ஒவ்வொரு வருடம் துல்ஹஜ் மாதம் முஸ்லிம்கள் உழ்ஹிய்யா எனும் கிரியையை செய்து வருகின்றனர். இதன் மூலம் குறிப்பாக வறிய குடும்பங்களும், பொதுவாக அனைவரும் பயனடைகின்றனர்.
உழ்ஹிய்யா கொடுக்குமாறு இஸ்லாம் எம்மைத் தூண்டியுள்ளது. நபி (ஸல்) அவர்கள் கூறியதாக அபூ ஹுரைரா (ரழி) அவர்கள் அறிவிக்கின்றார்கள் “யார் வசதியிருந்தும் அறுத்துப் பலியிடவில்லையோ அவர் நமது தொழுகை நடைபெறும் இடத்தை நெருங்கவும் வேண்டாம்” (அஹ்மத், இப்னு மாஜா).
பர்ரா இப்னு ஆஸிப் (ரழி) அவர்கள் நபி (ஸல்) அவர்கள் கூறியதாக அறிவிக்கின்றார்கள். “எமது இந்த நாளை (துல்ஹஜ் பத்தாவது நாள்) நாம் தொழுகையுடன் ஆரம்பிப்போம். பின்னர் அறுத்துப் பலியிடுவோம். யார் இவ்வாறு செய்கின்றாரோ அவர் எமது வழிமுறையை பின்பற்றி செய்தவராவார். (தொழுகைக்கு முன்னர்) யார் முன்னதாகவே அறுத்துப் பலியிட்டாரோ அவர் தனது குடும்பத்துக்கு வழங்கிய இறைச்சியாகவே கருதப்படும். அதனை (உழ்ஹிய்யா எனும்) கிரியையாக கருத முடியாது.” (புஹாரி).
உழ்ஹிய்யா பற்றிய சட்ட நிலைப்பாட்டில் அது வாஜிபானதா அல்லது சுன்னத்தானதா என்பது தொடர்பில் கருத்து வேறுபாடு உள்ளது. அது ஒரு கண்டிப்பான கடமையல்ல. ஒரு சுன்னத்தான வணக்கம் என்பதே அதிகமான அறிஞர்களின் கருத்தாகும். ஸஈத் இப்னுல் முஸய்யப், அதா இப்னு அபீ ரபாஹ், அல்கமா, இமாம் ஷாபியி, அபூ ஸவ்ர் (ரஹ்) போன்றவர்கள் இக்கருத்தில் உள்ளனர். இதனால் தான் சில ஸஹாபாக்கள் ஒரு சில சந்தர்ப்பங்களில் உழ்ஹிய்யா கொடுக்காது இருந்துள்ளார்கள்.
இப்னு மஸ்ஊத் (ரழி) அவர்கள் தமக்கு வசதி இருந்தும் மக்கள் உழ்ஹிய்யா ஒரு கடமையான அம்சம் எனப் புரிந்து கொள்ளாமல் இருப்பதற்காக சில சந்தர்ப்பங்களில் தவிர்ந்து கொண்டிருக்கிறார்கள். இதேபோல் அபூபக்ர் (ரழி), உமர் (ரழி) அவர்களும் சில சந்தர்ப்பங்களில் உழ்ஹிய்யா கொடுக்காது இருந்துள்ளார்கள்.
கால, இட, சூழல் மாற்றங்களுக்கேற்ப பத்வாக்களும் மாற்றமடையும் என்பது சட்ட அறிஞர்களுக்கு இடையில் ஏற்றுக் கொள்ளப்பட்ட ஒரு சட்டவிதியாகும். இது இஸ்லாம் அனைத்துக் காலங்கள், இடங்களுக்கும் நடைமுறைப்படுத்த முடியுமான மார்க்கம் என்பதை நிரூபிக்கும் ஒரு முக்கிய சட்ட அடிப்படை. இந்த அடிப்படையில் இவ்வருடம் உழ்ஹிய்யா கொடுப்பது தொடர்பில் மீள்பரிசீலனை தேவைப்படுகின்றது.
இது பற்றி பின்வரும் ஆலோசனைகளை முன்வைக்க விரும்புகின்றேன்.
1. ஒவ்வொரு ஊரின் பொது ஒழுங்குக்கு ஏற்ப இக்கிரியையை நிறைவேற்றல். அதாவது ஒவ்வொரு ஊரும் இவ்வருடம் உழ்ஹிய்யாவை நிறைவேற்றுவது தொடர்பில் ஒரு பொது நிலைப்பாட்டிற்கு வரவேண்டிய தேவையுள்ளது. ஒரு ஊருக்குப் பொருத்தமான ஒழுங்கு சிலபோது அடுத்த ஊருக்கு பொருத்தமற்றுக் காணப்பட முடியும். எனவே ஊர் தலைமை, ஊரின் பலதரப்பினருடன் கலந்தாலோசனை செய்து ஒரு பொது முடிவுக்கு வரவேண்டும். அந்த நிலைப்பாட்டிற்கேற்ப ஊர்மக்கள் தம்மை ஒழுங்குபடுத்திக்கொள்ள வேண்டும்.
