப் பதவிகளைத் துறப்பதற்கு முன்பு ஒன்றுகூடி கலந்துரையாடல்களை நடத்தியே இந்தத் தீர்மானத்தை மேற்கொண்டனர். பிரதமர் மற்றும் அமைச்சரவை அந்தஸ்துள்ள அமைச்சர்களுடனும் இது பற்றிக் கலந்துரையாடியே இறுதித் தீர்மானத்தை எடுத்தனர்.
ஏப்ரல்–21 தற்கொலை குண்டுத் தாக்குதல்களையடுத்து அது குறித்த விசாரணைகளை சுயாதீனமாக நடத்தவிடாது தடுக்க அமைச்சர்கள் சிலர் தடையாக உள்ளதாகவும் இந்த செயற்பாடுகளில் முஸ்லிம் பிரதிநிதிகளின் தொடர்புகள் இருப்பதாகவும் ஒரு சில அமைப்புகள் குற்றம் சுமத்தி வருவதுடன் அதனை காரணமாகக் கொண்டு குழப்பங்களை ஏற்படுத்தும் சூழ்ச்சிகள் இடம்பெற்று வருகின்றன. அதற்கு இடமளிக்காது சுயாதீனமாக உரிய விசாரணைகள் நடத்தப்பட வேண்டும் என்பதற்காகவே நாம் பதவி துறந்தோம்’ என பதவி துறந்த அன்று ஸ்ரீ லங்கா முஸ்லிம் காங்கிரஸின் தலைவர் ரவூப் ஹக்கீம் தெரிவித்திருந்தார்.
கண்டி தலதா மாளிகை வளாகத்தில் பாராளுமன்ற உறுப்பினர் அத்துரலிய ரதன தேரர் மேற்கொண்ட சாகும் வரையிலான உண்ணாவிரதப் போராட்டம் ஒரு பதற்றமான நிலையினைத் தோற்றுவித்தது. இந்நிலையில் சமூகத்தைப் பாதுகாப்பதற்காக முஸ்லிம் பாராளுமன்ற உறுப்பினர்கள் ஒன்பது பேர் தங்கள் அமைச்சுப் பதவிகளை இராஜினாமா செய்தனர்.
இவர்களில் 4 அமைச்சரவை அந்தஸ்துள்ள அமைச்சர்கள் 4 இராஜாங்க அமைச்சர்கள், ஒரு பிரதியமைச்சர் அடங்குவர். சமூக நலன்கருதி, சமூக பாதுகாப்பு கருதி முஸ்லிம் அமைச்சர்கள் அனைவரும் கூட்டாகப் பதவி விலகியமை பலராலும் பாராட்டப்பட்டது முஸ்லிம்களின் ஒற்றுமை மெச்சப்பட்டது.
பயங்கரவாதத்துடன் தொடர்பு அற்ற அப்பாவி முஸ்லிம்கள் அவசரகால சட்டத்தின் கீழ் கைது செய்யப்பட்டு பயங்கரவாத சட்டத்தின் கீழ் தடுத்து வைக்கப்பட்டிருந்தனர். இவர்கள் தொடர்பான விசாரணைகள் ஒரு மாத காலத்துக்குள் நிறைவுற்று, குற்றச் செயல்களுடன் தொடர்பற்றவர்கள் விடுதலை செய்யப்பட வேண்டும் எனவும் முஸ்லிம் பாராளுமன்ற உறுப்பினர்கள் கோரியிருந்தனர்.
இவ்வாறான நிலையிலேயே ஐக்கிய தேசியக்கட்சியின் தலைவரும் பிரதமருமான ரணில் விக்கிரமசிங்கவின் கோரிக்கையை ஏற்று ஐ.தே.க. பாராளுமன்ற உறுப்பினர்களான கபீர் ஹாசிமும், எம்.எச்.ஏ. ஹலீமும் கடந்த மாதம் தங்கள் முன்னைய அமைச்சுப் பொறுப்புகளைப் பொறுப்பேற்றுக்கொண்டனர். அதனையடுத்து ஒன்றுகூடிய ஏனைய அமைச்சுப் பதவிகளைத் துறந்த முஸ்லிம் பாராளுமன்ற உறுப்பினர்கள் கடந்த 11 ஆம் திகதி தங்கள் முன்னைய அமைச்சுப் பதவிகளைப் பொறுப்பேற்றுக்கொள்ளத் தீர்மானித்தனர்.
பாராளுமன்ற உறுப்பினர்களான ரவூப் ஹக்கீம், ரிசாத் பதியுதீன், பைசல்காசிம், எச்.எம்.எம்.ஹரீஸ், எம்.எஸ்.அமீர்அலி, அலிசாஹிர் மௌலானா, அப்துல்லாஹ் மஹ்ரூப் ஆகியோர் அமைச்சுப் பொறுப்புகளை ஏற்க வேண்டியவர்களாக இருக்கிறார்கள்.
இந்நிலையில் முன்னாள் இராஜாங்க அமைச்சரான முஸ்லிம் காங்கிரஸின் பிரதிநிதி எச்.எம்.எம்.ஹரீஸ் மீண்டும் பதவியேற்பதில்லை என உறுதியாகக் கூறியுள்ளார். நாடு தழுவிய ரீதியில் முஸ்லிம்களின் பிரச்சினை மற்றும் குறிப்பாக கிழக்கு முஸ்லிம்களின் பிரச்சினைகளுக்கு அரசாங்கம் எவ்வித தீர்வுகளையும் வழங்காத நிலையில் தன்னால் அமைச்சுப் பொறுப்பினை மீளப்பெற முடியாது. பெறவிரும்பவில்லை என்று தெரிவித்துள்ளார்.
ஸ்ரீ லங்கா முஸ்லிம் காங்கிரஸும் அமைச்சுப் பொறுப்புகளை மீளப்பெறுவது தொடர்பில் கட்சியின் உயர் பீடத்தின் ஆலோசனையைப் பெறவுள்ளது. இதேவேளை அகில இலங்கை மக்கள் காங்கிரஸ் அமைச்சுப் பதவிகளைப் பொறுப்பேற்பதற்கு அவசரப்பட மாட்டோம் எனத் தெரிவித்துள்ளது.
தேர்தல் ஒன்று அண்மித்துள்ள நிலையில் அகில இலங்கை மக்கள் காங்கிரஸும், ஸ்ரீ லங்கா முஸ்லிம் காங்கிரஸும் உடனடியாக தீர்மானம் ஒன்றினை எட்ட முடியாத நிலையில் இருப்பதை அவதானிக்க முடிகிறது.
பதவிகளை இராஜினாமா செய்து கொண்ட போது முஸ்லிம் பாராளுமன்ற உறுப்பினர்களிடம் காணப்பட்ட ஒற்றுமையினை இன்று காண முடியாதுள்ளது. இருவர் ஏற்கனவே அமைச்சுப் பதவிகளை ஏற்றுக்கொண்டார்கள். ஒருவர் அமைச்சுப் பதவி வேண்டாம் என்கிறார். ஒரு சாரார் அவசரப்பட மாட்டோம் என்கிறார்கள். உயர் பீடத்தின் ஆலோசனை பெற வேண்டும் என்கிறார்கள்.
மீண்டும் முஸ்லிம் எம்.பிக்கள் இழுபறி நிலையில். இவ்வாறான நிலைமை சமூகத்தைப் பாதுகாக்காது. எனவே பாராளுமன்ற உறுப்பினர்கள் எந்தத் தீர்வென்றாலும் உறுதியாக இருக்கவேண்டும்.
vidivelli