குர்பான் கொடுக்கப்பட வேண்டும். ஆனால் அதற்கு முன்னர் நிறைவேற்றப்பட வேண்டிய விடயங்கள் பல உள்ளன. முதலில் அவை நிறைவேற்றப்பட வேண்டும் என அஷ்ஷெய்க் யூசுப் முப்தி தெரிவித்தார். குர்பான் கடமை தொடர்பில் விளக்கமளிக்கையிலேயே அவர் இவ்வாறு குறிப்பிட்டார். அவர் மேலும் தெரிவிக்கையில்,
நமது சமூகத்தில் இன்று பலர் ஹஜ்ஜுக்கு மேல் ஹஜ் , உம்ராவுக்கு மேல் உம்ரா என்று செய்து கொண்டே இருக்கிறார்கள். அதே போல்தான் இப்போது குர்பானும் கொடுக்கிறார்கள். இன்று வட்டி வாங்கியவர்கள், கடனாளிகள், சீதனம் வாங்கியவர்கள் என்று எந்தவித வித்தியாசமும் இன்றி அனைவரும் குர்பான் கொடுக்கிறார்கள்.
அளவை நிறுவைகளில் குறை செய்து சம்பாதித்தவர்கள், அனாதைகளின் சொத்துக்களை ஏமாற்றி சம்பாதித்தவர்கள், மாறுபாடு செய்து சம்பாதித்தவர்கள், களவாடியவர்கள் என்று விதிவிலக்கில்லாமல் குர்பான் கொடுக்கிறார்கள்.
ஒருவர் சீதனம் வாங்கியிருந்தால் அவர் குர்பான் கொடுக்காமல் வாங்கிய பணத்தை தனது மனைவியிடம் திருப்பிக் கொடுத்து கடனைக் குறைத்துக் கொள்வதே சிறந்தது. ஒருவருடைய மனைவியின் நகை வங்கியில் அடகு வைக்கப்பட்டிருக்கும் பட்சத்தில் அவர் குர்பான் கொடுக்காமல் அந்தக் கடனுக்கு முடிவு கட்டுவது சிறந்ததாகும். குடும்பத்தில் ஒருவருக்கு மருத்துவ சிகிச்சைக்காக பணம் தேவைப்படும் பட்சத்தில் அவருக்கு குர்பான் கட்டாயமில்லை. இது மிக முக்கியமான விடயமாகும். முதன்மைப்படுத்தப்பட வேண்டிய விடயங்கள் முதன்மைப் படுத்தப்பட வேண்டும்.
இன்று மனிதர்கள் அதிகமாக விழித்து விட்டார்கள். இந்த விழிப்பு ஆரோக்கியமானதல்ல. ஒருவர் குர்பான் கொடுப்பதற்கு முன்னர் தன்னுடைய கடமைகள் அனைத்தையும் முழுமையாக பூர்த்தி செய்து விட்டேனா என்பது பற்றி சிந்தித்துப் பார்க்க வேண்டும். மின்சாரப்பட்டியல், தண்ணீர்ப் பட்டியல், தொலைபேசி பட்டியல் என்பவற்றை முறையாக பூர்த்தி செய்ய வேண்டும்.
வங்கிகளில் வீடு வாங்க, வாகனம் வாங்கவென தவணை முறைக்கடன் பாக்கியிருந்தால் அவற்றையும் செலுத்தி முடிக்க வேண்டும். கடன் இருக்கும் போது அதை செலுத்தாமல் குர்பான் கொடுப்பது ஒருவருக்கு கடமை கிடையாது.
இப்படியெல்லாம் சட்டதிட்டங்கள் இருந்தால் குர்பான் என்ற ஒன்றே இல்லாமல் போவதற்கு வாய்ப்பு இருக்கிறது என்று பலரும் எண்ணலாம். அதில் எந்தவிதமான பிரச்சினையும் இல்லை. ஏனென்றால் இப்படி நிறைவேற்றப்படாத குறைகளை வைத்துக்கொண்டு நிறைவேற்றப்படும் குர்பானின் பக்கம் அல்லாஹ் தேவையற்றவன். இப்படிப்பட்ட ஒரு குர்பானை அல்லாஹ் எங்களிடம் இருந்து எதிர்பார்க்கவும் இல்லை. இது வீணாக எங்களை நாங்களே கஷ்டப்படுத்திக் கொள்ளும் ஒரு விடயமாகும்.
குர்பான் கொடுக்கப்பட வேண்டும். ஆனால் அதற்கு முன்னர் நிறைவேற்றப்பட வேண்டிய விடயங்கள் பல உள்ளன. முதலில் அவை நிறைவேற்றப்பட வேண்டும். கடன் நிறைவேற்றப்பட வேண்டும். தௌபா செய்ய வேண்டும். எடுத்த சீதனத்தை திருப்பிக் கொடுக்க வேண்டும். அனாதைகளின் சொத்துக்கள் அபகரிக்கப்பட்டிருந்தால் அவை பற்றி கவனத்தில் கொள்ள வேண்டும்.
vidivelli