2. இவ்வருடம் உழ்ஹிய்யாவை நிறைவேற்றாது தவிர்ந்து கொள்ளல் சிறந்தது. சமூக மட்டத்தில் நடைபெற வேண்டிய எத்தனையோ கடமைகள் உள்ளன. அது தொடர்பில் நாம் கவனம் செலுத்த வேண்டும். குறிப்பாக வறுமையில் அல்லற்படும் எத்தனையோ குடும்பங்கள் ஒவ்வொரு ஊரிலும் இருக்கின்றன. வாழ்க்கையின் அடிப்படைத் தேவைகள் நிறைவேற்றப்படாது பலர் வாழ்ந்து வருகின்றனர். உணவு, மருத்துவம், கல்வி போன்ற அடிப்படைத் தேவைகளுக்கான பணமில்லாது பல உள்ளங்கள் ஏங்கிக் கொண்டு காலத்தை கழிக்கின்றன.
இத்தகைய நிலையுடன், நாட்டில் ஏற்பட்ட அசாதாரண சூழலினால் குறிப்பாக முஸ்லிம் சமூகத்தின் வியாபாரிகள் பல சவால்களை எதிர்கொண்டு வருகின்றனர். முஸ்லிம்களுக்கு சொந்தமான பல கடைகள், வியாபாரங்கள் அழிக்கப்பட்டுள்ளன. இதனால் பல குடும்பங்கள் கஷ்டங்களை எதிர்கொண்டு வருகின்றன. பலர் தொழில் இழந்த நிலையில் வாழ்கின்றனர்.
இவர்களுக்கு உதவுவது சமூகத்தின் கடமை. குறிப்பாக வசதியுள்ளவர்களின் பொறுப்பு. விஷேடமாக அவர்களது குடும்பத்திலுள்ள வசதிபடைத்தவர்களின் நேரடிக் கடமை.
இவ்விடத்தில் இம்முறை உழ்ஹிய்யா கிரியையை நிறைவேற்றாது தவிர்ந்து கொள்வது பொருத்தமானது. உழ்ஹிய்யாவுக்காக ஒதுக்க நாடிய பணத்தொகையை மேலே குறிப்பிட்ட தேவையுடைவர்களுக்கு கொடுத்து அவர்களைப் பலப்படுத்த முடியும். இதன் மூலம் அவர்களது நாளாந்த சில அடிப்படைத் தேவைகளை நிவர்த்தி செய்வதற்கான வழி பிறக்கின்றது.
தொழில் பாதிக்கப்பட்ட வர்களுக்கு தொழிலை செய்தவற்காக உதவிசெய்ய முடியும். இதன் மூலம் அவர்கள் நாளாந்த வாழ்க்கையை நடாத்துவதற்கான வழியைக் கண்டு கொள்வார்கள். இதனால் கையேந்தும் நிலை இல்லாது போய், சமூகத்துக்கு மத்தியில் நம்பிக்கையை கட்டியெழுப்பலாம்.
இது ஒருவகையில் சமூகக் கூட்டுப் பொறுப்பாகும். அதாவது இத்தகைய தேவையுள்ள நபர்கள், குடும்பங்களுக்கு உதவிக்கரம் நீட்டுவது சமூகத்தின் மீதான கடமையாகும். இதில் சமூகம் குறைவிடக் கூடாது. இதற்காக பொது வழிகாட்டல்கள் ஊர் மட்டத்தில் இருப்பது பொருத்தமானது.
3. உழ்ஹிய்யாவை எளிமையாக நிறைவேற்றல். உழ்ஹிய்யாவை நிறைவேற்றித்தானாக வேண்டும் என்ற நிய்யத்தில் உள்ளவர்கள் அதனை எளிமையாக நிறைவேற்றிக் கொள்ள வேண்டும். நாட்டின் சட்டங்களை மதித்து அதனை செய்ய வேண்டும். சகோதர சமூகங்களின் கவனத்தை ஈர்க்காத வகையில் அதனை செய்வதற்கு முன்னேற்பாடுகளை செய்து கொள்வது முக்கியமானது. மாடுகளை அறுப்பதைத் தவிர்த்து ஆடுகளை அதற்குப் பகரமான கொடுக்கவும் முடியும்.
ஷெய்க் ஆஸாத்
அப்துல் முஈத்
vidivelli